« 23–29 nō Tēnuare. Mataio 3 ; Mareko 1 ; Luka 3 : ‘E ha’amaita’i ’outou i te ’ē’a o te Fatu’ » Mai, pe’e mai—nō te Paraimere : Faufa’a ’Āpī 2023 (2022)
« 23–29 nō Tēnuare. Mataio 3 ; Mareko 1 ; Luka 3 », Mai, pe’e mai—nō te Paraimere : 2023
Hiʼo ha’amāramarama ʼunaʼuna i roto i te hiero nō Nauvoo Illinois, nā Tom Holdman
23–29 nō Tēnuare
Mataio 3 ; Mareko 1 ; Luka 3
« E ha’amaita’i ’outou i te ’ē’a o te Fatu »
’A tai’o ai ’oe nō ni’a ia Ioane Bāpetizo ’e te bāpetizora’a o Iesu Mesia, ’a pāpa’i i te mau mana’o pae vārua tā ’oe e fāri’i. E tauturu te Mai, pe’e mai—nō te ta’ata hō’ē ’e te ’utuāfare ia ’oe ’ia hāro’aro’a i teie mau pāpa’ira’a mo’a, ’e e tauturu ho’i ia ’oe ’ia pāturu i te ’apora’a mai tā te mau tamari’i e rave i te fare.
Tītau i te mana’o
Nō te hōro’a i te mau tamari’i i te rāve’a nō te fa’a’ite mai e aha tā rātou i ’apo a’ena mai, ’a fa’a’ite i te hō’ē hōho’a nō Iesu e bāpetizohia ra. E ani ia rātou ’ia fa’a’ite mai i te mea e tupu ra i roto i te hōho’a ’e e aha tā rātou e fāri’i ’ia bāpetizo-ana’e-hia rātou.
Ha’api’i i te ha’api’ira’a tumu : Te mau tamari’i ’āpī
E nehenehe au e bāpetizohia mai ia Iesu.
Nāhea ’oe ’ia fa’a’ohipa i te ’ā’amu nō te bāpetizora’a o Iesu, nō te tauturu i te mau tamari’i ’ia fa’aineine ’ia bāpetizohia ?
Te mau ’ātivite e au
-
’A ha’apoto i te ’ā’amu nō te bāpetizora’a o te Fa’aora (hi’o Mataio 3:13–17 ; hi’o ato’a « Pene 10 : ’Ua bāpetizohia Iesu », i roto i Te mau ’ā’amu o te Faufa’a ’Āpī, 26–29, ’aore rā, te video e tano, i ni’a ChurchofJesusChrist.org). ’A fa’ata’a ē, ’ua bāpetizohia Iesu ma te utuhira’a nā te hō’ē ta’ata tei mau i te ha’amanara’a o te ’autahu’ara’a. ’A fa’ahiti fa’ahou i te ’ā’amu e rave rahi taime ’e e ani i te mau tamari’i ’ia fa’a’ite mai i te mau mea ri’i tā rātou e ha’amana’o ra.
-
’A fa’a’ite i te hō’ē hōho’a nō Iesu e bāpetizohia ra, ’e te ’api ’ātivite nō teie hepetoma. E vaiiho i te mau tamari’i ’ia fa’a’ite i te mau tū’atira’a i rotopū i nā hōho’a e piti. (Tē vai ra hō’ē hōho’a nō Iesu Mesia e bāpetizohia ra i roto i te fa’anahora’a nō teie hepetoma i roto te Mai, pe’e mai—nō te ta’ata hō’ē ’e te ’utuāfare.)
-
’A hi’o fa’ahou i te mau fafaura’a tā te mau tamari’i e rave ’ia bāpetizo-ana’e-hia rātou (hi’o Mosia 18:8–10 ; Te Ha’api’ira’a Tumu ’e te mau Fafaura’a 20:37 ; Mau tumu parau o te ’evanelia, « Bāpetizora’a », topics.ChurchofJesusChrist.org a). E ani ia rātou e aha o teie mau mea o tā rātou i rave a’e na.
-
E ani i te hō’ē melo o te ’ēpisekōpora’a ’ia paraparau i te mau tamari’i nō ni’a i te uiuira’a o te bāpetizora’a e ravehia hou rātou ’a bāpetizohia ai.
-
E hīmene ’āmui i te hō’ē hīmene nō ni’a i te bāpetizora’a mai te « Baptême » (Chants pour les, 54–55). ’A feruri i te ani i te hō’ē tamari’i ’ia arata’i i te tahi atu mau tamari’i ’a hīmene ai rātou.
E nehenehe tātou e pe’e i te hi’ora’a o Iesu ’a bāpetizohia ai tātou.
E tauturu te Vārua Maita’i iā’u
Hau atu i te fa’aineinera’a nō te bāpetizora’a, e fa’aineine ato’a te mau tamari’i ’ia fāri’i i te hōro’a o te Vārua Maita’i. Nāhea ’oe i te tauturu ia rātou ?
