Hiʼo tei pēnihia i roto i te hiero nō Nauvoo (Illinois, Marite), nā Tom Holdman

23–29 nō Tēnuare

Mataio 3 ; Mareko 1 ; Luka 3

« ’A haʼamaitaʼi i te ’ēʼa o te Fatu »

Ha’amata nā ni’a i te tai’ora’a i te Mataio 3 ; te Mareko 1 ’e te Luka 3. ’Ia pure ’outou nō te Vārua Maita’i ’ia tauturu mai ’ia māramarama i teie mau pene, e hōro’a mai ’oia i te mau mea ta’a ’ē nō ’outou ’A tāpa’opa’o i te reira mau mana’o e tae mai ’e ’a fa’ata’a i te fa’anahora’a nō te rave i te reira.

Pāpa’i i te mau mana’o e tae mai

E ti’a ia Iesu Mesia ’e i tāna ’evanelia ’ia taui ia ’outou. ’Ua fa’ahiti Luka i te hō’ē parau tohu tahito e parau ra nō te mau ’ohipa e tupu nō te taera’a mai te Fa’aora : « ’Ia hope te peho i te fa’a’īhia, ’ia hope te mou’a ’e te mau ’aivi i te ha’apāpūhia ; ’ia fa’atītī’aifarohia te ’ē’a pi’o ’e ’ia ha’amāninahia te ’ē’a pu’upu’u » (Luka 3:5 ; hi’o ato’a Isaia 40:4). E poro’i teie nō tātou pā’āto’a, nō te mau ta’ata ato’a e mana’o ra ē e’ita e haere ’ia taui. Mai te peu pa’i e nehenehe e ha’apāpū i te hō’ē mea ha’uti ’ore mai te mou’a, e mea pāpū ïa e nehenehe tā te Fatu e tauturu ia tātou ’ia fa’a’tītī’aifaro i tō tātou mau ’ē’a tīoioi (hi’o Luka 3:4–5). ’Ia fāri’i tātou i te anira’a a Ioane Bāpetizo e tātarahapa ’e e taui, tē fa’aineine ra ïa tātou i tō tātou ferurira’a ’e tō tātou ’ā’au nō te fāri’i ia Iesu Mesia ’ei reira e ’ite ato’a ai tātou i « te ora a te Atua » (Luka 3:6).

Mau mana’o nō tā’u iho tuatāpapara’a pāpa’ira’a mo’a

’O vai Mareko ?

I roto i te mau ta’ata pāpa’i ’Evanelia, ’o Mareko ’aita i ’ite-rahi-hia i te parau nōna. ’Ua ’ite tātou ē, e hoa misiōnare ’oia nō Paulo, Petero ’e te tahi atu mau misiōnare e rave rahi. E rave rahi ’aivāna’a nō te Bibilia e ti’aturi nei ē, nā Petero i fa’aue ia Mareko e pāpa’i i te mau ’ohipa i tupu i roto i te orara’a o te Fa’aora. Pēnei a’e ’ua pāpa’ihia te ’Evanelia a Mareko nā mua atu i te tahi e toru.

Hi’o ato’a Arata’i nō te mau pāpa’ira’a mo’a, « Mareko. »

Mataio 3:1–12 ; Mareko 1:1–8 ; Luka 3:2–18

’Ua riro te tātarahapara’a ’ei tauira’a rahi roa o te ferurira’a ’e o te ’ā’au.

Te misiōni a Ioane Bāpetizo ’o te fa’aineinera’a ïa i te ’ā’au o te ta’ata ’ia fāri’i i te Fa’aora ’e ’ia riro rahi atu ā mai iāna te huru. Nāhea ’oia i te ravera’a i te reira ? ’Ua pi’i ’oia : « E tātarahapa ’outou » (Mataio 3:2). ’E ’ua fa’a’ohipa ’oia i te mau hōho’a mai te mā’a hotu ’e te sītona nō te ha’api’i nō ni’a i te tātarahapara’a (hi’o Luka 3:9, 17).

E aha te tahi atu mau hōho’a tā ’oe e ’ite ra i roto i te mau fa’ati’ara’a nō te tāvinira’a a Ioane Bāpetizo ? (hi’o Mataio 3:1–12 ; Mareko 1:1–8 ; Luka 3:2–18). E nehenehe e tāpa’opa’o i te reira i roto i tā ’oe mau pāpa’ira’a mo’a ’aore rā e nehenehe e pāpa’i i te hōho’a nō te reira. E aha te ha’api’ira’a a teie mau hōho’a nō ni’a i te ha’api’ira’a tumu ’e te tītaura’a ’ia tātarahapa ?

