Fa’a’ohipara’a i te Mai, pe’e mai—nō te Paraimere

Fa’aineine nō te ha’api’i i roto i te Paraimere

’Ia riro te tuatāpapara’a a te ta’ata hō’ē ’e a te ’utuāfare i te fare ’ei pū nō te ha’api’ira’a mai te ’evanelia. E parau te reira nō ’oe ’e nō te mau tamari’i tā ’oe e ha’api’i ra. ’A fa’aineine ai ’oe nō te ha’api’i, ’a ha’amata nā roto i te fāri’ira’a i tō ’oe iho mau ’itera’a rau nō te mau pāpa’ira’a mo’a. E tupu tā ’oe fa’aineinera’a faufa’a roa a’e ’a ora ai ’oe i te ’evanelia, ’a ’imi ai i roto i te mau pāpa’ira’a mo’a, ’e ’a tītau ai i te fa’aurura’a a te Vārua Maita’i.

’Ua riro te Mai, pe’e mai—nō te ta’ata hō’ē ’e te ’utuāfare ’ei tuha’a faufa’a rahi nō tā ’oe iho tuatāpapara’a ’e tā ’oe fa’aineinera’a nō te ha’api’i. E tauturu te reira ia ’oe ’ia raupa i te hō’ē hāro’aro’ara’a hōhonu a’e i te ha’api’ira’a tumu o te mau parau tumu e ’itehia i roto i te mau pāpa’ira’a mo’a. E hōro’a mai te Mai, pe’e mai—nō te Paraimere i te mau ’ātivite e rave rahi nō te mau pāpa’ira’a mo’a ’e te mau ’ā’amu ’o tē ani i te mau tamari’i ’ia tuatāpapa i te fare i te roara’a o te hepetoma.

I roto i tā ’oe fa’aineinera’a, e tupu mai te mau mana’o ’e te mau fa’aurura’a nō ni’a i te mau tamari’i tā ’oe e ha’api’i ra. E fāri’i ’oe i te mau mana’o e nāhea te mau parau tumu i roto i te mau pāpa’ira’a mo’a i te ha’amaita’i i tō rātou orara’a. E arata’ihia ’oe nō te fa’auru ia rātou ’ia ’ite mai i te reira mau parau tumu, ’a ha’api’i mai ai rātou nā roto mai i te mau pāpa’ira’a mo’a nō rātou iho, ’e nō tō rātou ’utuāfare.

Te mau mana’o nō te ha’api’ira’a

’A fa’aineine ai ’oe nō tē ha’api’i, e noa’a mai te tahi atu ā fa’aurura’a nā roto i te tuatāpapara’a i te mau arata’i ha’api’ira’a i roto i teie mātēria. ’Eiaha e fa’ariro i teie mau mana’o ’ei arata’ira’a fa’ahepohia, ’ei mana’o rā nō te fa’atupu i te fa’aurura’a nō ’oe iho. ’Ua mātau ’oe i teie mau tamari’i,’e e rahi atu tō ’oe mātau ia rātou mai te mea ē, e ’ohipa ’oe ’e ’o rātou i roto i te piha ha’api’ira’a. ’Ua ’ite ato’a te Fatu ia rātou, ’e e fa’auru ’oia ia ’oe ma te mau rāve’a maita’i a’e nō te ha’api’i ’e nō te ha’amaita’i ia rātou.

E rave rahi atu ā rāve’a tauturu e vai ra nō te tauturu ia ’oe ’a fa’aineine ai ’oe ia ’oe, mai te mau mana’o i roto i te Mai, pe’e mai—nō te ta’ata hō’ē ’e te ’utuāfare ’e te Mau ve’a a te ’Ēkālesia. Nō te mau ha’amāramaramara’a hau atu nō ni’a i teie mau rāve’a tauturu ’e te tahi atu, ’a hi’o « Te tahi atu mau mātēria tauturu nō te ha’api’i i te mau tamari’i » i roto i teie buka.

Te tahi mau mea e ha’amana’o noa

• I te mau taime ato’a e fārerei ai ’oe i te mau tamari’i, ’a feruri i te mau rāve’a nō te tauturu ia rātou ’ia ’ite i te here o tō tātou Metua i te ao ra ’e tō Iesu Mesia ’e ’ia ’ite i te fa’aurura’a a te Vārua Maita’i.

• Tei te mau metua te hōpoi’a rahi nō te ha’api’i i tā rātou mau tamari’i. ’Ei ’orometua ha’api’i, e hōpoi’a faufa’a nā ’oe ’ia pāturu, ’ia fa’aitoito ’e ’ia patu i ni’a iho i te raupara’a i te ’ite o te ’evanelia i te fare. ’Ia vai ara ’oe nō te mau tamari’i ’aita te mau metua e ha’api’i nei i te ’evanelia i tō rātou fare. ’A fa’aō mai i te mau tamari’i ato’a i roto i te mau ’āparaura’a ’evanelia, ma te hi’o ’ore i te huru o tō rātou orara’a ’utuāfare.

• E mea maita’i te nā ni’a-iho-fa’ahou-ra’a. E ’apo pāpū maita’i a’e te mau tamari’i i te mau parau mau o te ’evanelia mai te mea ē, e nā ni’a iho fa’ahouhia teie mau parau mau i te ha’api’ihia nā roto i te mau ’ātivite rau. ’Ia ’ite ana’e ’oe ē, e mea maita’i nō te mau tamari’i te hō’ē ’ātivite nō te raupa i te ’ite, ’a feruri ’ia nā ni’a iho fa’ahou i te rave i te reira, mai te mea iho ā rā tē ha’api’i ra ’oe i te mau tamari’i ’āpī. E nehenehe ato’a ’oe e hi’o fa’ahou i te hō’ē ’ātivite i roto i te hō’ē ha’api’ira’a tahito.

• Tē hina’aro nei tō tātou Metua i te Ao ra ’ia manuia ’oe ’ei ’orometua ha’api’i. ’Ua hōro’a mai ’oia e rave rahi rāve’a nō te tauturu ia ’oe, tae noa atu i te mau rurura’a a te mau ’orometua ha’api’i. I roto i teie mau rurura’a e nehenehe ’oe e ’āparau ’e te tahi mau ’orometua ha’api’i nō ni’a i te mau fifi tā ’oe e fārerei ra. E nehenehe ato’a ’oe e ’āparau ’e e fa’a’ohipa i te mau parau tumu o te ha’api’ira’a mai te huru Mesia.

• Mai te mea ē, tē ha’api’i ra ’oe i te mau tamari’i ’āpī, ’e tē hina’aro ra ’oe i te tauturu hau atu, ’a hi’o « Pāhonora’a i te mau hina’aro o te mau tamari’i ’āpī » i roto i teie buka.

I roto i teie mātēria, tē vai ra te mau arata’ira’a ha’api’ira’a nō te hepetoma tāta’itahi o te matahiti. I te mau sābati ’aita e fa’atupuhia te Paraimere, nō te ’āmuira’a rahi ānei, nō te ’āmuira’a tītī ānei, ’aore rā, nō te tahi atu tumu, e fa’aitoitohia te mau ’utuāfare ’ia tāmau noa i te tai’o i te Faufa’a ’Āpī i te fare mai te au i te tārena i fa’anahohia i roto i te Mai, pe’e mai—nō te ta’ata hō’ē ’e te ’utuāfare. ’Eiaha e ha’ape’ape’a nō ni’a i te mau ha’api’ira’a tā ’oe e ’ere ra ; ’a ha’api’i i te arata’ira’a ha’api’ira’a i fa’anahohia nō te hepetoma.