Sa rairai na Karisito vei Paula ena valeniveivesu

A sikovi Paula e vale ni veivesu na iVakabula sa tucaketale (raica na Cakacaka 23:11). Sa rawa ni sereki keda o Jisu Karisito mai na “ivua mo dou bobula kina” (Kalatia 5:1).

25 ni Sepiteba–1 ni Okotova

Kalatia

“Dou Lako Voli ena Yalo Tabu”

Ni o wilika na Kalatia, vola na veivakauqeti vakayalo o ciqoma. Ni ko vakayacora oqo ena rawa ni vukei iko ena nomu nanuma ka vakasamataka vakatitobu ena veisiga ni mataka.

Vola na Veika o Vakauqeti Kina

Na kosipeli i Jisu Karisito e rawa ni veisereki mai na veivakabobulataki vakayalo. Ia ena so na gauna o ira era sa vakila oti na veisereki ni kosipeli era vuki tani mai kina ka “dou sa vinakata mo dou qarava tale” (Kalatia 4:9). Oqo eso na veika era a cakava tiko eso na Yalosavasava mai Kalatia—era vuki tani tiko mai na galala e solia vei ira o Karisito (raica na Kalatia 1:6). Na iVola i Paula vei ira na kai Kalatia, oya, sai koya na kaci bibi me lesu mai ki na “ka mo dou qai tudei ena lalaga sa vakalalagataki keda kina na Karisito” (Kalatia 5:1). Oqo e dua na kaci eda gadreva meda rogoca ka vakatudaliga kina, e dina ga ni na rawa ni veisau na draki ni bula, na veidre ni tu galala kei na vesuki ena tu ga. Me vaka e vakatavulica o Paula, e sega ni rauta “ni dou sa kacivi na veiwekani mo dou lalaga” (Kalatia 5:13); e dodonu talega meda “tudei tu” kina (Kalatia 5:1) ni da vakararavi vei Karisito.

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Kalatia 1–5

Na lawa i Karisito e vagalalataki au.

E volavola o Paula vei ira na Yalosavasava e Kalatia ena gauna e sa kila kina ni ra sa vakasesei ena ivakavuvuli lasu (raica na Kalatia 1:6–9). E dua vei ira na ivakavuvuli oqo kevaka era vinakati me ra vakabulai na kai Matanitu tani era sa ciqoma na kosipeli e dodonu me ra cilivi ka vakamuria na itovo tale eso ni lawa i Mosese (raica na Kalatia 2). E vakatoka o Paula na ivakarau oqo me “ivua mo dou bobula kina” (Kalatia 5:1). Ni o wilika na ivakasala nei Paula vei ira na kai Kalatia, vakaraica na ivakavuvuli e rawa ni vukei iko mo kila na cava na galala dina. Ena rawa talega ni o vakasamataka vakatitobu na ivakarau lasu se ivua ni bobula cava e rairai tiko ena nomu bula. E tiko beka e dua na ka e tarovi iko tiko mai na nomu vakila na galala e solia tu na kosipeli? Esa “vagalalataki [iko]” vaka cava o Karisito kei na Nona kosipeli? (Kalatia 5:1).

Raica talega na 2 Nifai 2:27; 9:10–12.

Kalatia 3

Au rawa ni taukena talega na veivakalougatataki a yalataki vei Eparaama.

Eso vei ira na Yalosavasava mai Kalatia era leqataka baleta ni ra sega ni kawa dina (“vakadra”) mai vei Eparama, era na sega ni ciqoma na veivakalougatataki e yalataki vei Eparama, ka oka kina na bula vakacerecerei. Ena Kalatia 3:7–9, 13–14, 27–29, na cava me tiko vua e dua me rawa ni vakatokai me “kawa i Eparama”?

Me vulici na veivakalougatataki e yalataki vei Eparaama kei na veivakalougatataki e rawa ni da taukena me nona kawa, raica na iDusidusi ki na iVolanikalou, “Veiyalayalati Vaka-Eparama,” topics.ChurchofJesusChrist.org. Na cava na vuna e bibi kina vei iko na veivakalougatataki a yalataki vei Eparaama?

Kalatia 3:6–25

A tiko vei Eparama na kosipeli i Jisu Karisito.

E vakamacalataka na Parofita o Josefa Simici ni: “E sega ni rawa ni da vakabauta, ni o ira na qase ni gauna e liu era a lecava tu na veiwalewale vakalomalagi me vaka era nanuma e vuqa, me vaka ni o ira kece na vakabulai, era a vakabulai ena kaukauwa ni tuvatuva cecere oqo ni veivakabulai, ni bera nona tadu na Karisito ka vaka kina mai na gauna a tadu mai kina. … A vakacabo isoro o Eparaama, ka sega ni vakuwai oqo, a vunautaki vua na Kosipeli” (“O ira na iTalatala Qase ni Lotu mai Katiladi vei ira na Wekadra ena Veivanua Tani,” Na Yakavi kei na Kalokalo ni Mataka, Maj. 1834, 143, JosephSmithPapers.org). Na cava na vuna o nanuma kina ni sa rui bibi vei ira na Yalododonu ena gauna nei Paula me ra kila ni o Eparaama kei ira na parofita ni gauna e liu a tu vei ira na kosipeli i Jisu Karisito? Na cava e bibi kina vei iko mo kila na ka oqo? (Raica na Ilamani 8:13–20; Mosese 5:58–59; 6:50–66.)

