“ວັນທີ 21–27 ເດືອນສິງຫາ. 1 ໂກຣິນໂທ 1–7: ‘ໃຫ້ຖືກຕ້ອງປອງດອງກັນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 21–27 ເດືອນສິງຫາ. 1 ໂກຣິນໂທ 1–7,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
Corinth, Southern Greece, the Forum and Civic Center [ເມືອງໂກຣິນໂທ, ພາກໃຕ້ຂອງປະເທດກຣີກ, ບ່ອນຊຸມນຸມສາທາລະນະ ແລະ ສູນຊຸມຊົນ], ແຕ້ມໂດຍ ເບເລດຈ໌ Balogh/www.ArchaeologyIllustrated.com
ວັນທີ 21–27 ເດືອນສິງຫາ
1 ໂກຣິນໂທ 1–7
“ໃຫ້ຖືກຕ້ອງປອງດອງກັນ”
ໃຫ້ບັນທຶກຄວາມປະທັບໃຈຂອງທ່ານ ຂະນະທີ່ທ່ານອ່ານ 1 ໂກຣິນໂທ 1–7. ຄວາມປະທັບໃຈເຫລົ່ານີ້ອາດຮ່ວມດ້ວຍການກະຕຸ້ນໃຫ້ສຶກສາແນວຄິດເພີ່ມເຕີມ, ເພື່ອແບ່ງປັນບາງສິ່ງທີ່ທ່ານຮຽນຮູ້ກັບຄົນອື່ນ, ຫລື ທຳການປ່ຽນແປງໃນຊີວິດຂອງທ່ານ.
ບັນທຶກຄວາມປະທັບໃຈຂອງທ່ານ
ລະຫວ່າງເດືອນທີ່ໂປໂລຢູ່ໃນເມືອງໂກຣິນໂທ, “ຊາວໂກຣິນໂທຫລາຍຄົນຜູ້ໄດ້ຍິນພຣະທຳທີ່ [ເພິ່ນ] ກ່າວ ກໍໄດ້ເຊື່ອ, ແລະ ຮັບບັບຕິສະມາ” (ກິດຈະການ 18:8). ສະນັ້ນ ຈຶ່ງເຮັດໃຫ້ໂປໂລເສົ້າສະຫລົດໃຈທີ່ໄດ້ຍິນ, ພຽງແຕ່ສອງສາມປີຕໍ່ມາ, ວ່າມີການ “ຖືພັກຖືພວກ” ແລະ “ຜິດຂ້ອງຕ້ອງຖຽງກັນ” ໃນບັນດາໄພ່ພົນຊາວໂກຣິນໂທ ແລະ ວ່າໃນຕອນທີ່ເພິ່ນບໍ່ຢູ່ນຳ ພວກເຂົາໄດ້ເອົາໃຈໃສ່ກັບ “ປັນຍາຂອງຝ່າຍໂລກ” (1 ໂກຣິນໂທ 1:10–11, 20). ໃນການຕອບ, ໂປໂລໄດ້ຂຽນຈົດໝາຍທີ່ເວລານີ້ເຮົາເອີ້ນວ່າ 1 ໂກຣິນໂທ. ມັນເຕັມໄປດ້ວຍຄຳສອນເລິກເຊິ່ງ, ແຕ່ໃນເວລາດຽວກັນ, ໂປໂລເບິ່ງຄືຜິດຫວັງທີ່ໄພ່ພົນຍັງບໍ່ພ້ອມທີ່ຈະຮັບເອົາຄຳສອນທັງໝົດທີ່ເພິ່ນຢາກມອບໃຫ້ພວກເຂົາ. “ພີ່ນ້ອງທັງຫລາຍເອີຍ, ຕາມຄວາມເປັນຈິງແລ້ວ, ຝ່າຍເຮົາຈະເວົ້າກັບພວກເຈົ້າເໝືອນເວົ້າກັບຄົນທີ່ຢູ່ຝ່າຍວິນຍານກໍບໍ່ໄດ້,” ເພິ່ນຄ່ຳຄວນ, “ເພາະວ່າພວກເຈົ້າຍັງຢູ່ຝ່າຍມະນຸດທຳມະດາ” (1 ໂກຣິນໂທ 3:1–3). ຂະນະທີ່ເຮົາກະກຽມທີ່ຈະອ່ານຖ້ອຍຄຳຂອງໂປໂລ, ມັນອາດເປັນປະໂຫຍດທີ່ຈະສຳຫລວດຄວາມພ້ອມຂອງເຮົາເອງ ທີ່ຈະຮັບເອົາຄວາມຈິງ—ລວມທັງຄວາມເຕັມໃຈຂອງເຮົາທີ່ຈະເອົາໃຈໃສ່ຕໍ່ພຣະວິນຍານ ແລະ ພະຍາຍາມທີ່ຈະເປັນນ້ຳໜຶ່ງໃຈດຽວກັນໃນຄອບຄົວຂອງເຮົາ, ກັບເພື່ອນໄພ່ພົນຂອງເຮົາ, ແລະ ກັບພຣະເຈົ້າ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ສະມາຊິກໃນສາດສະໜາຈັກຂອງພຣະຄຣິດພະຍາຍາມເປັນອັນໜຶ່ງອັນດຽວກັນ.
