Te mēnema o te ’ō

3–9 nō ’Ēperēra

Pāsa

« E hade ē, teihea tō ’oe rē°? »

’A fa’a’ohipa i tō ’oe taime ’e te mau tamari’i nō te tauturu ia rātou ’ia hi’o i te Pāsa ’ei pu’e tau nō te ’oa’oa i roto i te Fa’aora ’e nō te fa’ahōhonu i tō rātou māuruuru nō tāna tusia. ’Ia fa’atanohia te mau mana’o i roto i teie fa’anahora’a nō te tauturu ia ’oe ’ia ha’api’i i te mau tamari’i nō te mau huru matahiti ato’a.

ītona fa’a’itera’a

Tītau i te mana’o

Fa’a’ite i te mau hōho’a o te Fa’aora i Getesemane, i ni’a i te sātauro, ’e i muri iho i tōna ti’afa’ahoura’a (hi’o te hōho’a i roto i te fa’anahora’a nō teie hepetoma i roto te Mai, pe’e mai—nō te ta’ata hō’ē ’e te ’utuāfare ’e te Buka hōho’a ’Evanelia, N°56–60). E ani i te mau tamari’i ’ia fa’a’ite mai e aha tā rātou i ’ite nō ni’a i te mau ’ohipa e tupu ra i roto i te mau hōho’a.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

’O Iesu Mesia tō’u Fa’aora.

’A tai’o ai ’oe nō ni’a i te tāra’ehara a Iesu Mesia, ’a feruri māite e nāhea ’oe i te tauturu i te mau tamari’i ’ia ’ite, e here rahi tō Iesu ia rātou.

Te mau ’ātivite e au

• ’A fa’a’ite i te hō’ē hōho’a nō Iesu, ’e e ani i te mau tamari’i ’ia fa’a’ite mai e aha tā rātou i ’ite nō ni’a i te mea tāna i rave nō tātou. ’A fa’a’ite i tō ’oe ’itera’a pāpū nō te here o te Fa’aora ’e tōna mana nō te fa’aora ia tātou i te hara. ’A tāpe’a i te hō’ē hi’o, ’e ’a vaiiho i te mau tamari’i ’ia hi’o tāta’itahi i roto. ’A nā reira ai te tamari’i tāta’itahi, ’a parau, « ’Ua here Iesu ia [te i’oa ’o te tamari’i], ’e e tauturu ’oia ia [te i’oa o te tamari’i] ’ia ora fa’ahou i pīha’i iho i te Metua i te ao ra ».

• ’A fa’a’ite i te hōho’a Iesu e pure ra i Gētesemāne (Buka hōho’a ’Evanelia, N°56) ’a fa’ati’a ai ’oe i te ’ā’amu o Iesu e mamae ra i Gētesemāne nō te mau hara a tō te ao nei (hi’o Mataio 26:36–46°; Luka 22:39–44). ’A fa’a’ite pāpū ē, nā roto i tōna mamae e fa’a’orehia tā tātou hapa, ’ia rave ana’e tātou i te hō’ē mā’itira’a tano ’ore. E fa’a’ohipa ato’a ’oe i te « Pene 51 : ’Ua mamae Iesu i roto i te ’ō nō Gētesemāne » (i roto Te mau ’ā’amu nō te Faufa’a ’Āpī, 129–32, ’aore rā, te video e tano i ni’a ChurchofJesusChrist.org).

• Hīmene ’āmui i te hō’ē hīmene nō ni’a i te here o Iesu nō tātou, mai te « Je ressens son amour » (Chants pour les enfants, 42–43). E tauturu i te mau tamari’i ’ia ’ite mai i te mau ta’o i roto i te hīmene e fa’ata’a nei i te here o te Fa’aora. E aha te mea e tauturu ia tātou ’ia ’ite i tōna here ? Nāhea tātou i te tauturu ia vetahi ’ē ’ia ’ite i tōna here ?

Te Mesia ’e ’o Maria i te mēnema ta’ata ’ore

’Ua ti’afa’ahou ’oia, nā Greg Olsen

Nō te mea ’ua pohe Iesu ’e ’ua ti’afa’ahou, e ora fa’ahou ïa vau.

Nāhea ’oe i te tauturu i te mau tamari’i ’ia hāro’aro’a ē, aua’a a’e Iesu Mesia, e ti’afa’ahou ai tātou ’e tei herehia e tātou, i te hō’ē mahana ?

