Maria ’e ’o Elisabeta

2–8 nō Tēnuare

Mataio 1 ; Luka 1

« ’Ia nā-reira-hia mai au mai tā ʼoe i parau na »

Ha’amata ma te tai’o Mataio 1 ’e Luka 1. E tauturu te Mai, pe’e mai—nō te ta’ata hō’ē ’e te ’utuāfare ia ’oe ’ia hāro’aro’a i teie mau pene, ’e e hōro’a mai teie fa’anahora’a ia ’oe i te mau mana’o nō te ha’api’ira’a. Mai te mea e hina’aro ’oe i te tahi atu tauturu nō te ha’api’i i te mau tamari’i ’āpī, ’a hi’o « Pāhono i te mau hina’aro o te mau tamari’i ’āpī » i te ’ōmuara’a o teie buka.

ītona fa’a’itera’a

Tītau i te mana’o

E ani i te mau tamari’i e pārahi ha’amenemene, ’e e ani i te hō’ē tamari’i ’ia fa’a’ite mai i te hō’ē ’ohipa tāna i ’apo mai ’aita i maoro a’e nei nā roto mai i te mau pāpa’ira’a mo’a. E nehenehe teie tamari’i e fa’atere i te pōpō ’aore rā e fa’atoro te reira i te tahi atu tamari’i i roto i te menemenera’a, nāna ïa te taime nō te fa’a’itera’a mai.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Mataio 1:18–25 ; Luka 1:26–38

’Ua fa’a’ite mai te mau melahi i te fānaura’a o Iesu.

’Ua fā mai te hō’ē melahi ia Maria ’e ia Iosepha nō te fa’a’ite mai i te fānaura’a o Iesu Mesia. E tauturu teie mau ’ohipa i tupu i te mau tamari’i ’ia ’ite i te faufa’a rahi o te fānaura’a o te Mesia.

Te mau ’ātivite e au

• E ani i nā metua o te hō’ē tamari’i ’ia haere mai i roto i te piha ha’api’ira’a, ma te ’ahuhia mai ia Maria ’e ia Iosepha. E ani ia rāua ’ia fa’ati’a mai i te mau ’ohipa i tupu tei pāpa’ihia i roto i te Mataio 1:18–25 ’e Luka 1:26–38.

• ’A fa’ati’a i te ’ā’amu o te mau melahi i te fāra’a ia Maria ’e ’ia Iosepha, mai tei pāpa’ihia i roto i teie mau ’īrava. (Hi’o ato’a « Pene 2 : Maria ’e te melahi » ’e « Pene 4 : Iosepha ’e te Melahi », i roto Te mau ’ā’amu o te Faufa’a ’Āpī, 8–9, 12, ’aore rā, te mau video e tano i ni’a ChurchofJesusChrist.org.) E nehenehe ’oe e fa’a’ite i te hōho’a i roto i te fa’anahora’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare. E ani i te mau tamari’i ’ia fa’ati’a fa’ahou mai te mau ’ā’amu.

• E ani i te mau tamari’i ’ia pāpa’i hōho’a i te mau ’ā’amu e ’itehia i roto i te Mataio 1:18–25 ’e te Luka 1:26–38.

te fāraʼa Gabriela ia Maria

Te fa’a’itera’a, nā John Scott

Luka 1:5–25, 57–63

E pāhono te Metua i te ao ra i tā’u mau pure.

E mea pāpū ē, e rave rahi matahiti tō Zakaria ’e tō Elisabeta purera’a nō te hō’ē tamari’i. I te pae hōpe’a, ’ua pāhono mai tō tātou Metua i te ao ra i tā rāua pure ma te hōro’ara’a mai i te hō’ē tamaiti nā rāua, ’o Ioane Bapetizo. Nāhea ’oe ’ia fa’a’ohipa i teie ’ā’amu nō te ha’api’i i te mau tamari’i ē, e pāhono mai tō tātou Metua i te ao ra i te mau pure ?

Te mau ’ātivite e au

• Nā roto i tā ’oe iho mau parau, ’a fa’ati’a i te ’ā’amu nō roto mai i te Luka 1:5–25, 57–63. E hina’aro paha ’oe e tāpiti i te fa’ati’a i te ’ā’amu e rave rahi taime. E ani i te mau tamari’i ’ia ha’uti ta’ata ora i te ti’ara’a o Zakaria, o Elizabeta, ’e o te mau melahi, ’e ’a fa’aha’uti i te ’ā’amu. ’A ha’apāpū i te mau parau a te melahi ia Zakaria : « ’Ua fa’aro’ohia ho’i tā ’oe pure » (Luka 1:13). ’A fa’a’ite i te hō’ē ’ohipa i tupu i reira te Metua i te ao ra pāhonora’a i tā ’oe pure.

