Blong Tingbaot Mi, i kam long Walter Rane

29 Mei–4 Jun

Matiu 26; Mak 14; Jon 13

“Blong Tingbaot”

Taem yu stap ridim ol samting we oli hapen insaed long Matiu 26; Mak 14; mo Jon 13, lisin gud long eni tingting o filing we yu gat, speseli ol filing ia we oli mekem yu gat moa dip fet long Jisas Kraes mo gat moa komitmen long Hem.

Raetemdaon Ol Filing mo Tingting blong Yu

Dei bifo Hem i ded, Jisas i givim wan samting long ol disaepol, blong oli stap tingbaot Hem long hem. “Jisas i tekem bred, i prea blong talem tangkyu long God from. Nao hem i brekem, i givim long ol man blong hem, i talem se, ‘Yufala i tekem, yufala i kakae. Hemia bodi blong mi.’ Mo hem i tekem kap waen, i talem tangkyu long God from, nao i pasem i go long olgeta, i talem se, ‘Yufala evriwan, yufala i dring long hem, from we hemia blad blong mi’” (Matiu 26:26–28).

Hemia i hapen 2,000 yia i pas, long wanples we plante long yumi bae i neva luk, long wan lanwis we sam long yumi nomo i save andastanem. Be naoia, evri Sandei, long ol miting ples blong yumi, olgeta we oli kasem prishud, oli gat raet blong mekem wok long nem blong Jisas Kraes, mo mekem wanem we Hem i bin mekem long wan taem. Oli tekem bred mo wota, oli blesem, mo oli givim long wanwan long yumi, ol disaepol blong Hem. Hem i wan simpol aksen—?I gat eni samting moa we i moa simpol, i moa impoten, bitim blong kakae bred mo dring wota? Be bred mo wota ia, oli tabu long yumi; oli helpem yumi blong tingbaot Hem. Hemia i wei blong yumi blong stap talem, “Bae mi neva fogetem Hem”—i no jes, “bae mi neva fogetem wanem mi bin ridim abaot ol tijing mo laef blong Hem.” Be, yumi stap talem: “Bae mi neva fogetem wanem we Hem i bin mekem blong mi.” “Bae mi neva fogetem olsem wanem Hem i bin sevem mi taem mi singaot blong kasem help.” Mo “Bae mi neva save fogetem komitmen blong Hem long mi, mo komitmen blong mi long Hem—kavenan ia we mitufala i bin mekem.”

Sam Aedia blong Skripja Stadi blong Yuwan

Matiu 26:6–13; Mak 14:3–9

“Woman ia i mekem wan samting we hem i naf blong mekem. Hem i kapsaetem senta ya long mi blong mekem mi mi rere blong oli berem mi.

Wetem wan fasin blong wosip we i soem we tingting blong hem i stap daon, woman ia we oli tokbaot long ol ves ia, i bin soem se hem i bin save se huia i Jisas, mo wanem nao Hem i stap rere blong mekem (luk long Matiu 26:12). ?From wanem nao yu ting se ol aksen blong hem oli gat bigfala mining long Sevya (luk long ves 13). ?Wanem nao i tajem yu abaot woman ia mo fet blong hem? Tingting hevi long wei we yu save folem eksampol blong Hem.

Luk tu long Jon 12:1–8.

Matiu 26:20–22; Mak 14:17–19

“Masta. ?Hu ya? ?Mi?”

?Wanem nao yu lanem abaot ol disaepol aot long ol kwestin we oli askem long Lod long ol ves ia? ?Yu ting se from wanem oli askem kwestin ia? Tingting se hao nao bae yu yu askem Lod: “?Huia? ?Mi?”

Luk tu long Dieter F. Uchtdorf, “Lord, Is It I?,” Liahona, Nov. 2014, 56–59.

Matiu 26:26–29; Mak 14:22–25

Sakramen i wan janis blong tingbaot Sevya.

Taem we Sevya i statem sakramen wetem ol disaepol blong Hem, ?wanem tingting mo filing yu yu ting se oli bin gat? Tingting long hemia taem yu stap rid abaot eksperiens blong olgeta long Matiu 26:26–29 mo Mak 14:22–25. ?From wanem nao yu yu ting se Jisas i bin jusum wei ia blong yumi stap tingbaot Hem? Maet bae yu wantem tingting hevi tu long ol eksperiens we yu bin mekem long taem blong sakramen. ?I gat eni samting we i bin save mekem eksperiens blong yu ia i moa tabu mo i gat moa mining?

Afta we yu ridim mo tingting hevi long ol ves ia, maet bae yu save raetemdaon ol samting we yu filim insperesen blong tingbaot abaot Sevya. Yu save luklukbak long ol samting ia long nekis taem we yu tekem sakramen. Yu save luklukbak long olgeta long wan nara taem, olsem wan wei blong “oltaem tingbaot hem” (Moronae 4:3).

