Were o Kecisemani, mai vei Derek Hegsted

12–18 ni Jiune

Luke 22; Joni 18

“Me Kakua ni Yaco na Noqu Lewa, Me Yaco Ga na Nomuni Lewa”

Na vuli mai na Luke 22 kei na Joni 18 vata kei ira na gone e sa dua na madigi me vukei ira me vakatitobutaka na nodra lomani Jisu Karisito kei na nodra vakabauti Koya. Vakasamataka ena masumasu na sala mo na cakava kina na ka oqo.

Sureta na Veiwasei

Vakaraitaka na iyaloyalo ni veika a yaco ena wase eso oqo, me vaka na Sa Masu o Jisu e Kecisemani (iVola ni iYaloyalo Vakosipeli, naba 56) kei na iyaloyalo eso ena Lako Mai, Mo Muri Au—Me Baleti Ira na Tamata Yadua kei na Matavuvale. Kerei ira na gone me ra vakamacalataka na ka e yaco tiko ena iyaloyalo.

Vakavulica na iVunau: Gone Sobu

Luke 22:39–46

A vakararawataki ena vukuqu o Jisu baleta ni lomani au.

Navuca na iwalewale o rawa ni vukei ira kina na gone ni vakila na loloma i Jisu kivei ira ni o veivosakitaka na italanoa ni Nona vakararawataki e Kecisemani.

iTaviqaravi e Rawa ni Caka

• Tukuna na italanoa ni Luke 22:39–46 vei ira na gone, ena nomu vakayagataka beka na “Wase e 51: Vosota na Rarawa o Jisu ena Were o Kecisemani” (e Na iTukuni ena Veiyalayalati Vou, 129–32, se na kena vidio ena ChurchofJesusChrist.org). Vakamacalataka ni a vakila o Jisu na mosi kei na rarawa taucoko esa bau vakila na tamata kecega. Tarogi ira na gone se cava e rawa ni cakava e dua na tamata me rarawa, mavoa, se yaloca. Vakadinadinataka ni rawa ni vukei keda o Jisu me da yalo vinaka cake ni da vakila na veika oqo.

• Solia wavoki e dua na iyaloyalo ni iVakabula e Kecisemani (me vaka na kena ena ituvatuva ena macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale). Ni ra taura yadua na gone na iyaloyalo, kaya sara yani, “A vakararawataki o Jisu baleta ni lomani [yaca ni gone] o Koya.” Sureti ira na gone me ra tokaruataka vata kei iko na veivosa oqori.

• Lagata vata kei ira na gone e dua na sere baleta na loloma i Jisu ena vukuda, me vaka na “Au Vakilai Koya” (iVolanisere ni Lalai, 42). Vukei ira me ra vakasamataka na sala eso era sa vakila kina na loloma i Jisu.

Luke 22:41–43

Au rawa ni masu ni’u gadreva na veivuke.

Ni a masu o Jisu e Kecisemani, a rairai mai e dua na agilosi me vakaukauwataki Koya. O na vukei ira beka vakacava na gone o vakavulica me kila ni sa rawa talega vei ira me ra masuta na kaukauwa kivua na Tamada Vakalomalagi?

iTaviqaravi e Rawa ni Caka

• Vakalekalekataka na Luke 22:41–43 vei ira na gone. Wasea e dua na gauna o a masulaka kina na veivuke ka a vakaukauwataki iko na Tamada Vakalomalagi ena Yalo Tabu se ena nona talai mai e dua me vukei iko.

• Ena tikitiki ni pepa eso, vola eso na ka eda rawa ni cavuta ena dua na masu, me vaka na “Tamaqu Vakalomalagi,” “Au sa vakavinavinakataki kemuni,” “Au sa kerei kemuni,” kei na “ena yaca i Jisu Karisito, emeni.” Biuta na veitiki ni pepa ena vuloa me ra veicurumaki tu, ka vukei ira na gone me ra tuvana ena kena ivakarau donu e rawa ni da cavuta ena dua na masu. Na cava eda rawa ni vakavinavinakataka vua na Tamada Vakalomalagi? Na cava tale eda rawa ni kaya Vua? Vakadinadinataka ni rawa vei ira na gone me ra masu vei Tamada Vakalomalagi ena vanua cava ga kei na dua ga na gauna.

Karisito ni Masu e na Were o Kecisemani, mai vei Hermann Clementz

Vakavulica na iVunau: Gone Qase Cake

Luke 22:39–46

E Kecisemani, a taura kina o Jisu Karisito ki Vua na noqu ivalavala ca kei na mosi.