Raica talega na Nodra iVakavuvuli na Peresitedi ni Lotu: Josefa Simici (2007), 45–56.

Kalatia 5:13–26; 6:7–10

Kevaka meu “lako voli ena Yalotabu,” au na ciqoma na “vua ni Yalotabu.”

Na vulici ni veitikina oqo ena rawa ni vukei iko mo vakadikeva na ivakatagede ni nomu lako vakataucoko voli ena Yalotabu. O sa vakila tiko beka na vua ni Yalotabu e tukuni tiko ena tikina e 22–23? Na cava tale eso na vuana, se macala, ni bula vakayalo o sa bau raica? Vakasamataka vakatitobu na veika e gadrevi mo cakava me rawa ni teivaki vakavinaka na vuana oqo. Ena rawa ni vakavinakataka vakacava na veiwekani bibi eso ena nomu bula na kena teivaki na vuana oqo.

eso na apolo ena vuna

E dodonu meu vakasaqara na “vua ni Yalo Tabu” ena noqu bula.

Kevaka o saga tiko mo lako ena Yalo Tabu ia na nomu sasaga e sega ni vaka mo vuanikau yalataki, wilika na Kalatia 6:7–10. Na itukutuku cava o vakila e vinakata na Turaga me nomu ena veitikina oqo?

Raica talega na Alama 32:28, 41–43; Vunau kei na Veiyalayalati 64:32–34.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Kalatia 3:11.Cava na ibalebale ni “bula ena vakabauta”? Eda sa bula tiko vakacava vakavuvale ena vakabauta?

Kalatia 4:1–7.Ena rawa ni o vakamacalataka taumada na Kalatia 4 ena kena veivosakitaki na kedrau duidui na nona italai e dua na tui kei ira na luvena. Na madigi se na veika cava e tiko vua e dua na luve ni Tui e sega vua e dua na italai? Vakasamataka na veika oqo ni dou wilika vata tikina e 1–7. Na cava era vakatavulica na veitikina oqo me baleta na noda veiwekani kei na Tamada Vakalomalagi?

Kalatia 5:16–26.Sa rawa me veivosakitaki na kedrau duidui na “cakacaka ni tovo yago” kei na “vua ni Yalo Tabu.” Me rawa ni marautaki na veivosaki, sa rawa ki na nomu vuvale me vakayacana na veimataqali vuata ena vosa e vakayagataka o Paula me vakamacalataka na vua ni Yalo Tabu. Me qai digitaka na lewe yadua ni matavuvale edua, vakamacalataka na kena ibalebale, ka qai veitalanoataka e dua e ivakaraitaki ni vuata oqo. Ena rawa oqo me veivosakitaki kina na veisala eso e rawa ni sureta kina na Yalo Tabu na nomu matavuvale ki na nomudou itikotiko ka teivaka na vuata oqo. Ni oti na veivosaki, e rawa ni dou marautaka vata e dua na kakana vuata.

Kalatia 6:1–2.Ena tiko na gauna e rawa ni dua ena nomu vuvale ena “vakidacalataki e dua me ivalavala ca.” Na ivakasala cava o kunea ena Kalatia 6:1–2 me baleta na veika me caka ena gauna vakaoqo?

Kalatia 6:7–10.Kevaka esa teivaka vata na nomu vuvale e dua na ka, e rawa ni o vakayagataka na veika e yaco ena gauna oya mo vakaraitaka kina na ivakavuvuli ni “ka ga e kaburaka na tamata, ena tamusuka talega ko koya” (tikina e 7). Se e rawa ni o tarogi ira nomu lewe ni vuvale me baleta na nodra vuata se kakana draudrau taleitaki ka veitalanoataka na veika me vakayacori me rawa ni tei kina e dua na itei me rawa mai kina na kakana. (Raica na iyaloyalo ena mua ni ituvatuva oqo.) E rawa ni dou qai veitalanoataka vakavuvale na veivakalougatataki o dou nuitaka mo dou ciqoma me baleta na “tamusuki” ni veivakalougatataki vakaoqori.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Tuberi Au E Nona Loloma,” iVolanisere ni Gonelalai, 70.

Vakatorocaketaki Noda Veivakavulici

Vukei ira na nomu vuvale me ra vakatauvatana na ivolanikalou vei ira. E kaya ko Nifai, “Au sa vakatautauvatataka vei keimami na ivolanikalou, me rawa ni yaga vei keimami ka me keimami vuli kina” (1 Nifai 19:23). Me vukea nomu vuvale ena kena vakayacori oqo, e rawa ni o sureti ira me ra vakasamataka vakatitobu na veigauna era sa vakila kina na vua ni Yalo Tabu me vaka e vakamacalataki ena Kalatia 5:22–23. (Raica na Veivakavulici ena iVakarau ni iVakabula, 21.)

eso na pea ena vuna

E vakatavulica o Paula ni gauna eda lako voli kina ena Yalo Tabu, eda na sotava na “vua ni Yalo Tabu” ena noda bula.