9–15 ni Okotova

Filipai; Kolosa

“Au sa Rawata na ka Kecega ena Vuku i Karisito o Koya sa Vakaukauwataki Au”

Na cava nai otioti ni gauna o wilika kina na veivakasama titobu vakayalo o vola tu ena nomu vulica tiko na Veiyalayalati Vou? Ena rawa ni veivuke mo taleva lesu eso na veivakauqeti o sa ciqoma tiko.

Vola na Veika o Vakauqeti Kina

E vola o Paula na nona ivola vei ira na kai Filipai kei ira na kai Kolosa ni a tiko e vale ni veivesu mai Roma. Ia, na ivola eso oqo e sega ni tautau ni vola nei dua e tu e vale ni veivesu. E tukuna vakalevu o Paula me baleta na reki, kei na vakavinavinaka ka segai na dredre kei na veivakatovolei: “sa vunautaki na Karisito,” e kaya o koya, “ia na ka oqo kau sa rekitaka, io, kau na rekitaka tiko ga” (Filipai 1:18). Ka “ dina ga ka’u sa tiko tani vakayago, ia ka’u sa tiko vakayalo ga vei kemudou, ka reki ka raici kemudou … ni dou sa dua vata ka tu dei e na vakabauti Karisito” (Kolosa 2:5). E dina sara, “na vakacegu ni Kalou” e vakila o Paula ena gauna dredre e sotava “e uasivia na ka kecega e kilai rawa” (Filipai 4:7), ia e vakilai vakai dina sara. Ena gauna ni noda vakatovolei, eda rawa ni vakila na vakacegu vata oqo ka meda “reki tiko ga vua na Turaga” (Filipai 4:4). Ena rawa me da, me vaka e cakava o Paula, vakararavi vakatabakidua vei Jisu Karisito, “ko koya eda sa rawata kina na bula” (Kolosa 1:14). Ena rawa ni da kaya, me vakataki Paula, “Au sa rawata na ka kecega ena vuku i Karisito o koya sa vakaukauwataki au” (Filipai 4:13; raica talega na Kolosa 1:11).

Vakasama Eso ni Vuli iVolanikalou ni Tamata Yadua

Filipai 2:5–11; Kolosa 1:12–23

E yavutaki tu noqu vakabauta vei Jisu Karisito.

E kaya o Peresitedi Russell M. Nelson ni gauna e vakanamata kina na nona vulica na ivolanikalou ena veitikina me baleti Jisu Karisito, e sa tarai koya sara ga na veika e vakila ni vaka me sa “duatani na tamata!” (“Vagoleya Mai na Mana nei Jisu Karisito ki na Noda Bula,” Liaona, Me 2017, 39). Sa rawa mo muria na nona ivakaraitaki ni o wilika na Filipai kei na Kolosa (raica vakabibi na Filipai 2:5–11; Kolosa 1:12–23). Na cava o sa vulica baleta na Turaga? Ena vukei iko vakacava na dina oqo mo yaco mo “duatani na tagane” se marama?

Filipai 2:12–13

Eda “cakacakataka beka na [noda] vakabulai”?

Eso na tamata era vakayagataka na malanivosa “dou cakacakataka ga na nomudou vakabulai” (Filipai 2:12) me tokona na vakasama nida vakabulai ga ena noda sasaga ga vakaikeda. Eso tale era vakayagataka na ivakavuvuli nei Paula “dou sa vakabulai ena loloma soli wale ena vuku ni vakabauta” (Efeso 2:8) me vakadeitaka ni sega ni gadrevi me cakacakataki na veivakabulai. Ia, na ivolanikalou, oka kina na veivola nei Paula, e vakavulici vakamatata kina ni gadrevi ruarua na loloma soliwale nei Jisu Karisito kei na sasaga yadua me rawa ni ciqomi na veivakabulai. Vakakina ena noda sasaga vinaka duadua meda cakacakataka noda vakabulai, “ni sai koya na Kalou sa cakacaka ena lomamudou” (Filipai 2:13; raica talega na Filipai 1:6; 2 Nifai 25:23; iDusidusi ki na iVolanikalou, “Loloma Soliwale”).

Filipai 3:4–14

Na kosipeli i Jisu Karisito sa kilikili kaya na solibula cava ga ena gadrevi.

E levu na ka e biuta laivi o Paula ena gauna sa saumaki mai kina ki na kosipeli i Jisu Karisito, oka kina na itutu vakairogorogo ena kedra maliwa na Jiu oya na itutu vaka Farisi. Ena Filipai 3:4–14, raica na veika e rawata o Paula baleta ni a lomasoli me solibula ena vuku ni kosipeli. Na cava e vakila o koya baleta na nona solibula?

Vakasamataka mada na nomu bula vakatisaipeli. Na cava o sa solibulataka me baleta na kosipeli i Jisu Karisito? Na cava o sa ciqoma? Eso tale tiko beka na solibula o nanuma e dodonu mo cakava mo rawa ni o tisaipeli yalodina cake kina ni iVakabula?

