ʼutuāfare e hiʼo ra i te buka hōhoʼa

26 nō Tītema–1 nō Tēnuare

E hōpoi’a nā tātou te ha’api’ira’a ia tātou iho

Te fā nō te mau pāpa’ira’a mo’a ’o te tauturura’a ïa ia ’outou ’ia haere mai i te Mesia ’e ’ia fa’afāriu hōhonu atu ā ia tātou i tāna ’evanelia. E ti’a i te Mai pe’e mai—nō te ta’ata hō’ē ’e te ’utuāfare ’ia tauturu ia ’outou ’ia māramarama i te mau pāpa’ira’a mo’a ’e ’ia ’ite i reira i te pūai pae vārua e tītauhia nō ’outou ’e nō tō ’outou ’utuāfare. ’Ei reira, ’ia tae ’outou i roto i te piha ha’api’ira’a, e fāna’o ïa ’outou i te rāve’a nō te fa’a’ite i te mea i ’apohia mai ’e nō te fa’aitoito i tō ’outou mau hoa feiā mo’a i roto i tā rātou tauto’ora’a e pe’e i te Mesia.

Pāpa’i i te mau mana’o e tae mai

« E aha tā ’ōrua e ’imi nei ? » ’Ua ani Iesu i te mau pipi a Ioane Bāpetizo (Ioane 1:38). E ui ato’a paha ’outou ia ’outou iho i teie uira’a—inaha te mea e ’ite mai ’outou i roto i te Faufa’a ’Āpī i teie matahiti, tei te huru ïa i te mea tā ’outou e ’imi nei. « E ’imi, e ’itea ïa ’outou », ’o te parau fafau teie a te Fa’aora (Mataio 7:7). Nō reira, e ui i te mau uira’a e tae mai i tō ’outou ferurira’a i roto i te tuatāpapara’a, ’ei reira e ’imi itoito atu ai i te mau pāhonora’a. I roto i te Faufa’a ’Āpī ’outou e tai’o ai nō ni’a i te mau taime ha’aputapūra’a pae vārua pūai a te mau pipi o Iesu Mesia. ’Ei pipi ha’apa’o maita’i nō te Fa’aora, e ti’a ia ’outou ’ia roa’a i tā ’outou iho taime ha’aputapūra’a pae vārua pūai ’a fāri’i ai ’outou i te anira’a a te Fa’aora i roto i teie buka mo’a : « Mai, pe’e mai » (Luka 18:22).

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Nō te ha’api’i mau mai roto mai i te Fa’aora, e ti’a ’iā’u ’ia fāri’i i tāna anira’a : « Mai, pe’e mai ».

E tano te anira’a a te Fa’aora, « Mai, pe’e mai » nō te tā’āto’ara’a—e mea ’āpī ānei tātou i ni’a i te ’ē’a o te ti’ara’a pipi ’aore rā ’ua nā ni’a tātou i terā ’ē’a i tō tātou orara’a tā’āto’a. ’O te reira tāna anira’a i te taure’are’a tao’a rahi e tūtava ra i te ha’apa’o i te mau fa’auera’a (hi’o Mataio Luka 19:16–22 ; Luka 18:18–23). Tā terā taure’are’a i ha’api’i—’e tā tātou pā’āto’a e ti’a ’ia ha’api’i—’oia te aura’a ïa nō te rirora’a ’ei pipi, ’oia ho’i te hōro’ara’a i tō tātou ’ā’au tā’āto’a i te Metua i te ao ra ’e ia Iesu Mesia. E haere tātou i mua i roto i te ti’ara’a pipi ’ia ’ite tātou i te mea ’ua ’ere tātou, ’ia rave tātou i te mau tauira’a ’e ’ia ’imi tātou ’ia pe’e hope atu ā ia rāua.

E ha’amata tātou i te ha’api’i mai roto mai i te Fa’aora ’ia tūtava tātou i te māramarama i te mea tāna i ha’api’i i te ta’ata. ’Ei hi’ora’a, e aha te hōhonu nō tō ’outou māramaramara’a i te ha’eha’a ’ia hi’o ’outou i te mau mea i muri nei ?

