Mau mana’o nō te ha’amaita’i i tā te ’utuāfare tuatāpapara’a pāpa’ira’a mo’a

’Ua riro te tuatāpapara’a pāpa’ira’a mo’a tāmau a te ’utuāfare ’ei rāve’a pūai nō te tauturu i te ’utuāfare ’ia ’ite i te fa’aurura’a a te Vārua Maita’i ’e ’ia ha’api’i i te ’evanelia. E ’ere te rahira’a ’e te roara’a o te tai’ora’a te mea faufa’a a’e, ’o te tāmaura’a rā i tā ’outou tauto’ora’a. ’A fa’ariro ai ’outou i te tuatāpapara’a pāpa’ira’a mo’a ’ei tuha’a faufa’a rahi nō tō ’outou orara’a ’utuāfare, e tauturu ato’a ïa ’outou i te mau melo o te ’utuāfare ’ia ha’afātata atu ā i te Metua i te ao ra ’e ia Iesu Mesia, ’e e patu ’outou i tō rātou ’itera’a pāpū i ni’a i te niu o te parau a te Atua. E nehenehe e ’āpo’o ’āmui nō ni’a i te mau uira’a i muri nei :

• Nāhea te mau melo o te ’utuāfare e fa’aitoito ai te tahi i te tahi ’ia tuatāpapa i te mau pāpa’ira’a mo’a i tōna pae ?

• E aha tā te mau melo o te ’utuāfare e nehenehe e rave nō te fa’aitoito i te ta’ata tāta’itahi ’ia fa’a’ite mai i te mea tā rātou i ’apo mai ?

• Nāhea ’outou e tūra’i ai i te parau nō te mau parau tumu i ’apohia mai i roto i te Faufa’a ’Āpī, i roto i te taime ha’api’ira’a ato’a o te mahana tāta’itahi ?

’A ha’amana’o ē, ’o te fare te vāhi tano roa a’e nō te ha’api’i mai i te ’evanelia. E mau rāve’a i te fare e nehenehe e ’apo i te ’evanelia ’e e ha’api’i i te ’evanelia ’aita tā te piha ha’api’ira’a. ’A feruri i te tahi mau ravera’a ’āpī ’ia feruri ’outou i te mau rāve’a nō te tauturu i tō ’outou ’utuāfare ’ia ’apo mai i te ha’api’ira’a i roto i te mau pāpa’ira’a mo’a. ’A hi’o i te tahi o te mau mana’o i muri nei nō te ha’amaita’i i te tuatāpapara’a pāpa’ira’a mo’a a te ’utuāfare.

Fa’a’ohipa i te pehe

E hīmene i te mau hīmene e pa’epa’e i te mau parau tumu i ha’api’ihia i roto i te mau pāpa’ira’a mo’a. ’Ua tāpurahia i roto i te arata’i ha’api’ira’a o te hepetoma tāta’itahi, te hō’ē hīmene purera’a ’aore rā te hō’ē hīmene nā te mau tamari’i. E nehenehe e ui i te mau uira’a nō ni’a i te mau ta’o ’e ’aore rā te mau pereota i roto i te hīmene. Ta’a ’ē noa atu te hīmenera’a, e nehenehe te ’utuāfare e rave i te tahi mau ’ohipa e tū’ati i te mau hīmene ’aore rā e fa’aro’o noa i te mau hīmene ’a rave noa ai i te tahi atu mau ’ohipa ri’i. Nō te tahi atu mau mana’o, ’a hi’o « Tu’u i te pehe mo’a i roto i tā ’outou ha’api’ira’a ’evanelia » i roto i teie buka.

Fa’a’ite i te mau ’īrava pāpa’ira’a mo’a faufa’a rahi

’A fa’ata’a i te taime nō te mau melo o te ’utuāfare nō te fa’a’ite i te tahi mau ’īrava tā rātou i tāpe’a mai i roto i tā rātou iho tuatāpapara’a.

Fa’a’ohipa i tā ’outou iho mau parau

’A ani i te mau melo o te ’utuāfare ’ia parau poto mai nā roto i tā rātou iho mau parau i tā rātou i ’apo mai i roto i te mau pāpa’ira’a mo’a tā ’outou e tuatāpapa ra.