Raica talega na 3 Nifai 9:19–20; Vunau kei na Veiyalayalati 58:2–5; Taylor G. Godoy, “E Dua Tale na Siga,” Liaona, Me 2018, 34–36.

Filipai 4:1–13

E rawa niu kunea na reki vei Karisito, veitalia ga na ituvaki ni bula au tu kina.

Na bula i Paula e ivakaraitaki matata ni dina e vakamacalataka o Peresitedi Russell M. Nelson: “Ni sa vakanamata tu noda bula vei … Jisu Karisito kei na Nona kosipeli, ena rawa ni da vakila na reki veitalia ga na veika e yaco tiko—se sega ni yaco tiko—ena noda bula. Sa vu mai Vua ka yaco mai na reki baleti Koya” (“Reki kei na Bula Vakayalo,” Liaona, Nove. 2016, 82).

Ni o wilika na Filipai—vakabibi na wase e 4—vakasaqara na itukutuku ena rawa ni vukei iko mo kunea na reki ena veituvaki cava ga ena nomu bula. Ena gauna cava o sa bau vakila kina na “vakacegu ni Kalou” ena dua na gauna veibolei? (tikina e 7). Ena gauna cava o sa bau kunea kina na kaukauwa “ena vukui Karisito” mo vakayacora na veika dredre? (tikina e 13). Na cava na vuna o nanuma kina ni sa ka bibi meda “vakacegu tiko” ena veituvaki ni bula kece sara? (tikina e 11). Ena rawa vakacava ni vukei iko na vakatovotovotaki ni itovonibula ena tikina e 8 ena nomu ituvaki ni bula?

Raica na Alama 33:23; Dieter F. Uchtdorf, “Vakavinavinaka ena iTuvaki Kecega,” Liaona, Me 2014, 70–77.

Kolosa 3:1-17

Era “vakavoui” na tisaipeli i Jisu Karisito ni ra bulataka Nona kosipeli.

O na kila vakacava ni sa vukei iko tiko o Jisu Karisito mo “tagane [se yalewa] vou”? E dua na sala mo vakasamataka vakatitobu oqo o ya mo vakasaqaqara ena Kolosa 3:1–17 ka qai vola na lisi ni ivakarau, itovonibula, kei na ivalavala ni “tamata makawa” kei na dua tale na lisi ni ivakarau, itovonibula, kei na ivalavala ni “tamata vou.”

Vola na nomu nanuma me baleta na sala sa veisautaki iko tiko kina na iVakabula, mo rawa ni o taleva lesu ena veisiga ni mataka ka qai vakasamataka vakatitobu na nomu sa veisau tiko.

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Filipai.Ena raica beka nomu vuvale ni cavuti vakawasoma na vosa na reki se rekitaki ena Filipai. Ena veigauna o raica kina e dua veirau na vosa oqo, ena rawa ni o cegu mada me veitalanoataki na veika e vakatavulica tiko o Paula me baleta na kunei ni reki.

Filipai 2:14–16.E rawa vakacava me da sa “veicina e vuravura”?

Filipai 4:8.Ena rawa ni raica na nomu vuvale eso na ka me ra “vakasamataka” ka veirauti kei na ivakamacala ena tikina oqo (raica talega na Yavu ni Vakabauta 1:13). Ena rawa vakacava ni vakalougatataki nomu vuvale ena kena vakamuri nai vakasala i Paula?

Kolosa 1:23; 2:7.Ena rawa beka ni wilika nomu vuvale na veitikina oqo ni ra dabe wavolita e dua na vunikau se sarava tiko e dua na iyaloyalo ni vunikau (me vaka na kena e salavata tiko yani kei na idusidusi oqo). Na cava na kena ibalebale meda “vakataudeitaki” ka “vakaukauwataki” vei Karisito? Ena rawa ni da veivukei vakacava meda vakaukauwataka na wakada vakayalo?

Kolosa 2:2–3.Ena rawa ni marautaka na nomu vuvale na vakatawana e dua na “kato ni iyau” ena veika e matataka na “iyau” kei na “iyau ni vuku kei na yalomatua” o kunea ena kosipeli.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Marau na Tui Sau!,” Serenilotu, naba. 35.

Vakatorocaketaki Noda Veivakavulici

Bulataka na nomu ivakadinadina. “Mo veivakavulici ga mai na nomu bula,” e vakavulica o Elder Neal A. Maxwell. “Ena nanumi vakalevu cake na nomu ivakarau … mai na dua na dina vakatabakidua ena dua na lesoni vakatabakidua” (ena Veivakavulici ena iVakarau ni iVakabula, 13).

E vakatavulica o Paula ni noda vakabauta e dodonu me “vakataudeitaki” vei Jisu Karisito (Kolosa 2:7).