Piha Paraimere

Pāhono i te mau hina’aro o te mau tamari’i huma

E hōpoi’a nā te feiā fa’atere o te Paraimere ’ia ha’api’i i te ’evanelia a Iesu Mesia i te mau tamari’i ato’a, tae noa atu i te mau tamari’i huma. I te Paraimere, tītauhia ’ia fāri’i poupouhia te mau tamari’i ato’a, ’ia herehia, ’ia fa’a’amuhia ’e ’ia fa’aō-ato’a-hia mai. I roto i te reira huru ravera’a, e mea ’ōhie a’e nō te mau tamari’i ’āto’a ’ia hāro’aro’a i te here ’o tō tātou Metua i te ao ra ’e ’o Iesu Mesia ’e ’ia fāri’i ’e ’ia ’ite ato’a i te fa’aurura’a o te Vārua Maita’i. E tauturu te mau mana’o i muri nei ia ’outou ’ia pāhono i te mau hina’aro o te mau tamari’i huma.

• ’Ia ’ite i te mau hina’aro ta’a ’ē o te tamari’i. Te rāve’a maita’i a’e nō te rave i te reira ’o te paraparaura’a ïa i te mau metua o te tamari’i ’aore ra i te feiā utuutu. ’A hi’o nāhea te tamari’i ’ia ’apo maita’i a’e i te ’ite ’e e aha te mau ravera’a maita’i a’e. ’Ia ’āparau ato’a ’outou ’e te tahi atu feiā fa’atere ’e te mau ’orometua o te Paraimere tei ’ite ’e e mau mana’o tō rātou nō te fa’a’ite mai.

• ’A ha’amau i te hō’ē vāhi au maita’i i reira te tamari’i tāta’itahi e ’ite ai i te hau ’e te here. ’Ia ’ite ’outou i te i’oa o tā ’outou mau pīahi ato’a ’e ’a tauturu ia rātou ’ia ’ite e fāri’i-maita’i-hia rātou, ’ua herehia ’e e fa’aōhia mai rātou. Pinepine te mau tamari’i huma i te fa’a’inohia, nō reira, ’a ’imi i te mau rāve’a nō te ha’apōpou i tō rātou mau huru maita’i.

• Rave i te mau fa’atanora’a ’ia nehenehe te tā’āto’ara’a ’ia ’āmui mai. E ravehia te mau tāuiuira’a ha’iha’i nō te mau ’ātivite ’ia pāpū ē, e raupa mai te mau tamari’i ato’a i te ha’api’ira’a, tae noa atu i te mau tamari’i huru fifi i te pae tino ’e i te pae manava. ’Ei hi’ora’a, mai te mea e tītau te ’ātivite e fa’a’ite i te hō’ē hōho’a, e nehenehe ’outou e hīmene i te hō’ē hīmene e tū’ati i ni’a i te reira ’ohipa, nō te fa’aō mai i te mau tamari’i e fifi ra i te pae nō te hi’ora’a.

• Ha’amau i te mau peu ’e te mau fa’anahora’a matarohia nō te piha ha’api’ira’a. Hō’ē rāve’a nō te rave i te reira ’oia ho’i, e hāmani i te hō’ē hōho’a pia ’e te tārena nō te terera’a o te piha ha’api’ira’a. Tei roto i tā ’outou tārena, te mau pure, te taime ha’api’ira’a, ’e te taime ’ātivite. E tauturu te reira ’ia fa’aiti mai i te mau mana’o pāpū ’ore ’o te nehenehe e fa’arahi i te mana’o pe’ape’a i roto i te tahi mau tamari’i.

• Fa’a’ohipa i te mau tāpa’o ’ite-mata. Te mau tamari’i e fifi nei nō te raupa i te ha’api’ira’a ’aore rā, te mau tamari’i e fifi nei i roto i tō rātou mau huru, mea fana’o a’e nō rātou te mau tāpa’o ’ite-mata, mai te mau hōho’a e fa’a’ite ra i te mau peu tano, mai te ’āfa’ira’a i te rima i ni’a hou ’a pāhono ai i te hō’ē uira’a.

• ’Ia hāro’aro’a nō te aha te mau huru fifi i tupu ai. ’A ha’api’i nō ni’a i te huma ’aore rā, te tahi atu mau huru ’o te nehenehe e tūra’i i te hō’ē tamari’i ’ia rave i te mau peu au ’ore. ’Ia ara maita’i i te ’ohipa e tupu ra ’ia tupu ana’e mai te mau huru fifi. I roto i te vārua pure, ’a feruri nāhea ’ia taui i te huru i taua taime ra nō te pāturu maita’i a’e i te reira tamari’i.