26 nō Tītema–1 nō Tēnuare

E hōpoi’a nā tātou tō tātou iho ha’api’ira’a mai

’A tai’o ai ’oe i te mau pāpa’ira’a mo’a i roto i teie fa’anahora’a, ’a pāpa’i i te mau mana’o pae vārua e ō mai i roto i tō ’oe ferurira’a. E ’ite ’oe ē, i roto i te fa’anahora’a ato’a o teie buka ha’api’ira’a, tē vai ra te mau ’ātivite nā te mau tamari’i ’āpī ’e te mau tamari’i pa’ari a’e, terā rā, e nehenehe ’oe e fa’atano te mau ’ātivite ato’a i tā ’oe piha.

Tītau i te mana’o

I te ha’amatara’a o tā ’oe piha, ’a vaiho i te mau tamari’i ’ia fa’a’ite mai i te mau mea tā rātou i ’apo mai nō ni’a i te ’evanelia. ’Ei hi’ora’a, i teie hepetoma e ani ’oe ia rātou ’ia fa’ati’a mai i te mau ’ā’amu i auhia e rātou nō Iesu Mesia.

Ha’api’i i te ha’api’ira’a tumu : Te mau tamari’i ’āpī

Tē hina’aro nei Iesu Mesia ’ia pe’e au iāna.

E tai’o ’oe ’e te mau tamari’i e rave rahi ’ā’amu nō roto mai i te orara’a o Iesu Mesia i teie matahiti. ’A tauturu i te mau tamari’i ’ia hāro’aro’a ē, te tumu tātou e ha’api’i mai ai i teie mau ’ā’amu ’oia ho’i nō te pe’e maita’i a’e i te hi’ora’a maita’i roa o Iesu Mesia.

Te mau ’ātivite e au

• ’A parau i te mau tamari’i i te anira’a a te Fa’aora, « ’A pe’e mai iā’u », e ’itehia i roto i te Mataio 4:18–22. ’A ha’uti i te hō’ē ’ātivite i reira te hō’ē tamari’i e rave ai i te hō’ē ’ohipa, ’e i muri iho e parau ai i te tahi atu mau tamari’i, « ’A pe’e mai iā’u ». E ani i te tahi atu tamari’i ’ia tāpiti i te ha’uti.

• ’A fa’a’ite i te mau hōho’a nō te mau ta’ata e pe’e ra i te Fa’aora nā roto i te mau rāve’a huru rau, i te ’anotau ’a tāvini ai ’oia i te tāhuti nei, ’e i tō tātou nei ’anotau. E ’itehia ia ’oe te mau hōho’a i roto i te Buka hōho’a ’evanelia ’aore rā, i roto i Te mau ve’a a te ’Ēkālesia. E nehenehe ato’a ’oe e fa’a’ite i te video « Light the World [Te māramarama o te ao nei] » (ChurchofJesusChrist.org). ’A vaiiho i te mau tamari’i ’ia ’imi mai e mea nāfea te mau ta’ata i te pe’era’a i te Fa’aora.

• ’A tauturu i te mau tamari’i ’ia feruri i te mau mea tā rātou e rave nei nō te pe’e i te Fa’aora. E hōro’a mai te hīmenera’a « Sans tarder, je recherche mon Sauveur » (Chants pour les enfants, 67) ia rātou te tahi mau mana’o. ’A vaiiho ia rātou e pāpa’i hōho’a ia rātou iho e rave ra i te reira mau mea.

E noaa i te mau tamari’i tō rātou iho ’itera’a pāpū nō te parau mau o te pāpa’ira’a mo’a.

E parau mau te mau pāpa’ira’a mo’a.

E noa’a i te mau tamari’i te hō’ē ’itera’a pāpū ē, e parau mau te mau pāpa’ira’a mo’a, hou rātou ’a ’ite ai i te tai’o. ’A tuatāpapa ai ’oe i te mau pāpa’ira’a mo’a ’e te mau tamari’i i teie matahiti, e nehenehe ’oe e tauturu ’ia ’ite rātou iho ē, e parau mau te mau pāpa’ira’a mo’a.