Te mau ’ātivite e au

• ’A ha’api’i i te mau tamari’i i te ’ā’amu nō te Pāsa ma te fa’a’ohipa i te mau hōho’a o te Mesia i Gētesemāne, i ni’a i te sātauro, ’e i muri a’e i tōna ti’afa’ahoura’a, (hi’o Buka hōho’a ’Evanelia, N°56–60 ’e te ’api hōho’a tā’āto’a i roto te fa’anahora’a nō teie hepetoma i roto te Mai, pe’e mai—nō te ta’ata hō’ē ’e te ’utuāfare). ’A vaiiho i te tahi mau tamari’i ’ia tape’a i te mau hōho’a, ’a fa’ati’a ai ’oe i te ’ā’amu. ’A parau i te mau tamari’i nō ni’a i te tahi mau ta’ata tei ’ite ia Iesu i muri a’e i tōna ti’afa’ahoura’a, mai ia Maria (hi’o Ioane 20:1–18) ’e ia Toma (hi’o Ioane 20:24–29).

• E ani i te mau tamari’i nō te aha tātou e fa’ahanahana ai i te Pāsa. ’A fa’ata’a ē, i te Pāsa e fa’ahanahana tātou i te mahana i ti’afa’ahou ai Iesu Mesia. E ani atu, e hina’aro ānei te tahi mau tamari’i e fa’a’ite mai, e aha tā tō rātou ’utuāfare e rave nō te ha’amana’o i te ti’afa’ahoura’a o Iesu Mesia.

• ’A fa’ata’a te aura’a o te ti’afa’ahoura’a ’oia ho’i, te ora-fa’ahou-ra’a i muri a’e i tō tātou pohera’a. ’A fa’a’ite i tō ’oe ’itera’a pāpū ē, maoti Iesu Mesia, e ti’afa’ahou ai tātou—e ora fa’ahou tātou i muri a’e i tō tātou pohera’a, ’e e ’ore roa tātou e pohe fa’ahou.

• ’A fa’a’ohipa i te hō’ē rimarima nō te ha’api’i i te mau tamari’i ē, e tino tō tātou pā’āto’a (fa’ahōho’ahia e te rimarima) ’e te vārua (fa’ahōho’ahia e te rima). ’Ia pohe tātou, e fa’ata’a-ē-hia tō tātou vārua e tō tātou tino. E tāmau noa tō tātou vārua i te ora, ’eiaha rā tō tātou tino. ’Ia ti’afa’ahou ana’e tātou, e fa’atāhō’ē-fa’ahou-hia tō tātou vārua ’e te tino. ’A vaiiho i te tamari’i tāta’itahi ’ia ’ō’omo i te rimarima ’e ’ia tātara.

• ’A hīmene ’āmui i te hō’ē hīmene nō Pāsa, mai teie « Jésus est-il réssuscité ? » ’aore rā « Jésus est ressuscité » (Chants pour les enfants,, 45, 44), ’e ’a fa’a’ite i te mau tamari’i i te mau hōho’a nō Iesu i muri a’e ’oia ’a ti’afa’ahou ai (hi’o Buka hōho’a ’Evanelia, N°59–61).

• ’A fa’a’ite i te hōho’a o te hō’ē ta’ata tā ’outou i ’ite tei pohe. ’A fa’a’ite i tō ’oe ’itera’a pāpū ē, e ti’afa’ahou mai ’oia maoti te tāra’ehara ’e te ti’afa’ahoura’a o Iesu Mesia.

• ’A māta’ita’i ’āmui i te mau video « Jesus Is Resurrected [’Ua ti’afa’ahou Iesu] » ’aore rā « The Risen Lord Appears to the Apostles [’Ua fā mai te Fatu tei ti’afa’ahou i te mau ’āpōsetolo] » (ChurchofJesusChrist.org). ’Aore rā e fa’a’ite i te tahi atu video e ’itehia i ni’a Easter.ComeuntoChrist.org.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari a’e

’Ua mamae Iesu nō’u i Gētesemāne ’e i ni’a i te sātauro.

’A tuatāpapa ai ’oe i te mau pāpa’ira’a mo’a i teie hepetoma, ’a feruri nāhea ’oe i te tauturu i te mau tamari’i ’ia patu i tō rātou fa’aro’o ia Iesu Mesia ’e i tāna tāra’ehara.

Te mau ’ātivite e au

• ’A tai’o ’e te mau tamari’i te Luka 22:39–44 ’e ’a mā’iti i te mau ’īrava nō roto mai i te Mataio 27:29–50. E ani ia rātou ’ia ’imi mai i te mau ta’o ’o te tauturu ia rātou ’ia hāro’aro’a, i te mea tā te Fa’aora i ora i Gētesemāne ’e i ni’a i te sātauro.

