“ວັນທີ 11–17 ເດືອນກັນຍາ. 2 ໂກຣິນໂທ 1–7: ‘ຄືນດີກັນກັບພຣະອົງເທີ້ນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 11–17 ເດືອນກັນຍາ. 2 ໂກຣິນໂທ 1–7,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ພຣະເຢຊູຄຣິດ

ວັນທີ 11–17 ເດືອນກັນຍາ

2 ໂກຣິນໂທ 1–7

“ຄືນດີກັນກັບພຣະອົງເທີ້ນ”

ຂະນະທີ່ທ່ານສຶກສາຈົດໝາຍຂອງໂປໂລເຖິງຊາວໂກຣິນໂທ, ໃຫ້ຂຽນຫລັກທຳພຣະກິດຕິຄຸນບາງຢ່າງທີ່ທ່ານຄົ້ນພົບ ແລະ ໄຕ່ຕອງວິທີທີ່ທ່ານສາມາດນຳໃຊ້ມັນໃນຊີວິດຂອງທ່ານ.

ບັນທຶກຄວາມປະທັບໃຈຂອງທ່ານ

ບາງເທື່ອ, ການເປັນຜູ້ນຳໃນສາດສະໜາຈັກໝາຍຄວາມວ່າ ຕ້ອງໄດ້ກ່າວບາງຢ່າງທີ່ຍາກ. ສິ່ງນີ້ເປັນຄວາມຈິງໃນສະໄໝຂອງໂປໂລເທົ່າໆກັບໃນສະໄໝປະຈຸບັນ. ເຫັນໄດ້ຢ່າງຊັດເຈນວ່າ ຈົດໝາຍກ່ອນໜ້ານີ້ຈາກໂປໂລເຖິງໄພ່ພົນຊາວໂກຣິນໂທແມ່ນລວມດ້ວຍການຕີສອນ ແລະ ເຮັດໃຫ້ເກີດຄວາມຮູ້ສຶກເຈັບປວດ. ໃນຈົດໝາຍທີ່ກາຍເປັນ 2 ໂກຣິນໂທ, ເພິ່ນໄດ້ພະຍາຍາມອະທິບາຍສິ່ງທີ່ກະຕຸ້ນເພິ່ນໃຫ້ກ່າວຄຳຮຸນແຮງວ່າ: “ເຮົາໄດ້ຂຽນມາເຖິງພວກເຈົ້າດ້ວຍຄວາມລຳບາກຍິ່ງ ແລະ ຄວາມເສົ້າໂສກຢ່າງໜັກ ແລະ ດ້ວຍນ້ຳຕາຫລັ່ງໄຫລ, ຈຸດປະສົງຂອງເຮົາ ບໍ່ແມ່ນເພື່ອຈະເຮັດໃຫ້ພວກເຈົ້າເສົ້າໂສກ, ແຕ່ເພື່ອເຮັດໃຫ້ພວກເຈົ້າຮູ້ສຶກວ່າ ເຮົາຮັກພວກເຈົ້າທຸກຄົນຫລາຍເທົ່າໃດ” (2 ໂກຣິນໂທ 2:4). ເມື່ອທ່ານກຳລັງໄດ້ຮັບການວ່າກ່າວຈາກຜູ້ນຳ, ມັນຈະຊ່ວຍໄດ້ຫລາຍທີ່ຮູ້ວ່າ ມັນຖືກດົນໃຈໂດຍຄວາມຮັກທີ່ເປັນເໝືອນພຣະຄຣິດ. ແລະ ແມ່ນແຕ່ໃນກໍລະນີທີ່ບໍ່ເປັນເຊັ່ນນັ້ນ, ຖ້າຫາກເຮົາເຕັມໃຈທີ່ຈະເຫັນຄົນອື່ນດ້ວຍຄວາມຮັກທີ່ໂປໂລຮູ້ສຶກ, ມັນຈະງ່າຍຂຶ້ນໃນການຕອບຮັບຕໍ່ຄວາມຜິດໃດໆຢ່າງເໝາະສົມ. ດັ່ງທີ່ແອວເດີ ແຈັບຟະຣີ ອາ ຮໍແລນ ໄດ້ແນະນຳວ່າ, “ຈົ່ງມີຄວາມເມດຕານຳຄວາມອ່ອນແອຂອງມະນຸດ—ຂອງຕົວເອງ ແລະ ຂອງຄົນທີ່ຮັບໃຊ້ໃນສາດສະໜາຈັກນີ້ ຊຶ່ງນຳພາໂດຍຜູ້ອາສາສະໝັກທັງຊາຍ ແລະ ຍິງ. ຍົກເວັ້ນແຕ່ພຣະບຸດອົງດຽວທີ່ຖືກຳເນີດຜູ້ດີພ້ອມທຸກຢ່າງຂອງພຣະອົງເທົ່ານັ້ນ, ພຣະເຈົ້າໄດ້ເຮັດວຽກງານນຳຜູ້ຄົນທີ່ຂາດຕົກບົກພ່ອງ” (“Lord, I Believe,” Liahona, May 2013, 94).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