Te tātarahapara’a mau, e « tauira’a ferurira’a ïa, e hi’ora’a ’ana’anaea nō ni’a i te Atua, nō ni’a i te ta’ata iho ’e nō ni’a i te ao. … [Te aura’a ra], e fāriura’a i te ’ā’au ’e te hina’aro i ni’a i te Atua » (Arata’i nō te mau pāpa’ira’a mo’a, « Tātarahapara’a »). I roto i te Luka 3:7–14, e aha te mau tauira’a tā Ioane e tītau manihini ra i te ta’ata ’ia rave ’ei fa’aineinera’a nō te fāri’i i te Mesia ? Nāhea teie parau a’o e tano ai i ni’a ia ’oe ? E nāhea ’oe i te fa’a’ite ē, ’ua tātarahapa mau ’oe ? (hi’o Luka 3:8).

Hi’o ato’a Russell M. Nelson, « E nehenehe tātou e rave maita’i a’e ’e e ha’amaita’i ia tātou », Liahona, Mē 2019, 67–69 ; Dallin H. Oaks, « Tāmāhia e te tātarahapa », Liahona, Mē 2019, 91–94.

Mataio 3:7 ; Luka 3:7

’O vai te mau pharisea ’e te mau sadukea ?

E mau melo, te mau pharisea, nō te hō’ē pupu pae fa’aro’o ’āti Iuda tei fa’ate’ote’o ia rātou i te ha’apa’o-ti’a-ra’a i te ture a Mose ’e tō te reira mau ’ōro’a. E pupu ’āti Iuda moni rahi te mau sadukea, ma te mana rahi i te pae fa’aro’o ’e i te pae poritita ; ’aita rātou i ti’aturi i te ha’api’ira’a tumu nō te ti’afa’ahoura’a. ’Ua hahi ’ē teie nā pupu i te fā mātāmua nō te mau ture a te Atua.

Hi’o ato’a Mataio 23:23–28 ; Arata’i nō te mau pāpa’ira’a mo’a, « Pharisea », « Sadukea ».

Mataio 3:11, 13–17 ; Mareko 1:9–11 ; Luka 3:15–16, 21–22

’Ua bāpetizohia Iesu Mesia « nō te fa’ati’a i te mau parauti’a ato’a ».

I te bāpetizora’ahia ’oe, ’ua pe’e ’oe i te hi’ora’a o te Fa’aora. E fa’aau i tā ’oe i ha’api’i i roto i teie mau fa’ati’ara’a nō te bāpetizora’a o te Fa’aora i te mea i tupu nō tō ’oe iho bāpetizora’a.

Te bāpetizora’a o te Fa’aora	Tō’u bāpetizora’a
Te bāpetizora’a o te Fa’aora ’O vai tei bāpetizo ia Iesu ’e e aha te mana tāna i mau ?	Tō’u bāpetizora’a ’O vai tei bāpetizo ia ’oe ’e e aha te mana tāna i mau ?
Te bāpetizora’a o te Fa’aora I hea Iesu i te bāpetizora’ahia ?	Tō’u bāpetizora’a I hea ’oe i te bāpetizora’ahia ?
Te bāpetizora’a o te Fa’aora ’Ua nāhea Iesu i te bāpetizora’ahia ?	Tō’u bāpetizora’a ’Ua nāhea ’oe i te bāpetizora’ahia ?
Te bāpetizora’a o te Fa’aora Nō te aha Iesu i bāpetizohia ai ?	Tō’u bāpetizora’a Nō te aha ’oe i bāpetizohia ai ?
Te bāpetizora’a o te Fa’aora ’Ua nāhea te Metua i te ao ra i te fa’a’itera’a ē, ’ua māuruuru ’oia ia Iesu ?	Tō’u bāpetizora’a ’Ua nāhea te Metua i te ao ra i te fa’a’itera’a ē, ’ua māuruuru ’oia i te bāpetizora’ahia ’oe ? ’Ua nāhea ’oia i te fa’a’itera’a i tōna mana’o fāri’i mai taua mahana ra ?

