Afio Mai Faalua

O Le Afio Mai Faalua, saunia e Harry Anderson

22–28 Me

Iosefa Samita—Mataio 1; Mataio 24–25; Mareko 12–13; Luka 21

“E Sau le Atalii o le Tagata”

A o e faitauina le Iosefa Samita—Mataio 1; Mataio 24–25; Mareko 12–13; ma le Luka 21, atonu e te fesili, ”O a savali o i ai i nei mataupu mo au? mo lo’u aiga? mo lo’u vala‘auga?”

Tusifaamaumau Ou Lagona Uuna‘i

Atonu na faate‘ia soo o Iesu i Lana valo‘aga: o le malumalu maoa‘e o Ierusalema, le totonugalemu faaleaganuu o tagata Iutaia, o le a matua faaumatia ma “o [le a] leai se … maa i luga o le isi.” Na manana‘o le ‘au soo e iloa atili. “O afea e tutupu ai nei mea?” sa latou fesili ai. “A o le a foi le faailoga o lou afio mai?” (Iosefa Samita—Mataio 1:2–4). O tali a le Alii na faaalia ai le faatafunaga tele ua oo mai i—o se valoaga na faataunuuina i le TA 70—o se mea laitiiti lava pe a faatusatusa i faailoga o Lona afio mai i aso e gata ai. O mea na foliga e sili ona mausali nai le malumalu i Ierusalema o le a faamaonia ua na o sina taimi---o le la, o le masina, o fetu, o atunuu, ma le vasa. E oo lava i “mana o le lagi o le a luluina” (Iosefa Samita—Mataio 1:33). Afai tatou te matauina faaleagaga, e mafai e lenei vavao ona aoao ai i tatou e tuu lo tatou faatuatuaga i se mea e tumau moni. E pei ona folafola mai Iesu, “E mavae atu le lalolagi; ae le mavae atu lava la’u upu. … Ma o se na te tausia au upu, e le faaseseina lava” (Iosefa Samita—Mataio 1:35, 37).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

O le a le Iosefa Samita—Mataio?

O le Iosefa Samita—Mataio, o loo maua i le Penina Tau Tele, o le faaliiuga a Iosefa Samita o le fuaiupu mulimuli o le Mataio 23 ma le mataupu atoa o le Mataio 24. O le toefaafouga musuia a Iosefa Samita ua toefuatai mai ai upumoni taua na leiloloa. Fuaiupu 12–21 e faasino i le faatafunaga o Ierusalema anamua; fuaiupu 21–55 o loo i ai valoaga e uiga i aso amuli.

Iosefa Samita—Mataio 1:21–37; Mareko 13:21–37; Luka 21:25–38

E mafai ona fesoasoani valoaga e uiga i le Afio Mai Faalua o le Faaola ia te au e faafetaiaia le lumanai i le faatuatua.

E mafai ona le maumanatu le faitau e uiga i mea na tutupu e tau atu i le Afio Mai Faalua o Iesu Keriso. Ae ina ua valoia e Iesu nei mea e tutupu, sa Ia ta’u atu i Ona soo “e aua le atuatuvale”Iosefa Samita—Mataio 1:23). E mafai faapefea ona e “lē faaatuatuvaleina” a o e faalogo e uiga i mafuie, taua, taufaasese, ma oge? Mafaufau i le fesili lea a o e faitauina nei fuaiupu. Maka pe matau soo se fautuaga faamautinoa e te maua.

Tagai foi Gospel Topics, “Second Coming of Jesus Christ,” topics.ChurchofJesusChrist.org.

Iosefa Samita—Mataio 1:26–27, 38–55; Mataio 25:1–13; Luka 21:29–36

E tatau ona ou saunia pea mo le Afio Mai Faalua o le Faaola.

E lei faaalia mai e le Atua “le aso po o le itu aso e sau ai le Atalii o le Tagata” (Mataio 25:13). Ae e le finagalo o Ia i lena aso e “faafuasei” mai ia te i tatou (Luka 21:34), o lea ua Ia tuuina mai ai fautuaga ia te i tatou e uiga i le ala e saunia ai.

A o e faitauina nei fuaiupu, faailoa mai faataoto ma isi faatusatusaga sa faaaoga e le Faaola e aoao ai i tatou ia saunia e le aunoa mo Lona Afio Mai Faalua. O a ni mea ua tatou aoao mai ai? O le a se mea ua musuia oe e fai?

Atonu foi e te mafaufau pe o a ni auala o finagalo le Faaola e te fesoasoani ai e sauni le lalolagi mo Lona Afio Mai Faalua. O le a lou manatu i le uiga o le ia saunia e talia le Faaola pe a Ia afio mai? O le savali a Elder D. Todd Christofferson “Saunia mo le Toe Foi mai o le Alii” (Liahona, Me 2019, 81–84) e mafai ona fesoasoani e te mafaufau loloto ai i lenei mea.

