“ວັນທີ 28 ເດືອນສິງຫາ–ວັນທີ 3 ເດືອນກັນຍາ. 1 ໂກຣິນໂທ 8–13: ‘ຝ່າຍເຈົ້າທັງຫລາຍເປັນພຣະກາຍຂອງພຣະຄຣິດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 28 ເດືອນສິງຫາ–ວັນທີ 3 ເດືອນກັນຍາ. 1 ໂກຣິນໂທ 8–13,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
ວັນທີ 28 ເດືອນສິງຫາ–ວັນທີ 3 ເດືອນກັນຍາ
1 ໂກຣິນໂທ 8–13
“ຝ່າຍເຈົ້າທັງຫລາຍເປັນພຣະກາຍຂອງພຣະຄຣິດ”
ຂະນະທີ່ທ່ານອ່ານ 1 ໂກຣິນໂທ 8–13 ດ້ວຍການອະທິຖານ, ພຣະວິນຍານບໍລິສຸດອາດກ່າວກັບທ່ານໃນທາງທີ່ລະອຽດອ່ອນ (ເບິ່ງ 1 ກະສັດ 19:11–12). ການບັນທຶກຄວາມປະທັບໃຈເຫລົ່ານີ້ ຈະຊ່ວຍທ່ານໃຫ້ຈື່ຈຳຄວາມຮູ້ສຶກ ແລະ ຄວາມຄິດທີ່ທ່ານມີລະຫວ່າງການສຶກສາຂອງທ່ານ.
ບັນທຶກຄວາມປະທັບໃຈຂອງທ່ານ
ໃນສະໄໝຂອງໂປໂລ, ເມືອງໂກຣິນໂທເປັນສູນການຄ້າທີ່ມັ່ງຄັ່ງ ພ້ອມທັງຜູ້ອາໄສທີ່ມາຈາກທົ່ວຈັກກະພົບໂຣມ. ດ້ວຍວັດທະນະທຳ ແລະ ສາດສະໜາທີ່ຫລາກຫລາຍໃນເມືອງນີ້, ສະມາຊິກຂອງສາດສະໜາຈັກໃນເມືອງໂກຣິນໂທຈຶ່ງມີບັນຫາເລື່ອງການຮັກສາຄວາມເປັນນ້ຳໜຶ່ງໃຈດຽວກັນ, ສະນັ້ນໂປໂລຈຶ່ງໄດ້ພະຍາຍາມຊ່ວຍເຫລືອພວກເຂົາໃຫ້ເປັນນ້ຳໜຶ່ງໃຈດຽວກັນໃນຄວາມເຊື່ອຂອງພວກເຂົາໃນພຣະຄຣິດ. ຄວາມເປັນນ້ຳໜຶ່ງໃຈດຽວກັນນີ້ແມ່ນຕ້ອງສຳຄັນກວ່າການພຽງແຕ່ຢູ່ຮ່ວມກັນເທົ່ານັ້ນ; ໂປໂລບໍ່ໄດ້ພຽງແຕ່ຮຽກຮ້ອງພວກເຂົາໃຫ້ອົດທົນກັບຄວາມແຕກຕ່າງຂອງກັນແລະກັນເທົ່ານັ້ນ. ກົງກັນຂ້າມ, ເພິ່ນໄດ້ສິດສອນວ່າ ເມື່ອທ່ານທັງຫລາຍໄດ້ເຂົ້າຮ່ວມສາດສະໜາຈັກຂອງພຣະເຢຊູຄຣິດ, ພວກທ່ານ “ໄດ້ຮັບບັບຕິສະມາ … ເຂົ້າເປັນກາຍອັນດຽວກັນ,” ແລະ ແຕ່ລະພາກສ່ວນຂອງຮ່າງກາຍເປັນທີ່ຕ້ອງການ (1 ໂກຣິນໂທ 