“5–11 Jun. Jon 14–17: ‘Oltaem Yufala I Mas Joen Gud long Mi blong Mi Mi Save Lavem Yufala Olwe,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“5–11 Jun. Jon 14– 17,” Kam Folem Mi—Blong Wanwan Man, Woman mo Famli: 2023
Las Sapa, i kam long William Henry Margetson
5–11 Jun
Jon 14–17
“Oltaem Yufala I Mas Joen Gud long Mi blong Mi Mi Save Lavem Yufala Olwe”
Taem yu stap ridim ol tijing blong Sevya insaed long Jon 14–17, Tabu Spirit bae i helpem yu blong faenemaot ol mesej we oli blong yu. Raetemdaon ol filing mo tingting we yu kasem.
Raetemdaon Ol Filing mo Tingting blong Yu
Tedei, yumi singaotem “Las Sapa,” be yumi no save se ol disaepol blong Jisas oli bin luksave fulwan, taem we oli bin kam tugeta wanples long lafet blong Pasova, se hemia bae i las kaekae wetem Masta blong olgeta bifo bae Hem i ded. Be, “Jisas i save we taem blong hem i kam finis blong hem i aot long wol ya” (Jon 13:1). I no longtaem, bae Hem i fesem safaring long Getsemane, taem we bae ol gudfala fren blong Hem bae oli salem Hem, mo tanem baksaed long Hem, mo bae i fesem wan nogud ded antap long kros. Be yet, iven wetem evri samting ia we i hang long fored blong Hem, Jisas i no lusum tingting blong Hem, i no lukluk long wanem bae i hapen long Hem, be i lukluk i go long ol disaepol blong Hem. ?Bae oli nidim blong save wanem long ol dei mo ol yia we oli stap kam? Ol naes tijing blong Jisas we oli stap long Jon 14–17 oli soemaot olsem wanem Hem i stap filim abaot ol disaepol blong Hem, long tetaem ia, mo naoia. Long medel blong plante trutok we i mekem hat i kwaet, Hem i serem wan we, long wan wei, se bae Hem i neva lego yumi. Hem i bin promesem: “Sapos yufala i stap obei long ol tok blong mi, bambae mi mi lavem yufala olwe” (Jon 15:10).
Sam Aedia blong Skripja Stadi blong Yuwan
Mi soem lav blong mi long Jisas Kraes taem mi stap obei long ol komanmen blong Hem.
Taem yu stap ridim Jon 14–15, bae yu save raetem, o makem wanwan wei blong yusum toktok ia, lav. Bae yu luk se, toktok ia, ol komanmen oli ripitim plante wetem toktok ia lav long ol japta ia. ?Wanem nao yu yu lanem abaot rilesensip bitwin lav mo ol komanmen, aot long ol tijing blong Sevya. ?Wanem nao ol nara toktok mo sentens we yu faenem, we oli go wetem lav insaed long ol japta ia?
Tingting hevi long wei we lav blong Sevya i bin lidim tingting blong yu.
Luk tu long Jon 13:34–35; D. Todd Christofferson, ““Sapos Yufala I Stap Obei long Ol Tok blong Mi Bambae Mi Lavem Yufala Olwe”,” Jeneral Konfrens, Oktoba 2016, ChurchofJesusChrist.org/general-conference/conferences?lang=bis.
Las Sapa, i kam long Clark Kelley Price
Tabu Spirit i helpem mi blong mekem stamba tingting blong mi olsem wan disaepol blong Jisas Kraes, i hapen.
Maet ol disaepol oli harem nogud tumas blong harem se taem blong olgeta wetem Sevya, kolosap i finis tu. Maet bae oli stap wari tu se bae oli mekem olsem wanem sapos Hem i no stap. Taem yu stap ridim Jon 14–16, lukaotem wanem we Sevya i talem blong mekem tingting blong olgeta i kwaet. Mo speseli, luk wanem Hem i bin tijim olgeta long saed blong Tabu Spirit. ?Wanem nao yu yu lanem abaot Tabu Spirit, aot long ol toktok blong Sevya long ol ves ia?
?From wanem nao ol disaepol oli nidim kaen help olsem we i kam tru long Tabu Spirit? ?Long wanem wei nao Tabu Spirit i bin mekem ol rol ia blong yu? Tingting long wanem yu save mekem blong paoa blong Hem i strong moa insaed long laef blong yu.
Luk tu long 3 Nifae 19:9; 27:20; Doktrin mo Ol Kavenan 11:12–14; Moses 6:61; Michelle D. Craig, “Paoa long Saed blong Spirit,” Liahona, Novemba 2019, 19–21.
Taem mi joen wetem Kraes, bae mi tekem ol gudfala frut.
Long tingting blong yu, ?hem i minim wanem blong “joen wetem Kraes”? (Jon 15:4). ?Wanem nao i “frut” blong yu, we i soem we yu yu hang long rop blong grep, we i ripresentem Jisas Kraes?
Jisas Kraes i prea bakegen from ol disaepol blong Hem.