Tagai foi Russell M. Nelson, “Fetaiai ma le Lumanai i le Faatuatua,” Liahona, Nov. 2020, 73–76.

Mataio 25:14–30

Ua faamoemoe le Tama Faalelagi ia ou faaaogaina ma le poto Ana meaalofa.

I le faataoto a le Faaola, o se “taleni” sa faasino i tupe. Ae o le faataoto i taleni e mafai ona faaosofia ai i tatou e mafaufau loloto i auala o loo tatou faaaoga ai soo se tatou faamanuiaga lava, ae le na’o tupe. A uma ona faitau le faataoto lenei, atonu e te faia se lisi o ni faamanuiaga ma tiutetauave ua tuuina mai e le Tama Faalelagi ia te oe. O le a se mea ua Ia faamoemoe e te faia i nei faamanuiaga? E mafai faapefea ona e faaaogaina atili ma le poto nei meaalofa?

Mataio 25:31–46

Pe a ou auauna atu i isi, ua ou auauna atu i le Atua.

Afai o e tau tomanatu pe o le a faapefea ona faamasinoina e le Alii lou olaga, faitau le faataoto o le mamoe ma ‘oti. Aisea e te manatu ai o le tausia o i latou e limavaivai o le a fesoasoani e saunia ai oe ia “fai mo … tofi le malo” o le Atua?

E faapefea ona tutusa le faataoto lea i le isi lua i le Mataio 25? O a ni savali o loo laugatasia i le tolu lea?

Tagai foi Mosaea 2:17; 5:13.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Iosefa Samita—Mataio.Ina ia fesoasoani i lou aiga i le vailiiliina o lenei mataupu, valaaulia i latou e vaavaai mo aoaoga a le Faaola e uiga i le ala e mafai ai ona tatou saunia mo Lona Afio Mai Faalua (tagai, mo se faataitaiga, fuaiupu 22–23, 29–30, 37, 46–48). O le a se mea e mafai ona tatou faia e mulimuli ai i lenei fautuaga? Atonu e fiafia lou aiga e usu le “Pe a Ia Toe Afio Mai” (Tusipese a Tamaiti, 46–47) ma tusi ni ata o mea latou te vaai faalemafaufau i ai o le a tutupu i le Afio Mai Faalua o le Faaola.

Iosefa Samita—Mataio 1:22, 37.O le a le uiga o le teulotoina o afioga a le Atua? E faapefea ona tatou faia lenei mea faaletagata lava ia ma o se aiga? E faapefea i le faia o lea mea ona fesoasoani ia tatou taumamao ai mai le faaseseina?

Mataio 25:1–13.E mafai ona e faaaogaina le ata o taupou e toasefulu o loo avatu faatasi ma lenei otootoga e talanoaina Mataio 25:1–13. O a faamatalaga auiliili o tatou vaaia i le ata o loo faamatalaina i nei fuaiupu?

Atonu tou te otiotia ni pepa i ni mamanu o matāua o suauu ma nanā solo matāua i lou fale. E mafai ona tou faapipiia ia matāua i mea faitino e pei o tusitusiga paia po o se ata o le malumalu. A maua e tagata o le aiga ia matāua, e mafai ona tou talanoa i auala e fesoasoani ai nei mea ia i tatou e saunia mo le Afio Mai Faalua.

Mareko 12:38–44; Luka 21:1–4.O a mea ua aoao mai e nei fuaiupu e uiga i le ala e silasila ai le Faaola i a tatou taulaga? Faaali atu i le tou aiga le ala e totogi ai sefuluai ma taulaga anapogi i le Alii. E faapefea ona fesoasoani nei taulaga e fausia ai le malo o le Atua? O a nisi o auala e mafai ona tatou ositaulaga atu ai “mea uma [o ia i tatou]” i le Alii? (Mareko 12:44).

tamaitai o loo tuu le tupe siliva i totonu o le atigipusa

Tupe Iti a le Fafine Ua Oti Lana Tane, saunia e Sandra Rast

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Pe A Ia Toe Afio Mai,” Tusipese a Tamaiti, 46–47.

Faaleleia Suesuega Faaletagata Lava Ia

Tapenapena lou siosiomaga. “E mafai ona matua aafia o tatou siosiomaga i lo tatou tomai e aoao ai ma lagonaina le upumoni” (Aoao Atu i le Ala a le Faaola,15). Taumafai e sue se nofoaga e suesue ai tusitusiga paia lea e valaaulia ai le mana o le Agaga Paia. O musika faagaeetia ma ata e mafai foi ona valaaulia le Agaga.

tamaitai o loo uu se lamepa

O Le Toalima o i Latou e Popoto, saunia e Walter Rane