Te mau ’ātivite e au
-
’A fa’a’ohipa i te Mataio 3:11, 16 nō te ha’api’i i te mau tamari’i ē, ’ua pou mai te Vārua Maita’i i ni’a ia Iesu ’a bāpetizohia ai ’oia (’ua fā mai te hō’ē ’ū’upa ’ei tāpa’o nō te fa’a’ite ’ua tupu mau te reira). ’A fa’a’ite i te hōho’a Te hōro’a o te Vārua Maita’i (Buka hōho’a ’Evanelia, N°105), ’e ’a fa’ata’a ē, e fāri’i tātou i te hōro’a o te Vārua Maita’i ’ia ha’amau-ana’e-hia tātou.
-
’A hōpoi mai i te hō’ē vaira’a tei roto te tahi mau mea, mai te hō’ē hōho’a o Iesu, hō’ē paraitete māhanahana, ’e hō’ē ’āvei’a ’aore rā hōho’a fenua. E ani i te mau tamari’i ’ia mā’iti i te hō’ē tao’a ’e ’ia fa’ata’a mai nāhea te tao’a tāta’itahi e fa’ahōho’a ai i te rāve’a a te Vārua Maita’i nō te tauturu ia tātou—e fa’a’ite pāpū ’oia nō Iesu (hi’o Ioane 15:26), e tāmāhanahana ia tātou (hi’o Ioane 14:26),’e e fa’a’ite ia tātou i te ’ē’a ti’a (hi’o 2 Nephi 32:5).
-
’A fa’a’ite i tō ’oe iho mau ’itera’a i te fāri’ira’a i te tauturu a te Vārua Maita’i.
-
E ani i te mau tamari’i ’ia fa’aro’o i te mau rāve’a e tauturu ai te Vārua Maita’i ia tātou, ’a hīmene ai rātou « Le Saint-Esprit » (Chants pour les enfants, °56).
Ha’api’i i te ha’api’ira’a tumu : Te mau tamari’i pa’ari a’e
’Ua ha’amaita’ihia vau e te mau ’ōro’a o te autahu’ara’a a Aarona.
’Ua mau Ioane Bāpetizo i te Autahu’ara’a a Aarona, nō reira, ’ua riro te tai’ora’a nō ni’a iāna i roto i te Mataio°3 ’ei rāve’a maita’i nō te ha’api’i i te mau tamari’i nō ni’a i te Autahu’ara’a a Aarona. E tauturu ia rātou ’ia ’ite i te mau ha’amaita’ira’a ’e te mana e tae mai ia tātou, nā roto i teie autahu’ara’a.
Te mau ’ātivite e au
-
E ani i te mau tamari’i ’ia hāmani i te hō’ē tāpura nō te mau hōpoi’a a te autahu’ara’a a A’arona, ma te fa’a’ohipa Te Ha’api’ira’a Tumu ’e te mau Fafaura’a 20:46, 58–60 ; 84:111. E ani i te mau tamari’i ’ia hi’o i roto i te Mataio 3 ’ei hi’ora’a nō tō Ioane fa’aotira’a i teie mau hōpoi’a. Nāhea tātou pā’āto’a i te ani manihini ia vetahi ’ē ’ia haere mai i te Mesia ra, mai tā Ioane i nā reira ?
-
’A fa’a’ite i te tahi mau hōho’a o te feiā e mau nei i te autahu’ara’a a Aarona e rave ra i te mau ’ōro’a nō te bāpetizora’a ’e te ’ōro’a mo’a (hi’o Buka hōho’a ’evanelia, N° 103–104, 107–108). ’A tau’aparau e nāhea teie mau ’ōro’a i te fa’aineine ia tātou ’ia fāri’i ia Iesu Mesia ’e i te ha’amaita’ira’a o tāna tāra’ehara.
-
E tai’o ’āmui Te Ha’api’ira’a Tumu ’e te mau Fafaura’a 13:1, ’e ’a fa’a’ite pāpū ē, ’ua fa’aho’i fa’ahou mai Ioane Bāpetizo i te autahu’ara’a a Aarona ia Iosepha Semita ra. E ani i te mau tamari’i e mea nāhea tō rātou ha’amaita’ira’ahia nō te mea ’ua fa’aho’i-fa’ahou-hia mai te autahu’ara’a a Aarona.
Mataio 3:13–17°; Mareko 1:1–11°; Luka 3:2–18
E nehenehe au e ha’apa’o i tā’u mau fafaura’a nō te bāpetizora’a.
E hōro’a mai te ’apora’a mai nō ni’a i te ’ā’amu nō te bāpetizora’a o Iesu i te rāve’a maita’i nō te tauturu i te mau tamari’i ’ia hi’o fa’ahou i tā rātou mau fafaura’a nō te bāpetizora’a ’e ’ia fafau fa’ahou ’ia ha’apa’o i te reira.
