“ວັນທີ 14–20 ເດືອນສິງຫາ. ໂຣມ 7–16: ‘ຈົ່ງຊະນະຄວາມຊົ່ວດ້ວຍຄວາມດີ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 14–20 ເດືອນສິງຫາ. ໂຣມ 7–16,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
ວັນທີ 14–20 ເດືອນສິງຫາ
ໂຣມ 7–16
“ຈົ່ງຊະນະຄວາມຊົ່ວດ້ວຍຄວາມດີ”
ພຽງແຕ່ຫລັກທຳພຣະກິດຕິຄຸນສອງສາມຢ່າງໃນ ໂຣມ 7–16 ທີ່ສາມາດເອົາມາລວມຢູ່ໃນໂຄງຮ່າງນີ້, ສະນັ້ນຢ່າຈຳກັດຕົວເອງກັບສິ່ງທີ່ກ່າວຢູ່ໃນນີ້ເທົ່ານັ້ນ. ໃຫ້ເອົາໃຈໃສ່ຕໍ່ການດົນໃຈທີ່ທ່ານໄດ້ຮັບ ຂະນະທີ່ທ່ານສຶກສາ.
ບັນທຶກຄວາມປະທັບໃຈຂອງທ່ານ
ຂະນະທີ່ເພິ່ນເລີ່ມຕົ້ນສານທີ່ເພິ່ນຈະສົ່ງໄປກຸງໂຣມ, ໂປໂລໄດ້ກ່າວທັກທາຍສະມາຊິກໃນສາດສະໜາຈັກ ໂດຍການເອີ້ນພວກເຂົາວ່າ “ພຣະເຈົ້າຊົງຮັກ” ຜູ້ທີ່ຖືກ “ເອີ້ນໃຫ້ເປັນໄພ່ພົນ.” ເພິ່ນໄດ້ກ່າວວ່າ “[ສັດທາ] ຂອງພວກເຈົ້າກຳລັງຊ່າລືໄປທົ່ວໂລກ” (ໂຣມ 1:7–8). ເຖິງແມ່ນວ່າໂປໂລໄດ້ໃຊ້ເວລາສ່ວນຫລາຍໃນສານຂອງເພິ່ນເພື່ອດັດແປງຄວາມຄິດທີ່ຜິດ ແລະ ພຶດຕິກຳທີ່ບໍ່ດີ, ແຕ່ເບິ່ງຄືວ່າ ເພິ່ນກໍຢາກໃຫ້ຊາວຄຣິດຜູ້ປ່ຽນໃຈເຫລື້ອມໃສໃໝ່ເຫລົ່ານີ້ໝັ້ນໃຈໄດ້ວ່າ ພວກເຂົາເປັນໄພ່ພົນແທ້ໆ ຊຶ່ງເປັນທີ່ຮັກຂອງພຣະເຈົ້າ. ຄຳແນະນຳທີ່ອ່ອນໂຍນຂອງເພິ່ນໄດ້ເປັນພອນໃຫ້ແກ່ເຮົາທຸກຄົນຜູ້ຢາກຮູ້ສຶກເຖິງຄວາມຮັກຂອງພຣະເຈົ້າ ແລະ ສຳລັບຜູ້ທີ່ການກາຍເປັນໄພ່ພົນອາດເກີນກວ່າຈະເອື້ອມເຖິງ. ດ້ວຍຄວາມເຫັນອົກເຫັນໃຈຢ່າງຖ່ອມຕົວ, ໂປໂລໄດ້ຮັບຮູ້ວ່າ ເພິ່ນກໍເຄີຍຮູ້ສຶກ “ເປັນຄົນທຸກເຂັນໃຈ” ເປັນບາງຄັ້ງ (ໂຣມ 7:24), ແຕ່ພຣະກິດຕິຄຸນຂອງພຣະເຢຊູຄຣິດໄດ້ໃຫ້ພະລັງແກ່ເພິ່ນເພື່ອເອົາຊະນະບາບ (ເບິ່ງ ການແປຂອງໂຈເຊັບ ສະມິດ, ໂຣມ 7:22–27 [ໃນພຣະຄຣິສຕະທຳຄຳພີ ພາກຫ້ອຍທ້າຍ]). ດ້ວຍພະລັງນັ້ນ, ອຳນາດແຫ່ງການໄຖ່ຂອງພຣະຜູ້ຊ່ວຍໃຫ້ລອດ, ເຮົາສາມາດເອົາ “ຊະນະຄວາມຊົ່ວ”—ທັງຄວາມຊົ່ວໃນໂລກ ແລະ ຄວາມຊົ່ວໃນຕົວເຮົາເອງ—“ດ້ວຍຄວາມດີ” (ໂຣມ 12:21).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຜູ້ທີ່ເຮັດຕາມພຣະວິນຍານ ສາມາດກາຍເປັນ “ຜູ້ຮ່ວມຮັບມໍລະດົກກັບພຣະຄຣິດ.”
