tamā o loo opoina lona atalii

O Le Atalii Faama‘umau Oa, saunia e Liz Lemon Swindle

1–7 Me

Luka 12–17; Ioane 11

“Ia Tatou Olioli ia; aua ua Ou Maua La’u Mamoe na Leiloa”

A o e faitauina le Luka 12–17 ma le Ioane 11, saili ma le agaga tatalo mea e finagalo le Tama ia e iloa ma faia. O au su‘esu‘ega o nei mataupu e mafai ona tatala ai lou loto i savali ua patino mo na o oe lava.

Tusifaamaumau Ou Lagona Uuna‘i

O le tele o taimi, e 99 ma i le 100 e ono faitaulia e lelei tele—ae e le o lea pe afai o na fuainumera e mo fanau pele a le Atua (tagai Mataupu Faavae ma Feagaiga 18:10). I le tulaga lena, e oo lava i se agaga e tasi e mana‘omia se sailiga maioio, ma le naunauta‘i “seia oo ina[tatou] maua” (Luka 15:4), e pei ona a‘oa‘o mai e le Faaola i le faata‘oto i le mamoe na leiloa. Ona mafai lea ona amata le fiafiaga, aua e “faapea foi ona tele o le olioli i le lagi i le tagata agasala e to‘atasi e salamo, ae itiiti i e amiotonu e to‘aivagafulu ma le to‘aiva e le tusa i ai le salamo” (Luka 15:7). Afai e foliga mai e le fetaui lena mea, e fesoasoani le manatua, o le mea moni, e leai se tasi e “le tusa i ai le salamo.” Tatou te manaomia uma lava le laveai. Ma e mafai uma lava e i tatou ona auai i le faatinoina o le laveai, olioli faatasi i agaga taitasi e laveai mai (tagai Mataupu Faavae ma Feagaiga 18:15–16).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Luka 12; 14–16

E faamanuiaina a’u pe a tuu lo’u loto i mea e faavavau.

Aisea o le a faapea mai ai le Atua “Oe na le vale” i se tagata e galue malosi, ma faamanuiaina, o le sa fauina fale e faaputu ai saito ma faatutumu i fua o ana galuega? (tagai Luka 12:16–21). O nei mataupu i le Luka, o loo aoao mai ai e le Faaola ia faataoto e mafai ona fesoasoani e sii a’e ai la tatou vaaiga i luga atu o mea o le lalolagi i mea o le faavavau. O loo lisi atu i i nisi o nei faataoto. E faapefea ona e aoteleina le savali o nei faataoto taitasi? O le a le mea ua e manatu o loo ta’u mai e le Alii ia te oe?

• O le mauoa faavalevalea (Luka 12:13–21)

• O le faigaai tele (Luka 14:12–24)

• O le atalii faamaumauoa (Luka 15:11–32)

• O le auauna le faamaoni (Luka 16:1–12)

• O le mauoa ma Lasalo (Luka 16:19–31)

Tagai foi Mataio 6:19–34; 2 Nifae 9:30; Mataupu Faavae ma Feagaiga 25:10.

Luka 15

E olioli le Tama Faalelagi pe a maua i latou o e ua leiloloa.

A o e faitau i faataoto na aoao mai e Iesu i le Luka 15, o le a se mea ua e aoao i ai i lagona o le Tama Faalelagi ia i latou o e sa agasala pe sa “leiloloa”? E faapei ni lagona o se tatai faaleagaga—pe o soo se tasi o i tatou—e tatau ona faaali atu ia i latou? Mafaufau pe mata o a ni tali a Faresaio ma le au tusiupu i nei fesili (tagai Luka 15:1–2). O le tali a Iesu e mafai ona maua i faataoto e tolu i le Luka 15. A o e faitau, mafaufau e uiga i mea na aoao atu e Iesu i le au tusiupu ma Faresaio i nei faataoto.

Atonu foi e te mafaufau e fai se lisi o mea e tutusa ai ma eseesega i le va o nei faataoto. Mo se faataitaiga, e mafai ona e faailoa mai po o le a le mea na leiloa, ma pe aisea, na faapefea ona maua, ma pe na faapefea ona tali atu tagata ina ua maua. O a savali na ia Iesu mo i latou o e sa “leiloloa”—e aofia ai i latou o e le o manatu ua leiloloa? O a savali na ia te Ia mo tagata o e sailia i latou o e ua leiloloa?

Tagai foi Mataupu Faavae ma Feagaiga 18:10–16; Jeffrey R. Holland, “The Other Prodigal,” Ensign, May 2002, 62–64.

o le fafine o loo sueina le tupe siliva

O Le Tupe Siliva Na Leiloa, saunia e James Tissot

Luka 16:1–12

O le a le mea na aoao mai e Keriso i le faataoto i le auauna le faamaoni?

