« 8–14 nō Mē. Mataio 19–20°; Mareko 10°; Luka 18°: ‘E e aha iho ā tei toe iā’u°?’ », Mai, pe’e mai—nō te Paraimere : Faufa’a ’Āpī 2023 (2022)
« 8–14 nō Mē. Mataio 19–20 ; Mareko 10 ; Luka 18 », Mai, pe’e mai—nō te Paraimere : 2023
8–14 nō Mē
Mataio 19–20 ; Mareko 10 ; Luka 18
« E aha iho ā tei toe iā’u ? »
’A tai’o Mataio 19–20 ; Mareko 10 ; ’e Luka 18, ma te ha’amana’o noa i te mau tamari’i tā ’oe e ha’api’i ra. ’A pāpa’i i te mau huru muhumuhu ato’a tā ’oe e fāri’i. E tauturu tō ’oe fa’aineinera’a ia ’oe ’ia ha’api’i i te mau tamari’i i te mea tā rātou e hina’aro e ’ite mai nā roto mai i teie mau pene.
Tītau i te mana’o
E ani i te mau tamari’i ia fa’a’ite mai i te mau mea tā rātou e ha’amana’o ra i roto i te ha’api’ira’a nō te hepetoma i ma’iri. ’A fa’a’ite i te mau hōho’a nō te tauturu ia rātou ’ia ha’amana’o.
Ha’api’i i te ha’api’ira’a tumu : Te mau tamari’i ’āpī
’Ua hina’aro te Metua i te ao ra ’ia fa’aipoipo tātou i roto i te hiero ’e ’ia roa’a te hō’ē ’utuāfare mure ’ore.
Nāhea te mau tamari’i tā ’oe e ha’api’i ra ’ia fāna’o i te ha’api’ira’a mai nō ni’a i te ha’api’ira’a tumu o te fa’aipoipora’a mure ’ore ? E riro ’ei tauturura’a nō ’oe ’ia hi’o fa’ahou i te mau parau mau nō ni’a i te fa’aipoipora’a i roto « Te ’Utuāfare : E poro’i i tō te ao nei » (ChurchofJesusChrist.org).
Te mau ’ātivite e au
-
’A tai’o Mareko 10:6–8 i te mau tamari’i, ’e ’a fa’a’ite i te hō’ē hōho’a nō te hō’ē nā ta’ata fa’aipoipo. E ani i te mau tamari’i ’ia fa’atoro i ni’a i te tāne ’e te vahine ’ia fa’aro’o ana’e rātou ia ’oe ’ia tai’o i te mau ta’o tāne ’e vahine. ’A fa’ata’a ē, tē hina’aro nei te Metua i te ao ra ’ia fa’aipoipo te tāne ’e te vahine te tahi ’e te tahi (hi’o Genese 1:27–28).
-
’A fa’a’ite i te hōho’a nō te hō’ē ’utuāfare ’e te hiero. E ani i te mau tamari’i ’ia parau mai e aha tā rātou e ’ite nei i roto i te mau hōho’a. ’A fa’ata’a ē, tē hina’aro nei te Metua i te ao ra ’ia tā’atihia tātou i tō tātou mau ’utuāfare i roto i te hiero, ’ia vai noa ho’i tātou i pīha’i iho ia rātou e a muri noa atu. Ha’apa’o maita’i i te mau tamari’i ’aitā ā tō rātou nā metua i tā’atihia.
-
E hīmene i te hō’ē hīmene nō ni’a i te ’utuāfare, mai te « Un heureux foyer » (Chants pour les enfants,°104). ’A feruri i te hīmene e rave rahi taime te hīmene. E ani i te mau tamari’i ’ia fa’a’ite mai i te mau ’ohipa ’ārearea tā rātou i rave ’e tō rātou ’utuāfare. Nō te aha rātou e māuruuru ai nō tō rātou ’utuāfare ?
-
’A hīmene nō ni’a i te hiero, mai te « Oh, j’aime voir le temple » ’aore rā « Ensemble à tout jamais » (Chants pour les enfants, 99, 98). ’A vaiiho i te mau tamari’i ’ia tāpe’a i te mau hōho’a o te hiero ’aore rā, o te ’utuāfare, ’e e ani ia rātou ’ia ’āfa’i mai i tā rātou mau hōho’a i ni’a, ’ia hīmene ana’e rātou « hiero » ’aore rā, « ’utuāfare ». Tauturu i te mau tamari’i ‘ia feruri i te mau tumu, nō te aha e mea faufa’a ’ia fa’aipoipo i roto i te hiero.