Te mau ’ātivite e au
-
E ani i te mau tamari’i ’ia tai’o mai hō’ē i muri iho i te tahi i te mau ’īrava i roto i te Mareko 1:1–11. E ’āparau mai nō te aha tō tātou Metua i te ao ra e hina’aro ai ’ia bāpetizohia tātou. Nō te aha Iesu i bāpetizohia ai, noa atu ’aita ’oia e tītauhia ’ia tāmāhia i te hara ? Tauturu i te mau tamari’i ’ia hi’o mai i te mau pāhonora’a i teie uira’a i roto i te Mataio 3:13–15 ’e te 2 Nephi 31:6–7.
-
’A hi’o fa’ahou i te mau fafaura’a tā te mau tamari’i i rave i te bāpetizora’a, e ’itehia i roto i te Mosia 18:8–10 ’e Te Ha’api’ira’a Tumu ’e te mau Fafaura’a 20:37. E ani i te mau tamari’i ’ia pāpa’i i teie mau fa’ahorora’a i ni’a i te ’api ’ātivite nō teie hepetoma.
-
’A fa’aineine e rave rahi pea tāreta ma te pāpa’i i te mau pereota ’aore rā, i te mau hōho’a e tū’ati i tā tātou mau fafaura’a nō te bāpetizora’a. ’A fa’anaho i te mau tāreta ma te huri i te hōho’a i raro. E ani i te mau tamari’i ’ia huri e piti tāreta i te taime hō’ē, nō te ’imi i te pea e tano. ’Ia ’itehia nā pea, e ani i te mau tamari’i ’ia fa’a’ite mai i te mau rāve’a ’o tā rātou i rave nō te ha’apa’o i te reira fafaura’a.
-
’A fa’a’ite e mea nāhea te ha’apa’ora’a i tā ’oe mau fafaura’a nō te bāpetizora’a, i te ha’amaita’ira’a ia ’oe.
E nehenehe te Vārua Maita’i e arata’i iā’u.
’Ua ha’api’i mai te mau tamari’i nāhea ’ia ’ite ’e ’ia pe’e i te arata’ira’a a te Vārua Maita’i. ’A tauturu ia rātou ’ia hāro’aro’a ē, nā roto i te ha’apa’ora’a i tā rātou mau fafaura’a nō te bāpetizora’a, e tauturu te reira ia rātou ’ia vai ti’a mā nō te fāri’i i tāna arata’ira’a.
Te mau ’ātivite e au
-
E ani i te tamari’i tāta’itahi ’ia tai’o hō’ē o teie mau pāpa’ira’a mo’a i muri nei ’e ’ia fa’ata’a mai, e aha tā te reira e ha’api’i nei e nāhea te Vārua Maita’i i te paraparau mai ia tātou : Helamana 5:30 ; Te Ha’api’ira’a Tumu ’e te mau Fafaura’a 6:23 ; 8:2–3 ; 11:12–13.
-
’A ani i te hō’ē tamarii ’ia tai’o Mataio 3:11. Nāhea te Vārua Maita’i e riro ai mai te auahi ? ’Ei hi’ora’a, e tāmāhanahana te auahi, ’e e hōro’a mai i te māramarama nō te arata’i ia tātou (hi’o Ioane 15:26°; 2 Nephi 32:5).
-
E ani i te mau tamari’i ’ia tāpō i tō rātou mata ’e ’ia fa’atoro i tō rātou rima. I muri iho, ’a purumū māmā noa i ni’a i tō rātou ’apu rima te huruhuru manu ’aore rā te taura. ’A ani ia rātou ’ia parau mai ’ia ’ite ana’e rātou te reira. E aha tā teie ’ātivite e ha’api’i nei nō ni’a i te ’itera’a i te mau fa’a’itera’a a te Vārua Maita’i ?
-
E ani i te mau tamari’i ’ia fa’a’ite mai i te mau ’itera’a rau tā rātou i fāri’i ’e te Vārua Maita’i. Nō te aha te ha’apa’ora’a i tā tātou mau fafaura’a e tauturu ai ia tātou ’ia fāri’i i te arata’ira’a a te Vārua Maita’i ?
Fa’aitoito i te ha’api’ira’a i te fare
’A fa’aitoito i te tamari’i tāta’itahi ’ia ani i tō rātou metua, i te tahi atu mau melo o te ’utuāfare ’e i te mau hoa nō ni’a i tō rātou bāpetizora’a.
Ha’amaita’iraʼa i tā tātou ha’api’ira’a
’A ’imi i tā ’outou iho fa’aurura’a. ’Eiaha e hi’o i teie mau parau ’ei arata’ira’a fa’ahepo ’a ha’api’i ai ’outou. ’A fa’a’ohipa rā i te reira ’ei mana’o nō te fa’atupu i tō ’outou iho fa’aurura’a, ’a feruri hōhonu ai ’outou i te mau hina’aro o te mau tamari’i tā ’outou e ha’api’i ra. (Hi’o Ha’api’ira’a mai tā te Fa’aora,,°7.)