16–22 nō Tēnuare

Ioane 1

ʼUa ʼitea ia mātou te Mesia

’A tai’o ’e ’a feruri ai ’outou nō ni’a i te Ioane 1, ’a tāpa’opa’o i te mau mana’o e tae mai. E aha te mau poro’i tā ’outou i ’ite e mea faufa’a rahi nō ’outou ’e nō tō ’outou ’utuāfare ? E aha tā ’outou e nehenehe e fa’a’ite i roto i te piha ha’api’ira’a ?

Pāpa’i i te mau mana’o e tae mai

’Ua ui a’enei tō ’outou mana’o ē, e fāri’i ānei ’outou ia Iesu nō Nazareta ’ei Tamaiti a te Atua ’āhani i ora ’outou i te tau o tāna tāvinira’a tāhuti nei ? E mau matahiti e rave rahi tō te mau ’āti ’Īserā’ela, mai ia Anederea, Petero, Philipi ’e Natanaela, tīa’ira’a ’e purera’a ’ia tae mai te Mesia i parauhia. I tō rātou fārereira’a iāna, ’ua nāhea rātou i te ’itera’a ē, ’o ’oia taua ta’ata ra tā rātou i ’imi noa na ? Mai tā tātou ato’a e ha’api’i ’ia ’ite i te Fa’aora—nā roto i te fāri’ira’a i tāna anira’a ’ia « haere mai ’e ’a hi’o » tātou iho (Ioane 1:39). E tai’o tātou nō ni’a iāna i roto i te mau pāpa’ira’a mo’a. E fa’aro’o tātou i tāna ha’api’ira’a tumu. E ha’apa’o tātou i te huru ’oia e ora. E putapū tātou i tōna Vārua. ’A haere noa ai tātou, e ’ite mai tātou, mai ia Natanaela ē, ’ua ’ite te Fa’aora ’o vai tātou ’e ’ua here ’oia ia tātou ’e ’ua hina’aro ho’i ’ia fa’aineine ia tātou nō te fāri’i i te mea « e iti tenā i tā [’outou] e ’ite atu ā » (Ioane 1:50).

Mau mana’o nō tā’u iho tuatāpapara’a pāpa’ira’a mo’a

’O vai Ioane ?

E pipi Ioane nō Ioane Bāpetizo ’e i muri mai ’ua riro mai ’oia hō’ē o te feiā ’āpe’e mātāmua a Iesu Mesia ’e hō’ē o tāna ’ahuru ma piti ’āpōsetolo. Nāna i pāpa’i i te ’Evanelia a Ioane, te tahi mau rata ’e te buka Apokalupo. I roto i tāna ’Evanelia, tē parau nei Ioane iāna ’ei pipi « here a Iesu ra » ’e ’ei « taua pipi ato’a ra » (Ioane 13:23 ; 20:3). Nō te pūai rahi o tōna hina’aro ’ia poro i te ’evanelia ’ua ani ’oia ’ia fa’aea mai i ni’a i te fenua nei ē tae roa i te Tae-Piti-Ra’a mai o te Fa’aora, ’ia ti’a iāna ’ia hōpoi mai i te mau vārua i te Mesia ra (hi’o Te Ha’api’ira’a Tumu ’e te mau Fafaura’a 7:1–6).

Hi’o ato’a Arata’i nō te mau pāpa’ira’a mo’a, « Ioane », « Ioane, ’Evanelia a ».

Ioane 1:1–5

« I te mātāmua ra, i te Atua ra ho’i » Iesu Mesia.

’Ua ha’amata Ioane i tāna ’Evanelia nā roto i te fa’ata’ara’a i te ’ohipa tā te Mesia i rave hou ’oia ’a fānauhia ai : « I vai na te Logo [Iesu Mesia] i te mātāmua ra, i te Atua ra ». E aha te ha’api’ira’a tā ’oe e ’apo nei i roto i te mau ’īrava 1–5 nō ni’a i te Fa’aora ’e tāna ’ohipa ? E nehenehe ’outou e ’ite mai i te mau ha’amāramaramara’a i roto i te ’Īritira’a a Iosepha Semita, Ioane 1:1–5. ’Ia ha’amata ’oe i te tuatāpapa i te orara’a o te Fa’aora, nō te aha e mea faufa’a ’ia ’ite e aha tāna ’ohipa hou te tāhuti nei ?

Ioane 1:1–18

’O Iesu Mesia te « Māramarama mau », te Tamaiti a te Atua.

’Ua fa’auruhia Ioane ’ia ’imi i te Fa’aora maoti te ’itera’a pāpū o Ioane Bāpetizo tei parau ē « i haere mai […] e fa’a’ite i […] te māramarama mau » (Ioane 1:8–9). ’Ua fa’a’ite pāpū ato’a Ioane ma te mana rahi nō te orara’a ’e te misiōni o te Fa’aora.

E mea maita’i paha ’ia hāmani i te hō’ē tāpura nō te mau parau mau tā Ioane i fa’ahiti i roto i tōna ’itera’a pāpū nō te Mesia tei ’ōmua i tāna mau parau (mau ’īrava 1–18 ; hi’o ato’a ’Īritira’a a Iosepha Semita, Ioane 1:1–19). I tō ’oe mana’o, nō te aha Ioane i ha’amata ai i tāna ’Evanelia nā roto i te reira mau parau mau ? ’Ia pāpa’i ’oe i tō ’oe ’itera’a pāpū nō Iesu Mesia—e aha tā ’oe e hina’aro i te fa’a’ite atu ? E aha te mau ’ohipa i tupu tei tauturu ia ’oe ’ia mātau ’e ’ia pe’e i te Fa’aora ? ’O vai tē ha’amaita’ihia ’ia fa’aro’o i tō ’oe ’itera’a pāpū ?