ແມ່ນແຕ່ຫລັງຈາກໄດ້ມີ “ຊີວິດໃໝ່” ຜ່ານທາງພິທີການບັບຕິສະມາ (ໂຣມ 6:4), ບາງທີທ່ານອາດຮູ້ສຶກວ່າ ມີການຂັດແຍ້ງບາງຢ່າງຢູ່ພາຍໃນ ດັ່ງທີ່ໂປໂລໄດ້ບັນຍາຍຢູ່ໃນ ໂຣມ 7—ການ “ຕໍ່ສູ້” ລະຫວ່າງມະນຸດທີ່ມີຈິດໃຈທຳມະດາ ແລະ ຄວາມປາດຖະໜາທີ່ຊອບທຳຂອງທ່ານ (ໂຣມ 7:23). ແຕ່ໂປໂລຍັງໄດ້ກ່າວເຖິງຄວາມຫວັງຢູ່ໃນ ໂຣມ 8:23–25. ມີເຫດຜົນໃດແດ່ສຳລັບຄວາມຫວັງນີ້ທີ່ທ່ານພົບເຫັນຢູ່ໃນ ບົດທີ 8? ທ່ານກໍສາມາດຊອກຫາພອນທີ່ມາຈາກການມີ “ພຣະວິນຍານຂອງພຣະເຈົ້າຊົງສະຖິດຢູ່ໃນເຈົ້າທັງຫລາຍ” (ໂຣມ 8:9). ທ່ານຈະສາມາດສະແຫວງຫາການເປັນເພື່ອນຂອງພຣະວິນຍານບໍລິສຸດຢ່າງເຕັມທີ່ຫລາຍຕື່ມອີກໃນຊີວິດຂອງທ່ານໄດ້ແນວໃດ?
ຂອງປະທານແຫ່ງລັດສະໝີພາບນິລັນດອນ ມີຄ່າຫລາຍກວ່າການທົດລອງຂອງເຮົາຢູ່ໃນໂລກນີ້.
ພຽງແຕ່ສອງສາມປີຫລັງຈາກທີ່ໂປໂລໄດ້ຂຽນສານສະບັບນີ້, ໄພ່ພົນຢູ່ໃນກຸງໂຣມໄດ້ທຸກທໍລະມານກັບການຂົ່ມເຫັງຢ່າງໜັກ. ທ່ານພົບເຫັນຫຍັງແດ່ຢູ່ໃນ ໂຣມ 8:16–39 ທີ່ອາດຊ່ວຍໄພ່ພົນເຫລົ່ານີ້ ເມື່ອການຂົ່ມເຫັງໄດ້ເກີດຂຶ້ນ? ຖ້ອຍຄຳເຫລົ່ານີ້ອາດກ່ຽວພັນກັບທ່ານ ແລະ ກັບການທົດລອງທີ່ທ່ານກຳລັງປະເຊີນຢູ່ແນວໃດ?