Na kilai ni veika e cakava o Jisu ena vukuda e Kecisemani sa rawa ni vukei ira na gone mera veivutunitaka na nodra ivalavala ca ka goleva na iVakabula ni ra sotava na veivakatovolei dredre eso.

iTaviqaravi e Rawa ni Caka

• Sureti ira na gone me ra wilika na Luke 22:39–46, ni ra vakaraica tiko na vosa se na malanivosa eso e vakamacalataka na veika a vakila o Jisu e Kecisemani. Na cava a sotava tiko o Jisu ka vakavuna me vaqo na veika e vakila? (raica na Vunau kei na Veiyalayalati 19:16–19). Solia vei ira na gone na madigi me ra wasea na nodra nanuma baleti Jisu kei na Nona solibula ena vukuda.

• Sureti ira na gone me ra wasea e dua na gauna era a rarawa kina se mosi voli. Tarogi ira kevaka era kila e dua ka sa vakila na ka vata oya. Sureti ira me ra wilika na Alama 7:11–12. Na cava era vakavulica vei keda na veitikina oqo me baleti Jisu Karisito kei na Nona vakararawataki ena vukuda?

• Solia ki na dua na gone e dua na kau e balavu cake mai na raba ni katuba ni valenivuli, ka kerei koya me taura tu vakababa ka tovolea me lako curuma na katuba. Vakamacalataka ni kau e matataka na noda ivalavala ca, ka sai itatao ni noda curuma na matanitu ni Kalou. Kauta tani na kau me vakaraitaka ni sa mai taura o Jisu Kivua na noda ivalavala ca me rawa kina ni da vosoti ni da veivutuni.

Luke 22: 39–44

Au rawa ni muria na ivakaraitaki i Jisu ena noqu talairawarawa kivua na Tamada Vakalomalagi.

A vakaraitaka na talairawarawa o Jisu kivua na Tamana ena Nona kaya, “Me kakua ni yaco na noqu lewa, me yaco ga nomuni lewa” (Luke 22:42). O na rawa ni vukei ira vakacava na gone ni vulica na ivakaraitaki i Jisu?

iTaviqaravi e Rawa ni Caka

• Vukei ira na gone me ra cavuqaqataka na malanivosa “Me kakua ni yaco noqu lewa, me yaco ga nomuni lewa” (Luke 22:42) ka veivosakitaka na kena ibalebale. Na cava eda rawa ni cakava meda talairawarawa kina ki na lomai Tamada Vakalomalagi?

• Vukei ira na gone me ra raica eso na vuna e dau dredre kina ena so na gauna me da cakava na veika e vinakata na Tamada Vakalomalagi. Na veivakalougatataki cava soti eda sa ciqoma ena noda talairawarawa kivua na Tamada Vakalomalagi, ena gauna mada ga a dredre kina?

Luke 22:50–51

O Jisu a lomani ira na Nona meca.

Na vulici ni ivakarau me da dautataro e sega ni rawarawa, vakabibi ni so era sega ni dau yalovinaka vei keda. E rawa vakacava ni vakauqeti ira na gone o vakavulica na itukutuku ena Luke 22:50–51 me ra dau yalovinaka ena ituvaki kecega?

iTaviqaravi e Rawa ni Caka

• Sureti ira na gone me ra wilika na Luke 22:50–51. Na cava eda vulica baleti Jisu mai na veika e yaco oqo? Ena loma ni macawa, kerea eso na nodra itubutubu na gone me ra tukuna vei iko na gauna era dau yalovinaka kina na luvedra, ena gauna mada ga a dredre kina. Wasea na italanoa eso oqori ki na kalasi. (Vakananuma vei ira na gone ni yalovinaka e sega ni kena ibalebale me vakatarai ira na tani me ra vakamavoataki ira; e dodonu me ra vosa vei ira na nodra itubutubu se dua tale na qase nuitaki kevaka e dua e vakararawataki ira tiko.)

• Lagata e dua na sere baleta na yalovinaka, me vaka na “Me Tekivu Vei Au” (iVolanisere ni Gonelalai, 83). Na cava e vakatavulica na sere oqo me baleta na yalovinaka? E rawa vakacava ni da vakaraitaka na yalovinaka vei ira na tani me vaka a vakayacora na iVakabula?

Vakauqeta na Vuli e Vale

Sureti ira na gone mera wasea na nodra ivakadinadina ni iVakabula kei na nodra matavuvale. E rawa talega ni ra kerei ira na lewe ni nodra matavuvale mera wasea na nodra ivakadinadina baleti Koya.

Vakatoroicaketaki Ni Noda Veivakavulici

Sureti ira na gone mera wasea na veika era sa kila. “Kerei [ira na gone] me ra wasea vei iko na nodra vakasama, na veika era vakila, kei na veika era sa sotava ka semati ki na ivakavuvuli o vakatavulica tiko. O na raica ni tu vei ira na vakasama rawarawa, savasava, ka mana” (Veivakavulici ena iVakarau ni iVakabula, 26).