Ioane 1:11–13

E hōro’a mai Iesu Mesia i te « maita’i ra […] ’ei » tamaiti ’e ’ei tamāhine nā te Atua.

Noa atu ē e mau tamaiti ’e e mau tamāhine vārua tātou nā te Atua te Metua, ’ia hara tātou, e fa’aātea tātou ’aore rā e fa’ata’a ’ē tātou iāna. Tē pūpū mai nei Iesu Mesia i te rāve’a ho’ira’a nā roto i tāna tusia tāra’ehara. E feruri i te mea tā te Ioane 1:11–13 e ha’api’i nei nō ni’a i te mau tamāhine ’e te mau tamaiti a te Atua. E feruri ato’a i te mea tā teie mau ’īrava e ha’api’i nei nō ni’a i te huru tātou e fāri’i nei i teie hōro’a : Roma 8:14–18 ; Mosia 5:7–9 ; Te Ha’api’ira’a Tumu ’e te mau Fafaura’a 25:1. E aha te aura’a nō ’oe ’ia roa’a te « maita’i ra […] ’ei » tamāhine ’e ’ei tamaiti nā te Atua ?

Ioane 1:18

Tē fa’a’ite nei te Metua nō tāna Tamaiti.

Tē parau nei te Ioane 1:18 ē ’aita e ta’ata tei ’ite i te Atua. Terā rā tē ha’apāpū nei te ’Īritira’a a Iosepha Semita nō teie ’īrava ē « E ’aore ho’i e ta’ata i ’ite i te Atua i te tahi noa atu taime, maori rā tē vai ra tōna ’itera’a pāpū nō ni’a i te Tamaiti ». E nehenehe e hi’o i te mau hi’ora’a i muri nei i reira te Atua te Metua i te fa’aro’ora’ahia i te fa’a’itera’a nō te Tamaiti : Mataio 3:17 ; 17:5 ; 3 Nephi 11:6–7 ; Iosepha Semita—’Ā’amu 1:17.

Nō te aha e ha’amaita’ira’a te fāna’ora’a i teie mau fa’ati’ara’a ? E aha tā te reira e ha’api’i mai nei nō ni’a i te tā’amura’a i roto ia Iesu Mesia ’e tōna Metua ?

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

’A tuatāpapa noa ai tātou i te mau pāpa’ira’a mo’a, e fāri’i tātou i te fa’aurura’a nō tō tātou orara’a.

Ioane 1:4–10.Nāhea ’outou e nehenehe ai e tauturu i tō ’outou ’utuāfare ’ia hi’o mana’o i te mea e tai’ohia ra nō ni’a i te māramarama i roto i teie mau ’īrava ? E nehenehe te mau melo o te ’utuāfare e fa’a’ohu nō te fa’a’ama i te hō’ē mōrī i roto i te hō’ē piha pōiri ma te fa’a’ite i te huru te Fa’aora e riro nei ’ei Mārarama o tō rātou orara’a. ’Ei reira, ’a tai’o ai ’outou i te Ioane 1:4–10, e ’apo mai paha te mau melo o te ’utuāfare i te tahi fa’ahou mea i roto i te ’itera’a pāpū o Ioane nō ni’a ia Iesu Mesia, te Māramarama o te ao.

Ioane 1:35–36.Nō te aha Ioane Bāpetizo i pi’i ai ia Iesu « te ’Ārenio a te Atua » ? E aha te ha’api’ira’a tā tātou e ’apo nei nō ni’a i teie ti’ara’a i roto i te a’ora’a a Elder Jeffrey R. Holland « ’A hi’o na i te ’Ārenio a te Atua » ’aore rā te a’ora’a a Elder Gerrit W. Gong « Te Tīa’i māmoe maita’i, te ’Ārenio a te Atua ? »(Liahona, Mē 2019, 44–46, 97–101)

Ioane 1:35–46.E aha te mau fa’ahope’ara’a nō te ’itera’a pāpū o Ioane ? E aha te ha’api’ira’a tā tō ’outou ’utuāfare e nehenehe e ’apo mai nō mai i te mau ta’ata i fa’a’itehia i roto i teie mau ’īrava nō ni’a i te fa’a’itera’a i te ’evanelia ?

Ioane 1:45–51.E aha tā Natanaela i rave tei tauturu iāna ’ia roa’a te hō’ē ’itera’a pāpū nō te Fa’aora ? E ani i te mau melo o te ’utuāfare ’ia paraparau nō ni’a i te huru te roa’ara’a mai ia rātou tō rātou ’itera’a pāpū.

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « ’O te Fatu ra tō’u māramarama », Te mau hīmene, N°43.

Ha’amaita’i i tā tātou ha’api’ira’a

Fa’a’ohipa i te mau ha’api’ira’a tao’a. E ani i te mau melo o te ’utuāfare ’ia hi’o mai i te tahi mau tao’a e fa’a’ohipa nō te māramarama i te mau parau tumu i ’itehia i roto i te mau ’īrava tā te ’utuāfare e tai’o ra. ’Ei hi’ora’a, e nehenehe e fa’a’ohipa i te hō’ē mōrī hinu ’ei fa’ahōho’ara’a i te Māramarama o te Mesia (hi’o Ioane 1:4).

Jehovah Creates the Earth [Tē poiete ra Iehova i te ao nei], nā Walter Rane