mau tamari’i Paraimere

Pāhono i te mau hina’aro o te mau tamari’i ’āpī

’Ua ineine ’e e hina’aro rahi tō te mau tamari’i ’ia ha’api’i mai i te ’evanelia mai te mea e vauvauhia te reira ’ia au i tō rātou māramarama. Mai te mea iho ā rā e ha’api’i ’outou i te mau tamari’i ’āpī, e matā na i te fa’a’ohipa i te mau huru ’ātivīte i muri nei nō te tauturu ia rātou ’ia raupa i te ’ite.

• Hīmene. Tē ha’api’i nei te mau hīmene purera’a ’e te mau hīmene o te buka Chants pour les enfants i te ha’api’ira’a tumu ma te pūai E fa’a’ohipa i te fa’ahorora’a nō te mau tumu parau i te tua o te Chants pour les enfants nō te ’imi i te mau hīmene e tū’ati i ni’a i te mau parau tumu o te ’evanelia tā ’outou e ha’api’i ra. Tauturu i te mau tamari’i ’ia fa’atū’ati i te mau poro’i o te mau hīmene i ni’a i tō rātou orara’a. ’Ei hi’ora’a, e ui ’outou i te mau uira’a nō ni’a i te mau ta’o ’aore rā te mau pereota i roto i te mau paraparau o te hīmene. Ta’a ’ē atu i te hīmenera’a, e nehenehe te mau tamari’i e ’apa mai i te mau hīmene, ’aore rā, e fa’aro’o noa i te mau hīmene ’a rave noa ai rātou i te tahi mau ’ātivite. Nō te tahi atu mau mana’o, ’a hi’o te mau tuha’a « Fa’a’ohipa i te pehe nō te ha’api’i i te ha’api’ira’a tumu » ’e « Tauturu i te mau tamari’i ’ia ha’api’i mai ’e ’ia ha’amana’o i te mau hīmene Paraimere ’e te mau hīmene purera’a » i roto i te tuha’a hau o teie buka.

• Fa’aro’o ’aore rā ha’uti ta’ata ora i te hō’ē ’ā’amu. E mea au nā te mau tamari’i ’āpī te mau ’ā’amu—nō roto mai i te mau pāpa’ira’a mo’a, i tō ’outou orara’a, te ’ā’amu o te ’Ēkālesia ’aore rā i tō ’outou ’ā’amu ’utuāfare, ’aore rā nō roto mai i te Mau ve’a a te ’Ēkālesia. E ’imi i te mau rāve’a ’ia fa’aō mai ia rātou i roto i te ’ohipa fa’ati’ara’a ’ā’amu. E nehenehe rātou e tāpe’a te mau hōho’a ’aore rā te mau tao’a, e pāpa’i hōho’a i te mea tā rātou e fa’aro’o ra, e ha’uti ta’ata ora i te ’ā’amu ’aore rā e tauturu i te fa’ati’ara’a i te ’ā’amu. Tauturu i te mau tamari’i ’ia ’ite i te mau parau mau o te ’evanelia i roto i te mau ’ā’amu tā ’outou e fa’ati’a atu.

• Tai’o i te hō’ē ’īrava pāpa’ira’a mo’a. ’Aita paha te mau tamari’i ’āpī i ’ite i te tai’o, e nehenehe rā ’outou e tītau ia rātou ’ia ha’api’i mai i te mau pāpa’ira’a mo’a. E hina’aro paha ’outou e rōtahi i ni’a i te hō’ē ’īrava, hō’ē pereota faufa’a, ’aore rā, hō’ē ta’o. ’Ia tai’o pūai ana’e ’outou i te hō’ē pāpa’ira’a mo’a, e ani i te mau tamari’i ’ia ti’a ’aore rā, ’ia ’āfa’i i te rima i ni’a ’ia fa’aro’o ana’e rātou i te hō’ē ta’o ’aore rā, hō’ē pereota ta’a ’ē ’o tā ’outou e hina’aro e rōtahi i ni’a iho. E tāmau ’ā’au ato’a rātou i te mau pereota poto o te mau pāpa’ira’a mo’a, mai te mea e fa’ahiti rātou i te reira e rave rahi taime. ’Ia fa’aro’o ana’e rātou i te parau a te Atua, e ’ī rātou i te Vārua.