• Te mau ha’api’ira’a a te Fa’aora (hi’o Mataio 18:1–5 ; Luka 18:9–14)

• E hi’ora’a nō roto i tōna orara’a (hi’o Ioane 13:1–15)

Tē hina’aro ra ’outou i te ha’api’i rahi atu ā, ’a tāmata i teie ’ohipa i ni’a i te tahi atu parau tumu nō te ’evanelia, mai te here ’e te fa’aorera’a hapa.

Nā’u iho e amo i te hōpoi’a nō tā’u ha’api’ira’a.

’Ua ha’api’i Elder David A. Bednar : « ’Eiaha tātou e tīa’i nā te fa’anahora’a ’Ēkālesia e ha’api’i ’aore rā e parau ia tātou i te mau mea ato’a e tītauhia ia tātou ’ia ’ite ’e ’ia rave nō te riro mai ’ei pipi ha’apa’o ’e nō te fa’a’oroma’i itoito ē tae noa atu i te hope’a. ’Aita, tei ia tātou iho nei rā te hōpoi’a ’ia ha’api’i mai i tei tītauhia ’ia ha’api’i mai, ’ia ora mai tā tātou i ’ite e mea tītauhia ’ia ora, ’e ’ia riro i te ta’ata tā te Fatu e hina’aro ’ia riro tātou. ’E tei te fare te vāhi mau nō te ’apo mai i te ha’api’ira’a, nō te ora ’e nō te riro mai i terā ta’ata » (« ’Ua ineine nō te fāri’i i te mau mea tāta’itahi tei hina’arohia », Liahona, Mē 2019, 102).

E aha te aura’a nō te ravera’a i te hōpoi’a nō tā tātou iho ha’api’ira’a ? Hi’o i te tahi pāhonora’a i roto i te fa’ahitira’a a Elder Bednar ’e i roto i te mau ’īrava i muri nei : Ioane 7:17 ; 1 Tesalonia 5:21 ; Iakobo 1:5–6, 22 ; 2:17 ; 1 Nephi 10:17–19 ; 2 Nephi 4:15 ; Alama 32:27 ; ’e Te Ha’api’ira’a Tumu ’e te mau Fafaura’a 18:18 ; 58:26–28 ; 88:118. E aha tei fa’auruhia ia ’outou ’ia rave nō te fa’aitoito atu ā i roto i te ha’api’ira’a i te ’evanelia ?

Tītauhia iā’u ’ia ’ite i te parau mau nō’u iho nei.

Pēnei a’e e ta’ata tā ’outou i mātau ē, e au ē, ’aita tō rātou fa’aro’o tāpetepete, noa atu ā te ’ohipa e tupu i roto i tō rātou orara’a. Tē fa’aha’amana’o mai nei paha rātou i nā paretenia pa’ari i roto i te parabole a te Fa’aora (hi’o Mataio 25:1–13). Te mea rā ’aita ’outou e ’ite ra, ’o tā rātou ïa mau tauto’ora’a tu’utu’u ’ore nō te ha’apūai i tō rātou ’itera’a pāpū nō te parau mau.

Nāhea tātou e noa’a ai ’e e aupuru ai i tō tātou iho ’itera’a pāpū ? E pāpa’i i tō ’outou mau mana’o ’a feruri ai i te mau ’īrava i muri nei : Luka 11:9–13 ; Ioane 5:39 ; 7:14–17 ; Te ’Ohipa 17:10–12 ; 1 Korinetia 2:9–11 ’e Alama 5:45–46.

e tamāhine i pīha’i iho i te hō’ē purūmu

E mea ti’a ia tātou tāta’itahi ’ia noa’a te ’itera’a pāpū nō tātou iho.

E aha tē ti’a ’ia rave ’ia tae mai tā’u mau uira’a ?

’Ia ’imi ’outou i te ’ite pae vārua, e tae mai te mau uira’a i te ferurira’a. E nehenehe te mau parau tumu i muri nei i te tauturu ia ’outou ’ia pāhono i te mau uira’a ’e ’ia patu i tō ’outou fa’aro’o ’e tō ’outou ’itera’a pāpū :

• ’A ’imi i te māramarama nō ’ō mai i te Atua. ’O te Atua te puna nō te mau parau mau ato’a ’e tē heheu nei ’oia i te parau mau nā roto i te Vārua Maita’i, te mau pāpa’ira’a mo’a, ’e tāna mau peropheta ’e mau ’āpōsetolo.