Luk tu long Luk 22:7–39; 3 Nifae 18:1–13; Doktrin mo Ol Kavenan 20:76–79; Gaed long Ol Skripja, “Sakramen,” olskripja.ChurchofJesusChrist.org; “Always Remember Him” (vidio), ChurchofJesusChrist.org.

Jon 13:1–17

Sevya i eksampol blong yumi blong stap givim seves long ol narawan wetem tingting i stap daon.

Long taem blong Jisas, blong wasem leg blong wan narawan, i wok blong ol wokman, i no blong ol lida. Be Jisas i wantem ol disaepol blong Hem blong tingting defren abaot mining blong stap lidim man mo givim seves long man. ?Wanem mesej nao yu yu faenem insaed long ol toktok mo ol aksen blong Sevya? Jon 13:1–17? Long kalja blong yu, maet blong wasem leg blong wan narawan i no wan kastom wei blong givim seves. Be tingting long wanem yu save mekem blong folem eksampol blong Sevya long saed blong fasin blong givim seves wetem tingting i stap daon.

Bae i intresting tu blong luksave ol samting we Jisas i bin save mo i bin filim long tabu taem ia we Hem i bin stap wetem Ol Aposol (luk long ol ves 1 mo 3). Ol niu tingting o lukluk ia we yu gat, ?wanem nao oli helpem yu blong andastanem abaot Sevya?

Luk tu long Luk 22:24–27.

Jon 13:34–35

Lav we mi gat long ol narafala man, i wan saen se mi mi wan tru disaepol blong Jisas Kraes.

Bifo long hemia, Jisas i bin givim wan komanmen blong “mas lavem neba olsem yuwan bakegen” (Matiu 22:39). Nao, Hem i bin givim “wan niu komanmen.” ?Yu ting se hem i minim wanem blong lavem ol narawan olsem we Jisas i stap lavem yu? (luk long Jon 13:34).

Maet yu save tingting hevi long wei we ol nara pipol oli save se yu yu wan disaepol blong Jisas Kraes. ?Olsem wanem nao yumi save meksua se lav i stap olsem stamba fasin blong yumi olsem wan Kristin Man?

Ol Aedia blong Famli Skripja Stadi mo Haos Naet

Matiu 26:26–29; Mak 14:22–25.?Eksperiens blong famli blong yu long taem blong sakramen i olsem wanem long evri wik? Taem yu stap ridim abaot fas sakramen i save givim insperesen blong gat wan toktok storian abaot hamas sakramen i impoten, mo ol wei blong mekem eksperiens blong yu i kam antap moa. Tingting blong soem pikja ia: Stap Pasem Sakramen (Gospel Art Buk, namba 108) mo serem ol aedia abaot wanem yu save mekem bifo, long taem, mo afta long sakramen.

Sakramen i helpem yumi blong tingbaot Jisas Kraes.

Matiu 26:30.Tingting blong singsing long wan hym, olsem we Jisas mo Ol Aposol blong Hem oli bin mekem—maet wan sakramen hym. ?Olsem wanem nao blong singsing wan hym i wan blesing long Jisas mo Ol Aposol blong Hem, long tetaem ia? ?Olsem wanem ol hym oli wan blesing long yumi?

Jon 13:1–17.Maet bae yu wantem soem pikja we i stap long en blong aotlaen ia long famli blong yu taem yufala i stap ridim ol ves ia. ?Wanem trutok nao Sevya i bin tijim tru long ol aksen blong Hem? ?Wanem ditel i stap long pikja we i helpem yumi blong andastanem ol trutok ia? Maet ol memba blong famli oli save serem olsem wanem we, blong stap laef folem ol trutok ia i givim hapines long olgeta (luk long Jon 13:17).

Jon 13:34–35.Afta we yu ridim ol ves ia, maet bae yufala i save toktok tugeta abaot wei we ol nara pipol oli save se yufala i ol disaepol blong Jisas Kraes. ?Olsem wanem nao Sevya i wantem se olgeta we oli stap folem Hem, bae man i mas save olgeta? Yu save askem ol memba blong famli blong oli tokbaot ol pipol we, lav blong olgeta long ol narawan i soem se oli ol tru disaepol blong Jisas Kraes. Maet, bae yu wantem toktok raon abaot ol wei we yu save soem moa lav olsem wan famli.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Love One Another,” Children’s Songbook, 136.

Stap Kam Antap long Stadi blong Yuwan

Tingting hevi. Ol skripja oli gat ol mining long saed blong spirit we yumi save mestem sapos yumi ridim olgeta wanwan taem nomo, semmak olsem se bae yumi ridim sam nara buk. Yu no hariap blong flatem wan japta. Tekem taem blong tingting i go we i go abaot wanem ia yu stap ridim.

Olgeta we Oli Hae Moa Insaed long Kingdom, i kam long J. Kirk Richards