Na faamalamalama mai e Elder James E. Talmage se lesona e tasi e mafai ona tatou aoao mai i le faataoto: “Ia maelega; aua e le o toe mamao ona mavae lea o le aso e mafai ai ona e faaaogaina au oa faalelalolagi. “… Ia aoao se lesona mai le le faamaoni ma le leaga; afai ua matua fuafua tatau i latou e saunia mo le lumanai e tasi ua mafai ona latou mafaufauina, o le a la le tele e tatau ona e saunia ai, oe lena e talitonu i se lumanai e faavavau? Afai e te lei aoaoina le poto ma le faautauta i le faaaogaina o ‘mamone amioletonu,’ e mafai faapefea ona faatuatuaina oe i oa e sili ona tumau?” (Iesu le Keriso [1916],464). O a isi lesona e te maua i lenei faataoto?

Luka 17:11–19

O le lotofaafetai mo o’u faamanuiaga o le a ou latalata atili ai i le Atua.

Ana faapea o oe o se tasi o lepela e toasefulu, mata e te manatu o le a e toe foi e faafetai i le Faaola? O a faamanuiaga faaopoopo na maua e le lepela loto faafetai ona sa ia avatu le faafetai?

Atonu foi e te mafaufau loloto i upu a le Faaola, “Ua e ola i lou faatuatua” (fuaiupu 19). I lou manatu, o le a le faiā a le lotofaafetai ma le faatuatua? E faapefea ona Ia fesoasoani ia i tatou ia ola? O le vitio “President Russell M. Nelson on the Healing Power of Gratitude” (ChurchofJesusChrist.org” e mafai ona fesoasoani e te mafaufau loloto ai i nei fesili.

Tagai foi Dale G. Renlund, “Mafaufau i le Agaglelei ma le Silisiliese o le Atua,” Liahona, Me 2020, 41–44.

Ioane 11:1–46

O Iesu Keriso o le Toetu ma le Ola.

O le vavega o le faatuina mai o Lasalo mai le oti o se molimau mamana e le fesiligia o Iesu o le Alo moni o le Atua ma le Mesia folafolaina. O a upu, fasifuaitau, po o faamatalaga o i le Ioane 11:1–46 e faamalosia ai lou faatuatua o Iesu Keriso o “le toetu, ma le ola”? O le a le uiga ia te oe o le, o Iesu “o le toetu ma le ola”?

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Luka 15:1–10.E malamalama tagata o lou aiga pe o a lagona pe a leiloa se mea—pe se foi? O le talanoa e uiga i o latou aafiaga e mafai ona amatalia ai se talanoaga e uiga i faataoto i le mamoe ma le tupe na leiloloa. Pe e mafai foi ona fai se taaloga e lafi ai se tasi ae taumafai isi tagata o le aiga e sue o ia. E fesoasoani faapefea lea gaoioiga tatou te malamalama ai i nei faataoto?

Luka 15:11–32.E mafai faapefea ona tatou faapei o le tama i le tala lea pe a i ai ni a tatou fanau e leiloloa? O le a se mea e mafai ona tatou aoao mai le aafiaga o le atalii matua e mafai ona fesoasoani ia tatou avea atili ai faapei o Keriso? O faapefea ona pei le tama i lenei faataoto o lo tatou Tama Faalelagi?

Luka 17:11–19.Ina ia fesoasoani i tagata o le aiga e faaaoga le tala i lepela e toasefulu, e mafai ona e valaaulia i latou e tuu ni faamatalaga faalilolilo o le lotofaafetai mo tagata taitoatasi. E mafai foi ona outou pepese faatasi “Faitau Ou Manuia,” (Viiga, nu. 151) ma faitau faamanuiaga ua maua e lou aiga.

Ioane 11:1–46E mafai e tagata o le aiga ona matamata le vitio “Lazarus Is Raised from the Dead” (ChurchofJesusChrist.org) ma fefaasoaai a latou molimau ia Iesu Keriso.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “Pele i le Leoleo Mamoe,” Viiga, nu. 135.

Faaleleia o Lo Tatou Aoao Atu

Faaaoga tala ma faataitaiga e aoao atu ai mataupu faavae o le talalelei E tele ona aoao mai le Faaola e uiga i mataupu faavae o le talalelei i le faaaogaina o tala ma faataoto. Mafaufau i faataitaiga ma tala mai lou lava olaga e mafai ona faaolaola ai se mataupu faavae mo lou aiga (tagai i le Aoao Atu i Ala o le Faaola,22).

o se alii o loo tootuli ma le faafetai i luma o Iesu

O Fea o I Ai le Toa Iva, saunia e Liz Lemon Swindle