12:13). ເມື່ອອະໄວຍະວະສ່ວນໜຶ່ງເສຍໄປ, ກໍຄືກັບວ່າສູນເສຍແຂນຂາ ແລະ ຈະສົ່ງຜົນໃຫ້ຮ່າງກາຍອ່ອນແອລົງ. ເມື່ອອະໄວຍະວະສ່ວນໜຶ່ງເຈັບປວດ, ເຮົາທຸກຄົນກໍຄວນຮູ້ສຶກມັນ ແລະ ເຮັດສ່ວນຂອງເຮົາເພື່ອບັນເທົາມັນ. ໃນຄວາມເປັນນ້ຳໜຶ່ງໃຈດຽວກັນນີ້, ຄວາມແຕກຕ່າງບໍ່ພຽງແຕ່ຖືກຮັບຮູ້ ແລະ ຖືກທະນຸຖະໜອມ, ເພາະຖ້າຫາກປາດສະຈາກຂອງປະທານ ແລະ ຄວາມສາມາດທີ່ຫລາກຫລາຍ, ຮ່າງກາຍກໍຈະຖືກຈຳກັດ. ສະນັ້ນ ບໍ່ວ່າທ່ານຈະຮູ້ສຶກອົບອຸ່ນຢູ່ໃນສາດສະໜາຈັກ ຫລື ພົບເຫັນຕົວເອງສົງໄສວ່າທ່ານເປັນສ່ວນໜຶ່ງແທ້ໆບໍ, ຂ່າວສານຂອງໂປໂລຕໍ່ທ່ານແມ່ນວ່າ ຄວາມເປັນນ້ຳໜຶ່ງໃຈດຽວກັນບໍ່ແມ່ນຄວາມເໝືອນກັນ. ທ່ານຕ້ອງການເພື່ອນໄພ່ພົນ, ແລະ ເພື່ອນໄພ່ພົນກໍຕ້ອງການທ່ານ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຈົ້າຈັດຕຽມທາງເພື່ອໃຫ້ໜີຈາກການລໍ້ລວງ.
ປະສົບການທາງວິນຍານ, ແມ່ນແຕ່ການມະຫັດສະຈັນ, ບໍ່ໄດ້ຍົກເວັ້ນເຮົາຈາກການລໍ້ລວງທີ່ “ເຄີຍເກີດຂຶ້ນກັບມະນຸດ” (1 ໂກຣິນໂທ 10:13). ນັ້ນອາດເປັນເຫດຜົນໜຶ່ງທີ່ໂປໂລໄດ້ຂຽນກ່ຽວກັບວ່າ ຊາວອິດສະຣາເອນໃນສະໄໝຂອງໂມເຊໄດ້ຕໍ່ສູ້ດີ້ນລົນກັບການລໍ້ລວງ, ເຖິງແມ່ນວ່າພວກເຂົາໄດ້ເປັນພະຍານເຖິງການອັດສະຈັນຍິ່ງໃຫຍ່ກໍຕາມ (ເບິ່ງ ອົບພະຍົບ 13:21; 14:13–31). ຂະນະທີ່ທ່ານອ່ານ 1 ໂກຣິນໂທ 10:1–13, ມີຄຳເຕືອນຢ່າງໃດແດ່ໃນປະສົບການຂອງຊາວອິດສະຣາເອນ ທີ່ເບິ່ງຄືວ່າກ່ຽວຂ້ອງກັບທ່ານ? ມີທາງໃດແດ່ທີ່ຈະ “ໜີ” ຈາກການລໍ້ລວງ ຊຶ່ງພຣະບິດາເທິງສະຫວັນໄດ້ຈັດຕຽມໄວ້ໃຫ້ທ່ານ? (ເບິ່ງ ແອວມາ 13:27–30; 3 ນີໄຟ 18:18–19 ນຳອີກ).
1 ໂກຣິນໂທ 10:16–17; 11:16–30
ສິນລະລຶກໄດ້ປຸ້ມລຸມເຮົາໃນຖານະສະມາຊິກຂອງສາດສະໜາຈັກຂອງພຣະຄຣິດ.