Ol toktok blong Jisas, oli raetemdaon long Jon 17 mo oli save long olgeta olsem Prea long Bihaf blong Ol Man. Long prea ia, Jisas i bin prea from ol Aposol blong Hem, mo “from ol man ya we bambae oli save bilif long [hem] from tok blong olgeta” (Jon 17:20). Hemia i minim se Hem i bin stap prea long bihaf blong yu tu. ?Wanem nao Jisas i askem long Papa blong Hem long bihaf blong yu mo evriwan we bae oli biliv? ?Wanem nao hemia i tijim yumi abaot ol filing we Hem i gat long yu?
Prea ia i tijim ol trutok we oli dip mo oli no save finis. ?Wanem trutok nao yu yu faenem? Taem yu stap ridim japta ia, tingting blong raetemdaon wanem yu bin lanem abaot olgeta samting ia:
-
Prea
-
Rilesensip blong Sevya wetem Papa blong Hem
-
Rilesensip blong Sevya wetem ol disaepol blong Hem
-
?Long wanem wei nao, ol disaepol oli mas defren long wol?
-
Ol nara trutok we oli kamaot klia long yu
Papa long Heven mo Jisas Kraes, Tufala i wan fulwan.
Long prea blong Hem insaed long Jon 17, Jisas i tokbaot bigwan yuniti blong Hem wetem Papa. ?Long wanem wei nao Papa mo Pikinini, Tufala i “wan”? (Jon 17:11, 21–23). Luk gud se Sevya i bin prea se bae ol disaepol blong Hem bae oli stap wan “semmak olsem”—o long sem fasin we—Hem mo Papa blong Hem, Tufala i wan (Jon 17:22). ?Hemia i minim wanem long yu? Tingting long ol rilesensip blong yu—eksampol, wetem waef blong yu, o hasban blong yu, o ol nara memba blong famli, wetem ol memba blong wod, mo wetem ol nara fren we oli Ol Kristin man. ?Olsem wanem nao yu save wok blong kasem kaen yuniti ia we Jisas i gat wetem Papa?
Luk tu long Quentin L. Cook, “Ol Hat Oli Joen Tugeta long Fasin blong Stap Stret mo Gud mo Fasin blong Stap Wan,” Liahona, Novemba 2020, 18–22; Sharon Eubank, “Tru long Filing Yumi Kasem Paoa Wetem God,” Liahona, Novemba 2020, 55–57.
Ol Aedia blong Famli Skripja Stadi mo Haos Naet
-
Jon 14:5–6.Ol memba blong famli oli save glad blong wan wan i gat janis blong lidim famli blong go wokbaot folem wan rod. ?Long wanem wei nao, Jisas, Hem i rod? ?Hem i stap lidim yumi i go wea?
-
Jon 14:26–27.?Olsem wanem nao pis blong Jisas i defren long kaen pis ia we “wol i stap givim”? Ol memba blong famli oli save serem ol wei we oli bin faenem pis mo kamfot tru long Tabu Spirit.
-
Jon 15:1–8.Maet bae i gud blong ridim ol ves ia aotsaed, long saed blong plantesen blong grep, wan tri, o wan nara plant. ?Wanem i hapen long wan branj taem oli karemaot long stamba blong hem? Yufala i save tokbaot olsem wanem, yumi, yumi olsem ol branj ia, mo wanem i minim blong “stap” wetem Sevya mo “karem frut.”
-
Jon 15:17–27; 16:1–7.?From wanem yu yu ting se Jisas Kraes i givim woning long ol disaepol blong Hem abaot ol samting we bae oli kam agensem olgeta? ?Long wanem wei nao, ol disaepol blong Kraes tedei, oli fesem ol samting we oli kam agensem olgeta? ?Olsem wanem advaes blong Sevya long ol ves ia i helpem yumi taem yumi fesem hadtaem o samting we i kam agensem yumi?
-
Jon 16:33.?Long wanem wei nao Jisas Kraes i blong winim wol ia? ?olsem wanem nao Atonmen blong Hem i tekem pis blong glad i kam long yumi? (luk tu long Doktrin mo Ol Kavenan 68:6).
-
Jon 17:21–23.?Wanem nao bae i helpem famli blong yu blong lanem olsem wanem blong kam wan moa, semmak olsem Jisas Kraes mo Papa long Heven? Mebi yu save tokbaot wan fevret tim blong spot, mo olsem wanem oli wok tugeta i go from wan gol nomo. O, yu save lisin long wan kwaea, o wan okestra, mo toktok raon long wei we ol man blong plei miusik oli wan blong krietem wan naesfala miusik.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “The Holy Ghost,” Children’s Songbook, 105.
Kam Antap long Fasin blong Yumi blong Stap Tij
Yusum samting long odio rekoding. Taem yu stap tijim famli blong yu, tingting blong lisin long odio vesen blong ol skripja, we i stap long ChurchofJesusChrist.org o long Gospel Laebri ap. Sapos yu stap lisin long Jon 14–17 bae i save gat paoa long yu from se ol japta ia oli tekem plante toktok we Sevya i talem.
Jisas i talem se Hem, Hem i stamba, mo yumi, yumi ol branj (Jon 15:5).