Pauro achinyora mwadhi

Nyamavhuvhu 7–13

VaRoma 1–6

“Simba raMwari roKuponesa”

Kunyora pasi femero kunokubatsira kuyeuka izvo Mweya zvauri kukudzidzisa. Fungawo pamusoro pekunyora pasi manzwiro aunoita pamusoro pefemero idzi.

Nyora Pasi Manzwiro Ako

Panguva iyo Pauro yaakazonyora mwadhi yake kunhengo dzeChechi yeRoma, avo vaiva chikwata chakasiyana-siyana chevaJuda nevaJentairi, Chechi yaJesu Kristu yakanga yakura zvikuru kupfuura boka diki ravatendi vekuGarirea. Angangova makore makumi maviri mushure meKumuka Kuvakafa kweMuponesi, kwaiva nemagungano evaKristu kungangoita kwese zvako kwaikwanisa kuendwa zvine musoronaVaapositora—kusanganisira kuRoma, guta guru reushe hunesimba. Zvisinei, zvichienzaniswa nekukura kweushe hweRoma, Chechi yaiva diki uye kazhinji rutambudzwo rwainangiswa kwairi. Mumamiriro ezvinhu akadaro, vamwe vangangonzwa “vachinyara nevhangeri raKristu”—asi, pachokwadi, kwete Pauro. Aiziva uye aipupura kuti simba rechokwadi, “simba raMwari rokuponesa,” rinowanikwa muvhangeri raJesu Kristu (VaRoma 1:16).

mufananidzo wekunzvera kwako wega

Mazano eKunzvera Magwaro Matsvene Kwako Wega

Mwadhi chii, uye dzakarongwa sei?

Mwadhi itsamba dzakanyorwa nevatungamiri veChechi kuVatendi munzvimbo dzakasiyana-siyana dzepanyika. Mupositora Pauro akanyora zhinji dzemwadhi dziri muTestamente Itsva—achitanga naVaRoma uye achigumisira naVaHeberu. Mwadhi dzake dzakarongwa nehurefu hwadzo, kusara kwaVaHeberu (ona Nhungamiro kuMagwaro Matsvene, “Mwadi dzaPauro”). Kunyangwe zvazvo vaRoma iri iyo mwadhi yekutanga muTestamente Itsva, chokwadi ndechekuti yakanyorwa pedyo nokumagumo kwenzendo dzehushumiri dzaPauro.

VaRoma 1–6

“Wakarurama uchararama nokutenda.”

Tsananguro dzinotevera dzingangokubatsira kuti unzwisise zvirinani Mwadhi kuvaRoma:

Mutemo.Apo Pauro paakanyora nezve “mutemo,” aireva mutemo waMosesi. Shoko rekuti “mabasa” muzvinyorwa zvaPauro raireva zviito zvekunze zvinoenderana nemutemo waMosesi. Funga pamusoro pokuti mutemo waMosesi nemabasa anodiwa pasi pawo zvakasiyana sei “nemutemo werutendo” unotsanangurwa muna VaRoma 3:23–31.

Kudzingiswa, kusadzingiswa.Kare kare, kudzingiswa kwaiva yeuchidzo kana chiratidzo chechibvumirano icho Mwari chavakaita naAbrahama. Pauro akashandisa shoko rekuti “kudzingiswa” achireva vaJuda (vanhu vechibvumirano) uye rekuti “kusadzingiswa” achireva vaJentairi. Fungisisa izvo VaRoma 2:25–29 zvainodzidzisa pamusoro pechaizvo zvinoreva kuva vanhu vechibvumirano chaMwari. Cherechedza kuti kudzingiswa hakuchisiri yeuchidzo yechibvumirano chaMwari nevanhu vavo (ona Mabasa AvaApositora 15:23–29).

Ruramiso, ruramisa, kururamiswa.Mashoko aya anoreva kuregererwa, kana kukanganwirwa, kwechivi. Apo patinoruramiswa, tinoregererwa, tinoitwa vasina mhosva, uye tosunungurwa kubva kuchirango chokusingaperi chezvivi zvedu. Apo paunoona mashoko aya, cherechedza izvo zvakadzidziswa naPauro pamusoro pezvinoita kuti rururamiso rukwanisike (ona Nhungamiro kuMagwaro Matsvene, “Ruramiso, Ruramisa,” scriptures.ChurchofJesusChrist.org). Muna vaRoma, mashoko anoti “akarurama” uye “ururami” anokwanisa kuonekwa semashokofanana emashoko anoti “ruramo” uye “ruramiso.”

