aufaigaluega i le tovine

8–14 Me

Mataio 19–20; Mareko 10; Luka 18

“Se A se Mea o Toe Ou Te Le’i Faia?”

Faitau ma manatunatu loloto i le Mataio 19–20; Mareko 10; ma le Luka 18, ma mata’itu ia uuna’iga e te maua. Matau na uuna’iga, ma fuafua pe o le a faapefea ona e faatinoina.

Tusifaamaumau Ou Lagona Uunai

Afai e te maua le avanoa e fesili ai se fesili i le Faaola, mata o le a lena fesili? Ina ua feiloai atu se taulealea mauoa i le Faaola mo se ulua‘i taimi, sa ia fesili, “O le a se mea lelei ou te faia ina ia ou maua ai le ola e faavaau?” (Mataio 19:16). O le tali a le Faaola sa faaalia ai le talisapaia o mea lelei ua uma ona faia e le taule’ale’a ma le fautuaga alofa e faia isi mea. Pe a tatou manatunatu loloto i le mafai ona maua o le ola e faavavau, atonu e faapena foi ona tatou taumanatunatu pe i ai nisi mea e tatau ona tatou faia. A tatou fesili, i la tatou lava ala, “Se a se mea ou te lei faia?” (Mataio 19:20), e mafai e le Alii ona tuu mai tali ia te i tatou e patino e pei o Lana tali i le taulealea mauoa. Po o le a lava le mea e poloai mai le Alii tatou te faia, o le faatino o Lana tali o le a moomia e le aunoa ai lo tatou faalagolago atili ia te Ia nai lo lo tatou lava amiotonu (tagai Luka 18:9–14) ma e tatou te “maua le malo o le Atua i le pei o se tamaitiiti” (Luka 18:17; tagai foi 3 Nifae 9:22).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataio 19:3–9; Mareko 10:2–12

O le faaipoipoga i le va o se alii ma se tamaitai ua faauuina e le Atua.

O lea felafolafoaiga i le va o le Faaola ma le au Faresaio o se tasi o nai taimi na tusifaamaumauina lea na aoao patino atu ai le Faaola e uiga i le faaipoipoga. A uma ona faitauina le Mataio 19:3–9 ma le Mareko 10:2–12, fai se lisi o ni faamatalaga e te lagona e aotele ai manatu o le Faaola e uiga i le faaipoipoga. Ona suesue lea o punaoa o loo maua i le “Marriage” (Gospel Topics, topics.ChurchofJesusChrist.org), ma faaopoopo nisi faamatalaga i lau lisi. O fesoasoani faapefea lou malamalama i le fuafuaga a le Tama i le faaolataga e te malamalama ai pe aisea ua faauuina ai e le Atua le faaipoipoga i le va o se alii ma se tamaitai?

Mataio 19:3–9; Mareko 10:2–12

Pe na aoao mai e Iesu faapea e le talia lava le tatala o faaipoipoga pe le tatau foi ona toe faaipoipo tagata ua tatala faaipoipoga?

I se saunoaga e uiga i le tatala o faaipoipoga, na aoao mai ai Peresitene Dallin H. Oaks ua faamoemoe le Tama Faalelagi mo sootaga faalefaaipoipoga ia faavavau. Ae peitai, e malamalama foi le Atua o le tatala o faaipoipoga e alagatatau i ni isi o taimi. Sa faamalamalama mai e Peresitene Oaks e faapea, o le Alii e “faatagaina tagata ua tatala faaipoipoga ona toe faaipoipo e aunoa ma se pisia i le ola le mama o loo faapatino mai i le tulafono maualuga. Sei vagana ua faia e se tagata ua tatala le faaipoipoga se solitulafono matuia, ae e mafai e ia ona agavaa mo se pepa faataga o le malumalu i lalo o tulaga faatonuina lava e tasi lea e faatatau i isi foi tagata o le ekalesia” (“Tatalaina o Faaipoipoga,” Liahona, Me 2007, 70).

Mataio 19:16–22; Mareko 10:17–22; Luka 18:18–23

Afai ou te ole atu i le Alii, o le a Ia aoaoina a’u i mea ou te manaomia ona fai e mautofi ai i le ola e faavavau.

O le tala i le taulealea mauoa e mafai ona maua ai se mapusaga e oo lava i le soo faamaoni i le olaga atoa. A o e faitauina le Mareko 10:17–22, o a faamaoniga e te maua i le faamaoni ma le lotonaunau o le taulealea? O a ni lagona o le Alii agai i lenei alii talavou?

O lenei tala e ono faaosofia ai oe e fesili, “Se a se mea ou te lei faia?” (Mataio 19:20). E faapefea ona fesoasoani mai le Alii iai tatou e faaatoa mea tatou te le’i faia? (tagai Eteru 12:27). O le a se mea e mafai ona tatou fai e saunia ai i tatou lava e talia Lana faasa’oga ma le fesoasoani a o tatou saili ia alualu i luma?