• E tauturu i te mau tamari’i ’ia tāmau ’ā’au i te Hīro’a Fa’aro’o toru. ’A fa’a’ite i tō ’oe ’itera’a pāpū ē, e mana tō Iesu Mesia nō te fa’aora ia tātou i te hara ’e i te pohe.

• E tauturu i te mau tamari’i ’ia fa’aineine i te mau a’ora’a poto nō ni’a i te tāra’ehara a Iesu Mesia, ’o tā rātou e nehenehe e fa’a’ite atu ia vetahi ’ē. ’A fa’aitoito ia rātou ’ia tu’u i roto hō’ē pāpa’ira’a mo’a ’e tō rātou ’itera’a pāpū i roto i tā rātou a’ora’a. Mai te mea e hina’aro rātou i te tauturu hau atu, e nehenehe rātou e tai’o i te « Tara’e, Tāra’ehara » i roto i te Arata’i nō te mau pāpa’ira’a mo’a (scriptures.ChurchofJesusChrist.org).

Nō te mea ’ua pohe Iesu ’e ’ua ti’afa’ahou mai, e ora fa’ahou ïa vau.

E fa’aruru te mau tamari’i tā ’oe e ha’api’i ra i te hō’ē mahana, te pohe o te hō’ē tei herehia mai te mea ’aita ā rātou i fārerei atu ra. ’A tauturu ia rātou ’ia ’ite ē, nō te mea ’ua ti’afa’ahou Iesu, e ti’afa’ahou ïa tātou pā’āto’a.

Te mau ’ātivite e au

• ’A fa’a’ite i te mau hōho’a N°57–59 i roto te Buka hōho’a ’Evanelia, ’e e ani i te mau tamari’i ’ia fa’atano i te mau hōho’a i ni’a i te mau tuha’a pāpa’ira’a mo’a i muri nei : Mataio 27:29–38, 59–60°; Ioane 20:10–18.

• E ani i te mau tamari’i ’ia tai’o tāta’itahi te « Ti’afa’ahoura’a » i roto i te Arata’i nō te mau pāpa’ira’a mo’a (scriptures.ChurchofJesusChrist.org) ’e ’ia ’ite mai i te hō’ē mea tā rātou e hina’aro e ha’api’i i tō rātou ’utuāfare. E hōro’a i te taime i te mau tamari’i ’ia fa’a’ite mai i te mea tei ’itehia e rātou.

• ’A tauturu i te mau tamari’i ’ia hi’o i roto i te fa’ahorora’a tumu parau o te Chants pour les enfants nō te hi’o mai i te hō’ē hīmene tā rātou e hina’aro e hīmene nō ni’a ia Iesu Mesia ’aore rā te ti’afa’ahoura’a. Hīmene ’āmui i te hīmene, ’e e ani i te mau tamari’i e aha tā rātou i ha’api’i mai nā roto mai i teie hīmene.

• E fa’a’ite i te video « Jesus Is Resurrected [’Ua ti’afa’ahou Iesu] » (ChurchofJesusChrist.org) ’e e ani i te tahi mau tamari’i ia fa’a’ite mai i tō rātou ’itera’a pāpū nō ni’a i te tāra’ehara ’e te ti’afa’ahoura’a o te Fa’aora. (E ani i teie mau tamari’i ’ia nā reira tau mahana iti hou te ha’api’ira’a, nō te fa’a’ine’ine ia rātou.) E ani i te mau tamari’i ’ia pāpa’i i tō rātou ’itera’a pāpū nō te fa’a’ite i tō te fare.

ītona ha’api’ira’a

Fa’aitoito i te ha’api’ira’a i te fare

Nō te tauturu i te mau tamari’i ’ia fa’a’ite i tō rātou ’utuāfare i te mea tā rātou i ’apo mai, ’a fa’aitoito ia rātou ’ia hīmene i te hō’ē hīmene i te fare i teie hepetoma, nō ni’a ia Iesu Mesia.

Ha’amaita’i i tā tātou ha’api’ira’a

E fāna’o te mau tamari’i nā roto i te nā ni’a-noa-ra’a. ’Eiaha e taiā i te nā ni’a-fa’ahou-noa-ra’a te mau ’ātivite e rave rahi taime, nō te mau tamari’i ’āpī iho ā rā. E tauturu te nā ni’a-noa-ra’a i te mau tamari’i ’ia ha’amana’o i te mea tā ’outou e ha’api’i.

’api ’ātivite : E ora fa’ahou vau