ໃຫ້ຊອກຫາການເຊື່ອມຕໍ່ລະຫວ່າງຂໍ້ເຫລົ່ານີ້ ແລະ ຄຳແນະນຳຈາກຊິດສະເຕີ ລິນດາ ແອັສ ຣີບສ໌: “ຂ້າພະເຈົ້າບໍ່ຮູ້ວ່າ ເປັນຫຍັງ ເຮົາຈຶ່ງຖືກທົດລອງຫລາຍ, ແຕ່ມັນເປັນຄວາມຮູ້ສຶກສ່ວນຕົວຂອງຂ້າພະເຈົ້າວ່າ ລາງວັນນັ້ນຍິ່ງໃຫຍ່ແທ້ໆ, ເປັນນິລັນດອນ ແລະ ບໍ່ສິ້ນສຸດຈັກເທື່ອ, ເປັນໜ້າຊື່ນຊົມ ແລະ ເກີນກວ່າຄວາມເຂົ້າໃຈຂອງເຮົາແທ້ໆ ຈົນວ່າໃນມື້ທີ່ໄດ້ຮັບລາງວັນນັ້ນ, ເຮົາຈະກ່າວກັບພຣະບິດາທີ່ຊົງເມດຕາ ແລະ ຊົງຮັກຂອງເຮົາວ່າ, ‘ມີແຕ່ ເທົ່ານັ້ນ ບໍທີ່ຖືກຮຽກຮ້ອງ?’ ຂ້າພະເຈົ້າເຊື່ອວ່າ ຖ້າຫາກເຮົາສາມາດຈື່ຈຳ ແລະ ຮັບຮູ້ແຕ່ລະວັນເຖິງຄວາມຮັກອັນເລິກເຊິ່ງຂອງພຣະບິດາເທິງສະຫວັນຂອງເຮົາ ແລະ ຂອງພຣະຜູ້ຊ່ວຍໃຫ້ລອດ ທີ່ມີຕໍ່ເຮົາ, ແລ້ວເຮົາຈະເຕັມໃຈທີ່ຈະເຮັດທຸກສິ່ງ ເພື່ອໃຫ້ສາມາດກັບຄືນໄປຫາທີ່ປະທັບຂອງພວກພຣະອົງອີກ, ຖືກອ້ອມຮອບດ້ວຍຄວາມຮັກນິລັນດອນຂອງພວກພຣະອົງ. ມັນຈະສຳຄັນຫຍັງ ເຖິງແມ່ນເຮົາຈະທຸກທໍລະມານໃນເວລານີ້ ຖ້າຫາກໃນທີ່ສຸດ ການທົດສອບຂອງເຮົາ ເປັນສິ່ງທີ່ເຮັດໃຫ້ເຮົາເໝາະສົມສຳລັບຊີວິດນິລັນດອນ ແລະ ໄດ້ຮັບຄວາມສູງສົ່ງ ໃນອານາຈັກຂອງພຣະເຈົ້າ ນຳພຣະບຸດ ແລະ ພຣະຜູ້ຊ່ວຍໃຫ້ລອດຂອງເຮົາ?” (“Worthy of Our Promised Blessings,” Liahona, Nov. 2015, 11). ໃຫ້ຕັດສິນໃຈວ່າທ່ານຈະເຮັດສິ່ງໃດ ເພື່ອ “ຈື່ຈຳ ແລະ ຮັບຮູ້ແຕ່ລະວັນ” ເຖິງຄວາມຮັກຂອງພຣະເຈົ້າທີ່ມີຕໍ່ທ່ານ.
ໂປໂລໝາຍຄວາມວ່າແນວໃດ ກັບຄຳທີ່ວ່າ “ຖືກກຳນົດ,” “ການເລືອກ,” ແລະ “ຮູ້ລ່ວງໜ້າ”?
ໂປໂລໄດ້ໃຊ້ຄຳທີ່ວ່າ “ຖືກກຳນົດ,” “ການເລືອກ,” ແລະ “ຮູ້ລ່ວງໜ້າ” ເພື່ອສິດສອນວ່າ ກ່ອນຊີວິດນີ້, ພຣະເຈົ້າໄດ້ເລືອກລູກໆບາງຄົນຂອງພຣະອົງໃຫ້ເປັນພາກສ່ວນຂອງຊາວອິດສະຣາເອນ, ຜູ້ຄົນແຫ່ງພັນທະສັນຍາຂອງພຣະອົງ. ນີ້ໝາຍຄວາມວ່າ ພວກເຂົາຈະໄດ້ຮັບພອນ ແລະ ໜ້າທີ່ຮັບຜິດຊອບພິເສດ ເພື່ອວ່າພວກເຂົາຈະສາມາດເປັນພອນໃຫ້ແກ່ທຸກຄົນໃນໂລກ (ເບິ່ງ ຄູ່ມືພຣະຄຳພີ, “ການເລືອກ,” scriptures.ChurchofJesusChrist.org). ເຖິງຢ່າງໃດກໍຕາມ, ໂປໂລຍັງໄດ້ເນັ້ນຢູ່ໃນ ໂຣມ 9–11 ວ່າລູກໆຂອງພຣະເຈົ້າ ທຸກຄົນ ສາມາດກາຍເປັນຜູ້ຄົນແຫ່ງພັນທະສັນຍາຂອງພຣະອົງໄດ້, ແລະ ເຮົາທຸກຄົນຈະໄດ້ຮັບຊີວິດນິລັນດອນ ໃນທາງດຽວກັນ—ຜ່ານທາງສັດທາໃນພຣະເຢຊູຄຣິດ ແລະ ການເຊື່ອຟັງພຣະບັນຍັດຂອງພຣະອົງ.