Tagai foi Larry R. Lawrence, “Se A se Mea o Toe Ou Te Lei Faia?,” Liahona, Nov. 2015, 33–35; S. Mark Palmer, “Ua Silasila Atu Iesu ia te Ia, ua Alofa Atu ia te Ia,” Liahona, Me 2017, 114–16.

Mataio 20:1–16

E mafai e tagata uma lava ona maua faamanuiga o le ola e faavavau, tusa lava pe o le a le taimi latou te talia ai le talalelei.

Pe mafai ona e fesootai i le aafiaga o se tasi o le aufaigaluega i le tovine? O a lesona ua e maua mo oe lava i lenei fuaitau? O le savali a Elder Jeffrey R. Holland “O Le Au Faigaluega i le Tovine” (Liahona, Me 2012, 31–33) e ono fesoasoani ia te oe e vaai ai i ni auala fou e faaaoga ai lenei faataoto. O a ni uunaiga faaopoopo ua avatu e le Agaga ia te oe?

tagata lotomaualalo ma le Faresaio

O Le Telona ua Salamo ma le Faresaio Faafia-Amiotonu i le Malumalu, saunia e Frank Adams

Luka 18:9–14

E tatau ona tatou faalagolago i le alofa mutimutivale o le Atua, ae le o lo’u lava amiotonu.

Faamata e faapefea ona e aoteleina le eseesega i le va o tatalo e lua o loo i lenei faataoto? Mafaufau loloto i mea e te lagona e tatau ona e faia ina ia avea atili ai e pei o le telona i lenei tala ae faaitiitia le pei o le Faresaio.

Tagai foi Filipi 4:11–13; Alema 31:12–23; 32:12–16.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mareko 10:13–16; Luka 18:15–17.Ina ia fesoasoani i tagata o le aiga ia mafaufau loloto i le tala o loo i nei fuaiupu, e mafai ona outou usuina faatasi se pese e faatatau i ai, e pei o le “Ou Te Mafaufau i Lena Tala Manaia” (Tusipese a Tamaiti, 35). Mata e faapeī le i ai i tamaiti ia na faamanuiaina e Iesu? Mata o le a le uiga o le “talia le malo o le Atua faapei o se tamaitiiti”? (Mareko 10:15).

Mareko 10:23–27.O le a le eseesega i le va o le i ai o oa ma le faaalagolago i oa? (tagai Mareko 10:23–24). A o e faitauina le fuaiupu 27, atonu e te manao e faailoa atu le Faaliliuga a Iosefa Samita: “O tagata e faalagolago i oa, e le mafai; ae le faapea e le mafai e tagata o e faalagolago i le Atua ma tuua mea uma ona o a’u, aua o ia tagata o mea uma nei e mafai” (Faaliliuga a Iosefa Samita, Mareko 10:26 [i le Mareko 10:27, vaefaamatalagaa]). I le avea ai o se aiga, o faapefea ona tatou faaalia e sili atu ona tatou faalagolago i le Atua nai lo o mea o le lalolagi?

Mataio 20:1–16.Ina ia faapupula ia mataupu faavae o i le Mataio 20:1–16, e mafai ona e faatulagaina se tauvaga faigofie, e pei o se tautuuga puupuu. A uma ona faamaea e tagata uma le tauvaga, ia tauia tagata uma i le togi e tutusa uma ai, ia amata i le tagata na mulimuli uma ma faaiu ai i le tagata na muamua uma. O le a se mea o aoao mai i lea mea e uiga i le o ai e maua ia faamanuiaga o le ola e faavavau i le fuafuaga a le Tama Faalelagi?

Mataio 20:25–28; Mareko 10:42–45.O le a le uiga o le fasifuaitau “o se fia muamua foi ia te outou, ia fai o ia ma a outou tautua”? (Mataio 20:27). Na faapefea ona faataitai mai e Iesu Keriso lea mataupu faavae? E mafai faapefea ona tatou mulimuli i Lana faataitaiga i o tatou aiga, o la tatou uarota po ole paranesi, ma o tatou pitonuu?

Luka 18:1–14.O le a se mea ua tatou aoaoina e uiga i le tatalo mai faataoto e lua i nei fuaiupu?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Fanau, ua Leoleo mai le Atua,” Viiga, nu. 180.

Faaleleia o Suesuega Faaletagata Lava Ia

Sue se taimi e lelei mo oe. E tele taimi e sili ona faigofie ona aoao pe a mafai ona e suesue i tusitusiga paia e aunoa ma le faalavelaveina. Sue se taimi e lelei mo oe, ma fai le measili e te mafaia e suesue ai pea i lena lava taimi i aso taitasi.

O Keriso ma le taulealea talavou mauoa

O Keriso ma le Taulealea Mauoa, saunia e Heinrich Hofmann