2 ໂກຣິນໂທ 1:3–7; 4:6–10, 17–18; 7:4–7

ການທົດລອງຂອງເຮົາສາມາດເປັນພອນ.

ເມື່ອພິຈາລະນາເຖິງທຸກສິ່ງທີ່ໂປໂລໄດ້ປະເຊີນໃນຊ່ວງຊີວິດຂອງເພິ່ນ, ຈຶ່ງບໍ່ໜ້າແປກໃຈທີ່ເພິ່ນໄດ້ຂຽນໄວ້ຢ່າງຫລວງຫລາຍກ່ຽວກັບຈຸດປະສົງ ແລະ ພອນຂອງຄວາມທຸກຍາກ. ຂະນະທີ່ທ່ານອ່ານ 2 ໂກຣິນໂທ 1:3–7; 4:6–10, 17–18; 7:4–7, ໃຫ້ຄິດກ່ຽວກັບວິທີທີ່ການທົດລອງຂອງທ່ານສາມາດເປັນພອນແນວໃດ. ຍົກຕົວຢ່າງ, ທ່ານອາດໄຕ່ຕອງວິທີທີ່ພຣະເຈົ້າ “ເລົ້າໂລມໃຈ [ຂອງທ່ານ] ໃນຄວາມທຸກລຳບາກ [ຂອງທ່ານ]” ແລະ ວິທີທີ່ທ່ານສາມາດ, ໃນການຕອບແທນ, “ເລົ້າໂລມໃຈຄົນອື່ນທີ່ໄດ້ຮັບຄວາມທຸກລຳບາກ” (2 ໂກຣິນໂທ 1:4). ຫລື ທ່ານອາດສຸມໃຈໃສ່ວິທີທີ່ຄວາມສະຫວ່າງຂອງພຣະເຢຊູຄຣິດ “ໃຫ້ແສງແຈ້ງສ່ອງ” ໃນໃຈຂອງທ່ານ, ແມ່ນແຕ່ເມື່ອທ່ານມີ “ຄວາມທຸກລຳບາກ” ແລະ “ຂັດສົນ” (2 ໂກຣິນໂທ 4:6, 8).

ເບິ່ງ ໂມໄຊຢາ 24:13–17; Henry B. Eyring, “Tested, Proved, and Polished,” Liahona, Nov. 2020, 96–99; Gospel Topics, “Adversity,” topics.ChurchofJesusChrist.org ນຳອີກ.

2 ໂກຣິນໂທ 2:5–11

ການໃຫ້ອະໄພເປັນພອນທີ່ເຮົາສາມາດໃຫ້ ແລະ ຮັບໄດ້.