ເຖິງແມ່ນວ່າສິນລະລຶກມີສ່ວນກ່ຽວຂ້ອງກັບຄຳໝັ້ນສັນຍາລະຫວ່າງບຸກຄົນ ແລະ ພຣະຜູ້ເປັນເຈົ້າ, ແຕ່ມັນກໍເປັນປະສົບການໜຶ່ງທີ່ທ່ານແບ່ງປັນກັບຄົນອື່ນ. ເຮົາຈະຮັບສ່ວນສິນລະລຶກນຳກັນເກືອບທຸກເທື່ອ, ເປັນກຸ່ມໄພ່ພົນ. ໃຫ້ອ່ານສິ່ງທີ່ໂປໂລໄດ້ສິດສອນກ່ຽວກັບສິນລະລຶກ, ແລະ ໃຫ້ຄິດກ່ຽວກັບວິທີທີ່ພິທີການສັກສິດນີ້ສາມາດຊ່ວຍ “ຫລາຍຄົນ” ໃຫ້ກາຍເປັນ “ຮ່າງກາຍດຽວ” ໃນພຣະຄຣິດແນວໃດ (1 ໂກຣິນໂທ 10:17). ການຮັບສ່ວນສິນລະລຶກຊ່ວຍທ່ານໃຫ້ຮູ້ສຶກເຂົ້າໃກ້ພຣະຄຣິດ ແລະ ຄົນອື່ນຫລາຍຂຶ້ນແນວໃດ? ຂໍ້ເຫລົ່ານີ້ມີອິດທິພົນຕໍ່ຄວາມຮູ້ສຶກຂອງທ່ານກ່ຽວກັບສິນລະລຶກ ແລະ ວິທີທີ່ທ່ານກະກຽມສຳລັບມັນແນວໃດ?
ໃນແຜນຂອງພຣະເຈົ້າ, ຊາຍ ແລະ ຍິງຕ້ອງການກັນແລະກັນ.
ໃນ 1 ໂກຣິນໂທ 11:4–15, ໂປໂລອ້າງເຖິງຮີດຄອງປະເພນີທີ່ເຮົາບໍ່ປະຕິບັດຕາມໃນທຸກວັນນີ້. ເຖິງຢ່າງໃດກໍຕາມ, ໂປໂລກໍຍັງໄດ້ສິດສອນເຖິງຄວາມຈິງທີ່ສຳຄັນ ຊຶ່ງກ່ຽວຂ້ອງຊົ່ວນິລັນດອນ, ຢູ່ໃນ ຂໍ້ທີ 11. ທ່ານຄິດວ່າຂໍ້ນີ້ໝາຍຄວາມວ່າແນວໃດ, ແລະ ເປັນຫຍັງມັນຈຶ່ງສຳຄັນ? ແອວເດີ ເດວິດ ເອ ແບ໊ດນາ ໄດ້ສິດສອນວ່າ, “ຜູ້ຊາຍ ແລະ ຜູ້ຍິງແມ່ນຖືກຄາດຫວັງໃຫ້ຮຽນ, ເພີ່ມຄວາມເຂັ້ມແຂງ, ເປັນພອນ, ແລະ ຊ່ວຍກັນແລະກັນ” (“We Believe in Being Chaste,” Liahona, May 2013, 42). ຄວາມຈິງນີ້ມີອິດທິພົນຕໍ່ການແຕ່ງງານແນວໃດ? ມັນຄວນມີຜົນກະທົບຕໍ່ວິທີທີ່ເຮົາຮັບໃຊ້ໃນສາດສະໜາຈັກແນວໃດ?
ເບິ່ງ Jean B. Bingham, “United in Accomplishing God’s Work,” Liahona, May 2020, 60–63 ນຳອີກ.
ຂອງປະທານທາງວິນຍານຖືກມອບໃຫ້ເພື່ອເປັນປະໂຫຍດແກ່ລູກໆຂອງພຣະບິດາເທິງສະຫວັນ.