ເຮົາບໍ່ຮູ້ລາຍລະອຽດທັງໝົດກ່ຽວກັບການຂາດຄວາມເປັນນ້ຳໜຶ່ງໃຈດຽວກັນໃນບັນດາໄພ່ພົນຊາວໂກຣິນໂທ, ແຕ່ເຮົາຮູ້ກ່ຽວກັບການຂາດຄວາມເປັນນ້ຳໜຶ່ງໃຈດຽວກັນໃນຄວາມສຳພັນຂອງ ເຮົາເອງ. ໃຫ້ຄິດກ່ຽວກັບຄວາມສຳພັນໃນຊີວິດຂອງທ່ານ ທີ່ສາມາດໄດ້ຮັບຜົນປະໂຫຍດຈາກຄວາມເປັນນ້ຳໜຶ່ງໃຈດຽວກັນຫລາຍຂຶ້ນ; ແລ້ວໃຫ້ຊອກຫາສິ່ງທີ່ໂປໂລສິດສອນຢູ່ໃນ 1 ໂກຣິນໂທ 1:10–17; 3:1–11 ກ່ຽວກັບການຂາດຄວາມເປັນນ້ຳໜຶ່ງໃຈດຽວກັນໃນບັນດາໄພ່ພົນຊາວໂກຣິນໂທ. ຄວາມຮູ້ໃດແດ່ທີ່ທ່ານສາມາດໄດ້ຮັບກ່ຽວກັບວິທີທີ່ຈະພັດທະນາຄວາມເປັນນ້ຳໜຶ່ງໃຈດຽວກັນຫລາຍກວ່າເກົ່າກັບຄົນອື່ນ?
ເບິ່ງ ໂມໄຊຢາ 18:21; 4 ນີໄຟ 1:15–17; ຄຳສອນ ແລະ ພັນທະສັນຍາ 38:23–27; 105:1–5; Gospel Topics, “Unity,” topics.ChurchofJesusChrist.org ນຳອີກ.
ເພື່ອບັນລຸວຽກງານຂອງພຣະເຈົ້າ, ເຮົາຕ້ອງການສະຕິປັນຍາຂອງພຣະເຈົ້າ.
ຂະນະເປັນເລື່ອງດີ—ແມ່ນແຕ່ຊຸກຍູ້—ໃຫ້ສະແຫວງຫາສະຕິປັນຍາໃນບ່ອນໃດກໍຕາມທີ່ເຮົາສາມາດພົບເຫັນມັນ (ເບິ່ງ 2 ນີໄຟ 9:29; ຄຳສອນ ແລະ ພັນທະສັນຍາ 88:118), ແຕ່ໂປໂລໄດ້ໃຫ້ຄຳເຕືອນຢ່າງໜັກແໜ້ນກ່ຽວກັບສະຕິປັນຍາຂອງມະນຸດທີ່ບົກພ່ອງ, ຊຶ່ງເພິ່ນເອີ້ນວ່າ “ປັນຍາຂອງຝ່າຍໂລກ.” ຂະນະທີ່ທ່ານອ່ານ 1 ໂກຣິນໂທ 1:17–25, ໃຫ້ໄຕ່ຕອງສິ່ງທີ່ວະລີຂໍ້ນີ້ອາດໝາຍຄວາມວ່າແນວໃດ. ທ່ານຄິດວ່າໂປໂລໝາຍຄວາມວ່າແນວໃດກັບຄຳວ່າ “ສະຕິປັນຍາຂອງພຣະເຈົ້າ”? ເປັນຫຍັງເຮົາຈຶ່ງຕ້ອງການສະຕິປັນຍາຂອງພຣະເຈົ້າ ໃນການບັນລຸວຽກງານຂອງພຣະເຈົ້າ?