ເບິ່ງ ເອເຟໂຊ 1:3–4; 1 ເປໂຕ 1:2; ແອວມາ 13:1–5; Gospel Topics, “Foreordination,” topics.ChurchofJesusChrist.org ນຳອີກ.
ໂປໂລເຊື້ອເຊີນເຮົາໃຫ້ກາຍເປັນໄພ່ພົນ ແລະ ຜູ້ຕິດຕາມທີ່ແທ້ຈິງຂອງພຣະເຢຊູຄຣິດ.
ຫ້າບົດສຸດທ້າຍຂອງ ໂຣມ ບັນຈຸຄຳແນະນຳສະເພາະຫລາຍສິບຂໍ້ກ່ຽວກັບການດຳລົງຊີວິດໃນຖານະໄພ່ພົນ. ວິທີໜຶ່ງໃນການສຶກສາຄຳແນະນຳເຫລົ່ານີ້ ຄືໃຫ້ຊອກຫາຫົວຂໍ້ທີ່ຊ້ຳກັນ. ທ່ານຈະສະຫລຸບຄຳແນະນຳຂອງໂປໂລແນວໃດ?
ທ່ານອາດບໍ່ສາມາດນຳໃຊ້ຄຳແນະນຳນີ້ທັງໝົດໄດ້ໃນຄັ້ງດຽວ, ແຕ່ພຣະວິນຍານສາມາດຊ່ວຍທ່ານຊອກຫາຫລັກທຳຂໍ້ໜຶ່ງ ຫລື ສອງຂໍ້ ທີ່ທ່ານສາມາດເລີ່ມຕົ້ນນຳໃຊ້ໃນມື້ນີ້. ໃຫ້ແບ່ງປັນຄວາມປາດຖະໜາຂອງທ່ານກັບພຣະບິດາເທິງສະຫວັນໃນຄຳອະທິຖານ, ແລະ ທູນຂໍຄວາມຊ່ວຍເຫລືອຈາກພຣະອົງ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ໂຣມ 8:31–39.ເຮົາພົບເຫັນຫຍັງຢູ່ໃນ ໂຣມ 8:31–39 ທີ່ສິດສອນວ່າ ພຣະບິດາເທິງສະຫວັນ ແລະ ພຣະເຢຊູຮູ້ສຶກແນວໃດກ່ຽວກັບເຮົາ? ເຮົາເຄີຍຮູ້ສຶກເຖິງຄວາມຮັກຂອງພຣະເຈົ້າເມື່ອໃດ?
ເພື່ອສາທິດ ຂໍ້ທີ 38–39, ສະມາຊິກໃນຄອບຄົວສາມາດຊອກຫາຕົວຢ່າງຂອງບາງສິ່ງທີ່, ຄືເຮົາກັບຄວາມຮັກຂອງພຣະເຈົ້າ, ບໍ່ສາມາດແຍກອອກຈາກກັນໄດ້.
ແອວເດີ ວີວເຝີດ ດັບເບິນຢູ ແອນເດີເຊັນ ໄດ້ສິດສອນວ່າ, “ເພງຂອງພຣະກິດຕິຄຸນແມ່ນຄວາມຮູ້ສຶກປິຕິຍິນດີທາງວິນຍານ.”