Hi’o ato’a 2 Nephi 31 ; Mosia 18:8–11 ; Te Ha’api’ira’a Tumu ’e te mau Fafaura’a 20:37, 68–74 ; « The Baptism of Jesus [Te bāpetizora’a o Iesu] » (video, ChurchofJesusChrist.org.

Mataio 3:16–17 ; Mareko 1:9–11 ; Luka 3:21–22

Te mau melo nō te Atuara’a e toru ïa tino ta’a ’ē.

Tē vai ra e rave rahi fa’a’itera’a i roto i te Bibilia ē, e toru tino ta’a ’ē te Atuara’a. E hi’ora’a te mau fa’ati’ara’a nō te bāpetizora’a o te Fa’aora nō te reira. ’Ia tai’o ’oe i teie mau fa’ati’ara’a, ’a feruri i te ha’api’ira’a tā ’oe e ’apo nei nō ni’a i te atuara’a. Nō te aha e mea faufa’a teie mau ha’api’ira’a tumu nō ’oe ?

Hi’o ato’a Genese 1:26 ; Mataio 17:1–5 ; Ioane 17:1–3 ; Te ’Ohipa 7:55–56 ; Te Ha’api’ira’a Tumu ’e te mau Fafaura’a 130:22.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 3.’Ua mau Ioane Bāpetizo i te autahu’ara’a a Aarona. E aha te ha’api’ira’a tā tātou e nehenehe e ’apo mai i roto i te hi’ora’a o Ioane nō ni’a i te fā a te Autahu’ara’a a Aarona ? E aha te mau ha’amaita’ira’a tā tātou e fāri’i maoti te Autahu’ara’a a Aarona ? Mai te mea e taure’are’a tamāroa i tō ’outou ’utuāfare, e nehenehe ’outou e rave i te tahi taime nō te tauturu i te ha’amāramarama iāna e nāhea ’oia i te fa’a’ohipa i te Autahu’ara’a a Aarona nō te ha’amaita’i ia vetahi ’ē. (Hi’o ato’a Te Ha’api’ira’a Tumu ’e te mau Fafaura’a 13:1 ; 20:46–60.)

I te taime ’ua bāpetizohia tātou, ’ua hōroihia tā tātou mau hara.

Mataio 3:11–17 ; Mareko 1:9–11 ; Luka 3:21–22.’Ua hi’o ānei te mau melo nō tō ’outou ’utuāfare i te bāpetizora’ahia te hō’ē ta’ata ’aore rā i te ha’amaura’ahia ’ei melo nō te ’Ēkālesia ? E aha tā te mau melo nō te ’utuāfare i putapū ? E nehenehe ’outou e ha’api’i ia rātou nō ni’a i te mau tāpa’o nō te bāpetizora’a ’e te ha’amaura’a. Nō te aha te bāpetizora’a ’e te ha’amaura’a mai te hō’ē fānaura’a ’āpī ? Nō te aha tātou e utuhihia ai i roto i te pape ’ia bāpetizo-ana’e-hia tātou ? Nō te aha tātou e ’ō’omo ai i te mau ’ahu ’uo’uo ’ia bāpetizohia tātou ? Nō te aha te hōro’a nō te Vārua Maita’i e parauhia ai ’ei bāpetizora’a i te auahi ? (Te Ha’api’ira’a Tumu ’e te mau Fafaura’a 20:41 ; hi’o ato’a Arata’i nō te mau pāpa’ira’a mo’a, « Bāpetizora’a », « Vārua Maita’i »).

Mataio 3:17 ; Mareko 1:11 ; Luka 3:22.E aha te taime tātou i te putapūra’a ē ’ua māuruuru te Atua ia tātou ? E aha tā tātou te ’utuāfare e nehenehe e rave ’ia māuruuru mai te Atua ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Baptême », Chants pour les enfants, 54–55.

Ha’amaita’i i tā’u iho tuatāpapara’a pāpa’ira’a mo’a

’A ani i te Fatu i te tauturu. ’Ua hōro’ahia mai te mau pāpa’ira’a mo’a nā roto i te heheura’a, ’e nō te māramarama mau i te reira, tītauhia te heheura’a nō tātou iho. ’Ua parau fafau te Fatu : « E ani, e noa’a ïa ia ’outou ; e ’imi, e ’ite ïa ’outou ; e pātōtō, e ’īithia ïa te ’ōpani ia ’outou » (Mataio 7:7).

[John the Baptist Baptizing Jesus] Tē bāpetizo ra Ioane Bapetizo ia Iesu, nā Greg K. Olsen