« 10–16 nō ’Ēperēra. Mataio 15–17°; Mareko 7–9°: ‘’O te Mesia ’oe’ », Mai, pe’e mai—nō te Paraimere : Faufa’a ’Āpī 2023 (2022)
« 10–16 nō ’Ēperēra. Mataio 15–17°; Mareko 7–9 » Mai, pe’e mai—nō te Paraimere : 2023
Te fa’ahuru-’ē-ra’a, nā Carl Heinrich Bloch.
10–16 nō ’Ēperēra
Mataio 15–17°; Mareko 7–9
« ’O te Mesia ’oe »
’A feruri ai ’oe i te Mataio 15–17 ’e te Mareko 7–9, ’a ha’apa’o maita’i i te mau muhumuhu pae vārua ’o tē nehenehe e tauturu ia ’oe ’ia ’ite i te hina’aro o te mau tamari’i i roto i tā ’oe piha.
Tītau i te mana’o
E ani i te mau tamari’i ’ia fa’a’ite mai nō te aha rātou i māuruuru ai nō te feiā fa’atere i roto i te ‘Ēkālesia, ’oia ato’a te peropheta ’e te mau ’āpōsetolo ’e te feiā fa’atere o te fenua iho. E aha tā tātou i fa’aro’o ’aita i maoro a’enei, ia rātou i te ha’api’ira’a ?
Ha’api’i i te ha’api’ira’a tumu : Te mau tamari’i ’āpī
E noa’a iā’u te ’itera’a pāpū ē, e Tamaiti Iesu Mesia nā te Atua ?
’A feruri, e nāhea ’oe i te fa’a’ohipa i te ’itera’a pāpū o Petero ’e i te pāhonora’a a Iesu, nō te ha’api’i i te mau tamari’i, e aha te hō’ē ’itera’a pāpū ’e ’ia fa’auru ia rātou ’ia ’imi i tō rātou iho.
Te mau ’ātivite e au
-
E ani i te mau tamari’i ’ia fa’aro’o i te mea tā Petero i parau ’a tai’o ai ’oe te Mataio 16:15–17. (Hi’o ato’a « Pene 32 : Tē fa’a’ite pāpū nei Petero nō te Mesia », i roto Te mau ’ā’amu o te Faufa’a ’Āpī, 76–77, ’aore rā, te video e tano i ni’a ChurchofJesusChrist.org.) ’A fa’ata’a ē, ’ua fa’a’ite Petero i tōna ’itera’a pāpū nō Iesu Mesia. ’A tai’o fa’ahou i te mau ’īrava. (’Aore rā ’a fa’a’ite fa’ahou i te video.) I reira e ani i te mau tamari’i ’ia fa’aro’o, nā vai i parau ia Petero ē, e Tamaiti Iesu Mesia nā te Atua.
-
’A fa’a’ite i tō ’oe ’itera’a pāpū nō Iesu Mesia, ’e ’a fa’ata’a atu e mea nāhea tō ’oe fāri’ira’a i te reira. E ani i te mau tamari’i ’ia ’imi i tō rātou iho ’itera’a pāpū nā ’ō mai i te Metua i te ao ra ra.
’Ua hōro’a Iesu Mesia i te mau peropheta ’e i te mau ’āpōsetolo te mau tāviri o te autahu’ara’a nō te fa’atere i tāna ’Ēkālesia.
’Ua fa’aau te Fa’aora i te heheura’a i te hō’ē papa, ’e te ha’amanara’a o te autahu’ara’a i te mau tāviri. Nāhea ’oe ’ia fa’a’ohipa i teie mau fa’aaura’a nō te tauturu i te mau tamari’i ’ia roa’a te fa’aro’o i roto i te feiā e fa’atere nei i tāna ’Ēkālesia ?
Te mau ’ātivite e au
-
’A fa’a’ite i te hō’ē ’ōfa’i i te mau tamari’i ’a tai’o ai ’oe i te Mataio 16:18 ’e rātou. ’A fa’ahiti fa’ahou ’e rātou i te pereota, « ’ei ni’a iho i teie nei papa e patu ai au i tā’u ’ēkālesia », ma te ’aparima ’ia au i te mau ta’o. ’A fa’ata’a ē, ’ua patuhia te ’Ēkālesia i ni’a i te « papa » o te heheura’a.
-
’A fa’a’ite i te mau tamari’i i te tahi mau tāviri ’e ’a ui atu, e aha te fa’a’ohipara’a o te mau tāviri. ’A fa’ata’a ē, ’ua fāri’i Petero ’e te tahi atu mau ’āpōsetolo i te mau tāviri o te autahu’ara’a nā roto mai ia Iesu. E « ’īriti » teie mau tāviri i te mau ha’amaita’ira’a nō tātou, ’e e ’īriti i te ’ē’a e tae atu ai i te ra’i ra. ’Ei hi’ora’a, e fa’ati’a te mau tāviri o te autahu’ara’a ’ia bāpetizohia tātou ’e ’ia rave i te ’ōro’a mo’a. ’A hōro’a i te mau tamari’i te mau tāviri papie, ’e e fa’aue ia rātou ’ia pāpa’i i te tahi mau ha’amaita’ira’a tā te mau tāviri o te autahu’ara’a e « ’īriti ».
