Te tahi atu ā mau mātēria tauturu nō te ha’api’i i te mau tamari’i

E ’itehia teie mau mātēria tauturu i roto i te fa’anahora’a ’āfa’ifa’i nō te Vaira’a buka ’evanelia ’e i ni’a te ChurchofJesusChrist.org.

Mai, pe’e mai—nō te ta’ata hō’ē ’e te ’utuāfare

E nehenehe ’oe e fa’atano i te mau ’ātivite i roto i te Mai, pe’e mai—nō te ta’ata hō’ē ’e te ’utuāfare nō te fa’a’ohipa i roto i tā ’oe piha ha’api’ira’a Paraimere. ’Eiaha e ha’ape’ape’a mai te mea ’ua rave a’ena te mau tamari’i i teie mau ’ātivite ’e tō rātou ’utuāfare i te fare ; e tauturu te tāpitira’a i te ravera’a i te mau tamari’i ’ia ’apo mai. E hina’aro paha te mau tamari’i e fa’a’ite ia ’oe e mea nāhea tō rātou ravera’a i te mau ’ātivite ’e tō rātou ’utuāfare, ’e e aha tā rātou i ’apo mai.

Te mau Hīmene ’e te buka Chants pour les enfants

E tītau manihini te pehe mo’a i te Vārua, e tauturu ia tātou ’ia fāri’i i te here o te Atua, ’e e ha’api’i i te ha’api’ira’a tumu nā roto i te hō’ē rāve’a e ’ore roa e mo’ehia. Ta’a ’ē noa atu te fa’a’ohipara’a i te mau nene’ira’a o Te mau Hīmene ’e o te Chants pour les enfants, e ’ite mai ’oe i te video ’e te haruharura’a reo nō te mau hīmene e rave rahi ’e te mau hīmene nā te mau tamari’i i ni’a te music.ChurchofJesusChrist.org ’e i roto i te mau fa’anahora’a ’āfa’ifa’i Sacred Music ’e Gospel Media.

Nō te mau mana’o, ’a hi’o « Using Music to Teach Doctrine [Fa’a’ohipa i te pehe nō te ha’api’i i te ha’api’ira’a tumu] » ’e « Helping Children Learn and Remember Primary Songs and Hymns [Tauturu i te mau tamari’i ’ia ha’api’i mai ’e ’ia ha’amana’o i te mau hīmene Paraimere ’e te mau hīmene purera’a] » i roto i te parau hi’u o teie buka.

’A hi’o na i tā ’outou mau tamari’i ri’i

E rave rahi mau tumu parau i tu’uhia i roto i te ’A hi’o na i tā ’outou mau tamari’i ri’i : Buka ha’apa’ora’a tamari’i e tū’ati i te mau tumu parau tā ’oe e ha’api’i i roto i te Paraimere. Mai te mea iho ā rā e ha’api’i ’oe i te mau tamari’i ri’i, ’a feruri e ’imi i roto i te buka ha’api’ira’a a te piha ha’apa’ora’a tamari’i i te mau hīmene, te mau ’ā’amu, te mau ’ātivite ’e te mau ’ohipa rima’ī hau atu.

Hoa

Tē vai ra i roto i te ve’a Hoa te mau ’ā’amu ’e te mau ’ātivite ’o te nehenehe e tauturu i te mau parau tumu tā ’oe e ha’api’i ra nā roto mai i te Mai, pe’e mai—nō te Paraimere.

Te mau ’ā’amu o te Faufa’a ’Āpī

E tauturu te mau Ā’amu nō te Faufa’a ’Āpī i te mau tamari’i ’ia ha’api’i mai i te ha’api’ira’a tumu ’e i te mau ’ā’amu e ’itehia i roto i te Faufa’a ’Āpī. E ’ite ato’a mai ’oe i teie mau ’ā’amu i roto i te fa’anahora’a ’āfa’ifa’i o te Vaira’a buka ’evanelia ’e i ni’a MediaLibrary.ChurchofJesusChrist.org.

Buka pēni nō te mau ’ā’amu o te mau pāpa’ira’a mo’a—Faufa’a ’Āpī

Tē vai ra i roto i teie buka te mau ’api ’ātivite pēni ’ārearea tei fa’ata’ahia nō te ha’amaita’i i te ’apora’a mai a te mau tamari’i nō te Faufa’a ’Āpi.

Te mau video ’e te anoihi

E tauturu te hōho’a pēni, te mau video, ’e te tahi atu mau ha’apararera’a i tā ’oe mau pīahi ’ia hāro’aro’a i te ha’api’ira’a tumu ’e ’ia hi’o hōho’a i te mau ’ā’amu e ’itehia i roto i te mau pāpa’ira’a mo’a. ’A haere e hi’o i te ha’apararera’a ’evanelia i ni’a GospelMedia.ChurchofJesusChrist.org nō te hi’o i te ha’aputura’a mātēria ha’apararera’a a te ’Ēkālesia. E roa’a ato’a te Ha’apararera’a ’Evanelia i roto i te niuniu ’āfa’ifa’i. E rave rahi hōho’a tā ’oe e nehenehe e fa’a’ohipa i roto i te piha ha’api’ira’a e ’itehia i roto i te Buka hōho’a ’evanelia.

Ha’api’ira’a mai tā te Fa’aora

E tauturu teHa’api’ira’a mai tā te Fa’aora ia ’oe ’ia ’apo mai ’e ’ia fa’a’ohipa i te mau parau tumu o te ha’api’ira’a mai tā te Mesia. E tuatāpapahia ’e e fa’a’ohipahia teie mau parau tumu i roto i te mau rurura’a a te ’āpo’ora’a ’orometua ha’api’i.