“ວັນທີ 4–10 ເດືອນກັນຍາ. 1 ໂກຣິນໂທ 14–16: ‘ພຣະເຈົ້າບໍ່ໄດ້ເປັນຜູ້ກໍ່ໃຫ້ເກີດຄວາມວຸ້ນວາຍ, ແຕ່ຊົງໃຫ້ເກີດຄວາມສະຫງົບສຸກ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 4–10 ເດືອນກັນຍາ. 1 ໂກຣິນໂທ 14–16,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ອ່າງບັບຕິສະມາໃນພຣະວິຫານ

ວັນທີ 4–10 ເດືອນກັນຍາ

1 ໂກຣິນໂທ 14–16

“ພຣະເຈົ້າບໍ່ໄດ້ເປັນຜູ້ກໍ່ໃຫ້ເກີດຄວາມວຸ້ນວາຍ, ແຕ່ຊົງໃຫ້ເກີດຄວາມສະຫງົບສຸກ”

ບັນທຶກຄວາມປະທັບໃຈຂອງທ່ານ ຂະນະທີ່ທ່ານອ່ານ 1 ໂກຣິນໂທ 14–16. ໃຫ້ອະທິຖານກ່ຽວກັບສິ່ງທີ່ພຣະວິນຍານໄດ້ສິດສອນທ່ານ, ແລະ ທູນຖາມພຣະບິດາເທິງສະຫວັນວ່າ ພຣະອົງມີຫຍັງອີກບໍທີ່ພຣະອົງປະສົງໃຫ້ທ່ານຮຽນຮູ້.

ບັນທຶກຄວາມປະທັບໃຈຂອງທ່ານ

ຍ້ອນວ່າສາດສະໜາຈັກ ແລະ ຄຳສອນໃນນັ້ນເປັນສິ່ງໃໝ່ຢູ່ໃນເມືອງໂກຣິນໂທ, ຈຶ່ງເຂົ້າໃຈໄດ້ວ່າ ເປັນຫຍັງໄພ່ພົນຊາວໂກຣິນໂທຈຶ່ງປະເຊີນກັບຄວາມສັບສົນ. ທີ່ຜ່ານມາໂປໂລໄດ້ສິດສອນພວກເຂົາເຖິງຄວາມຈິງຂັ້ນພື້ນຖານຂອງພຣະກິດຕິຄຸນ: “ພຣະຄຣິດໄດ້ສິ້ນພຣະຊົນແທນຄວາມຜິດບາບຂອງເຮົາທັງຫລາຍ … ແລະ ພຣະອົງໄດ້ຖືກຝັງໄວ້, ແລະ ໃນວັນຖ້ວນສາມໄດ້ຖືກຊົງບັນດານໃຫ້ເປັນຄືນມາສູ່ຊີວິດ” (1 ໂກຣິນໂທ 15:3–4). ແຕ່ບໍ່ດົນຈາກນັ້ນ ສະມາຊິກບາງຄົນໄດ້ເລີ່ມສິດສອນວ່າ “ບໍ່ມີການເປັນຄືນມາຈາກຕາຍ” (1 ໂກຣິນໂທ 15:12). ໂປໂລໄດ້ອ້ອນວອນພວກເຂົາໃຫ້ “ຍຶດຖື” ຄວາມຈິງທີ່ພວກເຂົາໄດ້ຖືກສິດສອນ (1 ໂກຣິນໂທ 15:2). ເມື່ອເຮົາປະເຊີນກັບຄວາມຄິດຄວາມເຫັນທີ່ແຕກຕ່າງກ່ຽວກັບຄວາມຈິງຂອງພຣະກິດຕິຄຸນ, ມັນເປັນສິ່ງດີທີ່ຈະຈື່ຈຳວ່າ “ພຣະເຈົ້າບໍ່ໄດ້ເປັນຜູ້ກໍ່ໃຫ້ເກີດຄວາມວຸ້ນວາຍ, ແຕ່ຊົງໃຫ້ເກີດຄວາມສະຫງົບສຸກ” (1 ໂກຣິນໂທ 14:33). ການເຊື່ອຟັງຕໍ່ຜູ້ຮັບໃຊ້ທີ່ຖືກແຕ່ງຕັ້ງຂອງພຣະຜູ້ເປັນເຈົ້າ ແລະ ຍຶດຖືຄວາມຈິງອັນລຽບງ່າຍ ທີ່ພວກເພິ່ນສິດສອນ ສາມາດຊ່ວຍເຮົາໃຫ້ພົບເຫັນສັນຕິສຸກ ແລະ “ຢືນຢັດຢູ່ຢ່າງໝັ້ນຄົງໃນ [ສັດທາ]” ໄດ້ (1 ໂກຣິນໂທ 16:13).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