-
’A fa’a’ite i te hō’ē hōho’a nō te peresideni o te ’Ēkālesia, ’e ’a fa’a’ite i tō ’oe ’itera’a pāpū ē, tē mau nei ’oia i te mau tāviri ato’a o te autahu’ara’a i teie mahana, mai ia Petero.
Te mau tāviri o te autahu’ara’a ’o te ha’amanara’a ïa nō te arata’i i te fa’a’ohipara’a i te autahu’ara’a.
E nehenehe tō’u fa’aro’o e fa’atupu i te mau temeio.
’Ia tai’o ana’e ’oe i te fafaura’a a Iesu ē, e nehenehe te fa’aro’o mai te hō’ē huero sinapi noa iho te rahi, e fa’anu’u i te hō’ē mou’a, e aha tō ’oe mana’o nō ni’a te mau tamari’i tā ’oe e ha’api’i ra ?
Te mau ’ātivite e au
-
E tai’o i te Mataio 17:19–20 ’e te mau tamari’i. E ani ia rātou te tahi i muri mai i te tahi, ’ia pāpa’i hōho’a i te mau mou’a rarahi ’e te mau huero na’ina’i i ni’a i te tāpura ’ere’ere. ’A fa’ata’a ē e au te mau mou’a mai te mau mea pa’ari nō tātou ’ia rave. E aha te tahi mau mea ’o te nehenehe e riro ’ei mou’a nō tātou ? ’A fa’a’ohipa i te ’api ’ātivite nō teie hepetoma nō te tauturu i te mau tamari’i ’ia feruri, nāhea te fa’aro’o i te tauturu ia rātou ’ia rave i te mau ’ohipa tā te Atua e hina’aro ’ia rave rātou.
-
E tu’u i te hō’ē hōho’a nō te hō’ē mou’a i te hō’ē pae o te piha. E ani i te mau tamari’i ’ia fa’a’ite mai i te tahi mau mea tā rātou e nehenehe e rave, ’ia hau atu ā tō rātou fa’aro’o ia Iesu Mesia. E vaiiho i te tamari’i tāta’itahi ’o tē hōro’a mai i te tahi mana’o, ’ia fa’anu’u atu i te mou’a i te tahi pae o te piha. ’A tai’o Mataio 17:19–20, ’e ’a fa’a’ite pāpū nō te mana o te fa’aro’o i roto i tō ’oe orara’a.
-
E hīmene ’āmui i te hō’ē hīmene nō ni’a i te fa’aro’o, mai te « La foi » (Chants pour les enfants, 50). ’A hōro’a i te tamari’i tāta’itahi i te hō’ē huero nō te ’āfa’i i te fare. E ani ia rātou ’ia tanu i te huero ’e ’ia tu’u i te hō’ē vāhi e ’ite ai rātou i te reira ’ia tupu mai i te rahi, nō te tauturu ia rātou ’ia ha’amana’o ’ia roa’a te fa’aro’o i te Metua i te ao ra ’e ia Iesu Mesia.
Ha’api’i i te ha’api’ira’a tumu : Te mau tamari’i pa’ari a’e
E tae mai te hō’ē ’itera’a pāpū nō Iesu Mesia nā roto i te heheura’a.
Nāhea te ’itera’a pāpū o Petero i roto i te Mataio 16:13–17 e tauturu ai i te mau tamari’i, ’a patu ai rātou i tō rātou iho ’itera’a pāpū ?
Te mau ’ātivite e au
-
E ui i te mau tamari’i, e aha tā rātou e parau ’ia ui noa mai te hō’ē ta’ata ia rātou ē, « ’O vai Iesu ? » E ani i te mau tamari’i ’ia tai’o Mataio 16:13–17 nō te hi’o mai e mea nāhea tō Petero pāhonora’a i teie uira’a. Mea nāhea te roa’ara’a tōna ’itera’a pāpū nō Iesu ? E aha tā tātou e rave nō te ha’apūai i tō tātou ’itera’a pāpū ?
-
’A tauturu i te mau tamari’i ’ia fa’aau i te huru e ’ite ai tātou i te mau parau mau pae vārua ’e te huru e ’ite ai tātou i te tahi atu mau parau mau. ’Ei hi’ora’a, nāhea tātou e ’ite ai i te roa o te hō’ē ta’ata ’aore rā, i te huru o te reva ? Nāhea tātou e ’ite ai ē, e Tamaiti Iesu nā te Atua ? E parau i te mau tamari’i e mea nāhea tō te Vārua Maita’i fa’a’ite-pāpū-ra’a ia oe nō te Fa’aora.
-
’A fa’a’ite i tō ’oe ’itera’a pāpū nō Iesu Mesia, ’e ’a fa’aue i te mau tamari’i ’ia tītau ’e ’ia ha’apūai i tō rātou iho ’itera’a pāpū.
Tē arata’ihia nei te ’Ēkālesia a Iesu Mesia e te feiā tei mau i te mau tāviri o te autahu’ara’a.
