Tausamaaga Mulimuli

Ia Fai ma Faamanatuga ia te A’u, saunia e Walter Rane

29 Me–4 Iuni

Mataio 26; Mareko 14; Ioane 13

“I Le Faamanatuina”

A o e faitau i mea na tutupu o loo faamatala mai i le Mataio 26; Mareko 14; ma le Ioane 13, ma mataitū soo se lagona uunai e te maua aemaise o uuna‘iga e faaloloto ai lou faatuatua ia Iesu Keriso ma lou tuuto ia te Ia.

Tusi Faamaumau Ou Lagona Uunai

O le aso a’o lei maliu o Ia, na tuuina atu ai e Iesu i Ona soo se mea e manatua ai o Ia. Sa “tago Iesu i le areto, ua faafetai, ona tofitofi ai lea, ma avatu i le au soo, ua faapea atu, Ina tago ia, ina aai; o lo’u tino lenei. Ua tago foi o ia i le ipu, ua faafetai, ona avatu ai lea e ia ia te i latou, ua faapea atu, ina inu ia outou uma i ai, aua o lo’u toto lenei” (Mataio 26:26–28).

O lena mea na tupu i le tusa ma le 2,000 tausaga ua mavae, i se nofoaga o le toatele o i tatou o le a le vaai lava i ai, i se gagana e toaitiiti i tatou e mafai ona malamalama i ai. Ae o le taimi nei, i Aso Sa uma i a tatou lava nofoaga e faapotopoto ai, o e umia le perisitua, ua faatagaina e galulue i le suafa o Iesu Keriso, e faia le mea sa Ia faia. Latou te ave le falaoa ma le vai, faamanuia, ma tufatufa mai ia i tatou taitoatasi, o Ona soo. O se faatinoga faigofie—pe i ai ea se isi mea e faigofie atu, taua atu, nai lo le taumamafa i le falaoa ma inu i le vai? Ae o lena falaoa ma le vai e paia ia i tatou aua e fesoasoani tatou te manatua ai o Ia. O le tatou auala lea e fai atu ai, “O le a le galo o Ia ia te a’u”—ae le na’o le, “O le a le galo ia te au mea na ou faitau i ai e uiga i Ana aoaoga ma i Lona soifuaga.” Nai lo lena, o loo tatou faapea atu, “O le a le galo ia te ai le mea na Ia faia mo a’u.” O le a le galo ia te a’u le ala na Ia laveaiina ai a’u i taimi na ou tagi atu ai mo se fesoasoani. Ma “o le a le galo lava ia te a’u Lona tuuto ia te a’u ma lo’u tuuto ia te Ia—o le feagaiga na tatou faia.”

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataio 26:6–13; Mareko 14:3–9

“Ua na uuina lo’u tino … o lo’u tanuga.”

Faatasi ai ma se faatinoga faigofie o le tapuai, o le fafine o loo faamatalaina i nei fuaiupu ua faaalia ai sa ia iloaina Iesu ma le mea o le a Ia faia (tagai Mataio 26:12). Aisea e te manatu ai o ana faatinoga sa matuai anoa i le Faaola? (tagai fuaiupu 13). O le a se mea e faagaeetia ai oe e uiga i le fafine ma lona faatuatua? Mafaufau loloto i le ala e mafai ona e mulimuli ai i lana faataitaiga.

Tagai foi Ioane 2:1–8.

Mataio 26:20–22; Mareko 14:17–19

“Le Alii e, o au ea?”

O le a se mea ua e aoaoina e uiga i le au soo mai a latou fesili i le Alii i nei fuaiupu? Aisea e te manatu na latou fesili atu ai? Mafaufau pe ono faapefea ona fesili atu i le Alii, “O a’u ea?”

Tagai foi Dieter F. Uchtdorf, “Le Alii e, O A’u Ea?,” Liahona, Nov. 2014, 56-59.

Mataio 26:26–29; Mareko 14:22–25

O le faamanatuga o se avanoa lea e manatua ai le Faaola.

Ina ua faalauiloa atu e le Faaola le faamanatuga i Ona soo, o a ni mafaufauga ma ni lagona e te manatu na i ai ia i latou? Mafaufau e uiga i ai ao e faitau e uiga i lo latou aafiaga i le Mataio 26:26-29 ma le Mareko 14:22–25. Aisea e te manatu na filifili ai e Iesu lenei auala mo i tatou e manatua ai o Ia? E ono mafai foi ona e mafaufau loloto i aafiaga na e maua i le taimi o le faamanatuga. O i ai se isi mea e mafai ona e faia ia atili paia ma anoa ai lou aafiaga?

A uma ona faitau ma mafaufau loloto i nei fuaiupu, atonu e te tusia i lalo nisi o mea e te lagona le musuiaina ai o oe e manatua e uiga i le Faaola. E mafai ona e iloiloa nei mea i le isi taimi e te tagofia ai le faamanatuga. E mafai foi ona e iloiloa i isi taimi, o se auala e “manatua [ai] pea o Ia” (Moronae 4:3).