ໃນຄວາມພະຍາຍາມຂອງທ່ານທີ່ຈະເຮັດໜ້າທີ່ຮັບຜິດຊອບຂອງທ່ານ ໃນການບັນລຸວຽກງານຂອງພຣະເຈົ້າ, ທ່ານເຄີຍ “ຢ້ານກົວຈົນຕົວສັ່ນ” ບໍ ທີ່ໂປໂລໄດ້ຮູ້ສຶກຕອນເພິ່ນສິດສອນໄພ່ພົນຊາວໂກຣິນໂທ? (1 ໂກຣິນໂທ 2:3). ທ່ານພົບເຫັນຫຍັງແດ່ໃນ 1 ໂກຣິນໂທ 2:1–5 ທີ່ໃຫ້ຄວາມກ້າຫານແກ່ທ່ານ? ໃຫ້ພິຈາລະນາວິທີທີ່ທ່ານສາມາດສະແດງວ່າ ທ່ານໄວ້ວາງໃຈ “ອຳນາດຂອງພຣະເຈົ້າ” ຫລາຍກວ່າ “ປັນຍາຂອງມະນຸດ.”
ເບິ່ງ ຄຳສອນ ແລະ ພັນທະສັນຍາ 1:17–28 ນຳອີກ.
ເຮົາຕ້ອງການພຣະວິນຍານບໍລິສຸດ ເພື່ອຈະເຂົ້າໃຈພຣະໄທຂອງພຣະເຈົ້າ.
ຖ້າຫາກທ່ານຢາກຮຽນຮູ້ຕື່ມອີກກ່ຽວກັບບາງສິ່ງເຊັ່ນ ການສ້ອມແປງລົດຍົນ ຫລື ການກໍ່ສ້າງຂອງຍຸກກາງ, ທ່ານຈະເຮັດແນວໃດ? ອີງຕາມ 1 ໂກຣິນໂທ 2:9–16, ການຮູ້ຈັກ “ພຣະໄທຂອງພຣະເຈົ້າ” ແຕກຕ່າງຈາກ “ຄວາມຄິດຂອງມະນຸດ” ແນວໃດ? ເປັນຫຍັງເຮົາຈຶ່ງຈຳເປັນຕ້ອງມີພຣະວິນຍານບໍລິສຸດ ກ່ອນຈະເຂົ້າໃຈພຣະໄທຂອງພຣະເຈົ້າໄດ້? ຫລັງຈາກໄດ້ອ່ານຂໍ້ເຫລົ່ານີ້ແລ້ວ, ທ່ານຮູ້ສຶກວ່າ ທ່ານຄວນເຮັດສິ່ງໃດເພື່ອຈະເຂົ້າໃຈສິ່ງທີ່ເປັນທາງວິນຍານຢ່າງເຕັມປ່ຽມຫລາຍກວ່າເກົ່າ? ຂໍ້ຄວາມຂອງໂປໂລສາມາດຊ່ວຍບາງຄົນທີ່ດີ້ນລົນກັບປະຈັກພະຍານຂອງເຂົາແນວໃດ?
ຮ່າງກາຍຂອງເຮົາແມ່ນສັກສິດ.