ເຮົາບໍ່ຮູ້ຫຍັງຫລາຍກ່ຽວກັບຜູ້ຊາຍທີ່ໂປໂລກ່າວເຖິງໃນ 2 ໂກຣິນໂທ 2:5–11—ພຽງແຕ່ວ່າ ລາວໄດ້ລ່ວງລະເມີດ (ເບິ່ງ ຂໍ້ທີ 5–6) ແລະ ວ່າໂປໂລຢາກໃຫ້ໄພ່ພົນອະໄພໃຫ້ລາວ (ເບິ່ງ ຂໍ້ທີ 7–8). ເປັນຫຍັງບາງເທື່ອເຮົາບໍ່ “ສະແດງຄວາມຮັກ [ຂອງເຮົາ] ຕໍ່” ຄົນທີ່ເຮົາຮັກ ຜູ້ໄດ້ເຮັດຜິດຕໍ່ເຮົາ? (ຂໍ້ທີ 8). ການບໍ່ຍອມໃຫ້ອະໄພເປັນຜົນຮ້າຍຕໍ່ຄົນອື່ນ ແລະ ຕົວເຮົາເອງແນວໃດ? (ເບິ່ງ ຂໍ້ທີ 7, 10–11). ການບໍ່ຍອມໃຫ້ອະໄພຊ່ວຍ “ຊາຕານໃຫ້ມີໄຊເໜືອເຮົາ” ແນວໃດ? (ຂໍ້ທີ 11).

ເບິ່ງ ຄຳສອນ ແລະ ພັນທະສັນຍາ 64:9–11 ນຳອີກ.

2 ໂກຣິນໂທ 5:14–21

ຜ່ານທາງການຊົດໃຊ້ຂອງພຣະເຢຊູຄຣິດ, ເຮົາສາມາດຄືນດີກັນກັບພຣະເຈົ້າ.

ຄືກັນກັບຄົນອື່ນ, ໂປໂລຮູ້ວ່າ ການກາຍເປັນຜູ້ “ຖືກສ້າງຂຶ້ນໃໝ່” ນັ້ນເປັນຈັ່ງໃດ (2 ໂກຣິນໂທ 5:17). ເພິ່ນໄດ້ປ່ຽນຈາກການເປັນຜູ້ຂົ່ມເຫັງຊາວຄຣິດ ມາເປັນຜູ້ປົກປ້ອງທີ່ກ້າຫານຂອງພຣະຄຣິດ. ຂະນະທີ່ທ່ານອ່ານ 2 ໂກຣິນໂທ 5:14–21, ໃຫ້ຄິດກ່ຽວກັບຄຳຖາມຄືດັ່ງຕໍ່ໄປນີ້: ການຄືນດີໝາຍຄວາມວ່າແນວໃດ? ການ “ຄືນດີກັນກັບພຣະເຈົ້າ” ໝາຍຄວາມວ່າແນວໃດ? ໃຫ້ໄຕ່ຕອງສິ່ງທີ່ແຍກທ່ານອອກຈາກພຣະເຈົ້າ. ທ່ານຕ້ອງການເຮັດສິ່ງໃດເພື່ອຄືນດີກັບພຣະອົງຢ່າງສົມບູນຫລາຍຂຶ້ນ? ພຣະຜູ້ຊ່ວຍໃຫ້ລອດຊ່ວຍເຮັດໃຫ້ສິ່ງນັ້ນເປັນໄປໄດ້ແນວໃດ?

ທ່ານສາມາດໄຕ່ຕອງອີກວ່າ ການເປັນ “ທູດຂອງພຣະຄຣິດ” ໃນການ “ເຮັດໃຫ້ຄົນອື່ນຄືນດີກັບພຣະອົງ” ໝາຍຄວາມວ່າແນວໃດ (ຂໍ້ທີ 18, 20). ຄວາມຮູ້ຢ່າງໃດແດ່ທີ່ທ່ານໄດ້ຮັບຈາກຂ່າວສານຂອງແອວເດີ ແຈັບຟະຣີ ອາ ຮໍແລນ “The Ministry of Reconciliation”? (Liahona, Nov. 2018, 77–79).