1 ໂກຣິນໂທ 14

ເຮົາສາມາດສະແຫວງຫາຂອງປະທານແຫ່ງການທຳນາຍ.

ຂອງປະທານແຫ່ງການທຳນາຍຄືຫຍັງ? ມີຄວາມສາມາດທີ່ຈະບອກລ່ວງໜ້າກ່ຽວກັບອະນາຄົດບໍ? ມັນແມ່ນພຽງແຕ່ສຳລັບສາດສະດາເທົ່ານັ້ນບໍ? ຫລື ໃຜໆກໍສາມາດໄດ້ຮັບຂອງປະທານນີ້ບໍ?

ໃຫ້ໄຕ່ຕອງຄຳຖາມເຫລົ່ານີ້ ຂະນະທີ່ທ່ານສຶກສາ 1 ໂກຣິນໂທ 14:3, 31, 39–40. ທ່ານກໍສາມາດອ່ານ ພຣະນິມິດ 19:10 ແລະ “ທຳນາຍ, ການທຳນາຍ” ໃນ ຄູ່ມືພຣະຄຳພີ (scriptures.ChurchofJesusChrist.org ນຳອີກ). ອີງຕາມສິ່ງທີ່ທ່ານຮຽນຮູ້, ທ່ານຈະອະທິບາຍຂອງປະທານແຫ່ງການທຳນາຍວ່າແນວໃດ? ໂປໂລອາດໝາຍຄວາມວ່າແນວໃດ ເມື່ອເພິ່ນເຊື້ອເຊີນຊາວໂກຣິນໂທໃຫ້ “ຮ້ອນໃຈສະແຫວງຫາໃນການປະກາດພຣະທຳ”? (1 ໂກຣິນໂທ 14:39). ທ່ານຈະຮັບເອົາຄຳເຊື້ອເຊີນນີ້ແນວໃດ?

ເບິ່ງ ໂຢເອນ 2:28–29; ແອວມາ 17:3; ຄຳສອນ ແລະ ພັນທະສັນຍາ 11:23–28 ນຳອີກ.

1 ໂກຣິນໂທ 14:34–35

ບົດຄວາມກ່ຽວກັບພວກແມ່ຍິງຢູ່ໃນຂໍ້ເຫລົ່ານີ້ກ່ຽວຂ້ອງກັບປະຈຸບັນແນວໃດ?

ໃນສະໄໝຂອງໂປໂລ, ມັນມີການຄາດໝາຍທີ່ແຕກຕ່າງກ່ຽວກັບວິທີທີ່ແມ່ຍິງມີສ່ວນຮ່ວມໃນສັງຄົມ, ລວມທັງໃນການປະຊຸມໂບດ. ບໍ່ວ່າຄຳສອນຢູ່ໃນ 1 ໂກຣິນໂທ 14:34–35 ໝາຍເຖິງສິ່ງໃດ ໃນສະໄໝຂອງໂປໂລ, ແຕ່ມັນບໍ່ຄວນຖືກເຂົ້າໃຈວ່າ ແມ່ຍິງບໍ່ສາມາດກ່າວ ແລະ ນຳພາໃນສາດສະໜາຈັກໃນປະຈຸບັນ (ເບິ່ງ ການແປຂອງໂຈເຊັບ ສະມິດ, 1 ໂກຣິນໂທ 14:34 [ໃນ 1 ໂກຣິນໂທ 14:34, ໝາຍເຫດຢູ່ທາງລຸ່ມໜ້າປຶ້ມ ຂ]). ປະທານຣະໂຊ ເອັມ ແນວສັນ ໄດ້ກ່າວກັບບັນດາຜູ້ຍິງຂອງສາດສະໜາຈັກໃນປະຈຸບັນວ່າ: “ພວກເຮົາ … ອາໄສພະລັງ, ການປ່ຽນໃຈເຫລື້ອມໃສ, ຄວາມເກັ່ງກ້າ, ຄວາມສາມາດໃນການນຳພາ, ປັນຍາ, ແລະ ປາກສຽງຂອງທ່ານ. ອານາຈັກຂອງພຣະເຈົ້າຈະບໍ່ເກີດ ແລະ ສຳເລັດໄດ້ ຖ້າປາດສະຈາກຜູ້ຍິງທີ່ເຮັດ ແລະ ຮັກສາພັນທະສັນຍາອັນສັກສິດ ແລະ ປາດສະຈາກຜູ້ຍິງທີ່ສາມາດເວົ້າດ້ວຍພະລັງ ແລະ ສິດອຳນາດຂອງພຣະເຈົ້າ!” (“A Plea to My Sisters,” Liahona, Nov. 2015, 96).

