E ’orometua ha’api’i ’oe nō te mau tamari’i

’Ua pi’ihia ’oe e te Atua nō te ha’api’i i tāna mau tamari’i mai tā te Fa’aora te huru. ’Ua fa’ata’ahia ’oe nō teie pi’ira’a nā roto i te ha’amanara’a o tōna autahu’ara’a mo’a. Noa atu ē, e ’ere ’oe i te hō’ē ’orometua ha’api’i ’aravihi, ’a ora ti’a mā ai ’oe, ’a pure ai i te mau mahana ato’a, ’e ’a tuatāpapa ai i te mau pāpa’ira’a mo’a, e hōro’a mai tō tātou Metua i te ao ra i roto ia ’oe te fa’aurura’a ’e te mana o te Vārua Maita’i nō te tauturu ia ’oe ’ia manuia (hi’o 2 Nephi 33:1).

Te feiā tei tu’uhia mai i raro a’e i tā ’oe ti’a’aura’a, e mau tamari’i ïa nā tō tātou Metua i te ao ra, ’e ’ua ’ite ’oia e aha tei tītauhia nō rātou, ’e e nāhea i te toro maita’i a’e i te rima ia rātou. ’Ia ’imi ana’e ’oe nā roto i te pure i te fa’aurura’a a te Vārua Maita’i, e arata’i ’oia ia ’oe ’a fa’aineine ai ’e ’a ha’api’i ai ’oe. E heheu mai ’oia ia ’oe i te mea tā ’oe e parau ’e e rave (hi’o 2 Nephi 32:5).

’Eiaha roa atu e vahavaha i te ’aravihi o te hō’ē tamari’i ’ia māramarama i te ’evanelia. I roto i te mau huru tuha’a ato’a o tō rātou orara’a, e tāmau noa teie mau tamari’i tao’a rahi i te horomi’i i te mau ha’amāramaramara’a, i te fa’atupu ’e i te ha’amanino i tō rātou mau mana’o, ’e i te ravera’a ’e i te fa’a’itera’a i te mau mea i ’itehia mai e rātou. ’Ua ti’a mau roa te reira nō te ’evanelia, nō te mea, ’ua ineine te mau tamari’i ’e e hina’aro ’ū’ana tō rātou ’ia ’apo mai i te mau parau mau ’ōhie. E mea pūai ’e te vi’ivi’i ’ore tō rātou fa’aro’o i roto i te mau mea pae vārua, ’e e rave rātou i te taime tāta’itahi ’ei taime nō te ’apora’a mai. E fa’a’ohipa rātou ma tō rātou iho hina’aro i te mau mea tā rātou i ’apo mai, noa atu ē, ’aita i hope roa tō rātou hāro’aro’ara’a. Mai teie tō tātou pā’āto’a huru e fāri’i ai i te ’evanelia. Mai tā te Fa’aora i ha’api’i, « ’O tē ’ore e fāri’i i te bāsileia o te Atua mai te tamaiti iti ra, e ’ore roa atu ïa e ō i roto » (Luka 18:17).

Te pi’ira’a ’ia ha’api’i i te mau tamari’i e ti’aturira’a mo’a ïa, ’e e tupu ato’a mai rā te mana’o teimaha i te tahi taime. ’A ha’amana’o rā ē, nā tō ’oe Metua i te ao ra i pi’i ia ’oe, ’e e pāturu ’oia ia ’oe. Nā te Fatu teie ’ohipa, ’e ’ia tāvini ana’e ’oe « ma tō ’outou ’ā’au ato’a, te pūai ato’a, te mana’o ato’a, ’e te itoito ho’i » (Te Ha’api’ira’a Tumu ʼe te mau Fafaura’a 4:2), e fa’a’ā’ano ’oia i tō ’oe mau ’aravihi, mau hōro’a, ’e mau tāreni, ’e e ha’amaita’i tā ’oe tāvinira’a i te orara’a o tā ’oe mau pīahi.