Te mau ’ātivite e au

• E ani i te mau tamari’i ’ia parau mai nō ni’a i te mau tao’a hōro’a au-roa-hia, ’o tā rātou i fāri’i i te mahana fānaura’a ’aore rā, i te tahi atu mau taime. ’Āfa’i mai i te hō’ē buka pāpa’ira’a mo’a i pū’ohuhia ’ei tao’a hōro’a, e vaiiho i te hō’ē tamari’i e tātara i te reira, ’e ’ia fa’a’ite pāpū mai ē, e hōro’a te mau pāpa’ira’a mo’a nō tātou nō ’ō mai i te Metua i te ao ra ra.

• ’A fa’a’ite i te mau tamari’i i te tahi mau buka ’ā’amu mana’o-noa-hia, ’e e ani ia rātou e aha tā rātou mau ’ā’amu au roa a’e. ’A fa’a’ite ia rātou te mau pāpa’ira’a mo’a, ’e ’a fa’a’ite pāpū ē tei roto i te mau pāpa’ira’a mo’a te parau a te Atua nō tātou. Tē fa’ati’a nei te reira nō te mau ta’ata tei ora mau na ’e ’ua tupu mau iho ā te mau mea.

• ’A fa’a’ite i te mau poro’i e ’itehia i roto i te 2 Timoteo 3:15 ’e te Moroni 10:3–5, ma te tauturu i te mau tamari’i ’ia fa’ahiti fa’ahou mai i te tahi mau pereota. E tauturu ia rātou ’ia hāro’aro’a ē, e ’ite mau rātou iho e parau mau te mau pāpa’ira’a mo’a.

• ’A huna i te hō’ē hōho’a nō te Fa’aora, ’e ’a hōro’a i te tahi mau tāpa’o i te mau tamari’i nō te tauturu ia rātou ’ia ’imi mai i te reira. E tauturu i te mau tamari’i ’ia hāro’aro’a, e nāhea te ’imira’a i te mau pāpa’ira’a mo’a i te tauturu ia tātou ’ia ’ite maita’i ia Iesu Mesia. E vaiiho i te tamari’i, te tahi i muri mai i te tahi, ’ia huna i te hōho’a ’e ’ia hōro’a i te mau tāpa’o i te tahi atu mau tamari’i.

• Hīmene ’āmui i te hīmene nō te ha’api’i mai i te ’evanelia, mai te « Quand je lis l’Écriture sainte » (Chants pour les enfants, 66), ’e e tauturu i te mau tamari’i ’ia rave i te mau ’ohipa ’ia au i te mau ta’o. ’A fa’a’ite i te mau tamari’i hō’ē ’aore rā, e piti o tā ’oe mau pāpa’ira’a mo’a au roa, ’e e parau ia rātou e mea nāfea tō ’oe ’itera’a ē, e parau mau teie mau pāpa’ira’a mo’a. Mai te mea tē vai ra tā te mau tamari’i mau pāpa’ira’a mo’a ’aore rā, mau ’ā’amu pāpa’ira’a mo’a au roa, e ani ia rātou ’ia fa’a’ite mai.

Ha’api’i i te ha’api’ira’a tumu : Te mau tamari’i pa’ari a’e

Tē hina’aro nei Iesu Mesia ’ia ha’api’i mai au nō ni’a iāna ’e ’ia pe’e iāna.

’A feruri e mea nāhea tō ’oe ha’api’ira’a mai nō te ’ite maita’i ia Iesu Mesia. E aha tā ’oe e rave nō te tauturu i te mau tamari’i ’ia ha’api’i mai nō ni’a iāna ’e ’ia pe’e iāna ?

Te mau ’ātivite e au

• E ani i te mau tamari’i ’ia paraparau mai nō ni’a i te hō’ē hoa rahi tā rātou i matau ’e ’ia fa’ata’a mai e mea nāhea teie ta’ata i te rirora’a mai ’ei hoa. ’A tai’o ’e ’a ’āparau Ioane 5:39 ’e Ioane 14:15 nō te ’ite i te mau rāve’a, tātou e nehenehe ai e ’ite ’ua fātata atu tātou ia Iesu. E ani i te mau tamari’i ’ia fa’a’ite mai i te taime ’a ’ite ai rātou ’ua fātata atu rātou iāna.

