16–22 nō Tēnuare

Ioane 1

ʼUa ʼitea ia māua te Mesia

’A tai’o ai ’oe i te Ioane 1, ’a pāpa’i i te mau mana’o pae vārua tā ’oe e fāri’i. E nehenehe te fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare e tauturu ia ’oe ’ia tuatāpapa i teie pene. E nehenehe te mau ’ātivite e au i raro nei e hōro’a mai i te mau mana’o nō te tauturu i te mau tamari’i ’ia ha’api’i mai i te mau parau tumu i roto i te Ioane 1. E nehenehe e fa’aau i te mau ’ātivite nō te mau tamari’i pa’ari a’e, ’e mai te mea e tītauhia, nō te mau tamari’i ’āpī.

Tītau i te mana’o

Nō te tauturu i te mau tamari’i ’ia fa’a’ite mai i te mea tā rātou i ’ite nō ni’a ia Iesu, ’a fa’a’ite i te mau hōho’a nōna i te ravera’a i te tahi o tāna mau ’ohipa i fa’ata’ahia i roto i te Ioane 1 (mai te hāmanira’a i te fenua ’aore rā te ha’api’ira’a i te ’evanelia). E ani i te mau tamari’i ’ia fa’ata’a mai i te mau mea tā te hōho’a e fa’a’ite nei.

Ha’api’i i te ha’api’ira’a tumu : Te mau tamari’i ’āpī

Ioane 1:1–2

I ora na Iesu Mesia i pīha’i iho i tō tātou Metua i te ao ra hou ’oia ’a fānauhia mai ai.

’Ua ha’api’i Ioane ē, ’ua ora nā Iesu Mesia i pīha’i iho i te Atua hou tōna orara’a i te tāhuti nei. ’Ua ora ato’a na tātou i pīha’i iho i te Atua hou tātou ’a fānauhia mai ai (hi’o « Te ’Utuāfare : E Poro’i i tō te Ao nei », ChurchofJesusChrist.org). Nāfea ’oe i te ha’api’i i te mau tamari’i i teie parau mau ?

Te mau ’ātivite e au

• ’A fa’ata’a ē, « te logo » i roto i te Ioane 1:1 ’o Iesu ïa. ’A tai’o pūai i te ’īrava, ’e e ani i te mau tamari’i ’ia parau « Iesu » i te mau taime ato’a e tai’o ai ’oe « te logo. » Fa’a’ite i te fa’ahōho’ara’a tei topahia te i’oa « Premortal Life » (ChurchofJesusChrist.org ; hi’o ato’a ’A hi’o na i tā ’outou mau tamari’i ri’i [2008], 15). ’A fa’ata’a ē, i ora nā Iesu Mesia i pīha’i iho i tō tātou Metua i te ao ra, hou ’oia ’a haere mai ai i te fenua nei.

• ’A pāpa’i hōho’a i te mau rāve’a tauturu mai teie, nō te ha’api’i i te mau tamari’i nō ni’a i tō tātou orara’a i pīha’i iho i te Atua hou tātou ’a haere mai ai i te fenua nei : « ’Ōmuara’a : Te fa’anahora’a a tō tātou Metua i te ao ra » (i roto Te mau ’ā’amu o te Faufa’a ’Āpī, 1–5, ’aore rā, te video e tano i ni’a ChurchofJesusChrist.org) ’aore rā « Premortal Life » i roto i te Arata’i nō te mau pāpa’ira’a mo’a (scriptures.ChurchofJesusChrist.org).

• E ani i te hō’ē metua ’ia haere mai ’e te hō’ē ‘aiū i roto i te piha ha’api’ira’a. E ani i te mau tamari’i i hea te vārua o teie aiū i te orara’a hou ’oia ’a fānauhia mai ai. E fa’aha’amana’o i te mau tamari’i ē, i riro na rātou ’ei ’aiū, ’e ’a fa’a’ite pāpū ē, ’ua ora ato’a rātou i te ra’i i pīha’i iho i te Metua i te ao ra ’ei tamari’i vārua hou rātou ’a fānauhia mai ai.

Ioane 1:3

’Ua hāmani Iesu i te mau mea ato’a.

Te ’itera’a i te ’ohipa a te Mesia ’ei Rahu Nui, e tauturu te reira i te mau tamari’i tā ’oe e ha’api’i ra, ’ia fa’arahi i tō rātou fa’atura iāna.

Te mau ’ātivite e au

• ’A tai’o Ioane 1:3 ’e te mau tamari’i, ’e ’a fa’a’ite i te hōho’a nō roto mai i te fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare. ’A tauturu i te mau tamari’i ’ia tāmau ’ā’au i te pereota « nā [Iesu Mesia] i hāmani i te mau mea ato’a ».

