« 24–30 nō ’Ēperēra. Ioane 7–10 : ‘‘O vau te tīa’i māmoe maita’i’ », Mai, pe’e mai—nō te Paraimere: Faufa’a ’Āpī : 2023 (2022)
« 24–30 nō ’Ēperēra. Ioane 7–10 », Mai, pe’e mai—nō te Paraimere : 2023
E’ita ato’a vau e fa’autu’a atu ia ’oe, nā Eva Koleva Timothy
24–30 nō ’Ēperēra
Ioane 7–10
« ’O vau te tīa‘i māmoe maita’i »
’A tai’o ai ’oe i te Ioane 7–10, ’a feruri i te mau tamari’i tā ’oe e ha’api’i ra. E rave rahi mana’o nō te mau tamari’i pa’ari a’e i roto i teie fa’anahora’a, e nehenehe ato’a e fa’atano nō te mau tamari’i ’āpī, ’aore rā nō te tahi ’e te tahi.
Tītau i te mana’o
’A fa’aha’amana’o i te mau tamari’i i te mea tā ’oe i ani ia rātou ’ia rave i roto i te hō’ē ha’api’ira’a i ma’iri. E ani ia rātou ’ia fa’a’ite mai i te mea tā rātou i rave nō te pāhono i te anira’a.
Ha’api’i i te ha’api’ira’a tumu : Te mau tamari’i ’āpī
E tauturu te ha’apa’ora’a i te mau fa’auera’a iā’u ’ia ’ite e parau mau te reira.
’Ua ha’api’i Iesu ē, e roa’a ia tātou te hō’ē ’itera’a pāpū nō te mau parau mau tāna i fa’a’ite mai, ’a ora tātou i te reira. E tauturu te hau tā tātou e fāri’i ’ia ha’apa’o ana’e tātou i te mau fa’auera’a, ia tātou ’ia ’ite ē e parau mau te reira. ’A feruri nāhea ’oe i te ha’api’i i te mau tamari’i i teie parau mau.
Te mau ’ātivite e au
-
’A ha’apoto i te Ioane 7:17 nā roto i te mau parau e hāro’aro’a ai te mau tamari’i. Tauturu ia rātou ’ia ’ite ē, e tauturu te ha’apa’ora’a i te mau fa’auera’a ia tātou ’ia ha’afātata atu ia Iesu Mesia. ’Ei hi’ora’a, e hīmene ’āmui atu i te hō’ē hīmene mai te « Pour trouve la paix » ’aore rā « Choisir le bien » (Chants pour les enfants, 68, 82). E ani i te mau tamari’i ’ia fa’aro’o e nāhea tātou i te ha’amaita’ihia ’ia ha’apa’o ana’e tātou i te mau fa’auera’a.
-
’A fa’a’ite i te hō’ē ’itera’a ’a fāri’i ai ’oe i te ’itera’a pāpū ē nō ’ō mai i te Atua ra te fa’auera’a nō te mea ho’i ’ua ha’apa’o ’oe i teie fa’auera’a, mai te ’aufaura’a i te tuha’a ’ahuru, ’aore rā te fa’a’orera’a i te hapa a te hō’ē ta’ata ’ino. E ani i te mau tamari’i ’ia feruri i te hō’ē mea i orahia mai e rātou, ’a ha’apa’o ai rātou i te hō’ē fa’auera’a. E ani ia rātou ’ia fa’a’ite mai e aha tā rātou i fāri’i ’a ha’apa’o ai i te reira.
-
E ani i te mau tamariʼi ʼia pāpaʼi hōhoʼa ia rātou iho te ha’apa’o ra i te fa’auera’a. (Tauturu ia rātou ’ia feruri i te tahi atu mau hi’ora’a.) E ani ia rātou ‘ia fa’a’ite’ite mai i tā rātou hōho’a pāpa’i ’e ’ia paraparau mai nō ni’a i te ’oa’oa tā rātou i fāri’i ’a ha’apa’o ai rātou i taua fa’auera’a ra.
’Ua ha’apa’o Iesu i te parau a tōna Metua.
’Ua rave noa Iesu Mesia i te mau mea e māuruuru ai tōna Metua i te ao ra. Nāhea ’oe i te tauturu i te mau tamari’i ’ia ’ite ma i te mau rāve’a nō te pe’e i tōna hi’ora’a maita’i ?
Te mau ’ātivitē e au
-
Tauturu i te mau tamari’i ’ia fa’ahiti fa’ahou i te mea tā Iesu i parau nō te Metua i te ao ra i roto i te Ioane 8:29 : « ’Aore ho’i au i fa’aea i te rave i te mea e māuruuru ai ’oia ra ». E ani ia rātou ’ia fa’a’ite mai i te mau mea tā Iesu i rave i ’oa’oa ai te Metua i te ao ra. ’A fa’a’ite ia rātou i te tahi mau hōho’a nō roto mai i te Buka hōho’a ’Evanelia nō te hōro’a ia rātou te mau mana’o.