• ’Ia ’ohipa. Nō te mea e mea pinepine te mau tamari’i ’āpī i te ha’uti’uti noa, e fa’anaho i te mau rāve’a nō te fa’aha’uti ia rātou—hāhaere, ’ōu’au’a, pi’o i raro, ’e te tahi atu ā mau ravera’a e tū’ati i ni’a i te parau tumu ’aore rā, i te ’ā’amu tā ’outou e ha’api’i ra. E maita’i ato’a teie mau ravera’a mai te mea e hīmene ’āmui ’outou.

• E hi’o i te hō’ē hōho’a ’aore rā, e māta’ita’i i te hō’ē video. ’Ia fa’a’ite ana’e ’outou i te mau tamari’i i te hō’ē hōho’a ’aore rā, te hō’ē vidéo nō ni’a i te hō’ē parau tumu o te ’evanelia ’aore rā, te hō’ē ’ā’amu nō te pāpa’ira’a mo’a, e ui ia rātou i te mau uira’a ’o te tauturu ia rātou ’ia ’apo mai i te mea tā rātou e hi’o ra. ’Ei hi’ora’a, e ui atu ia rātou : « E aha te ’ohipa e tupu ra i roto i teie hōho’a ’aore rā i te video ? E aha te mea tā ’outou e fāri’i ra ? » E mau vāhi maita’i roa te fa’anahora’a ’āfa’ifa’i nō te Vaira’a buka ’evanelia, MediaLibrary.ChurchofJesusChrist.org, ’e te children.ChurchofJesusChrist.org nō te ’imi i te mau hōho’a ’e te mau video.

• Tauturu ’e fa’aitoito i te mau tamari’i ’ia fa’a’ite mai i te mau mea i ’orahia mai e rātou. ’Aita paha e rahi te mea tā te mau tamari’i ’āpī e fa’a’ite mai, mai te mau tamari’i pa’ari, terā rā, mai te mea e hōro’a ’outou ia rātou i te tahi arata’ira’a pāpū, e fa’a’ite mai rātou i tō rātou mau mana’o ’e te mau tupura’a ’ohipa nō ni’a i te mea tā rātou i ’apo mai.

• Hāmani. E nehenehe te mau tamari’i e patu, e pāpa’i hōho’a, ’aore rā, e fa’a’ū i te hō’ē mea nō roto mai i te ’ā’amu ’aore rā, i te parau tumu tā rātou i ha’api’i mai. E fa’aitoito ia rātou ’ia ’āfa’i i tā rātou ’ohipa i hāmani i te fare ’e ’ia fa’a’ite i te mau melo o te ’utuāfare nō te tauturu i te mau tamari’i ’ia ha’amana’o i te mea tā rātou i ’apo mai.

• Fa’aō mai i roto i te mau ha’api’ira’a tao’a. E nehenehe hō’ē ha’api’ira’a tao’a ’ōhie roa e tauturu i te mau tamari’i ’ia māramarama i te hō’ē parau tumu o te ’evanelia, e ’ere i te mea ’ōhie ’ia hāro’aro’a. ’Ia fa’a’ohipa ana’e ’outou i te ha’api’ira’a tao’a, ’a ’imi i te mau rāve’a nō te fa’aō mai i te mau tamari’i. E hau atu ā tō rātou ’apora’a mai nā roto i te ’āmuira’a mai i roto i te tupura’a ’ohipa, i te māta’ita’i noa i te hō’ē fa’a’ite’itera’a.

• Ha’utira’a ta’ata ora. ’Ia ha’uti ta’ata ora ana’e te mau tamari’i i te hō’ē huru tupura’a ’o tē riro i te tupu i roto i te orara’a nei, e māramarama maita’i a’e rātou e nāhea te hō’ē parau tumu o te ’evanelia e tano ai i tō rātou orara’a.

