Mau mana’o nō te ha’amaita’i i tā ’oe iho tuatāpapara’a pāpa’ira’a mo’a

Teie te tahi mau rāve’a ’ōhie nō te ha’amaita’i i tā ’oe iho tuatāpapara’a i te parau a te Atua i roto i te mau pāpa’ira’a mo’a.

’Imi i te parau mau nō ni’a ia Iesu Mesia

Tē ha’api’i nei te mau pāpa’ira’a mo’a ia tātou ē, tē fa’a’ite pāpū nei te mau mea ato’a nō te Mesia (hi’o 2 Nephi 11:4 ; Mose 6:63), nō reira, e nehenehe e pāpa’i ’aore rā e tāpa’o i te mau ’īrava e ha’api’i nei nō ni’a i te Fa’aora, ’e e nāhea tātou i te pe’e iāna.

Hi’o i te mau ta’o ’e te mau pereota fa’auru mau

E ’ite paha ’oe ē, e mea fa’ahiahia nō ’oe te tahi mau ta’o ’e mau pereota i roto i te mau pāpa’ira’a mo’a, mai te huru ra ē, ’ua pāpa’i-ta’a-’ē-hia te reira nō ’oe. Pēnei a’e e ’ite ’oe i te hō’ē tū’atira’a ia ’oe, ’e e mea fa’auru, ’e e mea fa’aitoito mau. E nehenehe e fa’a’ū i te reira i roto i tā ’oe mau pāpa’ira’a mo’a ’aore rā e pāpa’i i te reira i roto i te hō’ē buka tuatāpapara’a.

’Imi i te mau parau mau o te ’evanelia

I te tahi taime e parau-’āfaro-hia mai te mau parau mau o te ’evanelia (tei parau-pinepine-hia ’o te ha’api’ira’a tumu ’aore rā te mau parau tumu), ’e i te tahi atu taime, tei roto i te hō’ē hi’ora’a ’aore rā te hō’ē ’ā’amu. E ui ia ’oe iho ē : « E aha te mau parau mau mure ’ore e ha’api’ihia ra i roto i teie mau ’īrava ? »

Faʼaroʼo i te Vārua

E vai ara i te mau mana’o i roto i tō ’oe ferurira’a ’e tō ’oe ’ā’au, noa atu ā ’aita e tū’atira’a i te mau mea tā ’oe e tai’o ra. Pēnei a’e ’o te reira mau mana’o te mea mau tā te Metua i te ao ra e hina’aro ra ia ’oe ’ia ’apo mai.

Fa’aau i te mau pāpa’ira’a mo’a i tō ’oe orara’a

’A feruri e nāhea te mau ’ā’amu ’e te mau ha’api’ira’a tā ’oe e tai’o nei, i te tū’ati i tō ’oe orara’a. ’Ei hi’ora’a, e ui ’oe i roto ia ’oe ē : « E aha te mau ’ohipa i tupu nō’u ’o tē tū’ati i te mea tā’u e tai’o ra ? » ’aore rā « Nāhea vau e pe’e ai i te hi’ora’a o teie ta’ata i roto i te mau pāpa’ira’a mo’a ? »

Ui i te mau uira’a ’a tuatāpapa noa ai

’A tuatāpapa ai ’oe i te mau pāpa’ira’a mo’a, e tae mai paha te tahi mau uira’a i tō ’oe ferurira’a. E tū’ati paha teie mau uira’a i te mea tā ’oe e tai’o ra ’aore rā i tō ’oe orara’a. E feruri i teie mau uira’a ’e e ’imi i te pāhonora’a ’a tāmau noa ai i te tuatāpapa i te mau pāpa’ira’a mo’a.

Fa’a’ohipa i te mau tauturu tuatāpapara’a pāpa’ira’a mo’a

Nō te ’apo rahi atu ā nō ni’a i te mau ’īrava tā ’oe e tai’o ra, ’a fa’a’ohipa i te mau fa’ata’ara’a i raro i te ’api, te Arata’i nō te mau pāpa’ira’a mo’a (scriptures.ChurchofJesusChrist.org), ’e te tahi atu mau tauturu tuatāpapara’a.

