E ha’amori tātou iāna,, nā Dana Mario Wood

9–15 nō Tēnuare

Mataio 2 ; Luka 2

I haere mai ho’i mātou e tāhopu iāna

Te mau tamari’i tā ’oe e ha’api’i ra, e mau tamaiti ’e e mau tamāhine tao’a rahi nā tō tātou Metua i te ao ra. ’A ani atu iāna ’ia tauturu mai ia ’oe, ’a ’imi ai ’oe i te ha’api’i ia rātou nā roto mai i te mau pāpa’ira’a mo’a. E nehenehe ōna e arata’i ia ’oe i te mau parau tumu o tā ’oe e ha’apāpū ’e e fa’auru ia ’oe i te mau mana’o ’ātivite o te ha’apūtapu i tāna mau tamari’i.

Tītau i te mana’o

E ani i te mau tamari’i ’ia fa’a’ite mai i te mea tā rātou i ’ite nō ni’a i te fānaura’a o te Mesia. E aha tā rātou mau vāhi au roa a’e o te ’ā’amu ?

Ha’api’i i te ha’api’ira’a tumu : Te mau tamari’i ’āpī

Luka 2:1–14

’Ua fānauhia Iesu.

’Ua fa’aru’e Iesu i tōna fare i pīha’i iho i tōna Metua i te ao ra, ’ia fānauhia mai i te ao nei, ’ia riro mai ho’i ’ei Fa’aora nō tātou. Nāhea ’oe i te tauturu i te mau tamari’i ’ia ha’amana’o i te ’ā’amu o te fānaura’a o te Mesia ?

Te mau ’ātivite e au

• ’A tai’o ai ’oe i te ’ā’amu nō te fānaura’a o te Mesia, e ani i te mau tamari’i ’ia ha’uti mau rātou iho i te ’ā’amu ’aore rā, e fa’a’ohipa i te ’api ’ātivite o teie hepetoma nō te hi’o fa’ahou i te ’ā’amu. (Hi’o ato’a « Pene 5 : ’Ua fānauhia Iesu Mesia », i roto i Te mau ’ā’amu o te Faufa’a ’Āpī, 13–15, ’aore rā, te video e tano ChurchofJesusChrist.org.)

• Mai te mea tē vai ra tā ’outou fātene, ’a ’āfa’i mai ’e e ani i te mau tamari’i ’ia tu’u i te mau mea ato’a i tō rātou vāhi, ’a fa’ati’a noa ai ’oe i te ’ā’amu nō te fānaura’a o Iesu Mesia. E nehenehe ato’a ’oe e fa’a’ite i te hō’ē hōho’a nō te fānaura’a (hi’o ’ei hi’ora’a, te fa’anahora’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’A toro i terā ’e terā ta’ata o te fātene, ’e e ani i te mau tamari’i ’ia fa’a’ite mai e aha tā rātou i ’ite nō ni’a i te ta’ata tāta’itahi.

• ’A hīmene ’āmui i te hīmene au roa a’e a te mau tamari’i nō ni’a i te fānaura’a o Iesu. ’A nā reira ai ’oe, ’a hi’o i te mau rāve’a nō te fa’a’ite i tō ’oe ’itera’a pāpū nō te Fa’aora. E ani i te mau tamari’i ’ia fa’a’ite mai nō te aha rātou i here ai ia Iesu.

Mataio 2:1–12

E nehenehe au e hōro’a i te mau ō maita’i nā Iesu.

’Ua hōro’a te mau ta’ata pa’ari i te auro, te tāpau libano ’e te mura nā Iesu. Nāhea ’oe i te fa’a’ohipa i teie ’ā’amu nō te ha’api’i i te mau tamari’i ē, e nehenehe ato’a rātou e hōro’a i te mau ō nā Iesu—te mau ō mai te here, te tāvinira’a ’e te ha’apa’o ?

Te mau ’ātivite e au

• ’A fa’a’ite i te hō’ē hōho’a o te mau ta’ata pa’ari, ’a hi’o fa’ahou ai ’oe ’e te mau tamari’i i tō rātou ’ā’amu, e ’itehia i roto i te Mataio 2:1–12. ’A fa’a’ite atu i te hōho’a Te pūpūra’a te mau ta’ata pa’ari i te mau ō (ChurchofJesusChrist.org).

• ’A pū’ohu i te hō’ē hōho’a ’aore rā, i te mau tao’a e fa’ahōho’a i te mau ō, ’o tā tātou e nehenehe e hōro’a nā Iesu. E ani i te mau tamari’i e tauturu mai ia ’oe ’ia ’īriti i te mau ō ’e ’ia ’āparau, nāhea tātou i te hōro’a i teie mau tao’a nā te Fa’aora.

