Tu’u i te pehe mo’a i roto i tā ’outou ha’api’ira’a ’evanelia

E nehenehe te hīmenera’a i te mau hīmene nā te mau tamari’i ’e te mau hīmene purera’a e ha’amaita’i ia ’outou ’e tō ’outou ’utuāfare i te mau rāve’a e rave rahi. E nehenehe teie mau mana’o e tauturu ia ’outou ’ia fa’a’ohipa i te pehe mo’a ’a tūtava noa ai i te ha’api’i ’e i te ora i te ’evanelia.

• ’Apo i te mau parau tumu nō te ha’api’ira’a tumu. ’A ’imi i te mau parau mau i ha’api’ihia i roto i te mau hīmene tā ’outou e hīmene ra ’aore rā, ’o tā ’outou e fa’aro’o ra. E nehenehe te reira e fa’atupu i te ’āparaura’a ’evanelia nō ni’a i teie mau parau mau i te roara’a o te mahana. ’A hīmene ’aore rā, ’a fa’aro’o i te mau hīmene Paraimere ’aore rā, i te mau hīmene purera’a e ha’api’i nei nō ni’a ia Iesu Mesia ’e tāna ’evanelia. ’A ha’apa’o maita’i i te fa’a’ite-pāpū-ra’a te Vārua Maita’i nō te Fa’aora ’e tāna mau ha’api’ira’a.

• ’Ite ē e mana tō te pehe. E nehenehe te hīmenera’a ’aore rā, te fa’aro’ora’a i te mau hīmene Paraimere ’e i te mau hīmene purera’a e riro ’ei ha’amaita’ira’a i roto i te mau taime fifi. ’Ei hi’ora’a, e nehenehe te hīmenera’a i te hō’ē hīmene e tāmarū i te hō’ē tamari’i i te taime ta’otora’a, e fa’atupu i te ’oa’oa ’a rave ’āmui ai te ’utuāfare i te ’ohipa, e fa’ateitei i te mau ta’ata tupu tei ro’ohia i te ma’i, ’aore rā, e tāmarū i te hō’ē ta’ata mana’o pe’ape’a.

• Fa’a’ite i te mau ’ohipa i tupu. ’A fa’a’ite i te mau ’ohipa i tupu nō te ta’ata hō’ē ’e nō te ’utuāfare ’o tē tū’ati i te poro’i o te mau hīmene. E nehenehe ato’a ’outou e fa’a’ite i te mau ’ā’amu pāpa’ira’a mo’a e tū’ati i te mau hīmene.

• Fa’aō i te ’utuāfare i roto i te ’ohipa. E ha’api’i rahi mai te ’utuāfare nā roto i te mau hīmene mai te mea e ’āmui pāpū mai rātou i roto i te ’ohipa. Nō te fa’aō mai i te mau melo o te ’utuāfare i roto i te ’ohipa, e nehenehe e ani i te hō’ē tamari’i pa’ari ’ia tauturu i te ha’api’ira’a i te hō’ē hīmene i te mau teina ’aore rā, e ani i te mau tamari’i ’ia ha’api’i i te ’utuāfare i te hō’ē hīmene tā rātou i ha’api’i mai i te Paraimere. E nehenehe ato’a e vaiiho i te mau melo o te ’utuāfare, te tahi i muri i te tahi, ’ia arata’i i te hō’ē hīmene.

• Feruri i te mau ravera’a ’āpī. ’A fa’a’ohipa i te mau rāve’a rau nō te ha’api’i mai i te hīmene mo’a ’ei ’utuāfare. ’Ei hi’ora’a, e nehenehe e ’aparima i te mau ta’o ’e te mau pereota ’a hīmene noa ai. ’Aore ra e nehenehe te ta’ata e fa’a’ohu nō te ’aparima i te tahi tuha’a o te hīmene ’e nā te tahi atu ïa mau melo o te ’utuāfare e tāmata i te ’imi e aha terā hīmene. E au paha te ’utuāfare ’ia hīmene mai ma te taui haere i te vitiviti o te hīmene ’e ’aore rā, e taui haere i te pūai o te reo. I roto i te mau putuparau uira Vaira’a buka ’evanelia ’e Gospel for Kids [nā te mau tamari’i], tē vai ra te mau rīpene ’e te mau video ’o tē nehenehe e tauturu ia ’outou ’ia ha’api’i i te mau hīmene. E nehenehe ato’a e fa’ata’a i te tahi mau tāpura hīmene mo’a nō te fa’aro’o atu.

Nō te mau mana’o hau atu, ’a hi’o i te mau tuha’a « Fa’a’ohipa i te pehe nō te ha’api’i i te ha’api’ira’a tumu » ’e « Tauturu i te mau tamari’i ’ia ha’api’i ’e ’ia ha’amana’o i te mau hīmene Paraimere ’e te mau hīmene purera’a », e ’itehia i roto i te « Mau arata’ira’a nō te taime hīmenera’a ’e te fa’anahora’a a te mau tamari’i i te purera’a ’ōro’a » i roto i te Mai, pe’e mai—nō te Paraimere.