ເບິ່ງ 2 ນີໄຟ 10:23–25 ນຳອີກ.

2 ໂກຣິນໂທ 7:8–11

ຄວາມທຸກໃຈຕາມຢ່າງຊອບພຣະໄທພຣະເຈົ້ານຳໄປສູ່ການກັບໃຈ.

ຕາມປົກກະຕິແລ້ວ ເຮົາບໍ່ຄິດວ່າ ຄວາມໂສກເສົ້າເປັນສິ່ງທີ່ດີ, ແຕ່ໂປໂລໄດ້ກ່າວເຖິງ “ຄວາມທຸກໃຈຕາມຢ່າງຊອບພຣະໄທພຣະເຈົ້າ” (2 ໂກຣິນໂທ 7:10) ວ່າເປັນພາກສ່ວນໜຶ່ງທີ່ສຳຄັນຂອງການກັບໃຈ. ໃຫ້ພິຈາລະນາສິ່ງທີ່ທ່ານຮຽນຮູ້ກ່ຽວກັບຄວາມທຸກໃຈຕາມຢ່າງຊອບພຣະໄທພຣະເຈົ້າຈາກດັ່ງຕໍ່ໄປນີ້: 2 ໂກຣິນໂທ 7:8–11; ແອວມາ 36:16–21; ມໍມອນ 2:11–15; ແລະ ຂ່າວສານຂອງຊິດສະເຕີ ມິແຊວ ດີ ຄະເຣກ “Divine Discontent” (Liahona, Nov. 2018, 52–55). ເມື່ອໃດທີ່ທ່ານເຄີຍຮູ້ສຶກເຖິງຄວາມທຸກໃຈຕາມຢ່າງຊອບພຣະໄທພຣະເຈົ້າ, ແລະ ມັນມີຜົນກະທົບຕໍ່ຊີວິດຂອງທ່ານແນວໃດ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

2 ໂກຣິນໂທ 3:1–3.ສະມາຊິກໃນຄອບຄົວຂອງທ່ານເຄີຍຂໍໃຫ້ບາງຄົນຂຽນຈົດໝາຍແນະນຳເຂົາເຈົ້າບໍ່, ດັ່ງເຊັ່ນສຳລັບການງານ ຫລື ສຳລັບໃບສະໝັກເຂົ້າໂຮງຮຽນ? ຂໍໃຫ້ເຂົາເຈົ້າເວົ້າລົມກັນກ່ຽວກັບປະສົບການນີ້. ໂປໂລໄດ້ສິດສອນວ່າ ຊີວິດຂອງໄພ່ພົນກໍຄືກັນກັບຈົດໝາຍແນະນຳສຳລັບພຣະກິດຕິຄຸນຂອງພຣະເຢຊູຄຣິດ, “ຊຶ່ງບໍ່ໄດ້ຂຽນດ້ວຍນ້ຳມຶກ, ແຕ່ຂຽນດ້ວຍພຣະວິນຍານຂອງພຣະເຈົ້າທີ່ຊົງ [ພຣະຊົນ].” ຂະນະທີ່ທ່ານອ່ານ 2 ໂກຣິນໂທ 3:1–3 ນຳກັນ, ໃຫ້ສົນທະນາວິທີທີ່ຕົວຢ່າງຂອງເຮົາເປັນຄືກັນກັບຈົດໝາຍ ທີ່ສາມາດ “ໃຫ້ທຸກຄົນໄດ້ຮູ້ ແລະ ໄດ້ອ່ານ,” ສະແດງຄວາມຈິງ ແລະ ຄຸນຄ່າຂອງພຣະກິດຕິຄຸນແນວໃດ. ບາງທີສະມາຊິກໃນຄອບຄົວແຕ່ລະຄົນສາມາດຂຽນຈົດໝາຍ ຫລື “ສານ” ອະທິບາຍວ່າ ສະມາຊິກໃນຄອບຄົວອີກຄົນໜຶ່ງໄດ້ເປັນຕົວຢ່າງທີ່ດີຂອງການເປັນສານຸສິດຂອງພຣະເຢຊູຄຣິດແນວໃດ. ເຂົາເຈົ້າສາມາດອ່ານຈົດໝາຍຂອງເຂົາເຈົ້າໃຫ້ຄອບຄົວຟັງ ແລະ ມອບມັນໃຫ້ແກ່ສະມາຊິກໃນຄອບຄົວທີ່ເຂົາເຈົ້າຂຽນກ່ຽວກັບ. ເປັນຫຍັງມັນຈຶ່ງສຳຄັນທີ່ຈະເຂົ້າໃຈວ່າຊີວິດຂອງເຮົາເປັນຄືກັນກັບ “ສານຂອງພຣະຄຣິດ”?

