Were o Kecisemani, mai vei Derek Hegsted

12–18 ni June

Luke 22; Joni 18

“Me Kakua ni Yaco na Noqu Lewa, me Yaco Ga na Nomuni Lewa”

Taura na nomu gauna mo wilika na Luke 22 kei na Joni 18 ena macawa oqo. Vakasamataka vakatitobu ka masulaka na veika o sa wilika. Ni caka oqo e rawa ni solia na madigi vua na Yalo me vakadinadinataka ki lomamu ni sa dina na ivolanikalou.

Vola na Nomu Nanuma

E tolu ga na tamata e ratou a vakadinadinataka na rarawa i Jisu Karisito ena Were mai Kecisemani - ia a levu ga na gauna e ratou a moce tu kina. Mai na were o ya ka qai muri ena kauveilatai, e a ciqoma ko Jisu na ivalavala ca, mosi, kei na rarawa ni tamata kecega ka ra bau bula voli, e dina ga ni sega ni dua e bula tu ena gauna koya e a kidava na ka e sa yaco tiko. Na vei ka bibi taudua ni tawamudu e yaco e dau lakotasiri vakawasoma ka dau sega ni yadrava ko vuravura. Ia e kila tu na Kalou na Tamada. E rogoca na vakamamasu nei Luvena yalodina: “Tamaqu, kevaka ko ni sa vinakata, ni kauta tani vei au na bilo oqo: ia me kakua ni yaco na noqu lewa, me yaco ga na nomuni lewa. A sa rairai mai vei koya e dua na agilosi mai lomalagi, a sa mai vakaukauwataki koya” (Luke 22:42–43). Eda a sega ni tiko dina e kea me da vakadinadinataka na itovo oqo ni sega ni nanumi koya vakai koya koya kei na soli koya, ia eda sa ivakadinadina kece ni Veisorovaki nei Jisu Karisito. Ena vei gauna kece eda veivutuni ka ciqoma kina na veivosoti ni noda ivalavala ca, ena vei gauna kece eda vakila kina na kaukauwa veivakaqaqacotaki ni iVakabula, e rawa ni da vakadinadinataka na dina ni ka a yaco mai na Were o Kecisemani.

Vakasama Eso ni Vuli iVolanikalou ni Tamata Yadua

Luke 22:31–34, 54–62; Joni 18:17–27

Na saumaki mai sa dua na cakacaka ena toso tikoga na kena vakayacori.

Vakasamataka na veika a sotava ko Pita mai vua na iVakabula—na vei cakamana a vakadinadinataka kei na ivunau a vulica. Na cava ga e kaya kina na iVakabula vei Pita, “Ni ko sa saumaki tale, mo vakataudeitaki ira na wekamu”? (Luke 22:32; ena vosakala). Nio vakasamataka vakatitobu oqo, ena rawa ni veivuke me vakasamataki na vei ka a vakatavulica o Elder David A. Bednar me baleta na duidui ni dua na ivakadinadina kei na saumaki dina (raica na “Converted unto the Lord,” Liaona, Nove. 2012, 106–9).

Nio wilika me baleta na veika a sotava o Pita ena Luke 22:31–34, 54–62 (raica talega na Joni 18:17–27), vakasamataka na nomu a saumaki mai. O sa bau vakila mada na mataqali yalayala vakaoya, me vakataki Pita, o sa “vakarau tu mo lako vata kei [na iVakabula], ki na vale ni veivesu, ki na mate talega”? (Luke 22:33). Na cava e dau seyavu yani kina na yalo vakaoqori? E tu na madigi ni vei siga me da cakitaka se vakadinadinataka na iVakabula; na cava o na vakayacora mo ivakadinadina ni vei siga Vua? Na cava eso tale na ivakavuvuli o vulica rawa mai na ivakaraitaki nei Pita?

Ni o tomana tiko na nomu wilika na Veiyalayalati Vou, vakaraica toka na ivakadinadina ni nona saumaki o Pita. Raica talega na sala e ciqoma kina o koya na lewa ni Turaga me “vakataudeitaki ira na wekamu” (Luke 22:32; raica na Cakacaka 3–4).

Raica talega na Marika 14:27–31.

Luke 22:39–46

A vakararawataki na iVakabula ena vukuqu mai Kecisemani.

E sureti keda o Peresitedi Russell M. Nelson me da “solia noda gauna meda vulica kina na iVakabula kei na Nona solibula ni veisorovaki” (“Drawing the Power of Jesus Christ into Our Lives,”,” Liaona, Me 2017,40).

Vakasamataka na cava mo na cakava mo ciqoma kina na veisureti nei Peresitedi Nelson. E rawa ni ko tekivu ena vakanananu titobu ena masu baleta na rarawa ni iVakabula mai Kecisemani, me vaka e vakamacalataki ena vei tikina oqo, ka vola na veivakila kei na taro eso o vakasamataka.

Me vulici vakatitobu na iVakabula kei na Nona Veisorovaki, tovolea mo vakasaqaqara ena ivolanikalou tale eso me sauma na taro vakaoqo:

• Na cava e gadrevi bibi kina na Veisorovaki ni iVakabula? (Raica na 2 Nifai 2:5–10, 17–26; 9:5–26; Alama 34:8–16; 42:9–26.)