’Ua here Iesu i te mau tamari’i, nō te mea « mai ia rātou ho’i te bāsileia o te Atua ra » (Mareko 10:14).
’Ua hina’aro Iesu i te mau tamari’i ri’i ’ia haere mai iāna ra, ’ia ti’a iāna ’ia ha’amaita’i ia rātou.
E hōro’a mai teie ’ā’amu i te rāve’a nō te tauturu i te mau tamari’i ’ia ’ite, ’ua here rahi mau Iesu ia rātou.
Te mau ’ātivite e au
-
Nā roto i tā ’oe iho mau parau, ’a fa’a’ite i te ’ā’amu i roto te Mareko 10:13–16. E nehenehe ato’a ’oe e fa’a’ite i te video « Suffer the Little Children to Come unto Me [’A tu’u mai i te tamari’i ri’i ’ia haere noa mai iā’u nei] » (ChurchofJesusChrist.org). Tauturu i te mau tamari’i ia feruri i te mau taime ’a putapū ai rātou i te here o Iesu nō rātou. ’A fa’a’ite i te mau tamari’i i tō ’oe ’itera’a pāpū ē, ’ua here Iesu ia rātou ’e tē hina’aro nei ’oia e ha’amaita’i ia rātou.
-
’A fa’a’ite i te hōho’a Te Mesia ’e te mau tamāri’i (Buka hōho’a ’Evanelia, N°47). Tauturu i te mau tamari’i ’ia feruri, e aha rā te huru ’ia riro ’ei hō’ē o te mau tamari’i e pārahi ra i pīha’i iho ia Iesu i ni’a i te hōho’a. E ani i te mau tamari’i ’ia fa’a’ite mai e aha tō rātou mana’o nō ni’a ia Iesu.
-
’A vaiiho i te mau tamari’i ’ia pāpa’i hōho’a ia rātou iho e ha’amaita’ihia ra e Iesu (hi’o Mareko 10:16 ’e te ’api ’ātivite nō teie hepetoma).
Mai te mea e ha’apa’o vau i te mau fa’auera’a, e nehenehe au e fāri’i i te ora mure ’ore.
’Ua ha’api’i Iesu i te ta’ata tao’a rahi ē, e noa’a te ora mure ’ore–-te orara’a mai tō te Metua i te ao ra—’ia ha’apa’o ’oia i te mau fa’auera’a.
Te mau ’ātivite e au
-
’A fa’ati’a i te ’ā’amu o te ta’ata tao’a rahi i roto te Mareko 10:17–22 i te mau tamari’i. (Hi’o ato’a « Pene 42 : Te ta’ata tao’a rahi », i roto Te mau ’ā’amu o te Faufa’a ’Āpī, 105–6, ’aore rā, te video e tano i ni’a ChurchofJesusChrist.org.) E ani ia rātou ’ia fa’aro’o i te mea tā Iesu i parau atu i te taure’are’a ’ia rave, ’e e mea nāfea tō te taure’are’a pāhonora’a.
-
’A fa’ati’a hō’ē ’ā’amu ’aore rā hau atu nō te mau tamari’i e ani nei i te a’o ’aore rā i te arata’ira’a a tō rātou mau metua, ’aita rā rātou i pe’e ’aore rā i ha’apa’o. E aha te tahi mau mea tā te Metua i te ao ra e ani mai nei ia tātou ’ia rave ? E aha tā tātou e fāri’i ’ia ha’apa’o ana’e tātou i tāna mau fa’auera’a ?
-
’A fa’a’ite i te mau ’itera’a rau ’a fāri’i ai ’outou i te mau muhumuhura’a ’ia rave i te hō’ē mea ’ia maita’i a’e ’outou.
Ha’api’i i te ha’api’ira’a tumu : Te mau tamari’i pa’ari a’e
’Ua hina’aro te Metua i te ao ra ’ia fa’aipoipo tātou i roto i te hiero ’e ’ia fāri’i i te hō’ē ’utuāfare mure ’ore.
E nehenehe te mau mea tā Iesu i ha’api’i nō ni’a i te fa’aipoipora’a e tauturu i te mau tamari’i e ’oa’oa ’ia fa’aipoipohia i roto i te hiero ’e ’ia fa’atupu i te hō’ē ’utuāfare mure ’ore.
Te mau ’ātivite e au
-
E ani i te hō’ē tamari’i ’ia tai’o pūai i te Mareko 10:6–8. ’A fa’ata’a ē, te aura’a nō te parau ’ati atu ’oia ho’i, e « tāpe’a mā’ite » ’aore rā, e « tāpe’a pāpū » i te hō’ē mea. Nō te aha e mea faufa’a ’ia tāhō’ēhia te tāne ’e te vahine, ’ia here te tahi ’e te tahi, ’e ’ia ’ohipa ’ei nā ’āpiti ?