• ’A taututu i te tamari’i tāta’itahi ’ia pāpa’i hōho’a ’aore rā, ’ia pāpa’i i te mau ō tā rātou e nehenehe e hōro’a nā Iesu, mai « te rirora’a ’ei hoa maita’i » ’aore rā, « te purera’a ». E ani i te mau tamari’i ’ia fa’a’ite mai i tā rātou tāpura i tō te piha ha’api’ira’a ’e ’ia mā’iti hō’ē « ō » tā rātou e hōro’a nā Iesu i teie mahana.

Luka 2:40–52

’Ua riro na Iesu ’ei tamari’i mai iā’u.

E tauturu te ’apora’a mai nō ni’a i te tamari’iri’ira’a o te Fa’aora, i te mau tamari’i tā ’oe e ha’api’i ra i te fa’ahōho’a i ni’a iāna. ’A ui i te mau tamari’i e aha tā rātou i ha’api’i mai nā roto mai i teie mau ’īrava, e nā rātou ’ia riro mai mai ia Iesu i teienei.

Te mau ’ātivite e au

• ’A ani i te hō’ē o te feiā ’āpī i roto i te pāroita ’ia haere mai i roto i tā ’oe piha ’e ’ia fa’ati’a mai i te ’ā’amu o Iesu i te ha’api’ira’a i roto i te hiero i tōna feiā ’āpīra’a.

• E ani i e rave rahi tamari’i nā mua a’e, ’ia hōpoi mai i te mau hōho’a nō tō rātou ’aiūra’a, nō te fa’a’ite. E ani ia rātou, e mea nāhea rātou i te pa’arira’a mai. ’A fa’a’ite i te tahi mau rāve’a nō tō Iesu tupura’a i te rahi (hi’o Luka 2:40, 52). ’A hīmene ’e te mau tamari’i « Jésus enfant » (Chants pour les enfants, 34), ’aore rā, te tahi atu hīmene nō ni’a i te Fa’aora.

• ’A tai’o Luka 2:52, ’e ’a fa’ata’a i te aura’a nō te parau « pa’ari » ’e « rahi ». E nehenehe ’oe e ani i te mau tamari’i e rave i te mau ’ohipa ’o tē fa’a’ite nei i te aura’a, ’ia rahi i te pa’ari ’e ’ia auhia mai e te Atua ’e te tahi atu mau ta’ata. ’Ei hi’ora’a, e nehenehe rātou e ha’uti mai, te tai’ora’a i te hō’ē buka ’aore rā, te tauturura’a i te hō’ē ta’ata i roto i te fifi.

Ha’api’i i te ha’api’ira’a tumu : Te mau tamari’i pa’ari a’e

Luka 2:1–21 ; Mataio 2:1–12

’Ua tohu te mau peropheta i tahito ra i te fānaura’a o te Fa’aora.

’Ua tīa’i te mau peropheta ’e te feiā ha’apa’o ma te fa’aoroma’i e rave rahi tēnētere i te fānaura’a o te Fa’aora. E tauturu te hāro’aro’ara’a i teie parau mau i te mau tamari’i ’ia au maita’i atu ā te orara’a ’e te misiōni a te Fa’aora.

Te mau ’ātivite e au

• E ani i te mau tamari’i ’ia ’āparau mai nō ni’a i te mau mea tā rātou e tīa’i nei ma te fa’aoroma’i, mai te mahana fānaura’a ’e te fa’afa’aeara’a ha’api’ira’a. ’A ani i te mau tamari’i ’ia tai’o Helamana 14:2–5 nō te ’imi i te hō’ē mea tā te mau peropheta e tīa’i ra.

• E tai’o ’āmui i te tahi mau tohura’a nō ni’a i te fānaura’a o te Fa’aora (hi’o Isaia 7:14 ; 9:6 ; 1 Nephi 11:18 ; Helamana 14:5). ’A tauturu i te mau tamari’i ’ia tāpura i te mau mea ri’i e vai ra i roto i teie mau tohura’a, ’e ’a ’imi mai i tō rātou tupura’a i roto i te Luka 2:1–21 ’e Mataio 2:1–2.

• E ani i te mau tamari’i ’ia pāpa’i hōho’a i te hō’ē mea nō roto mai i te Mataio 2:1–12 ’aore rā te Luka 2:1–21, ’e ’ia fa’a’ite mai nō te aha rātou i māuruuru ai, ’ua fānauhia mai Iesu.

Simona i te fa’aturara’a i te ’aiū Mesia, nā Greg K. Olsen

Luka 2:40, 52

Tupu atu ra Iesu i te rahi « ’e itoito atu ra te ’ā’au, ’ī a’e ra ho’i i te pa’ari, ’e te herehia mai e te Atua ’e te ta’ata ato’a ».

Mai ia Iesu, e misiōni faufa’a rahi tā te mau tamari’i tā ’oe e ha’api’i ra e ti’a e fa’aineine. E aha tā rātou e nehenehe e ha’api’i mai nā roto mai i te hi’ora’a o Iesu ?