Feruri i te mau ’ā’amu i roto i te mau pāpa’ira’a mo’a

E tāpe’a mai ’oe i te tahi mea nō ni’a i te hō’ē ’īrava mai te peu e feruri ’oe i te ’ohipa e tupu ra i taua taime ra—te huru orara’a ’aore rā te vaira’a nō taua ’īrava ra. ’Ei hi’ora’a, ’ia ’ite ’oe i te mau ’ohipa i tupu ’e te mau ti’aturira’a o te ta’ata tā te hō’ē peropheta e paraparau ra, e ti’a ïa ia ’oe ’ia māramarama i te fā nō tāna mau parau.

Pāpa’i i tō ’oe mau mana’o ’e tō ’oe mau ferurira’a

’Ua rau te rāve’a nō te pāpa’i i te mau fa’aurura’a e tae mai i roto i tā ’oe tuatāpapara’a. ’Ei hi’ora’a, e nehenehe tā ’oe e fa’a’ū i te hō’ē parau ’aore rā te hō’ē pereota faufa’a rahi ’e e pāpa’i i tō ’oe mau mana’o ’ei parau fa’ata’ara’a, i roto i tā ’oe mau pāpa’ira’a mo’a. E nehenehe ato’a e fa’ata’a i te hō’ē buka tāmahana nō te mau mea i ’apohia mai, te mau mana’o ’e te mau fa’aurura’a tā ’oe i fāri’i.

Tuatāpapa i te parau a te mau peropheta ’e a te mau ’āpōsetolo i te mau mahana hope’a nei

’A tai’o i tā te mau peropheta ’e tā te mau ’āpōsetolo i te mau mahana hope’a nei i ha’api’i nō ni’a i te mau parau tumu tā ’oe e ’ite ra i roto i te mau pāpa’ira’a mo’a (’ei hi’ora’a, hi’o conference.ChurchofJesusChrist.org ’e te mau ve’a a te ’Ēkālesia).

Fa’a’ite i te mea tā ’oe i ’apo mai

’Ua riro te ’āparaura’a i te mau mea i ’apohia mai i roto i tā ’oe tuatāpapara’a ’ei rāve’a maita’i nō te ha’api’i i te ta’ata, e ’ere rā i te reira noa, e tauturu ato’a te reira ’ia ha’apūai i tō ’oe māramaramara’a i te mea tā ’oe i tai’o.

Ora ’ia au i te ha’api’ira’a tā ’oe i ’apo mai

’Eiaha te tuatāpapara’a pāpa’ira’a mo’a e fa’auru noa ia tātou—’ia fa’ataui ato’a rā i tō tātou mau peu. ’A fa’aro’o i te mea tā te Vārua e muhumuhu ia ’oe ’ia rave i roto i tā ’oe tai’ora’a, ’ei reira, ’a fafau ’ia rave mai te au i te reira mau muhumuhu.

’Ua parau Elder David A. Bednar : « ’Eiaha tātou e tīa’i nā te fa’anahora’a ’Ēkālesia e ha’api’i ’aore rā e parau ia tātou i te mau mea ato’a i tītauhia ia tātou ’ia ’ite ’e ’ia rave nō te riro mai ’ei pipi ha’apa’o ’e nō te fa’a’oroma’i itoito ē tae noa atu i te hope’a [hi’o Te Ha’api’ira’a Tumu ’e te mau Fafaura’a 121:29]. ’Aita, tei ia tātou iho nei rā te hōpoi’a ’ia ha’api’i mai i tei tītauhia ’ia ha’api’i mai, ’ia ora mai tā tātou i ’ite e mea tītauhia ’ia ora, ’e ’ia riro i te ta’ata tā te Fatu e hina’aro ’ia riro tātou. ’E tei te fare te vāhi mau nō te ’apo mai i te ha’api’ira’a, nō te ora ’e nō te riro mai i terā ta’ata » (« Fa’aineinehia nō te noa’a mai te mau mea ato’a i hina’arohia ra », Liahona, Mē 2019, 102).