ຈຳນວນຂອງປະທານທາງວິນຍານໃນ 1 ໂກຣິນໂທ 12–13 ບໍ່ແມ່ນມີແຕ່ເທົ່ານັ້ນ. ແຕ່ມັນກໍເປັນຈຸດເລີ່ມຕົ້ນທີ່ດີ ຂະນະທີ່ຊອກຫາ ແລະ ໄຕ່ຕອງຂອງປະທານທາງວິນຍານທີ່ພຣະບິດາເທິງສະຫວັນໄດ້ມອບໃຫ້ທ່ານ. ບົດຄວາມສັ້ນ “Spiritual Gifts” ໃນ Gospel Topics (topics.ChurchofJesusChrist.org) ອາດຊ່ວຍທ່ານໃຫ້ເຂົ້າໃຈຂອງປະທານເຫລົ່ານີ້ຫລາຍຂຶ້ນໄດ້. ຂະນະທີ່ທ່ານອ່ານຈຳນວນຂອງປະທານຂອງໂປໂລ, ທ່ານສາມາດຕື່ມຂອງປະທານຢ່າງອື່ນໆທີ່ທ່ານພົບເຫັນໃນຕົວເອງ, ຫລື ໃນຜູ້ຄົນຢູ່ໃນພຣະຄຳພີ ໃສ່ນຳຕື່ມອີກ. ຖ້າທ່ານມີໃບປິຕຸພອນ, ມັນອາດກ່າວເຖິງຂອງປະທານທາງວິນຍານຂອງທ່ານ. ຂອງປະທານເຫລົ່ານີ້ຊ່ວຍທ່ານໃຫ້ເປັນພອນແກ່ຄົນອື່ນແນວໃດ? ໃຫ້ພິຈາລະນາວິທີທີ່ທ່ານສາມາດສະແຫວງຫາ “[ຂອງປະທານທີ່ດີທີ່ສຸດນັ້ນຢ່າງພາກພຽນ]” ແນວໃດ (1 ໂກຣິນໂທ 12:31).
ເບິ່ງ 1 ໂກຣິນໂທ 14; ໂມໂຣໄນ 10:8–21, 30; ຄຳສອນ ແລະ ພັນທະສັນຍາ 46:8–26; ຫລັກແຫ່ງຄວາມເຊື່ອ 1:7 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
1 ໂກຣິນໂທ 9:24–27.ນັບແຕ່ໂປໂລໄດ້ປຽບທຽບການດຳລົງຊີວິດຕາມພຣະກິດຕິຄຸນໃສ່ກັບການແລ່ນແຂ່ງຂັນ, ທ່ານສາມາດຈັດການແລ່ນແຂ່ງຂັນໃນຄອບຄົວ ເພື່ອສາທິດຈຸດນີ້. ໃຫ້ມອບມົງກຸດເປັນລາງວັນໃຫ້ແກ່ຜູ້ແລ່ນເຖິງເສັ້ນໄຊແຕ່ລະຄົນ, ແລະ ສົນທະນາວ່າ ທຸກຄົນທີ່ຕິດຕາມພຣະເຢຊູຄຣິດຢ່າງພາກພຽນໃນຊີວິດນີ້ ຈະໄດ້ຮັບລາງວັນທີ່ “ບໍ່ມີວັນຫ່ຽວແຫ້ງ” (1 ໂກຣິນໂທ 9:25; ເບິ່ງ 2 ຕີໂມທຽວ 4:7–8 ນຳອີກ). ນັກແລ່ນຈະເຮັດສິ່ງໃດເພື່ອກຽມພ້ອມສຳລັບການແຂ່ງຂັນ? ເຮົາສາມາດເຮັດຫຍັງແດ່ເພື່ອກຽມພ້ອມທີ່ຈະກັບໄປຫາພຣະບິດາເທິງສະຫວັນ?
ໂປໂລໄດ້ປຽບທຽບການດຳລົງຊີວິດຕາມພຣະກິດຕິຄຸນໃສ່ກັບການແລ່ນແຂ່ງຂັນ.
-
1 ໂກຣິນໂທ 12:1–11.ຫລັງຈາກໄດ້ອ່ານຂໍ້ເຫລົ່ານີ້ນຳກັນແລ້ວ, ໃຫ້ຄິດທີ່ຈະຢາຍເຈ້ຍໃບໜຶ່ງໃຫ້ສະມາຊິກໃນຄອບຄົວແຕ່ລະຄົນ ໂດຍມີຊື່ຂອງຄົນອື່ນຢູ່ສົ້ນເທິງໜ້າເຈ້ຍ. ຂໍໃຫ້ແຕ່ລະຄົນຂຽນຂອງປະທານທາງວິນຍານທີ່ເຂົາເຈົ້າສັງເກດເຫັນໃນຕົວຂອງບຸກຄົນນັ້ນ. ແລ້ວທ່ານສາມາດຢາຍເຈ້ຍເຫລົ່ານັ້ນຢູ່ໃນວົງ ຈົນວ່າທຸກຄົນໄດ້ມີໂອກາດຂຽນກ່ຽວກັບຂອງປະທານທາງວິນຍານຂອງແຕ່ລະຄົນໃນຄອບຄົວ.