Te mau ’ātivite e au

• ’A tai’o ai ’oe i te Luka 2:40, 52, ’a parau i te mau tamari’i e fa’aro’o i te mau mea tā Iesu i rave. E ani ’ia rātou e fa’a’ite mai i te mau rāve’a ’a tupu ai rātou i te rahi mai tō rātou na’ina’ira’a mai. ’A fa’a’ite i tō ’oe iho ’itera’a nō ni’a i te ha’api’ira’a mai i te ’evanelia, te tahi vāhi iti ’e te tahi vāhi iti. ’A fa’a’ite i tō ’oe ’itera’a pāpū nō ni’a i te Fa’aora.

• ’A fa’a’ī i te mau ’ātivite e fa’ahōho’a nei i te mau pereota i roto i te Luka 2:40, 52. ’Ei hi’ora’a, e fāito ’oe i te roa o te tamari’i tāta’itahi (« Tupu atu ra Iesu i te rahi ») ’aore rā, e ani i te mau tamari’i ’ia fa’a’ite mai i tā rātou pāpa’ira’a mo’a au roa a’e (« e itoito atu ra te ’ā’au »). ’A tauturu i te mau tamari’i ’ia tāpa’o i te mau rāve’a nō tō rātou tupura’a ’e ’ia fa’a’ite i te reira i tō rātou ’utuāfare.

• I muri a’e i te hi’o-fa’ahou-ra’a i te Luka 2:40, 52, e ani i te mau tamari’i ’ia fa’a’ite mai mai te hea te huru o Iesu i tō rātou fāito matahiti. Mai te hea tōna huru i ni’a i tōna metua vahine ? Tōna mau taea’e ’e tōna mau tuahine ?

Luka 2:41–52

E pe’e au i te hi’ora’a maita’i o Iesu.

’Oia ato’a i tōna ’apīra’a, ’ua ha’api’i Iesu te ’evanelia i te feiā pa’ari i roto i te hiero. ’Oia ato’a te mau tamari’i i roto tā ’oe piha, e rave rahi mea tā rātou e ha’api’i i te feiā ’ati a’e ia rātou.

Te mau ’ātivite e au

• E ani i te hō’ē tamari’i ’ia haere ineine mai nō te fa’ati’a poto mai i te ’ā’amu i roto i te Luka 2:41-52. Nō te tauturu i te mau tamari’i ’ia hāro’aro’a i te ’ā’amu, ’a ha’api’i atu e aha te aura’a nō te parau « ia ha’apa’o vau i tā tā’u Metua e ti’a ai » (’īrava 49). ’Ei hi’ora’a, e nehenehe ’oe e parau i te mau tamari’i, e aha tā ’oe ’aore rā, tā tō ’oe nā metua ’ohipa e rave nei. E aha te tōro’a ’aore rā, te « ’ohipa » a Iosepha, te metua tāne o Iesu i te tino nei ? (hi’o Mataio 13:55). E aha te ’ohipa a tōna Metua i te ao ra ? (Hi’o Luka 2:46–49 ; hi’o ato’a Mose 1:39).

• ’A tai’o ’e te mau tamari’i Luka 2:46–49,’e e ui « nāhea Iesu i te ha’apa’ora’a i tā ‘tōna Metua ’ohipa’ ? » E tauturu i te mau tamari’i ’ia tāpura ’aore rā ’ia pāpa’i hōho’a i ni’a i te tāpura ’ere’ere, te mau rāve’a e tauturu ai rātou ’ia ha’apa’o ato’a i te ’ohipa a tō tātou Metua i te ao ra.

• Nō te tauturu i te mau tamari’i ’ia fāri’i i te ti’aturira’a ē, mai te tamaiti Iesu e nehenehe rātou e ha’api’i i te ’evanelia, ’a tauturu ia rātou ’ia tamata i te ha’api’i te tahi ’e te tahi i te hō’ē parau tumu nā roto mai i te buka iti Nō te Pūai o te Feiā ’āpī.

Fa’aitoito i te ha’api’ira’a i te fare

’A ani i te mau tamari’i ’ia ha’api’i i tō rātou ’utuāfare i te hō’ē mea tā rātou i ’apo mai nō ni’a i te fānaura’a o Iesu Mesia.

Ha’amaita’i i tā tātou ha’api’ira’a

E mea hi’opo’a roa te mau tamari’i ’e e ’apo mai nā roto i te mau rāve’a rau. E ’oa’oa te mau tamari’i ’ia ha’api’i mai nā roto i te mau ’itera’a ’āpī ’e te rau. ’A fa’a’ohipa i te mau ’ātivite ’o te tauturu ia rātou ’ia haere i mua, ’a fa’a’ohipa i tō rātou mau te’ara’a ato’a, ’a hi’o haere ’e ’a tāmata i te mau mea ’āpī. (Hi’o Ha’api’ira’a mai tā te Fa’aora,, 25–26.)