• ’A fa’a’ohipa « Le front baissé » (Chants pour les enfants, 18) ’aore rā, te tahi atu hīmene nō te ha’api’i i te mau tamari’i nāhea ’ia pure. I te mau taime ato’a e hīmene ai te mau tamari’i i te ta’o ra « pure » e ani ia rātou ’ia taupe i tō rātou upo’o i raro ’e ’ia tūfene i tō rātou rima.

• E ani i te tamari’i tāta’itahi ’ia rave i te mau ’ohipa e fa’ahōho’a i te hō’ē mea nō te reira ’oia e pure ai. E vaiiho i te tahi atu mau tamari’i ’ia ’imi e aha te mau ’ohipa e fa’ahōho’ahia ra. E ’ite mai rātou te mau mana’o i ni’a i te ’api ’ohipara’a nō teie hepetoma.

Luka 1:30–35

E Tamaiti Iesu Mesia nā te Atua.

E Tamaiti Iesu Mesia nā te Metua i te ao ra ’e nā Maria. E aha tā ’oe e rave nō te tauturu i te mau tamari’i ’ia ha’api’i hau atu ā mai nō ni’a iāna ?

Te mau ’ātivite e au

• ’A parau i te mau tamari’i ē, ’ua parau te melahi ia Maria ē, e pi’ihia tāna ’aiū te Tamaiti a te Atua (hi’o Luka 1:35). E tauturu i te mau tamari’i ’ia fa’ahiti fa’ahou te pereota « e Tamaiti Iesu nā te Atua ». ’A tauturu i te mau tamari’i ’ia hāro’aro’a, ’o vai nā metua o Iesu ma te ani ia rātou ’ia pāpa’i hōho’a i tō rātou iho nā metua. ’A pāpa’i ai rātou i te reira, e parau ia rātou ē, e metua ato’a tō Iesu—’o Maria ’e te Metua i te ao ra. Hau atu, ’ua anihia ia Iosepha ’ia pāruru ’e ’ia aupuru ia Iesu, ’a ora ai ’oia i te fenua nei.

• ’A fa’a’ite i tō ’oe ’itera’a pāpū ē, nō te mea e Tamaiti Iesu nā te Atua, e ti’a ’ia pohe ’oia nō tā tātou mau hara, ’e ’ia ora fa’ahou mai. ’A fa’a’ite i te mau hōho’a nō te fa’asātaurora’a ’e te ti’afa’ahoura’a o Iesu (hi’o Buka hōho’a ’Evanelia, nūmera 57, 59).

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari a’e

Mataio 1:18–25 ; Luka 1:5–37

’Aore roa ho’i e mea e ’ore e ti’a i te Atua.

Nā roto ana’e i te mana o te Atua i tupu ai te fānaura’a o Iesu ’e o Ioane Bāpetizo. E nehenehe te ’ite-hau-ra’a nō ni’a i teie mau temeio e ha’apūai i te fa’aro’o o te mau tamari’i ē, e mana tō te Atua nō te fa’atupu i te mau temeio i roto i tō rātou orara’a.

Te mau ’ātivite e au

• ’A tai’o fa’ahou ai ’oe ’e te mau tamari’i i te Mataio 1:18–25 ’e te Luka 1:5–37, ’a ui i te mau tamari’i i te mau uira’a mai teie « e aha tā ’outou e parau ’āhiri ē, ’o ’outou Maria ? » ’aore rā, « e aha te mana’o e tae mai ’ia ’outou ’āhiri ē, ’o Zakaria ’outou ? »

• Nā roto i te mau parau ’ōhie, ’a fa’ati’a i te mau ’ā’amu i fa’ahitihia i roto i te Mataio 1:18–25 ’e te Luka 1:5–37. E ani i te mau tamari’i ’ia ’āfa’i i te rima i ni’a, ’ia fa’aro’o ana’e rātou i te tahi mea e’ita e tupu ’aita ana’e te mana o te Atua. E aha te tahi atu ā mau ’ā’amu tā te mau tamari’i e nehenehe e fa’ati’a mai, i reira te Atua i te ravera’a i te tahi mea e’ita roa atu e tupu ?

• Tauturu i te mau tamari’i ’ia tāmau ’ā’au i te Luka 1:37. Nō te rave i te reira, e pāpa’i i te ’īrava i ni’a i te tāpura ’ere’ere ’e e ani i te mau tamari’i ’ia fa’ahiti mai i te reira e rave rahi taime. I muri iho, ’a tūmā hō’ē ta’o i te taime tāta’itahi.

Mataio 1:21–25 ; Luka 1:30–35, 46–47

E Tamaiti Iesu Mesia nā te Atua.