E nehenehe te tuatāpapara’a i te Mataio 16:15–19 e ha’apūai i te fa’aro’o o te mau tamari’i ē, Te ’Ēkālesia a Iesu Mesia i te Feiā Mo’a i te mau Mahana Hope’a nei ’o te hō’ē ïa fa’aho’i-fa’ahou-ra’a mai o te ’Ēkālesia iho tā Iesu i ha’amau ’a ora ai ’oia i te fenua nei.
Te mau ’ātivite e au
-
Pāpa’i te ’īrava Mataio 16:19 i ni’a i te tāpura ’ere’ere, ma te ha’amo’e i te tahi mau ta’o, ’oia ato’a te ta’o « te mau tāviri ». E ani i te mau tamari’i ’ia ’imi i te mau ta’o tei mo’ehia.
-
Fa’a’ite i te video « Where Are the Keys ? [Tei hea te mau tāviri] ? » (ChurchofJesusChrist.org), ’aore rā e hi’o fa’ahou « Te mau tāviri o te autahu’ara’a » i roto i te Arata’i nō te mau pāpa’ira’a mo’a (scriptures.ChurchofJesusChrist.org). E aha te mau tāviri o te autahu’ara’a ? Nāhea te mau tāviri o te autahu’ara’a e riro ai ’ei tāviri mau ?
-
’A tauturu i te mau tamari’i ’ia tāpura mai i ni’a i te tāpura ’ere’ere te tahi mau ta’ata tei mau i te mau tāviri o te autahu’ara’a. « Te mau tāviri o te autahu’ara’a » i roto te Arata’i nō te mau pāpa’ira’a mo’a (scriptures.ChurchofJesusChrist.org) ’e te tāpura nō te tauturu ia rātou. ’A ani i te hō’ē ta’ata i roto i tā ’oe pāroita e mau nei i teie mau tāviri o te autahu’ara’a, ’ia fa’a’ite poto mai i te piha ha’api’ira’a, nō te aha e mea faufa’a teie mau tāviri.
-
’A huna e rave rahi tāviri (’aore rā mau hōho’a tāviri) nā roto i te piha, ’e e ani i te mau tamari’i ’ia ’imi mai i te reira. ’Ia ’itehia mai te hō’ē tāviri, ’a tauturu i te mau tamari’i ’ia feruri i te mau ha’amaita’ira’a tā tātou e fāna’o nā roto i te mau tāviri o te autahu’ara’a (’ei hi’ora’a, ’utuāfare mure ’ore, bāpetizora’a, ’e te ’ōro’a mo’a).
E Tamaiti Iesu Mesia nā te Atua.
Tē fa’ata’a nei teie mau ’īrava i te hō’ē o te tahi mau taime i roto i te mau pāpa’ira’a mo’a, ’a fa’aro’ohia ai te reo o te Atua te Metua i te fa’a’ite-pāpū-ra’a nō tāna Tamaiti Here. ’Ia tuatāpapa ana’e ’oe i teie ’ā’amu ’e te mau tamari’i, e ha’apūai te reira i tō rātou fa’aro’o ia Iesu Mesia.
Te mau ’ātivite e au
-
E ani i te mau tamari’i ’ia pāpa’i hōho’a i te ’ohipa e tupu ra tei fa’ata’ahia mai i roto te Mataio 17:1–9. E ani ia rātou ’ia fa’ata’a mai i tā rātou hōho’a i mua i te tahi ’e te tahi. (Hi’o « Pene°33 :Te fāra’a mai ma te hanahana°:Te fa’ahuru-’ē-ra’a », i roto Te mau ’ā’amu o te Faufa’a ’Āpī, 78–79, ’aore rā, te video e tano i ni’a ChurchofJesusChrist.org.)
-
Hōro’a te taime i te mau tamari’i ’ia feruri e aha tā te ’ā’amu i roto i te Matai’o 17:1–9 e ha’api’i nei ia rātou nō ni’a ia Iesu Mesia. E ani ia rātou ’ia pāpa’i i tō rātou mau mana’o i ni’a i te tāpura ’ere’ere. ’A ani i te tahi mau tamari’i ’ia fa’a’ite mai, nāhea rātou i ’ite ai ē, e Tamaiti Iesu Mesia nā te Atua.
Fa’aitoito i te ha’api’ira’a i te fare
E ani i te mau tamari’i ’ia ui atu i tō rātou mau metua ’aore rā, i te tahi atu melo o te ’utuāfare, e mea nāhea tō rātou fāri’ira’a i tō rātou ’itera’a pāpū nō Iesu Mesia.
Ha’amaita’i i tā tātou ha’api’ira’a
Fa’a’ohipa i te pehe. E nehenehe te mau hīmene nō te Paraimere ’e te mau hīmene purera’a e tauturu i te mau tamari’i nō te mau fāito matahiti ato’a, ’ia hāro’aro’a ’e ’ia ha’amana’o i te mau parau mau o te ’evanelia. E nehenehe ato’a te hīmenera’a e fa’aitoito i te mau tamari’i ’ia ha’api’i mai. (Hi’o Ha’api’ira’a mai tā te Fa’aora,°22.)