• ’A fa’aori haere i tā ’oe mau piahi ’ati a’e te fare purera’a. E ani i te mau tamari’i ’ia ’āfa’i i te rima i ni’a ’ia ’ite ana’e rātou i te hō’ē mea i roto i te tere ori-haere-ra’a, ’o tē fa’aha’amana’o ia rātou i te hō’ē rāve’a nō te pe’e i te Fa’aora (mai te vāhi bāpetizora’a ’aore rā, hō’ē hōho’a).

• E hīmene ’e te mau tamari’i i te hō’ē hīmene nō ni’a i te pe’era’a ia Iesu Mesia, mai te « Mai, pe’e mai » (Te mau Hīmene, N°58). E ani i te mau tamari’i ’ia fa’a’ite mai i te taime ’a pe’e ai rātou i te hi’ora’a o te Fa’aora.

E nehenehe au e tuatāpapa i te mau pāpa’ira’a mo’a nō’u iho.

’A tai’o ai ’oe i te mau pāpa’ira’a mo’a ’e te mau tamari’i, ’e ’a ui ai ia rātou i te mau uira’a, e hōro’a ’oe ia rātou te ha’apāpūra’a ē, e nehenehe rātou e ’apo mai nā roto mai i te mau pāpa’ira’a mo’a, ’e e roa’a mai ia rātou te mau tao’a faufa’a rahi o te ’ite.

Te mau ’ātivite e au

• E tai’o ’āmui i te Ioane 5:39 ’e Te ’Ohipa 17:10–11,’e e ani i te mau tamari’i e aha tā rātou i ha’api’i mai nō ni’a e nāhea i te tuatāpapa i te mau pāpa’ira’a mo’a.

• ’A mā’iti i te tahi mau pāpa’ira’a mo’a ’ōhie ’e te mana o te Faufa’a ’Āpī, ’a pāpa’i tāta’itahi i te reira i ni’a i te hō’ē papie, ’e ’a huna atu ai. ’A hāmani i te tahi mau tāpa’o ’o tē arata’i i te mau tamari’i i roto i te ha’uti « ’imira’a tao’a » nā roto i te piha ha’api’ira’a ’aore rā nā roto i te ti’ahapa o te fare purera’a nō te ’imi mai i teie mau pāpa’ira’a mo’a. ’Ia ’ite‑ana’e-hia mai ia rātou te hō’ē pāpa’ira’a mo’a, e ’āparau e aha te aura’a te pāpa’ira’a mo’a ’e nō te aha te reira i riro ai ’ei tao’a rahi.

• ’A fa’a’ite i te tahi mau pāpa’ira’a mo’a tā ’oe e fa’ariro nei ’ei tao’a rahi, ’e ’a fa’ata’a nō te aha te reira i riro ai ’ei mea faufa’a nō ’oe. ’Ei piha ha’api’ira’a, ’a tāpura i te mau pāpa’ira’a mo’a tao’a rahi tā te mau tamari’i i ’ite mai i roto i te Faufa’a ’Āpī i teie matahiti—i te fare ānei ’aore rā, i te taime nō te Paraimere.

• ’A fa’atupu i te hō’ē ’āparaura’a ’e te mau tamari’i, nō ni’a nō te aha e mea fifi i te tahi taime ’ia tai’o i te mau pāpa’ira’a mo’a. E ani i te mau tamari’i ’ia hōro’a mai i te rāve’a nō ni’a i te tuatāpapara’a i te mau pāpa’ira’a mo’a. E ani ato’a ia rātou ’ia fa’a’ite mai i te tahi mau ’itera’a rau maita’i tei noa’a ia rātou nō ni’a i te mau pāpa’ira’a mo’a.