E Tamaiti Iesu Mesia nā te Metua i te ao ra ’e nā Maria. Nāhea ’oe i te tauturu i te mau tamari’i ’ia ’apo mai i teie parau mau ?

Te mau ’ātivite e au

• E ani i te mau tamari’i ’ia tai’o Luka 1:30–35, ma te ’imi i te mau pāhonora’a i teie mau uira’a : « ’O vai te metua vahine o Iesu ? » ’e « ’O vai te metua tāne o Iesu ? » E tauturu ia rātou ’ia hāro’aro’a ē, ’o Iesu Mesia ana’e te ta’ata e metua vahine tāhuti tōna, ’o Maria, ’e e Metua tāne tāhuti ’ore tōna, te Metua i te Ao ra (hi’o ato’a 1 Nephi 11:18–21).

• ’A tai’o ai ’outou i teie mau ’īrava, e ani i te mau tamari’i ’ia ’imi i te mau i’oa ’e te mau ti’ara’a o Iesu Mesia. E aha te aura’a o teie mau i’oa, ’e e aha tā te reira e ha’api’i mai nei ia tātou nō ni’a ia Iesu ?

• ’A fa’a’ite i tō ’oe ’itera’a pāpū nō Iesu Mesia, ’e e ani i te mau tamari’i ’ia fa’a’ite ato’a mai i tō rātou.

Luka 1:5–25, 57–66

Tē fa’aro’o nei ’e tē pāhono nei te Metua i te ao ra i tā’u mau pure.

E pāhono te Atua i te mau pure, ’eiaha noa rā mai te au i tā tātou e hina’aro. Nāhea ’oe i te fa’a’ohipa i te parau nō Zakaria ’e nō Elizabeta, nō te ha’api’i i te mau tamari’i i teie parau mau ?

Te mau ’ātivite e au

• E ani i te mau tamari’i e aha tā rātou e parau i te hō’ē ta’ata tei pure nō te hō’ē ha’amaita’ira’a, ’aita rā i fāri’i atu ra i te reira. E ani ia rātou ’ia feruri i ni’a teie uira’a ’a tai’o ’āmui ai rātou i te Luka 1:5–25, 57–66. (Hi’o ato’a « Pene 1 : Elizabeta ’e Zakaria » ’e te « Pene 3 : ’Ua fānauhia Ioane Bāpetizo », i roto Te mau ’ā’amu o te Faufa’a ’Āpī, 6–7, 10–11, ’aore rā, te mau video e tano i ni’a ChurchofJesusChrist.org.) E aha tā Zakaria ’e tā Elizabeta e nehenehe e parau i te hō’ē ta’ata e mana’o ra ē, ’aita tāna pure i pāhonohia ?

• ’A ani nā mua roa i te rahira’a tamari’i ’ia fa’a’ite mai i te ’ohipa i tupu nō rātou nō ni’a i te pāhonora’a te Metua i te ao ra i tā rātou pure. ’A fa’a’ite atu i te hō’ē taime ’a ’ite ai ’oe ē, ’ua pāhonohia tā ’oe pure ma te rāve’a tīa’i-’ore-hia.

• E ani i te mau tamari’i ’ia pāpa’i i te hō’ē hōho’a nō te hō’ē taime ’a pāhono ai te Metua i te ao ra i te hō’ē pure—hō’ē iho ā rā o tā rātou iho pure. ’A vaiiho ia rātou ’ia fa’a’ite mai i te piha tā rātou hōho’a.

ītona ha’api’ira’a

Fa’aitoito i te ha’api’ira’a i te fare

E ani i te mau tamari’i ’ia fa’a’ite i tō rātou ’utuāfare i te mau hōho’a tā rātou i pāpa’i i roto i te piha ha’api’ira’a. E fa’aitoito ia rātou ’ia uiui i te mau melo o tō rātou ’utuāfare nō ni’a i te mau taime ’a pāhono ai te Atua i tā rātou pure.

Ha’amaita’i i tā tātou ha’api’ira’a

Tauturu i te mau tamari’i ’āpī a’e ’ia ha’api’i mai nā roto mai i te mau pāpa’ira’a mo’a. Nō te tauturu i te mau tamari’i ’āpī a’e ’ia ha’api’i mai nā roto mai i te mau pāpa’ira’a mo’a, ’a fa’atumu atu i ni’a noa hō’ē ’īrava ’aore rā, i ni’a ato’a hō’ē noa a’e pereota tumu. E nehenehe ’outou e ani i te mau tamari’i ’ia ti’a i ni’a ’aore rā, e ’āfa’i i te rima i ni’a ’ia fa’aro’o ana’e rātou i te reira ta’o ’aore rā, te reira pereota. (Hi’o Ha’api’ira’a mai tā te Fa’aora, 21.)

’api ’ohipara’a : E pāhono te Metua i te ao ra i tā’u mau pure