• Na cava e a sotava na iVakabula ena Nona vakararawataki? (Raica na Aisea 53:3–5; Mosaia 3:7; Alama 7:11–13; Vunau kei na Veiyalayalati 19:16–19.)

• E tara vakacava na noqu bula na vakararawataki nei Karisito? (Raica na Joni 10:10–11; Iperiu 4:14–16; 1 Joni 1:7; Alama 34:31; Moronai 10:32–33; Dallin H. Oaks, “Strengthened by the Atonement of Jesus Christ,” Liaona, Nove. 2015, 61–64.)

• Eso tale na noqu taro:

Nio vulica tiko na ka e yaco mai Kecisemani, e rawa ni vakatubu vakasama mo kila ni o Kecisemani e dua na were ni vei olive ka tiko kina e dua na iqaqi ni olive, ka vakayagataki me qaqia na olive ka bosoki mai kina na waiwai ka vakayagataki ena cina kei na kakana kei na wainimate talega (raica na Luke 10:34). Ena rawa vakacava me ivakatakarakara na iwalewale ni bosoki ni waiwai olive ki na vei ka a vakayacora vei keda na iVakabula mai Kecisemani? Me baleta eso na vakasama, raica na itukutuku nei Elder D. Todd Christofferson “Abide in My Love” (Liaona, Nove. 2016, 50–51).

Raica talega na Maciu 26:36–46; Marika 14:32–42.

Joni 18:28–38

“Sa sega ni vakavuravura na matanitu” ni iVakabula.

Ni a iliuliu vakapolitiki, a kila vinaka tu o Ponitio Pailato na kaukauwa kei na matanitu ni vuravura oqo. Ia a tukuna o Jisu e dua na mataqali matanitu e duidui sara. Vakasamataka lesu na vei ka o sa wilika me baleta na bula ni iVakabula, na ivakadinadina cava o raica ni Nona “matanitu sa sega ni vakavuravura”? (Joni 18:36). Na cava e bibi kina vei iko mo kila na ka oqo? Na cava soti tale e matata vei iko me baleta na vosa i Jisu vei Pailato?

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Luke 22:31–32.Ena vakacava beka na nona nanuma o Pita ni o Jisu a masulaki koya kei na nona vakabauta? O cei e rawa ni da masulaka, “me kakua ni malumalumu na [nodra] vakabauta”? (tikina e 32).

Luke 22:39–46.Na vulici ni vakararawataki ni iVakabula e Kecisemani sa rawa ni dua na gauna vakatabui ki na nomu matavuvale. Vakasamataka na cava o rawa ni cakava mo bulia kina e dua na yalo ni vakarokoroko kei na sokalou ni o vulica na Luke 22:39–46. Sa rawa mo ni vakatagitaka se lagata vata eso na serenilotu taleitaki ni nomu matavuvale se nodra sere na gonelalai me baleta na iVakabula. Sa rawa mo raica na cakacaka ni liga veisemati se sarava e dua na vidio me vaka na “The Savior Suffers in Gethsemane” (ChurchofJesusChrist.org). Nio wilika na tikina eso, e rawa ni ra wasea na lewe ni matavuvale na vei tikina e vakaibalebale vakalevu vei ira—e dua na tikina e vukei ira me ra vakila na loloma ni iVakabula (raica talega na Maciu 26:36–46; Marika 14:32–42). Sa rawa talega mo sureti ira me ra wasea na nodra ivakadinadina me baleti Jisu Karisito kei na Nona Veisorovaki.

Luke 22:42.Sa rawa me ra wasea na lewe ni matavuvale na gauna era a vulica kina me ra kaya, “Me kakua ni yaco na noqu lewa, ia me yaco ga na nomuni lewa.”

Luke 22:50–51; Joni 18:10–11.Na cava eda vulica me baleti Jisu mai na vei tikina oqo?

Kua Mada ni Vakakoya, mai vei Walter Rane

Joni 18:37–38.Eda na sauma vakacava na taro nei Pailato “A cava na ka dina?” (tikina e 38). Me baleta eso na vakasama, raica na Joni 8:32; Vunau kei na Veiyalayalati 84:45; 93:23–28; kei na “Na Cava na Dina?,” Sere ni Lotu, naba 166.

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Loloma i Jisu,” Sere ni Lotu, naba 110.

Vakatoroicaketaki ni Vuli Yadudua

Vulica na nodra vosa na parofita kei na iapositolo edaidai. Wilika na cava era vakatavuvulitaka na parofita kei na iapositolo edaidai me baleta na dina o kunea ena ivolanikalou. Me vaka, ena ilavelave ni koniferedi raraba sa oti ena Liaona, sa rawa mo vakasaqara na tuvai ni ulutaga “Veisorovaki” (raica na Veivakavulici ena iVakarau ni iVakabula, 21).

Me Kakua ni Yaco na Noqu Lewa, Me Yaco Ga na Nomuni, mai vei Walter Rane