• ’A tauturu i te mau tamari’i ’ia hāmani i te hō’ē tārena ’ōhie ’o tā rātou e nehenehe e fa’a’ohipa nō te tāpa’o, e aha te pinepinera’a tā rātou tai’ora’a i te mau pāpa’ira’a mo’a. E fa’aha’amana’o teie tārena ia rātou ’ia tai’o i te mau pāpa’ira’a mo’a i te mau mahana ato’a.

E hina’aro vau i tō’u iho ’itera’a pāpū.

E hina’aro te mau tamari’i tā ’oe e ha’api’i ra i tō rātou iho ’itera’a pāpū nō tō tātou Metua i te ao ra ’e nō Iesu Mesia. E aha tā ’oe e rave nō te fa’auru ia rātou ’ia ’apo mai nō rātou iho i te parau mau ?

Te mau ’ātivite e au

• ’A fa’ati’a i te ’ā’amu nō nā paretenia hō’ē ’ahuru (hi’o Mataio 25:1–13 ; hi’o ato’a « Pene 47 : Nā paretenia hō’ē ’ahuru », i roto Te mau ’ā’amu o te Faufa’a ’Āpī, 118–20, ’aore rā, te video tano i ni’a ChurchofJesusChrist.org). E ui i te mau tamari’i i te mau uira’a mai teie : Nāhea tō tātou ’itera’a pāpū e riro ai mai te mau lamepa ? Nō te aha e mea faufa’a ’ia roa’a tō tātou iho ’itera’a pāpū ?

• E ’āparau e aha tā tātou e rave nō te ha’apūai i tō tātou ’itera’a pāpū ? Nō te mau mana’o, e ani i te mau tamari’i ’ia ’imi mai Ioane 7:17 ’e Moroni 10:3–5. E ani ia rātou ’ia fa’a’ite mai i te mau mea tā rātou i ’ite e parau mau.

• ’A ani i te mau tamari’i e tauturu mai ia ’oe ’ia tāpa’o i te mau ’ōfa’i patura’a i te mau parau mau ’o te fa’atupu i tō tātou ’itera’a pāpū (hi’o Mau tumu parau o te ’evanelia, « ’Itera’a pāpū », topics.ChurchofJesusChrist.org). E vaiiho i te mau tamari’i ’ia fa’a’ohipa i te mau ’ōfa’i nō te patu i te hō’ē patura’a e fa’ahōho’a i te hō’ē ’itera’a pāpū.

Fa’aitoito i te ha’api’ira’a mai i te fare

Nāhea ’oe i te fa’aitoito i te mau tamari’i ’e tō rātou mau metua, ’ia ha’api’i mai nā roto mai i te Faufa’a ’Āpī i te fare ? ’Ei hi’ora’a, e nehenehe ’oe e ani i te mau tamari’i ’ia tāmau ’ā’au i te hō’ē o te mau pāpa’ira’a mo’a tā ’outou i ’āparau i roto i te piha ha’api’ira’a (e mea maita’i ’ia tāpūpū te pāpa’ira’a mo’a ’ei pereota potopoto) ’e ’ia fa’a’ite i te ’īrava i tō rātou ’utuāfare.

Ha’amaita’i i tā tātou ha’api’ira’a

E tāuiui i te mau ’ātivite ’ia au i te matahiti ’e te ’aravihi o te mau tamari’i tā ’outou e ha’api’i ra. E hina’aro te mau tamari’i ’āpī i te mau ha’amāramaramara’a pāpū maita’i ’e ’ia ’apo mai nā roto i te mau rāve’a ha’api’ira’a rau. ’Ia haere te tamari’i i te pa’arira’a, e nehenehe rātou e rave hau atu ’e te maita’i a’e paha nō te fa’a’ite i tō rātou mau mana’o. ’A hōro’a ia rātou i te mau rāve’a nō te fa’a’ite mai, ’ia hōro’a mai i te ’itera’a pāpū ’e ’ia fa’aō mai. Hōro’a i te tauturu mai te mea e hina’arohia. (Hi’o Ha’api’ira’a mai tā te Fa’aora,, 25–26.)