• ’Ohipa ma te fa’aro’o. Mai te peu ’aita te mau pāhonora’a e tae mai i terā iho taime, ’ia vai te ti’aturi ē, e heheu mai te Fatu i te mau pāhonora’a i te taime tano. Ē tae atu i terā taime, e tāmau noa i te ora mai te au i te parau mau tā ’outou i ’ite a’ena.

• Tāpe’a noa i te hi’o-fa’aātea-ra’a mure ’ore. E tāmata i te hi’o i te mau mea mai tā te Fatu e hi’o ra, ’eiaha rā mai tā te ao e hi’o ra. E hi’o i tā ’outou mau uira’a i roto i te fa’anahora’a nō te fa’aorara’a a tō tātou Metua i te ao ra.

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 13:1–23.Nō te tauturu i tō ’outou ’utuāfare ’ia fa’aineine nō te ’apo mai i te ha’api’ira’a i roto i te Faufa’a ’Āpī i teie matahiti, e nehenehe ’outou e tai’o i te parabole nō te ueue huero. E au mai paha tō ’outou ’utuāfare ’ia haere nā rāpae e ’ia hi’o i te mau huru repo tei fa’a’itehia i roto i te parabole. Nāhea tātou e fa’ariro ai i tō tātou ’ā’au mai te « vāhi repo maita’i » tā Iesu i fa’a’ite mai ? (Mataio 13:8).

Galatia 5:22–23 ; Philipi 4:8.’Ua ani te peresideni Russell M. Nelson ia ’outou ’ia « fa’ariro i tō [’outou] ’utuāfare ’ei vāhi mo’a nō te fa’aro’o » ’e ’ia « fa’aau i tō ’outou ’utuāfare ’ei pū nō te ha’api’ira’a ’evanelia. » Te feiā e nā reira, ’ua parau fafau ’oia ē : « E ’ana’anatae roa mai tā ’outou mau tamari’i i tē ha’api’i mai ’e i te ora i te mau ha’api’ira’a a te Fa’aora, ’e e iti noa mai te mana o te ’enemi i roto i tō ’outou orara’a ’e tō ’outou ’utuāfare. E taui roa mai tō ’outou ’utuāfare ’e e vai noa mai te reira maita’i » (« Riro ’ei feiā mo’a hi’ora’a maita’i », Liahona, Nov. 2018, 113).

’Ua riro te ha’amatara’a o te matahiti ’ei taime tano roa nō te fa’atupu i te hō’ē ’āpo’ora’a ’utuāfare nō ni’a i te fa’arirora’a i tō ’outou ’utuāfare « ’ei vāhi mo’a nō te fa’aro’o » ’e ’ei « pū nō te ha’api’ira’a ’evanelia. » ’Ia tai’o tātou i te Galatia 5:22–23 ’e te Philipi 4:8, e aha te mau mana’o e tae mai nō ni’a i te rāve’a nō te rave i te reira ? Pēnei a’e e nehenehe tō ’outou ’utuāfare e ha’amau i te mau fā nō te ta’ata hō’ē ’e nō te ’utuāfare, nō te tuatāpapa i te Faufa’a ’Āpī i teie matahiti. E aha tē nehenehe e rave nō te fa’aha’amana’o ia tātou i tā tātou mau fā ?

Nō te mau mana’o hau atu nō te ha’api’ira’a i te mau tamari’i, ’a hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Ha’api’i iā’u ’ia ’ite i te maita’i », Te mau hīmene, N°189.

Ha’amaita’i i tā’u iho tuatāpapara’a pāpa’ira’a mo’a

E ’imi i te ha’api’ira’a tumu. ’Ua riro te hō’ē ha’api’ira’a tumu ’ei parau mau mure ’ore ’e te taui ’ore. ’Ua ha’api’i te peresideni Boyd K. Packer : « E fa’ataui te ha’api’ira’a tumu mau, tei ta’a-maita’i-hia, i te mau huru ’e te peu » (« Little Children », Ensign, Nov. 1986, 17). ’A tuatāpapa ai ’outou ’e tō ’outou ’utuāfare i te mau pāpa’ira’a mo’a, ’a ’imi i te mau parau mau e tauturu ia ’outou ’ia ora rahi atu ā mai te Fa’aora te huru.

Iesu Mesia

Light of the World [Te māramarama o teie nei ao], nā Brent Borup