ຜູ້ຄົນສ່ວນຫລາຍໃນເມືອງໂກຣິນໂທຮູ້ສຶກວ່າ ການຜິດສິນທຳທາງເພດເປັນທີ່ຍອມຮັບກັນ ແລະ ວ່າຮ່າງກາຍຂອງພວກເຂົາໄດ້ຖືກສ້າງຂຶ້ນມາ ເພື່ອຄວາມເພີດເພີນສ່ວນຫລາຍ. ໃນອີກຄຳໜຶ່ງ, ເມືອງໂກຣິນໂທກໍບໍ່ແຕກຕ່າງຈາກໂລກໃນປະຈຸບັນ. ໂປໂລໄດ້ສິດສອນຫຍັງແດ່ໃນ 1 ໂກຣິນໂທ 6:13–20 ທີ່ສາມາດຊ່ວຍທ່ານໃຫ້ອະທິບາຍຕໍ່ຄົນອື່ນວ່າ ເປັນຫຍັງທ່ານຈຶ່ງຢາກດຳລົງຊີວິດໃນທາງບໍລິສຸດ?
ຄືກັນກັບໂປໂລ, ຊິດສະເຕີ ເວັນດີ ດັບເບິນຢູ ແນວສັນ ໄດ້ຊຸກຍູ້ໄພ່ພົນໃຫ້ເປັນຄົນບໍລິສຸດ; ເບິ່ງຂ່າວສານຂອງເພິ່ນ “Love and Marriage” (worldwide devotional for young adults, Jan. 8, 2017, broadcasts.ChurchofJesusChrist.org). ອີງຕາມຊິດສະເຕີ ແນວສັນ, ພອນຢ່າງໃດແດ່ທີ່ມາຈາກການດຳລົງຊີວິດຕາມມາດຕະຖານຂອງພຣະຜູ້ເປັນເຈົ້າ ກ່ຽວກັບຄວາມຮັກ ແລະ ຄວາມໃກ້ຊິດ?
ໂປໂລໄດ້ສິດສອນວ່າ ເປັນໂສດດີກວ່າແຕ່ງງານບໍ?
ຫລາຍຂໍ້ໃນ 1 ໂກຣິນໂທ 7 ເບິ່ງຄືແນະນຳວ່າ ຂະນະທີ່ການແຕ່ງງານກໍເປັນສິ່ງດີ, ແຕ່ການເປັນໂສດ ແລະ ຫລີກເວັ້ນຈາກຄວາມສຳພັນທາງເພດກໍດີກວ່າ. ເຖິງຢ່າງໃດກໍຕາມ, ການແປຂອງໂຈເຊັບ ສະມິດ, 1 ໂກຣິນໂທ 7:29–33 (ໃນພຣະຄຣິສຕະທຳຄຳພີ ພາກຫ້ອຍທ້າຍ) ຊ່ວຍເຮົາໃຫ້ເຂົ້າໃຈວ່າ ໂປໂລໝາຍເຖິງຜູ້ທີ່ຖືກເອີ້ນໃຫ້ເປັນຜູ້ສອນສາດສະໜາເຕັມເວລາ, ເພື່ອວ່າພວກເຂົາຈະໄດ້ຮັບໃຊ້ພຣະເຈົ້າຢ່າງມີປະສິດທິພາບກວ່າ ຖ້າຫາກພວກເຂົາເປັນໂສດໃນຊ່ວງໄລຍະການເຜີຍແຜ່ຂອງພວກເຂົາ. ພຣະຜູ້ເປັນເຈົ້າໄດ້ສິດສອນຜ່ານທາງຜູ້ຮັບໃຊ້ຂອງພຣະອົງ, ລວມທັງໂປໂລ, ວ່າການແຕ່ງງານເປັນພາກສ່ວນໜຶ່ງຂອງແຜນນິລັນດອນຂອງພຣະອົງ ແລະ ກໍຈຳເປັນຕໍ່ຄວາມສູງສົ່ງ (ເບິ່ງ 1 ໂກຣິນໂທ 11:11; ຄຳສອນ ແລະ ພັນທະສັນຍາ 131:1–4).
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
1 ໂກຣິນໂທ 1:10–17; 3:1–11.ຂະນະທີ່ຄອບຄົວຂອງທ່ານອ່ານຂໍ້ເຫລົ່ານີ້, ໃຫ້ເຊື້ອເຊີນເຂົາເຈົ້າໃຫ້ຊອກຫາຄວາມຮູ້ທີ່ສາມາດຊ່ວຍເຂົາເຈົ້າໃຫ້ເປັນນ້ຳໜຶ່ງໃຈດຽວກັນຫລາຍຂຶ້ນ.
