Na iOtioti ni Vakayakavi, mai vei William Henry Margetson

5–11 ni June

Joni 14–17

“Dou Tiko Ga ena Noqu Loloma”

Masu mo kila na nodra gagadre na gone o vakavulica ni o wilika na Joni 14-17. Lako Mai, Mo Muri Au—Me Baleti Ira na Tamata Yadua kei na Matavuvale sa rawa ni tokona tu na nomu vuli, ka rawa ni solia vei iko na ituvatuva oqo na vakasama eso ena sala me ra vakavulici kina na gone ena nomu kalasi.

Sureta na Veiwasei

Me vukea na gone me ra wasea na veika era sa vulica tiko mai vale, me ra veivukevuke na gone yadua ena tauri ni dua na uto pepa ka wasea e dua na ka e dau cakava me vakaraitaka kina na loloma vei ira na tani.

Vakavulica na iVunau: Gone Sobu

Joni 14:15

Au vakaraitaka na noqu lomani Jisu Karisito ena noqu talairawarawa ki na Nona vunau.

Vukea na gone me ra kila matua ni rawa ni ra vakaraitaka vua na iVakabula ni ra lomani Koya ena nodra talairawarawa ki na Nona vunau.

iTaviqaravi e Rawa ni Caka

• Vukei ira na gone ni cavuqaqataka na Joni 14:15. Kerei ira me ra kaya “Kevaka dou sa lomani au” ni ko taura cake na uto pepa. Kerei ira me ra kaya “Dou talairawarawa ki na noqu ivunau” ni ko taura cake na ivolanikalou.

• Vukea na gone me ra vakasamataka eso na vunau i Jisu. Sureta me ra vakatura na sala eso era rawa ni muria kina na vunau yadua. Vakadinadinataka na vakayacori ni veika oqo sa vakaraitaka na noda lomani Jisu Karisito.

• Lagata vata e dua na sere ni vunau, vaka na “Talairawarawa ki na iVunau” (iVolanisere ni Gonelalai, 68).

• Qitora vata kei ira na gone na qito ena tabana ni taviqaravi ena macawa oqo.

Joni 14:26–27; 15:26; 16:13–14

Sa dau vukei au na Yalo Tabu.

A vakavulici ira na Nona tisaipeli o Jisu me baleta na veidina bibi ni Yalo Tabu. Navuca na sala e rawa ni vakalougatataki ira kina na gone o vakavulica na dina eso oqo.

iTaviqaravi e Rawa ni Caka

• Vakaraitaka na yaloyalo Na iOtioti ni Vakayakavi (iVola ni Yaloyalo Vakosipeli, naba 54). Vakamacalataka vei ira na gone ni a vakavulici ira na Nona tisaipeli o Jisu ena iOtioti ni Vakayakavi me baleta na Yalo Tabu. Wasea na dina eso a vakavulica o Koya ena Joni 14:26–27; 15:26; 16:13–14.

  

  Na iOtioti ni Vakayakavi, mai vei Clark Kelley Price

• Wasea e dua na gauna a vakacegui iko kina na Yalo Tabu, tuberi iko, se vukei iko ni kila na dina. Vakadinadinataka ni rawa ni vukei ira na gone na Yalo Tabu ena sala eso vaka oqori.

• Lagata vata kei ira na gone e dua na sere baleta na Yalo Tabu, vaka na “The Holy Ghost” (Children’s Songbook, 105). Sureta me ra vakarogoca ena sere na veika e dau cakava na Yalo Tabu.

Joni 17:3

Au rawa ni kila na Tamada Vakalomalagi kei Jisu Karisito.

A vakatavulica o Jisu Karisito ni “bula tawamudu” na kilai “ni Kalou dina duadua ga, kei Jisu Karisito.” Ni ra sa mai kilai Rau na gone o vakavulica, era na raica na kaukauwa vakayalo ena vakalougatataki ira ena nodra bula taucoko ka vukei ira ni rawata na bula tawamudu.

iTaviqaravi e Rawa ni Caka

• Wilika na Joni 17:3, ka kerea na gone me ra vakarogoca se o cei e vinakata o Jisu me da kila. Vakaraitaka e vica na yaloyalo e matataka na sala eso eda rawa ni kila kina na Tamada Vakalomalagi kei Jisu Karisito, vaka na yaloyalo ni ivolanikalou eso, na matavuvale e vuli vata tiko, kei na dua e qarava tiko e dua tale na tamata. Vukica sobu na yaloyalo, ka sureta na gone me ra veivukevuke ena nodra vukica cake ka vakamacalataka na ka e tiko ena yaloyalo. E vukei keda vakacava na veika oqo ni kila na Tamada Vakalomalagi kei Jisu?