2 ໂກຣິນໂທ 5:6–7.ການ “ດຳເນີນຊີວິດຕາມ [ສັດທາ], ບໍ່ແມ່ນຕາມທີ່ຕາເຫັນ” ໝາຍຄວາມວ່າແນວໃດ? ເຮົາຈະເຮັດແນວໃດເພື່ອສະແດງວ່າ ເຮົາເຊື່ອໃນພຣະຜູ້ຊ່ວຍໃຫ້ລອດ ເຖິງແມ່ນວ່າເຮົາບໍ່ສາມາດເຫັນພຣະອົງກໍຕາມ?

2 ໂກຣິນໂທ 5:17.ຄອບຄົວຂອງທ່ານສາມາດຄິດ ແລະ ຊອກຫາຕົວຢ່າງໃນສິ່ງທຳມະຊາດທີ່ປ່ຽນແປງແບບອັດສະຈັນ ແລະ ກາຍເປັນສິ່ງມີຊີວິດໃໝ່ບໍ່? (ເບິ່ງຮູບພາບຢູ່ໃນທ້າຍໂຄງຮ່າງນີ້). ພຣະກິດຕິຄຸນຂອງພຣະເຢຊູຄຣິດປ່ຽນແປງເຮົາແນວໃດ?

2 ໂກຣິນໂທ 6:1–10.ອີງຕາມ 2 ໂກຣິນໂທ 6:1–10, ການ “ເປັນຜູ້ຮັບໃຊ້ຂອງພຣະເຈົ້າ” ໝາຍຄວາມວ່າແນວໃດ? (ຂໍ້ທີ 4). ຄຸນສົມບັດຢ່າງໃດແດ່ທີ່ຜູ້ປະຕິບັດສາດສະໜາກິດຂອງພຣະເຈົ້າມີ?

2 ໂກຣິນໂທ 6:14–18.ເຮົາຈະເຮັດຕາມຄຳແນະນຳຂອງໂປໂລວ່າ “ຈົ່ງແຍກຕົວອອກຈາກ [ຄົນບໍ່ຊອບທຳ], ແລະ ຈົ່ງຕັ້ງຢູ່ຕ່າງຫາກ” ຂະນະທີ່ຍັງຮັກຄົນທີ່ຢູ່ອ້ອມຂ້າງເຮົາແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.

ການປັບປຸງການສິດສອນຂອງເຮົາ

ແບ່ງປັນບົດຮຽນທີ່ໃຊ້ສິ່ງຂອງ. ແນວຄິດບາງຢ່າງຂອງພຣະກິດຕິຄຸນ, ດັ່ງເຊັ່ນການຊົດໃຊ້, ອາດເປັນສິ່ງຍາກທີ່ຈະເຂົ້າໃຈ. ໃຫ້ຄິດທີ່ຈະໃຊ້ຮູບພາບ ຫລື ສິ່ງຂອງທີ່ສາມາດຊ່ວຍຄອບຄົວຂອງທ່ານໃຫ້ເຂົ້າໃຈຫລັກທຳ ທີ່ທ່ານຄົ້ນພົບໃນຂໍ້ພຣະຄຳພີ.