• E tāpiti i te mau ’ātivite. E hina’aro paha te mau tamari’i ’āpī ’ia nā ni’a iho fa’ahou i te fa’aro’ora’a i te mau tumu parau nō te hāro’aro’a i te reira. ’Eiaha e taiā i te tāpiti i te fa’ati’ara’a i te mau ’ā’amu ’aore rā, te ravera’a i te mau ātivite, noa atu taua ha’api’ira’a iti nei. ’Ei hi’ora’a, e fa’ati’a ’outou i te hō’ē ’ā’amu nō te pāpa’ira’a mo’a e rave rahi taime ma te mau ravera’a rau, i te roara’a o te hō’ē ha’api’ira’a—nā roto i te tai’ora’a i te mau pāpa’ira’a mo’a, te ha’apotora’a nā roto i tā ’outou iho parau, te hi’ora’a i te hō’ē video, te vaiihora’a i te mau tamari’i ’ia tauturu i te fa’ati’ara’a i te ’ā’amu, te anira’a ia rātou ’ia ha’uti i te ’ā’amu, ’e tē vai atu ra. Mai te mea ’ua tāpitihia te hō’ē ’ātivite i te fare, tei ravehia i roto i te piha ha’api’ira’a, e tauturu te reira i te mau tamari’i ’ia ’apo mai ’e ’ia ha’amana’o noa.

• E ha’api’i i te tahi ’e te tahi. E nanea te mau ’aravihi tōtiare o te mau tamari’i ’e e pinepine e tītau i te ’apo mai ’e i te ha’uti ’e tō rātou mau hoa. E fa’atupu te mau rāve’a nō rātou nō te fa’a’ite mai, nō te mono i te tahi ’e te tahi , ’e nō te ’ohipa ’āmui, ’a ha’api’i mai ai rātou.

• ’Āmui mai i roto i te mau ’ātivite rau. Te rahira’a o te mau tamari’i ’āpī e mea poto roa tō rātou taime ’ana’anataera’a, ’e ’ua rau huru tō rātou raupara’a i te ’ite. E fa’a’ohipa e rave rau ’ātivite, ’e e ha’apa’o maita’i i te mau tāpa’o e fa’a’ite ra ē, e hina’aro te mau tamari’i e taui te ’oi’oira’a. ’Ei hi’ora’a, e ti’a paha ia ’outou e tāuiui i te mau ’ātivite hau, i te mau ’ātivite pe’epe’e.

te ’orometua ’e te tamari’i Paraimere

Hō’ē tuha’a o tō ’outou ti’ara’a ’orometua nō te mau tamari’i ’āpī—ta’a ’ē atu te ha’api’ira’a i te mau parau tumu o te ’evanelia—’o te tauturura’a ïa i te mau tamari’i ’ia ha’api’i mai e nāhea ’ia fa’aō maita’i mai i roto i te piha ha’api’ira’a a te ’Ēkālesia. ’Ei hi’ora’a, e hina’aro paha rātou e ha’api’i mai nāhea e mono i te tahi ’e te tahi, e fa’a’ite mai, e fa’atura ia vetahi ’ē, ’e tē vai atu ra. E hāmani te tahi mau ’orometua i te tāpura fa’ata’ara’a ’ohipa nā te tamari’i tāta’itahi nō te fa’aō mai i roto i te piha ma te rāve’a ta’a ’ē (mai te hōro’ara’a i te pure, te tāpe’ara’a te hōho’a, ’aore rā, te ’ōperera’a i te mau ’api parau). E nehenehe te fa’ata’ara’a ’ohipa e taui i te hepetoma tāta’itahi. E tauturu te reira i te mau tamari’i ’ia mono i te tahi ’e te tahi ’e ’ia rōtahi i ni’a i te peu tano nō te piha ha’api’ira’a.

Pinepine te mau tamari’i—te mau tamari’i ’āpī iho ā rā—i te fana’o i te hō’ē peu tāmau ’ite-ātea-hia. Nō te poto o te taime ’ana’anatae o te mau tamari’i ’āpī, ’e i te tahi taime, e iti roa tō rātou rōtahira’a nō te tā’āto’ara’a o te ha’api’ira’a, e mea maita’i a’e i roto i teie peu tāmau ’ia taui-pinepine-hia te huru ’ātivite i te tahi atu huru ’ohipara’a. ’Ei hi’ora’a, e nehenehe e tu’u i roto i te peu tāmau o tā ’outou piha te tahi mau taime fa’afa’aeara’a nō te pēni i te hōho’a, te hīmene, ’e tē vai atu ra.