• Veitalanoa kei ira na gone ena veika era cakava me ra kilai ira vakavinaka cake kina na nodra itokani. Eda na kilai Tamada Vakalomalagi kei Jisu Karisito vakavinaka cake vakacava? Wasea na sala eso o sa cakava kina na ka oqo.

Vakavulica na Vunau: Gone Qase Cake

Joni 14:15; 15:10–14

Au vakaraitaka na noqu lomani Jisu Karisito ena muri ni Nona vunau.

Ni o wilika na veitukutuku oqo ena nomu vuli vakataki iko, vakasamataki ira na gone o vakavulica. Era na vakalougatataki tu vakacava ni ra sa kila matua na nodra talairawarawa kivua na iVakabula sa ivakatakilakila ni nodra lomani Koya?

iTaviqaravi e Rawa ni Caka

• Sureta na gone me ra wasea na sala eso a vakaraitaka kina o Jisu ni sa talairawarawa vua na Tamada Vakalomalagi. Vakaraitaka na yaloyalo eso ni bula ni iVakabula me vukei ira (raica na iVola ni Yaloyalo Vakosipeli, naba 34–35, 56–57). Kerea na gone me ra tukuna na gauna eso era a talairawarawa kina kivua na Tamada Vakalomalagi.

• Sureta e dua na gone me wilika na Joni 14:15. Me ra sa veivukevuke na gone ni droinitaka na yaloyalo era matataka e dua ka muria tiko na vunau, ni ra vakilakila tu na vo ni gone na ka era droinitaka tiko. Me ivakaraitaki ni vunau eso, raica na volalailai Me iSakisaki ni iTabagone (2022). E vakaraitaka vakacava kivua na iVakabula na muri ni vunau oqo ni da sa lomani Koya?

Joni 14:26; 15:26; 16:13

Na Yalo Tabu sa tubera, vakaceguya, ka vakadinadinataka na dina.

Era sa ciqoma li na gone o vakavulica na isolisoli ni Yalo Tabu? Na cava era kila tu me baleta na sala e rawa ni vukei ira kina na Yalo Tabu? Navuca na sala o na vukei ira ni kila vakavinaka cake kina na itavi ni Yalo Tabu.

iTaviqaravi e Rawa ni Caka

• Solia vei ira na gone na veitikina oqo me ra wilika yarurua: Joni 14:26; 15:26; kei na 16:13. Kerea me ra vakaraica na vosa eso e vakavulici ira ena ka e dau vakayacora na Yalo Tabu. Vola na veivosa oqori ena papa ni volavola.

• Wasea na gauna a tuberi iko, vakacegui iko, vakaroti iko, se vakadinadinataka kina vei iko na Yalo Tabu na dina. Sureta na gone me ra wasea na veika era sa sotava oti. Era a vakila vakacava na veivakayarayarataki ni Yalo Tabu?

• Sureta na gone yadua me droinitaka na matana ena dua na taga pepa. Cinava na loma ni taga yadua ena cinalivaliva, ka matataka tu na Yalo Tabu. Qai biuta na ka eso ena taga e vakataotaka na rarama, vaka na tikitiki ni sulu, me vakavulica ni rawa ni yalana na veivakayarayarataki ni Yalo Tabu ena noda bula na noda digidigi cala. Me ra qai vagalalataka na gone na ka eso mai na nodra taga me matataka na veivutuni.

Joni 15:1–9; 17:3

E vinakata na Tamada Vakalomalagi kei Jisu meu kilai Rau.

O na vakalougatataka na nodra bula na gone ena nodra vukei mera kila vakavinaka cake na Tamada Vakalomalagi kei Jisu Karisito.

iTaviqaravi e Rawa ni Caka

• Vakaraitaka e dua na itei (se dua na kena yaloyalo) ni ra veivukevuke tu na gone ni wilika na tikina eso ena Joni 15:1–9. E sa tautauvata vakacava kei na vaini o Jisu? Eda sa tautauvata vakacava kei na tabana? Na cava eda rawa ni cakava me da “tiko,” se volekata tu, na iVakabula?

• Wilika i cake na Joni 17:3. Taroga na gone na cava era sa kitaka tiko me ra kila kina na Tamada Vakalomalagi kei Jisu Karisito. Wasea na sala o sa mai kilai Rau tu kina.

Vakauqeta na Vuli e Vale

Vakauqeta na gone me ra wasea ki na nodra matavuvale e dua na sere era se qai vulica wale ga ena kalasi se gauna ni lagasere.

Vakatorocaketaki Noda Veivakavulici

Moica na itaviqaravi. Kevaka o vakavulici ira na gone sobu, o na rairai raica na ikuri ni vakasama eso o rawa ni moica me baleta na nomu kalasi ena wase ni tuvatuva oqo baleti ira na gone qase cake. Vakakina, sa rawa ni moici na itaviqaravi baleti ira na gone sobu me ra vakavulici kina na gone qase cake.