1 ໂກຣິນໂທ 15:1–34, 53–58

ພຣະເຢຊູຄຣິດໄດ້ໄຊຊະນະເໜືອຄວາມຕາຍ.

ການຟື້ນຄືນພຣະຊົນຂອງພຣະເຢຊູຄຣິດເປັນພື້ນຖານແທ້ໆຕໍ່ຄວາມເປັນຄຣິດສະຕຽນ, ບາງຄົນເວົ້າວ່າ ຖ້າປາດສະຈາກການນັ້ນ ຈະ ບໍ່ມີຄວາມເປັນຄຣິດສະຕຽນເລີຍ—ເພື່ອໃຊ້ຖ້ອຍຄຳຂອງໂປໂລ, “ການປະກາດຂອງພວກເຮົາກໍບໍ່ມີປະໂຫຍດ, ແລະ [ສັດທາ] ຂອງພວກເຈົ້າກໍບໍ່ມີປະໂຫຍດເໝືອນກັນ” (1 ໂກຣິນໂທ 15:14). ແຕ່ໄພ່ພົນຊາວໂກຣິນໂທໄດ້ສິດສອນວ່າ ຈະ “ບໍ່ມີການເປັນຄືນມາຈາກຕາຍ”1 ໂກຣິນໂທ 15:12). ຂະນະທີ່ທ່ານອ່ານຄຳຕອບຂອງໂປໂລໃນ 1 ໂກຣິນໂທ 15, ໃຫ້ໃຊ້ເວລາຈັກບຶດໜຶ່ງເພື່ອໄຕ່ຕອງວິທີທີ່ຊີວິດຂອງທ່ານຈະແຕກຕ່າງແນວໃດ ຖ້າຫາກທ່ານບໍ່ເຊື່ອໃນການຟື້ນຄືນພຣະຊົນ (ເບິ່ງ 2 ນີໄຟ 9:6–19; ແອວມາ 40:19–23; ຄຳສອນ ແລະ ພັນທະສັນຍາ 93:33–34). ວະລີທີ່ວ່າ “ຖ້າພຣະຄຣິດບໍ່ໄດ້ເປັນຄືນມາ, [ສັດທາ] ຂອງພວກເຈົ້າກໍໄຮ້ປະໂຫຍດ” ໝາຍຄວາມວ່າແນວໃດ? (ຂໍ້ທີ 17).

ມັນກໍກຸ້ມຄ່າທີ່ຈະສັງເກດເບິ່ງວ່າ ໂປໂລໄດ້ກ່າວເຖິງການບັບຕິສະມາແທນຄົນຕາຍ ວ່າຫລັກຖານໃຫ້ກັບຄວາມເປັນຈິງຂອງການຟື້ນຄືນຊີວິດແນວໃດ (ເບິ່ງ 1 ໂກຣິນໂທ 15:29). ວຽກງານພຣະວິຫານ ແລະ ປະຫວັດຄອບຄົວເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນຄຳສອນເຖິງການຟື້ນຄືນຊີວິດແນວໃດ?

ເບິ່ງ ຄຳສອນ ແລະ ພັນທະສັນຍາ 138:11–37 ນຳອີກ.

1 ໂກຣິນໂທ 15:35–54

ຮ່າງກາຍທີ່ຟື້ນຄືນຈະແຕກຕ່າງຈາກຮ່າງກາຍມະຕະ.