-
1 ໂກຣິນໂທ 12:3.ເປັນຫຍັງພຣະວິນຍານບໍລິສຸດຈຶ່ງຈຳເປັນຕໍ່ການມີປະຈັກພະຍານເຖິງພຣະເຢຊູຄຣິດ? ເຮົາສາມາດເຮັດສິ່ງໃດເພື່ອເຊື້ອເຊີນພຣະວິນຍານບໍລິສຸດໃຫ້ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງເຮົາເຖິງພຣະອົງ?
-
1 ໂກຣິນໂທ 12:12–27.ການປຽບທຽບຂອງໂປໂລເລື່ອງຮ່າງກາຍ ສາມາດເປັນວິທີທີ່ໜ້າຊົງຈຳ ໃນການສົນທະນາກ່ຽວກັບຄວາມເປັນນ້ຳໜຶ່ງໃຈດຽວກັນໃນຄອບຄົວ. ຍົກຕົວຢ່າງ, ສະມາຊິກໃນຄອບຄົວສາມາດແຕ້ມຮ່າງກາຍທີ່ມີແຕ່ຕາ ຫລື ຫູ (ເບິ່ງ ຂໍ້ທີ 17). ຂໍ້ເຫລົ່ານີ້ແນະນຳແນວໃດແດ່ກ່ຽວກັບວິທີທີ່ເຮົາຄວນປະຕິບັດຕໍ່ກັນແລະກັນ ໃນຖານະສະມາຊິກໃນຄອບຄົວ?
-
1 ໂກຣິນໂທ 13:4–8.ຄຳອະທິບາຍຂອງໂປໂລກ່ຽວກັບຄວາມໃຈບຸນ ສາມາດເປັນຄຳຂວັນທີ່ດົນໃຈໄດ້ສຳລັບຄອບຄົວທ່ານ. ທ່ານສາມາດມອບໝາຍໃຫ້ສະມາຊິກໃນຄອບຄົວແຕ່ລະຄົນ ສຶກສາວະລີໃນ ຂໍ້ທີ 4–8 ແລະ ສິດສອນຄົນອື່ນໆໃນຄອບຄົວເຖິງຄວາມໝາຍຂອງຄຳອະທິບາຍ, ຕົວຢ່າງ, ແລະ ປະສົບການສ່ວນຕົວ. ພຣະຜູ້ຊ່ວຍໃຫ້ລອດເປັນຕົວຢ່າງຂອງຄຸນລັກສະນະເຫລົ່ານີ້ແນວໃດ? ພວກທ່ານກໍສາມາດເຮັດໂປສເຕີ້ນຳອີກ ສຳລັບວະລີແຕ່ລະຂໍ້ເຫລົ່ານີ້ ແລະ ຕິດມັນໄວ້ທົ່ວເຮືອນ. ຮູ້ຈັກປະດິດຄິດສ້າງ!
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ຄວາມເມດຕາເລີ່ມຈາກເຮົາ,” ເພງສວດ ແລະ ເພງຂອງເດັກນ້ອຍ, 69.
ການປັບປຸງການສິດສອນຂອງເຮົາ
ສະແດງຂໍ້ພຣະຄຳພີ. ສະແດງຂໍ້ໜຶ່ງທີ່ທ່ານເຫັນວ່າ ມັນມີຄວາມໝາຍໄວ້ບ່ອນທີ່ສະມາຊິກໃນຄອບຄົວສາມາດຫລຽວເຫັນມັນໄດ້ເລື້ອຍໆ. ເຊື້ອເຊີນສະມາຊິກໃນຄອບຄົວຄົນອື່ນໆ ໃຫ້ເລືອກຂໍ້ພຣະຄຳພີ ເພື່ອສະແດງ.
“ເຂົ້າຈີ່ຊຶ່ງເຮົາຫັກນັ້ນ, ເປັນສິ່ງທີ່ເຮັດໃຫ້ພວກເຮົາມີສ່ວນຮ່ວມໃນພຣະກາຍຂອງພຣະຄຣິດບໍ່ແມ່ນບໍ? ເຖິງແມ່ນວ່າພວກເຮົາມີຫລາຍຄົນ ເນື່ອງຈາກມີເຂົ້າຈີ່ກ້ອນດຽວ, ພວກເຮົາກໍເປັນຮ່າງກາຍດຽວ” (1 ໂກຣິນໂທ 10:16–17).