-
E ani i te mau tamari’i ’ia tauturu ia ’oe ’ia feruri i te mau pāhonora’a i te mau uira’a mai teie « Nō te aha e mea faufa’a te ’utuāfare i roto i te ’Ēkālesia ? » ’aore rā « Nō te aha e mea faufa’a nō ’outou ’ia fa’aipoipohia i roto i te hiero ? » Tauturu ia rātou ’ia ’imi i te mau pāhonora’a i roto i te mau mātēria tauturu mai te Mareko 10:6–8 ; 1°Korinetia 11:11 ; Te Ha’api’ira’a Tumu ’e te mau Fafaura’a 42:22 ; 131:1–4 ; Mose 3:18, 21–24 ; ’e « Te ’Utuāfare : E poro’i i tō te ao nei. »
-
’A hīmene ’āmui i te hō’ē hīmene nō ni’a i te ’utuāfare, mai te « Ensemble à tout jamais » (Chants pour les enfants,,°98). ’A fa’a’ite i tō ’oe ’itera’a pāpū nō te fa’aipoipora’a mure ’ore ’e nō te ’utuāfare ’e te mau tamari’i. ’A ani ia rātou ’ia fa’a’ite ato’a mai i tō rātou ’itera’a pāpū.
E nehenehe Iesu e tauturu iā’u ’ia ’ite, e aha tā’u e rave nō te haere i mua.
’Ua ’imi te ta’ata tao’a rahi ia Iesu ’e ’ua fāri’i i te arata’ira’a pāpū tei fa’ata’a-ta’a-’ē-hia nōna. Nāhea ’oe i te fa’auru i te mau tamari’i ’ia ’imi ato’a i te reira huru arata’ira’a i roto i tō rātou iho orara’a ?
Te mau ’ātivite e au
-
E ani i te mau tamari’i ’ia ’imi mai i te hō’ē ’īrava i roto te Mareko 10:17–22 ’o tē fa’ata’a nei i te hōho’a i roto te fa’anahora’a nō teie hepetoma i roto te Mai, pe’e mai—nō te ta’ata hō’ē ’e te ’utuāfare. ’A fa’ata’a ē, te a’ora’a tā Iesu i hōro’a i te taure’are’a ra e au ïa nōna iho, ’e e fāri’i tātou pā’āto’a i te arata’ira’a nō tātou iho nā ’ō mai i te Fatu ra nā roto i te Vārua.
-
’A tai’o ’āmui te Mareko 10:17–22. E ani i te mau tamari’i ’ia pāpa’i i ni’a i te tāpura ’ere’ere te mau fa’auera’a tā te Fa’aora i parau atu i te ta’ata tao’a rahi ’ia ha’apa’o (hi’o ’īrava 19). E aha atu ā tā Iesu i ani iāna ’ia rave ? (hi’o ‘īrava°21). ’A fa’aitoito i te mau tamari’i ’ia feruri i te mau mea e ti’a ia rātou e ha’amata i te rave ’aore rā, e fa’aea i te rave nō te pe’e maita’i a’e ia Iesu. E aha te tahi mau rāve’a tā tātou i ’ite mai nō te mea tā Iesu e hina’aro ’ia rave tātou ?
Fa’aitoito i te ha’api’ira’a i te fare
E ani i te mau tamari’i ’ia fa’a’ite i tō rātou ’utuāfare tō rātou here nō rātou, nā roto ānei i te pāpa’ira’a i te hō’ē rata ’aore rā te ravera’a i te ’ohipa tāvinira’a maita’i.
Ha’amaita’i i tā tātou ha’api’ira’a
Ha’apa’o maita’i i te mau tamari’i. E aha te huru o te mau tamari’i i roto i tā ’outou piha, ’ia pāhono i te mau ’ātivite nō te ha’api’ira’a mai ? Mai te mea e ’ere rātou i te mea ’ana’anatae roa, ’ua tae paha ïa i te taime nō te tāmata i te tahi atu ’ātivite ’aore rā, nō te hāhaere ri’i ma te tura. Terā rā mai te mea tē ’ite ra ’outou i te ’ana’anatae o te mau tamari’i, ’e tē ’apo mai ra rātou i te tahi mau tuha’a o te ha’api’ira’a, ’eiaha e rū i te haere i mua nō te rave fa’aoti i te ha’api’ira’a tā’āto’a.