-
E ani i te mau tamari’i e aha te mau mea e ’oa’oa ai rātou. ’Aore rā e ani i te hō’ē metua o te hō’ē o te mau tamari’i ’ia fa’a’ite mai i te hō’ē ’itera’a, ’a rave ai te tamari’i i te tahi mea i māuruuru ai ’aore rā i ’oa’oa ai te metua. E aha tā tātou e rave nō te fa’a’oa’oa i te Metua i te ao ra ? ’A ani i te mau tamari’i ’ia pāpa’i hōho’a ia rātou iho e rave ra i teie mau ’ātivite, nō te fa’aho’i i te fare ’e nō te fa’aha’amana’o ia rātou.
’Ua ’ite maita’i Iesu iā’u ’e ’ua here iā’u.
E tauturu te parabole nō te tīa’i māmoe maita’i i te mau tamari’i ’ia hāro’aro’a ē, ’ua here Iesu ia rātou ’e ’ua ’ite maita’i ’o vai rātou.
Te mau ’ātivite e au
-
’A hōro’a i te mau tamari’i te mau hōho’a e fa’ata’a nei i te tahi mea i roto i te parabole nō te tīa’i māmoe maita’i, mai te māmoe, te tīa’i māmoe ’aore rā te luto. Mā’iti i te tahi mau ’īrava i roto i te Ioane 10:1–16 nō te tai’o i te mau tamari’i, ’e e ani ia rātou ’ia ’āfa’i i tā rātou hōho’a i ni’a ’ia fa’aro’o ana’e rātou ia ’oe ’ia tai’o nō ni’a i tā rātou mau hōho’a. Tauturu i te mau tamari’i ’ia feruri i te mau rāve’a e riro Iesu mai te tīa’i māmoe nō tātou. ’A fa’a’ite i tō ’oe ’itera’a pāpū ē, ’ua here te Fa’aora ia tātou ’e e arata’i ’oia ia tātou iāna ra.
-
’A fa’a’ite i te hōho’a nō Iesu ’e te mau māmoe i roto i te fa’anahora’a nō teie hepetoma i roto te Mai, pe’e mai—nō te ta’ata hō’ē ’e te ’utuāfare. Nāhea tātou e ’ite ai ē, ’ua here Iesu i te mau māmoe ? Nāhea tātou ’ia parau ē, ’ua here te mau māmoe ia Iesu ? Nāhea tātou i te fa’a’ite ia Iesu ē, ’ua here tātou iāna ?
Ha’api’i i te ha’api’ira’a tumu : Te mau tamari’i pa’ari a’e
E tauturu te ha’apa’ora’a i te mau fa’auera’a iā’u ’ia ’ite e parau mau te reira.
’Ua ora na paha ’oe ’e te mau tamari’i tā ’oe e ha’api’i ra i te mau parau mau o te ’evanelia ’e ’ua ha’api’i mai e parau mau te reira. Nāhea ’oe i te patu i ni’a iho i te reira mau ’itera’a, ’a ha’api’i ai ’oe ?
Te mau ’ātivite e au
-
’A pāpa’i i te ’īrava tāta’itahi o te Ioane 7:14–17 i ni’a i te mau ’api parau ta’a ’ē, ’e e pia i te reira nā te ’āna’ira’a rau. E ani i te mau tamari’i ’ia ’āna’i tano mai i te reira, ’e ’ia hi’o te Ioane 7:14–17 ’ua tano ānei te reira. E ani i te mau tamari’i ’ia ha’apea ia rātou ’e ’ia fa’a’ite mai i tō rātou hāro’aro’ara’a i te ’īrava tāta’itahi ’e tō rātou ’āpiti. Nāhea te ha’apa’ora’a i te mau fa’auera’a a te Atua i te tauturu ia rātou ’ia ’ite e parau mau te mau fa’auera’a ?
-
’A fa’a’ite i te mau hi’ora’a nō roto mai i te mau pāpa’ira’a mo’a e fa’a’ite ra, e mea nāhea te ta’ata i te ha’amaita’ira’ahia nō tō rātou orara’a i te mau parau mau o te ’evanelia, mai ia Daniela (hi’o Daniela 6) ’aore rā, ia Elizabeta (hi’o Luka 1:5–14). E aha te mau ha’amaita’ira’a tei fāri’ihia e tātou nō te ha’apa’ora’a i te mau fa’auera’a ?