• ’A fa’a’ite i te hō’ē o te mau tamari’i i te hō’ē hōho’a nō te hō’ē o te mau hāmanira’a a te Fatu. E vaiiho iāna ’ia fa’ata’a mai i te reira i te tahi atu mau tamari’i, ’e e ani ia rātou ’ia ’imi e aha tē fa’ata’ahia ra.

• E ani i te tamari’i tāta’itahi ’ia fa’a’ite mai i te i’oa o te hō’ē mea tā Iesu i hāmani. Tauturu i te mau tamari’i ’ia feruri i te mau rāve’a nō te aupuru i te fenua ’e te tahi atu mau hāmanira’a a te Fatu.

’Ua hāmani Iesu Mesia i te ao nei ’e te mau mea ato’a i roto.

Ioane 1:35–51

E nehenehe au e ani ia vetahi ’ē ’ia haere mai ia Iesu Mesia ra ’e ’ia ha’api’i nō ni’a iāna.

Tē vai ra i roto i te Ioane 1 te mau ’ā’amu o te mau pipi tei ani i te ta’ata « ’A haere mai, ’a hi’o » ē, ’o Iesu te Tamaiti a te Atua. E nehenehe ato’a te mau tamari’i ri’i e pe’e i teie hi’ora’a.

Te mau ’ātivite e au

• ’A fa’ata’a e mea nāhea tō Anederea ha’api’ira’a mai nō ni’a ia Iesu, ’e ’a parau e mea nāhea tō Anederea i muri iho, ha’api’ira’a ia Petero (hi’o Ioane 1:35–42). ’A fa’a’ite e mea nāhea tō ’oe ha’api’ira’a mai nō ni’a i te ’Ēkālesia, ’aore rā, e ani i te hō’ē melo ’āpī ’ia fa’a’ite mai e mea nāfea tōna ha’api’ira’a mai nō ni’a i te ’Ēkālesia.

• ’A fa’a’ite i te ’ā’amu o Philipi i te anira’a ia Natanaela « ’A haere mai, ’a hi’o » (Ioane 1:43–51). E huna i te hō’ē hōho’a nō Iesu i roto i te hō’ē ’āfata, ’e e ani i te hō’ē tamari’i « ’A haere mai, ’a hi’o » i te reira, ’e i muri iho ’ia parau atu i te tahi atu mau tamari’i e aha te mea tāna i ’ite.

• E vaiiho i te mau tamari’i ’ia peni i te ’api ’ātivite o teie hepetoma, ’e e fa’aitoito ia rātou ’ia fa’a’ohipa i te reira nō te ani i te hō’ē ta’ata ’ia ha’api’i mai nō ni’a ia Iesu.

• E ani i te hō’ē tamari’i ’ia fa’ati’a mai i te hō’ē taime ’a hōro’a ai ’oia i te hō’ē mea, mai te hō’ē tao’a ha’uti, ’aore rā, te hō’ē tao’a hōro’a, i te hō’ē ta’ata. Nāhea tātou tātou ’ia fa’a’ite i te ’evanelia ? Fa’ati’a i te hō’ē ā’amu nō te hō’ē tamari’i tei fa’a’ite i te ’evanelia i te hō’ē hoa, mai te « Hō’ē hoa ’e hō’ē misiōnare », Hoa,, Tiurai 2018, 12–13 ; Liahona, Tiurai 2018, 70–71.

Ha’api’i i te ha’api’ira’a tumu : Te mau tamari’i pa’ari a’e

Ioane 1:1–5

I ora na Iesu Mesia i pīha’i iho i tō tātou Metua i te ao ra hou ’a fānauhia mai ai.

Nā mua a’e ’oia ’a fānauhia mai ai, ’ua rave Iesu Mesia i te mau ’ohipa faufa’a roa i roto i te fa’anahora’a a tō tātou Metua i te ao ra. ’Ia tai’o ana’e ’oe i te Ioane 1:1–5, e aha te mea e fa’atupu i te māere i roto ia ’oe nō ni’a i te ’ohipa a te Mesia hou te tāhuti nei ?

Te mau ’ātivite e au

• E ani i te mau tamari’i, ’ua ’ite ānei rātou i te hō’ē mea nō ni’a i te ’ohipa tā Iesu i rave hou ’oia ’a fānauhia mai ai. E ani ia rātou ’ia ’imi mai i te pāhonora’a i roto i te Ioane 1:1–5. E roa’a te tauturu ’ia hi’o atu i roto i te ’Īritira’a a Iosepha Semita, Ioane 1:1–5 (i roto te Parau hi’u Bibilia).

• E fa’a’ite atoʼa i te mau tuha’a o te « ʼOmuaraʼa : Te ʼōpuaraʼa a tō tātou Metua i te ao ra » (i roto Te mau ʼāʼamu nō te Faufaʼa ʼĀpī,1–5, ʼaore rā te video e tano i niʼa ChurchofJesusChrist.org). E ani i te mau tamari’i e aha tā rātou i ha’api’i mai nō ni’a ia Iesu Mesia.