Fa’a’ohipa i te mau pāpa’ira’a mo’a i roto i tō ’outou orara’a

’Ia oti te tai’ora’a o te hō’ē tuha’a ’īrava, ’a ani i te mau melo o te ’utuāfare ’ia fa’a’ite mai i te mau rāve’a e fa’a’ohipa ai rātou i teie tuha’a ’īrava i roto i tō rātou orara’a.

Ui i te hō’ē uira’a

E ani i te mau melo o te ’utuāfare ’ia ui i te hō’ē uira’a nō ni’a i te ’evanelia ’ei reira e ’imi atu ai i te tahi mau ’īrava e nehenehe e pāhono i te uira’a.

Pia i te hō’ē ’īrava

E mā’iti i te hō’ē ’īrava faufa’a rahi nō ’outou, e pia atu ai i te reira i te vāhi e ’ite pinepine te mau melo o te ’utuāfare. E ani i te tahi atu mau melo o te ’utuāfare e fa’a’ohu nō te mā’itira’a i te ’īrava e pia.

Ha’amau i te hō’ē tāpura ’īrava

E mā’iti te ’utuāfare i te tahi mau ’īrava ’o tā ’outou e paraparau i roto i te hepetoma i muri mai.

Tāmau ’ā’au i te mau ’īrava

’A mā’iti i te hō’ē tuha’a ’īrava faufa’a rahi nō te ’utuāfare, ’e ’a ani i te mau melo o te ’utuāfare ’ia tāmau ’ā’au i te reira nā roto i te fa’ahitira’a i te reira i te mau mahana ato’a ’aore rā nā roto i te tahi ha’uti nō te tāmau ’ā’au.

Fa’a’ohipa i te mau ha’api’ira’a tao’a

’A ’imi i te mau tao’a e tū’ati i te mau pene ’e te mau ’īrava tā te ’utuāfare e tai’o ra. E ani i te mau melo o te ’utuāfare ’ia paraparau nō ni’a i te huru te tao’a tāta’itahi e tū’ati ra i te mau ha’api’ira’a i roto i te mau pāpa’ira’a mo’a.

Mā’iti i te hō’ē tumu parau

E fa’a’ohu te mau melo o te ’utuāfare nō te mā’iti i te hō’ē tumu parau e tuatāpapa ’āmui i roto i te ’utuāfare. Fa’a’ohipa i te arata’i nō te mau pāpa’ira’a mo’a (scriptures.ChurchofJesusChrist.org) nō te ’imi i te mau tuha’a ’īrava nō ni’a i te reira tumu parau.

Pāpa’i i te hōho’a

E tai’o te ’utuāfare i te tahi mau ’īrava ri’i, ’ei reira e vaiiho ai i te tahi taime nō te mau melo o te ’utuāfare ’ia pāpa’i i te hō’ē hōho’a e tū’ati i te mea i tai’ohia. E fa’ata’a i te tahi taime ’āparaura’a nō ni’a i tā te tahi ’e tā te tahi hōho’a.

Ha’uti ta’ata ora i te ’ā’amu

’Ia oti te hō’ē ’ā’amu i te tai’ohia, ’a ani i te mau melo o te ’utuāfare ’ia ha’uti ta’ata ora i te reira. I muri iho, e paraparau nō ni’a i te huru teie ’ā’amu e tū’ati nei i te mau ’ohipa e tupu ra nō te ta’ata hō’ē ’e nō te ’utuāfare.

’Ua parau te peresideni Russell M. Nelson : « Tē parau fafau atu nei au ē, ’ia ha’a itoito noa ’outou nō te fa’aau i tō ’outou ’utuāfare ’ei pū nō te ha’api’ira’a ’evanelia, ’āraua’e, e riro mai ïa tā ’outou mau sābati ’ei mahana hina’arohia. E ’ana’anatae roa mai tā ’outou mau tamari’i i te ha’api’i mai ’e i te ora i te mau ha’api’ira’a a te Fa’aora, ’e e iti noa mai te mana o te ’enemi i roto i tō ’outou orara’a ’e tō ’outou ’utuāfare. E taui roa mai tō ’outou ’utuāfare ’e e vai noa mai te reira maita’i » (« Riro ’ei feiā mo’a hi’ora’a maita’i », Liahona, Nov. 2018, 113).