-
1 ໂກຣິນໂທ 3:1–2.ບາງທີທ່ານສາມາດອ່ານຂໍ້ເຫລົ່ານີ້ຂະນະທີ່ກິນນົມ ແລະ ກິນຊີ້ນ. ທ່ານສາມາດປຽບທຽບວິທີທີ່ແອນ້ອຍເຕີບໂຕເປັນຜູ້ໃຫຍ່ ໃສ່ກັບວິທີທີ່ເຮົາເຕີບໂຕທາງວິນຍານ.
-
1 ໂກຣິນໂທ 3:4–9.ໂປໂລໄດ້ປຽບທຽບການເຜີຍແຜ່ຂອງເພິ່ນໃສ່ກັບການຫວ່ານເມັດພືດ. ການປຽບທຽບຂອງເພິ່ນສິດສອນເຮົາຫຍັງແດ່ກ່ຽວກັບການແບ່ງປັນພຣະກິດຕິຄຸນ?
-
1 ໂກຣິນໂທ 6:19–20.ການປຽບທຽບຮ່າງກາຍຂອງເຮົາໃສ່ກັບພຣະວິຫານ, ດັ່ງທີ່ໂປໂລໄດ້ເຮັດ, ສາມາດເປັນວິທີທີ່ມີປະສິດທິພາບ ໃນການສິດສອນກ່ຽວກັບຄວາມສັກສິດຂອງຮ່າງກາຍເຮົາ. ບາງທີທ່ານສາມາດສະແດງຮູບພຣະວິຫານ, ດັ່ງເຊັ່ນຮູບທີ່ຢູ່ໃນໂຄງຮ່າງນີ້. ເປັນຫຍັງພຣະວິຫານຈຶ່ງສັກສິດ? ຮ່າງກາຍຂອງເຮົາເປັນເໝືອນດັ່ງພຣະວິຫານແນວໃດ? ເຮົາສາມາດເຮັດຫຍັງແດ່ເພື່ອປະຕິບັດກັບຮ່າງກາຍຂອງເຮົາເໝືອນດັ່ງພຣະວິຫານ? (ເບິ່ງ August 2020 special edition ວາລະສານ Liahona ກ່ຽວກັບເລື່ອງເພດນຳອີກ.)
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ພຣະເຈົ້າມອບພຣະວິຫານແກ່ເຮົາ,” ເພງສວດ ແລະ ເພງຂອງເດັກນ້ອຍ, 68.
ການປັບປຸງການສຶກສາສ່ວນຕົວ
ມີຄວາມອົດທົນກັບຕົວທ່ານເອງ. ໂປໂລໄດ້ສິດສອນວ່າ ນ້ຳນົມມາກ່ອນຊີ້ນ ເມື່ອເຮົາກຳລັງຮຽນຮູ້ພຣະກິດຕິຄຸນ (ເບິ່ງ 1 ໂກຣິນໂທ 3:1–2). ຖ້າຫາກທ່ານພົບເຫັນວ່າຄຳສອນບາງຢ່າງ ຍາກທີ່ຈະເຂົ້າໃຈໃນເວລານີ້, ໃຫ້ມີຄວາມອົດທົນ. ໃຫ້ໄວ້ວາງໃຈວ່າ ຄຳຕອບຈະມີມາເມື່ອທ່ານມີສັດທາ ແລະ ສຶກສາຢ່າງພາກພຽນ.
ໂປໂລໄດ້ປຽບທຽບຮ່າງກາຍຂອງເຮົາໃສ່ກັບຄວາມສັກສິດຂອງພຣະວິຫານ. ຈາກເທິງຊ້າຍຫາຂວາ: ພຣະວິຫານທີວານາ ແມັກຊິໂກ, ພຣະວິຫານໄຕ້ເປ ໄຕ້ຫວັນ, ພຣະວິຫານເຕກູຊິກາປາ ຮົງດູຣັດ, ພຣະວິຫານຮິວສະຕັນ ເທັກຊັດ.