• Tau mahana nā mua atu, e ani i te tahi mau tamari’i ’ia haere ineine mai nō te hōhora mai i te piha ha’api’ira’a te mea o tā rātou i hāmani. ’A fa’a’ite i te mau hōho’a nō te tahi o te mau hāmanira’a a te Fatu, ’e ’a fa’a’ohipa i te Ioane 1:3 nō te fa’ata’a ē, ’ua hāmani Iesu i te fenua nei ’e i te mau mea ato’a i ni’a iho.

Ioane 1:4–9

’O Iesu Mesia tō’u māramarama.

E tauturu te fa’ahōho’ara’a o te māramarama i te mau tamari’i ’ia hāro’aro’a i te Fa’aora ’e i tāna ’evanelia. Nāhea ’oe i te fa’auru i te mau tamari’i ’ia ’imi i te māramarama o te Fa’aora i te taime e au ra tei roto te ao nei i te pōiri ?

Te mau ’ātivite e au

• E ani i te mau tamari’i ’ia tai’o Salamo 27:1 ; Ioane 1:4–9 ; Mosia16:9 ; ’e Te Ha’api’ira’a Tumu ’e te mau Fafaura’a 39:1–2, ma te ’imi mai i te mau pereota e tū’ati i teie mau pāpa’ira’a mo’a. Nāhea Iesu Mesia e riro ai mai te māramarama ?

• ’A fa’a’ite i te hō’ē hōho’a nō te Fa’aora ’e te tahi mau tao’a ’o te hōro’a i te māramarama, mai te mori pata. Nāhea Iesu e riro ai mai teie mau tāo’a ? Nāhea tātou ’ia fa’a’ite i tōna māramarama ia vetahi ’ē ? ’A hīmene ’āmui « O te Fatu ra tō’u māramarama » (Te mau Hīmene,, N°43) ’aore rā, te tahi atu hīmene nō ni’a i te māramarama o te ’evanelia.

• E ani i te mau tamari’i e aha tā rātou e rave i te taime tei roto rātou i te pōiri ’e ’ia ri’ari’a ana’e rātou. ’A fa’a’ite pāpū ē, e nehenehe rātou e fāriu atu i te mau taime ato’a i ni’a i te Fa’aora ’ia ri’ari’a ana’e rātou.

Ioane 1:35–51

’Ei ta’ata pe’e nō Iesu Mesia, e nehenehe au e ani ia vetahi ’ē ’ia pe’e iāna.

’A feruri nāhea ’oe i te fa’a’ohipa i te mau hi’ora’a i roto i te Ioane 1:35–51 nō te fa’aitoito i te mau tamari’i ’ia ani ia vetahi ’ē ’ia ha’api’i mai nō ni’a i te Fa’aora.

Te mau ’ātivite e au

• ’A tauturu i te mau tamari’i ’ia ’imi i roto i te Ioane 1:35–51 te mau mea tā te ta’ata e parau nō te ani ia vetahi ’ē ’ia ha’api’i mai nō ni’a i te Fa’aora. E vaiiho ia rātou ’ia ha’api’ipi’i mai i te mea tā rātou e parau nō te ani i te hō’ē hoa ’ia ’apo mai nō ni’a i te Fa’aora.

• E ani i te mau tamari’i ’ia fa’a’ohipa i te ’api ’ātivite o teie hepetoma, nō te hāmani i te hō’ē parau tītaura’a ’o tā rātou e fa’a’ohipa nō te ’ani manihini i te hō’ē ho’a ’aore rā i te hō’ē melo o te ’utuāfare ’ia ha’api’i hau mai nō ni’a ia Iesu Mesia.

• ’A vaiiho te taime i te mau tamari’i ’ia fa’a’ite mai i te piha ha’api’ira’a te hō’ē mea o tā rātou i au roa. Tauturu i te mau tamari’i ’ia ’ite e nāhea ’ia fa’a’ite atu i te ’evanelia, penei a’e mai te hōro’ara’a i te tahi mau mea tā tātou e au roa (’ei hi’ora’a, e māta’ita’i i te video « Good Things to Share [Te mau mea maita’i e fa’a’ite] » i ni’a ChurchofJesusChrist.org).

Fa’aitoito i te ha’api’ira’a i te fare

Fa’aitoito i te mau tamari’i ’ia ani i te hō’ē ta’ata tā rātou i here ’ia ha’api’i hau mai nō ni’a ia Iesu Mesia.

Ha’amaita’i i tā tātou ha’api’ira’a

Fa’a’ohipa i te mau tauturu fa’ahi’ora’a. ’Imi i te mau rāve’a nō te tauturu i te mau tamari’i ’ia feruri i te mea tā rātou e ha’api’i mai nei i roto i te mau pāpa’ira’a mo’a. E nehenehe ’outou e rave i te reira ’e te mau hōho’a pēni, te mau hōho’a pāpa’i, te mau video, te mau pepe hurio, ’aore rā, te mau ha’uti.