-
ໂຣມ 9:31–32.ຂ່າວສານຂອງແອວເດີ ວິວເຝີດ ດັບເບິນຢູ ແອນເດີເຊັນ “The Music of the Gospel” (Liahona, May 2015, 54–56; ເບິ່ງ ວິດີໂອ ນຳອີກ ທີ່ ChurchofJesusChrist.org) ຊຶ່ງສາມາດຊ່ວຍສະແດງໃຫ້ເຫັນສິ່ງທີ່ໂປໂລສິດສອນກ່ຽວກັບກົດ, ວຽກງານ, ແລະ ສັດທາໄດ້. ຫລັງຈາກສົນທະນາກັນກ່ຽວກັບຄຳປາໄສຂອງເພິ່ນແລ້ວ, ຄອບຄົວຂອງທ່ານສາມາດຟ້ອນລຳໃສ່ດົນຕີ ແລະ ບໍ່ໃສ່ດົນຕີ. ສັດທາສາມາດຊ່ວຍເຮົາໃຫ້ປະສົບກັບຄວາມຊື່ນຊົມຂອງພຣະກິດຕິຄຸນໄດ້ແນວໃດ?
-
ໂຣມ 10:17.ໃຫ້ຕິດປ້າຍໃສ່ຈອກນ້ຳ ໂດຍໃຊ້ແຫລ່ງພຣະຄຳຂອງພຣະເຈົ້າ (ເຊັ່ນ ພຣະຄຳພີ, ການເປີດເຜີຍສ່ວນຕົວ, ແລະ ກອງປະຊຸມໃຫຍ່ສາມັນ). ໃຫ້ສົນທະນາວິທີທີ່ພຣະຄຳຂອງພຣະເຈົ້າເພີ່ມພູນສັດທາຂອງເຮົາແນວໃດ ຂະນະທີ່ທ່ານເທນ້ຳໃນຈອກໃສ່ໃນໂຖນ້ຳທີ່ມີປ້າຍວ່າ “ສັດທາ.”
-
ໂຣມ 12.ການເຮັດໃຫ້ຕົວເຮົາເອງ “ເປັນເຄື່ອງບູຊາອັນມີຊີວິດ ເປັນອັນບໍລິສຸດ ແລະ ເປັນທີ່ພໍພຣະໄທພຣະເຈົ້າ” ໝາຍຄວາມວ່າແນວໃດ? (ຂໍ້ທີ 1).
-
ໂຣມ 14:13–21.ຄອບຄົວຂອງທ່ານອາດໄດ້ຮັບຜົນປະໂຫຍດຈາກການສຶກສາຄຳແນະນຳຂອງໂປໂລກ່ຽວກັບການຕັດສິນ ແລະ ການຜິດຖຽງກັນກ່ຽວກັບຄວາມມັກສ່ວນຕົວ. ບາງທີພວກທ່ານສາມາດສົນທະນາກ່ຽວກັບວິທີທີ່ເໝາະສົມໃນການຕອບຮັບ ເມື່ອຄົນອື່ນ, ລວມທັງສະມາຊິກໃນຄອບຄົວ, ເລືອກເຮັດສິ່ງທີ່ແຕກຕ່າງຈາກທ່ານ. ເຮົາຈະສາມາດ “ສະແຫວງຫາສິ່ງທັງຫລາຍທີ່ເຮັດໃຫ້ເກີດຄວາມສະຫງົບສຸກ” ໄດ້ແນວໃດ? (ຂໍ້ທີ 19).
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27.
ການປັບປຸງການສິດສອນຂອງເຮົາ
ປ່ອຍໃຫ້ລູກໆສະແດງການປະດິດຄິດສ້າງຂອງເຂົາ. ເມື່ອທ່ານເຊື້ອເຊີນເດັກນ້ອຍໃຫ້ປະດິດບາງສິ່ງທີ່ກ່ຽວພັນກັບຫລັກທຳພຣະກິດຕິຄຸນ, ທ່ານໄດ້ຊ່ວຍເຂົາໃຫ້ເຂົ້າໃຈຫລັກທຳຫລາຍຂຶ້ນກວ່າເກົ່າ. … ປ່ອຍໃຫ້ເຂົາສ້າງ, ແຕ້ມ, ທາສີ, ແລະ ປະດິດ” (Teaching in the Savior’s Way, 25).
Abide with Me [ສະຖິດກັບຂ້າ], ໂດຍ ແດວ ພາສັນ