ທ່ານເຄີຍສົງໄສບໍວ່າ ຮ່າງກາຍທີ່ຟື້ນຄືນນັ້ນເປັນຈັ່ງໃດ? ອີງຕາມ 1 ໂກຣິນໂທ 15:35, ຊາວໂກຣິນໂທບາງຄົນກໍສົງໄສຄືກັນ. ໃຫ້ອ່ານຄຳຕອບຂອງໂປໂລໃນ ຂໍ້ທີ 36–54, ແລະ ສັງເກດເບິ່ງຖ້ອຍຄຳ ແລະ ວະລີທີ່ບັນຍາຍຄວາມແຕກຕ່າງລະຫວ່າງຮ່າງກາຍມະຕະ ແລະ ຮ່າງກາຍທີ່ຟື້ນຄືນ ວ່າເປັນແນວໃດ. ຂະນະທີ່ທ່ານເຮັດແນວນັ້ນ, ທ່ານສາມາດປຽບທຽບ ຂໍ້ທີ 40–42 ດ້ວຍ ຄຳສອນ ແລະ ພັນທະສັນຍາ 76:50–112. ການເປີດເຜີຍນີ້ຕໍ່ສາດສະດາໂຈເຊັບ ສະມິດ ເພີ່ມຄວາມເຂົ້າໃຈໃຫ້ແກ່ທ່ານແນວໃດ? (ເບິ່ງ ການແປຂອງໂຈເຊັບ ສະມິດ, 1 ໂກຣິນໂທ 15:40 [ໃນ 1 ໂກຣິນໂທ 15:40, ໝາຍເຫດຢູ່ທາງລຸ່ມໜ້າປຶ້ມ ກ] ນຳອີກ). ເປັນຫຍັງຄວາມຈິງເຫລົ່ານີ້ຈຶ່ງມີຄ່າຕໍ່ທ່ານ?

ເບິ່ງ ລູກາ 24:39; ແອວມາ 11:43–45; ຄຳສອນ ແລະ ພັນທະສັນຍາ 88:14–33 ນຳອີກ.

“ສະຫງ່າລາສີຂອງດວງອາທິດກໍຢ່າງໜຶ່ງ” (1 ໂກຣິນໂທ 15:41).

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

1 ໂກຣິນໂທ 15:29.ເຮົາຮຽນຮູ້ຈາກ ຂໍ້ທີ 29 ວ່າຊາວຄຣິດສະໄໝບູຮານໄດ້ມີສ່ວນຮ່ວມໃນການບັບຕິສະມາແທນຄົນຕາຍ, ຄືກັນກັບທີ່ເຮົາເຮັດໃນປະຈຸບັນ. ທ່ານຈະອະທິບາຍຕໍ່ຄົນອື່ນແນວໃດ ວ່າເປັນຫຍັງທ່ານຈຶ່ງບັບຕິສະມາແທນບັນພະບຸລຸດຂອງທ່ານ? (ເບິ່ງ “What Are Baptisms for the Dead?,” [ວິດີໂອ], ChurchofJesusChrist.org). ເຮົາກຳລັງເຮັດຫຍັງເປັນຄອບຄົວ ເພື່ອຈັດຫາພິທີການພຣະວິຫານໃຫ້ແກ່ບັນພະບຸລຸດທີ່ລ່ວງລັບໄປແລ້ວຂອງເຮົາ ທີ່ຕ້ອງການມັນ? ທ່ານສາມາດຊອກຫາແຫລ່ງຂໍ້ມູນກ່ຽວກັບຫົວຂໍ້ນີ້ຢູ່ໃນບົດຄວາມສັ້ນຂອງ Gospel Topics “Baptisms for the Dead” (topics.ChurchofJesusChrist.org) ແລະ ຢູ່ທີ່ FamilySearch.org.