-
Tau mahana hou te ha’api’ira’a, e ani i te hō’ē o te mau tamari’i ’ia pāpa’i mai, i te hō’ē taime ’a roa’a ai iāna te ’itera’a pāpū nō te hō’ē fa’auera’a tāna i fa’a’ohipa. I te taime nō te ha’api’ira’a, e ani i te tamari’i ’ia fa’a’ite mai i te mea tāna i pāpa’i.
Nā te parau mau vau e fa’ati’amā iā’u.
Tē mana’o nei te tahi mau ta’ata ē, e tā’ōti’a te orara’a i te ’evanelia ia rātou. Nāhea ’oe i te fa’a’ohipa i te Ioane 8:31–36 nō te tauturu i te mau tamari’i ’ia hāro’aro’a ē, e fa’ati’amā te orara’a i te ’evanelia ia tātou ?
Te mau ’ātivite e au
-
E ani i te mau tamari’i ’ia tai’o te Ioane 8:31–36 ’e ’ia fa’a’ite mai, e aha i tō rātou mana’o te aura’a ’ia riro ’ei tāvini nō te hara. Nāhea te mau ha’api’ira’a a Iesu i te tauturu ia tātou ’ia ti’amā ?
-
’A fa’a’ite i te hō’ē ponao nō te fa’ahōho’a i te hara ’e hō’ē tāviri nō te fa’ahōho’a e nāhea te mau parau mau o te ’evanelia i te fa’ati’amā ia tātou. ’Ei hi’ora’a, e hōro’a mai te ’itera’a nō te tāra’ehara o te Fa’aora i te ti’amāra’a ia tātou ’ia tātarahapa ’e ’ia fa’a’orehia tā tātou mau hara. ’Aore rā, e hōro’a mai te ’itera’a i te parau nō te ture pa’ari i te ti’amāra’a ’ia tātou ’ia ’ape i te fa’atītīra’a.
’Ua ha’api’i Iesu ē, « nā te parau mau ’outou e fa’ati’amā » (Ioane 8:32).
E au Iesu i te hō’ē tīa’i māmoe nō’u.
’A tuatāpapa ai ’oe i te parabole nō te tīa’i māmoe maita’i, ’a ’imi i te mau parau mau tā tē reira e ha’api’i nei nō ni’a i tō tātou aura’a ’e te Fa’aora. Nāhea te ’itera’a i teie mau parau mau i te ha’amaita’i i te mau tamari’i ?
Te mau ’ātivite e au
-
’A pāpa’i tīa’i māmoe maita’i ’e tārahuhia i ni’a i te tāpura ’ere’ere. ’A fa’ata’a ē, te ta’ata tārahuhia ’o te hō’ē ïa ta’ata tei tihepuhia nō te rave i te hō’ē ’ohipa tāmoni. E ani i te mau tamari’i ’ia tāpura i te mau ta’a-’ē-ra’a tā rātou e ’ite mai i roto i te Ioane 10:1–18 i rotopū i te hō’ē tīa’i māmoe maita’i ’e te hō’ē ta’ata tārahuhia. Nō te aha ’outou e hina’aro ai e pe’e i te tīa’i māmoe maita’i ’eiaha rā i te ta’ata tārahuhia ? Nāhea Iesu e riro ai ’ei tīa’i māmoe nō tātou ?
-
’A pāpa’i ’aore rā ’a fa’a’ite i te hō’ē hōho’a nō te hō’ē ’ōpani. ’A tai’o ’āmui i te Ioane 10:7–9, ’e ’a ui i te mau tamari’i nāhea Iesu e riro ai mai te hō’ē ’ōpani. ’Ia au i te ’īrava 9, e aha te mau ha’amaita’ira’a e tae mai i te feiā e « tomo mai » nā te ūputa ? Nāhea tātou i te tomo mai nā te ’ūputa tā Iesu Mesia i fa’anaho nō tātou ?
Fa’aitoito i te ha’api’ira’a i te fare
Tauturu i te mau tamari’i ’ia feruri i te fa’auera’a tā rātou e ha’apa’o maita’i a’e. E ani ia rātou ’ia tāmata i te ha’apa’o i te reira fa’auera’a i te hepetoma i muri nei.
Ha’amaita’i i tā tātou ha’api’ira’a
’A ui i te mau uira’a fa’auruhia. ’A ui i te mau uira’a ’o tē ani i te mau tamari’i tā ’outou e ha’api’i nei, ’ia haere i ’ō atu i te mau mea i fa’a’itehia. ’A fa’aitoito ia rātou ’ia fa’a’ite mai i tō rātou ’itera’a pāpū nō te mau parau mau o te ’evanelia. ’Ei hi’ora’a, mai te mea tē ’āparau ra ’outou i te mau fa’auera’a, e nehenehe ’outou e ani i te mau tamari’i ’ia fa’a’ite mai, nāhea te ha’apa’ora’a i te mau fa’auera’a i te ha’amaita’ira’a ia rātou.