Tagai foi Luka 22:7–39; 3 Nifae 18:1–13; Mataupu Faavae ma Feagaiga 20:76–79; Gospel Topics, “Sacrament,” topics.ChurchofJesusChrist.org; “Always Remember Him” (vitio), ChurchofJesusChrist.org.

Ioane 13:1–17

O le Faaola o lo tatou faataitaiga o le auauna atu i isi male lotomaualalo.

I le taimi o Iesu, o le mulumuluina o vae o se isi tagata o se galuega a auauna, e le o taitai. Ae sa finagalo Iesu i Ona soo ia ese o latou mafaufau e faatatau i le uiga o le taitai ma le auauna atu. O a ni savali e te maua i afioga ma faatinoga a le Faaola i le Ioane 13:1–17? I lau aganuu, o le mulumulu o vae o isi atonu e le o se auala faaleaganuu lea o se tautua. Ae mafaufau i mea e mafai ona e faia e mulimuli ai i le faataitaiga o le auaunaga faatauvaa a le Faaola?

Atonu foi e manaia le maitau o mea na silafia ma lagonaina e Iesu i lenei taimi paia faatasi ma Ana Aposetolo (tagai fuaiupu 1 ma le 3). O a ni mea o loo fesoasoani nei manatu ina ia e malamalama ai e uiga i le Faaola?

Tagai foi Luka 22:24–27.

Ioane 13:34–35

O lo’u alofa i isi o se faailoga lea o a’u o se soo moni o Iesu Keriso.

I se taimi na muamua atu, na tuuina atu ai e Iesu se poloaiga ia “alofa atu i le lua te tuaoi ia pei o oe lava ia te oe” (Mataio 22:39). O lea ua Ia tuuina mai “se poloaiga fou.” O le a lou manatu i le uiga o le ia alofa i isi e pei ona alofa Iesu ia te oe? (tagai Ioane 13:34).

Atonu foi e te mafaufau loloto pe faapefea ona iloa e isi tagata o oe o se soo o Iesu Keriso. E mafai faapefea ona e faamautinoa o le alofa o lou uiga faaalia fitoitonu lea o le avea ma se Kerisiano?

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataio 26:26–29; Mareko 14:22–25.E faape’i le aafiaga o lou aiga i le taimi o faamanatuga i vaiaso taitasi? O le faitau e uiga i le uluai faamanatuga e mafai ona musuia ai se talanoaga e uiga i le taua o le faamanatuga ma auala e faaleleia atili ai lou aafiaga. Fuafua e faaali le ata o le Tufatufaina o le Faamanatuga (Tusi Ata o le Talalelei, nu.108) ma fefaasoaai manatu i mea e mafai ona tou faia ao lei faia le faamanatuga, i le taimi o le faamanatuga, ma pe a uma le faamanatuga.

tamaitai o loo tagofia le faamanatuga

O le faamanatuga e fesoasoani tatou te manatua ai Iesu Keriso.

Mataio 26:30.Mafaufau e usu se viiga, e pei ona sa faia e Iesu ma Ana Aposetolo—atonu o se viiga faamanatuga. Na ono faapefea ona avea se viiga ma se faamanuiaga ia Iesu ma Ana Aposetolo i lena taimi? O faapefea ona avea viiga o se faamanuiaga ia i tatou?

Ioane 13:1–17.Atonu e te manao e faaali atu i lou aiga le ata o loo i le faaiuga o lenei otootoga a o outou faitauina nei fuaiupu. O a ni upumoni na aoao mai e le Faaola e ala i Ana faatinoga? O a ni faamatalaga auiliili o loo i le ata ua fesoasoani tatou te malamalama ai i nei upumoni? Atonu e mafai ona faasoa mai e tagata o le aiga ni auala na aumaia ai e le ola i nei upumoni le fiafia ia i latou (tagai Ioane 13:17).

Ioane 13:34–35.A uma ona faitau nei fuaiupu, atonu tou te talanoa faatasi pe faapefea ona iloa e isi tagata o outou o soo o Iesu Keriso. O a ni auala e finagalo le Faaola ia iloa ai Ona soo? E mafai ona fai atu i tagata o le aiga e talanoa e uiga i tagata o lo latou alolofa mo isi e faaalia ai o i latou o ni soo moni o Iesu Keriso. Atonu tou te talanoa foi i auala e mafai ona tou faaali atu ai le alofa faateleina o se aiga.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ia Fealofani,” Tusipese a Tamaiti, 74.

Faaleleia o Suesuega Faaletagata Lava Ia

Mafaufau Loloto. O tusitusiga paia e i ai uiga faaleagaga tatou te ono misia pe a tatou faasamasamanoa tele, e pei ona tatou faia i isi anomea faitau. Aua le faatopetopea ina ia uma se mataupu. Faaalu se taimi e manatunatu loloto ai e uiga i mea e te faitauina.

Iesu o loo mulumuluina vae o le au soo

Silisili i le Malo, saunia e J. Kirk Richards