1 ໂກຣິນໂທ 15:35–54.ສິ່ງຂອງ ຫລື ຮູບພາບຢ່າງໃດແດ່ທີ່ທ່ານສາມາດສະແດງ ເພື່ອຊ່ວຍຄອບຄົວຂອງທ່ານໃຫ້ເຂົ້າໃຈຂໍ້ຄວາມບາງຢ່າງທີ່ໂປໂລໄດ້ໃຊ້ ເພື່ອບັນຍາຍວິທີທີ່ຮ່າງກາຍມະຕະ ແລະ ຮ່າງກາຍທີ່ຟື້ນຄືນແລ້ວແຕກຕ່າງກັນແນວໃດ? ຍົກຕົວຢ່າງ, ເພື່ອສາທິດຄວາມແຕກຕ່າງລະຫວ່າງ ຄວາມເສື່ອມໂຊມ ແລະ ຄວາມບໍ່ເສື່ອມໂຊມ (ເບິ່ງ ຂໍ້ທີ 52–54) ທ່ານສາມາດສະແດງໂລຫະທີ່ເຂົ້າຂີ້ໝ້ຽງ ແລະ ໂລຫະທີ່ບໍ່ເຂົ້າຂີ້ໝ້ຽງ. ຫລື ທ່ານສາມາດປຽບທຽບບາງສິ່ງທີ່ອ່ອນແອໃສ່ກັບບາງສິ່ງທີ່ມີພະລັງ (ເບິ່ງ ຂໍ້ທີ 43).

1 ໂກຣິນໂທ 15:55–57.ການສົນທະນາກ່ຽວກັບຂໍ້ເຫລົ່ານີ້ ສາມາດມີຄວາມໝາຍໂດຍສະເພາະຖ້າຫາກຄອບຄົວຂອງທ່ານຮູ້ຈັກບາງຄົນທີ່ໄດ້ເສຍຊີວິດໄປແລ້ວ. ສະມາຊິກໃນຄອບຄົວສາມາດສະແດງປະຈັກພະຍານວ່າ ພຣະເຢຊູຄຣິດໄດ້ກຳຈັດ “ໄລພິດຂອງຄວາມຕາຍ” ແນວໃດ (ຂໍ້ທີ 56).

1 ໂກຣິນໂທ 16:13.ເພື່ອຊ່ວຍສະມາຊິກໃນຄອບຄົວຂອງທ່ານໃຫ້ເຂົ້າໃຈຂໍ້ນີ້, ທ່ານສາມາດຂີດວົງກົມໃສ່ພື້ນດິນ ແລະ ແນະນຳໃຫ້ສະມາຊິກໃນຄອບຄົວຄົນໜຶ່ງ “ຢືນຢັດຢູ່ຢ່າງໝັ້ນຄົງ” ຢູ່ໃນວົງ ຂະນະທີ່ຫລັບຕາຢູ່. ແລ້ວໃຫ້ຄົນອື່ນໆພະຍາຍາມຍູ້ ຫລື ດຶງລາວອອກຈາກວົງກົມນັ້ນ. ມັນຈະແຕກຕ່າງແນວໃດ ຖ້າຫາກຜູ້ທີ່ຢູ່ໃນວົງກົມມືນຕາ ແລະ ຄອຍ “ເຝົ້າລະວັງ”? ເຮົາຈະເຮັດຢ່າງໃດເພື່ອ “ຢືນຢັດຢູ່ຢ່າງເຂັ້ມແຂງ” ເມື່ອເຮົາຖືກລໍ້ລວງໃຫ້ເຮັດສິ່ງທີ່ບໍ່ດີ? (ເບິ່ງ “Stay in the Boat and Hold On!,” [ວິດີໂອ], ChurchofJesusChrist.org ນຳອີກ).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງສວດແນະນຳ: “ພຣະອົງຊົງຟື້ນ!,” ເພງສວດ ແລະ ເພງຂອງເດັກນ້ອຍ, 60.

ການປັບປຸງການສຶກສາສ່ວນຕົວ

ຊອກຫາແບບແຜນ. ໃນພຣະຄຳພີ ເຮົາພົບເຫັນແບບແຜນທີ່ສະແດງໃຫ້ເຫັນວ່າ ພຣະຜູ້ເປັນເຈົ້າກະທຳວຽກງານຂອງພຣະອົງແນວໃດ. ທ່ານພົບເຫັນແບບແຜນຢ່າງໃດແດ່ໃນ 1 ໂກຣິນໂທ 14 ທີ່ຊ່ວຍເຮົາໃຫ້ເຂົ້າໃຈວິທີທີ່ຈະໃຫ້ຄວາມຮູ້ແກ່ກັນແລະກັນ?