NyashaNyasha ndirwo “rubatsiro kana simba … rehumwari, zvinopuhwa kuburikidza nengoni zhinji uye rudo rukuru zvaJesu Kristu.” Kuburikidza nenyasha, vanhu vose vanozomutswa kuvakafa uye vagogamuchira kusafa. Pamusoro pezvo, “nyasha isimba rinogonesa iro rinotendera varume nemadzimai kuva neupenyu hwokusingaperi nekusimudzirwa kumusoro-soro mushure mokunge vashandisa kuedza kwose kwavo pachavo.” Hatiwani nyasha kuburikidza nekuedza kwedu; asi pane kudaro, inyasha dzinotipa “simba uye rubatsiro rwekuita mabasa akanaka ayo [isu] ataisazokwanisa kuchengetedza” (Nhungamiro kuMagwaro Matsvene, “Nyasha”; onawo 2 Nifai 25:23). Apo paunoverenga VaRoma, nyora pasi zvaunodzidza pamusoro penyasha dzeMuponesi.

VaRoma 2:17–29

Zviito zvangu zvinofanira kuratidza uye kuwedzera rutendeuko rwangu.

Vamwe vevaKristu vechiJuda muRoma semazivirwo azvinoitwa vaiva vachirikutenda kuti tsika nezviitwa zvemutemo waMosesi zvaiunza ruponeso. Izvi zvingangoratidzika sedambudziko risisiri kuwanikwa sezvo tisingararame nemutemo waMosesi. Asi paunoverenga zvinyorwa zvaPauro, kunyanya VaRoma 2:17–29, funga pamusoro pekuedza kwako pachako kurarama vhangeri. Zviito zvako zvekunze, zvakaita sekutora sakaramende kana kuenda kutemberi, zviri kudzamisa here rutendeuko rwako uye kusimbisa rutendo rwako muna Kristu? (ona Aruma 25: 15–16). Pane chimwe chinhu here chaunofanira kushandura kuitira kuti zviito zvako zvekunze zvitungamirire pakushanduka kwemwoyo?

VaRoma 3:10–31; 5

Kuburikidza naJesu Kristu, ndinokwanisa kuregererwa zvivi zvangu.

Vamwe vanhu vangangonzwa kuora mwoyo nokuda kwechiziviso chakasimba chaPauro chokuti “hakuna wakarurama, kunyangwe nomumwe” (VaRoma 3:10). Asi kunewo mashoko ane tariro muna VaRoma. Atsvake muzvitsauko 3 uye 5, uye funga pamusoro pekuti sei kuyeuka kuti “vose vakatadza, vakasasvika pakubwinya kwaMwari” (VaRoma 3:23) kuri chinhanho chakakosha pakudzidza “kufara netariro” kuburikidza naJesu Kristu (VaRoma 5:2).

VaRoma 6

Jesu Kristu anondikoka kuti “ndifambe muupenyu hutsva.”

Pauro akadzidzisa kuti vhangeri raJesu Kristu rinofanira kushandura mararamiro atinoita. Ndezvipi zvirevo zviri muna VaRoma 6 zvinotsanangura kuti kutevera Muponesi kwakakubatsira sei “kufamba muupenyu hutsva”? (ndima 4).

mufananidzo wekunzvera kwemhuri

Mazano ekuNzvera Magwaro Matsvene kweMhuri uye eNguva yeMhuri Pamba Manheru

VaRoma 1:16–17.Tingakwanisa sei kuratidza kuti “hatinyari pamusoro pevhangeri raKristu”?

VaRoma 3:23–28.Apo paunoverenga ndima idzi, ungangokurukura musiyano uripo pakati “pekuwana” nyasha dzaMwari, izvo zvatisingambofa takakwanisa kuita, nekudzigamuchira, zvinova izvo zvatinofanira kuita. Ndiriinhi watakanzwa nyasha dzaMwari? Tingakwanisa sei kudzigamuchira zvakanyanya kuzara?

VaRoma 5:3–5.Matambudziko api atakasangana nawo? Matambudziko aya akatibatsira sei kukudziridza mwoyo murefu, ruzivo, uye tariro?

VaRoma 6:3–6.Chii chakataurwa naPauro mundima idzi pamusoro pemucherechedzo werubhabhatidzo? Pamwe mhuri yako inokwanisa kuronga kuenda kurubhabhatidzo rwuri kuuya. Kana kuti mumwe munhu mumhuri menyu anokwanisa kugovera mifananidzo kana ndangariro kubva pazuva rake rerubhabhatidzo. Kuita uye kuchengeta zvibvumirano zvedu zverubhabhatidzo kunotibatsira sei “kufamba muhutsva hweupenyu”?

murume achibhabhatidza mumwe muchidziva

Rubhabhatidzo runomiririra kutanga upenyu hutsva semudzidzi waKristu.

Kuti uwane mamwe mazano ekudzidzisa vana, ona chirongwa chevhiki ino chiri muHuyai, Munditevere—Bhuku reVana Vadiki.

Kunatsurudza Kunzvera Kwako Wega

Bvunza mibvunzo apo paunonzvera Apo paunonzvera magwaro matsvene, mibvunzo inokwanisa kuuya mupfungwa. Fungisisa mibvunzo iyi, uye wotsvaga mhinduro. Semuenzaniso, muna VaRoma 1-6 unokwanisa kutsvaka mhinduro kumubvunzo wekuti “Nyasha chii?”

Kristu achisimudza musikana kubva murukova

Be Not Afraid [Musatya], naGreg K. Olsen