2–8 ni Okotova

Efeso

“Me ra Vakavinakataki Kina na Yalododonu”

O raica beka e dua na isema mai na itukutuku ni koniferedi raraba kei na iVola i Paula vei ira na kai Efeso?

Vola na Veika o Vakauqeti Kina

Ena gauna e tekivu tete kina na kosipeli mai Efeso, “sa tubu vakalevu na ue” (Cakacaka 19:23) ena kedra maliwa na kai Efeso. O ira na tamata cakacaka ka dau masuta na kalou tani era raica ni lotu Vakarisito ena rawa ni vakatanitaka na nodra ivurevure ni bula, ka totolo ni “sa ka tani sara na nodra cudru, … a sa ka levu na ue ena koro taucoko” (raica na Cakacaka 19:27–29). Raitayalotaka mada ni o dua se qai saumaki vou ki na kosipeli ena ituvaki vakaoqori. E vuqa na kai Efeso era a ciqoma ka bulataka na kosipeli ena gauna ni “ue” oqo (Cakacaka 19:40), ka qai vakadeitaka o Paula vei ira ni “sai Karisito … na vu ni noda veivinakati tale” (Efeso 2:13–14). Na veivosa oqo, ni sala vata kei na nona veisureti me “biu tani kece vei kemudou na yaloca, kei na cudrucudru, kei na daunene, kei na veiba, kei na vosavakacaca, kei na ca kecega sa vakakina” (Efeso 4:31), e sa veidonui ka veivakacegui ena gauna oqo me vaka na gauna e liu. Vei ira na kai Efeso, ka vakakina vei keda yadua, na kaukauwa me vorati kina na dredre e yaco mai ni “dou kaukauwa tiko ena Turaga, kei na kena levu ni nona kaukauwa” (raica na Efeso 6:10–13).

Vakasama Eso ni Vuli iVolanikalou ni Tamata Yadua

Efeso 1:4–11, 17–19

E digitaka, se sa lesia oti na Kalou, meu mai vakataucokotaka na itavi eso e vuravura.

E tukuni ira na Yalosavasava o Paula era sa “lesi e liu” mai vua na Kalou ka “digitaki … sa qai tauyavutaki emuri ko vuravura” ka meda Nona tamata. Ia, me vaka a kaya o Peresitedi Henry B. Eyring, ni oqo e sega ni kena ibalebale “ni sa navuca taumada na Kalou o cei soti na Luvena ena vakabula o Koya ka vakarautaka vei ira na kosipeli, kei ira era a sega ni rogoca na kosipeli era a sega ga ni ‘digitaki.’ … Ia na ituvatuva ni Kalou e sa dau loloma ka dodonu vakalevu sara mai na kena oya. Sa vakarau tu na Tamada Vakalomalagi me vakasokomuna ka vakalougatataka taucoko na Nona matavuvale” (Vakasoqoni Vata na Matavuvale ni Kalou,” Liaona, Me 2017, 20–21). O ira kece na luve ni Kalou era rawa ni ciqoma na kosipeli kei na kena cakacaka vakalotu me baleta na cakacaka vei ira na mate ena valetabu vakalou.

E dina ga ni sega ni dua e sa lesi oti tu me vakabulai se segai, na ivakatakila ni gauna oqo e vakatavulica ni so era sa “lesi taumada” ena bula taumada me cakava eso na itavi bibi me vakayacori rawa na inaki ni Kalou ena vuravura oqo. Ni o wilika na Efeso 1 vakasamataka vakatitobu na kena vakayagataki vakacava vei iko na dina oqo.

Efeso 1:10

Na Kalou ena “soqona vata na ka kecega vei Karisito.”

Cava na vuna o nanuma e vakatokai kina na noda siga nikua me “itabagauna ni taucoko ni gauna”? Na cava beka na ibalebale me “soqona vata na ka kecega vei Karisito”? Ni o vakasamataka vakatitobu na veitikina oqo, wilika na ivolanikalou oqo: Efeso 4:13; 2 Nifai 30:7–8; Vunau kei na Veiyalayalati 110:11–16; 112:30–32; 128:18–21. Ena rawa ni o vakauqeti mo vola ga na nomu ivakamacala baleta na veimalanivosa oqo.

Elder David A. Bednar, “Soqona Vata na Ka Kecega me Duabau vei Karisito,” Liaona, Nove. 2018, 21–24.

Efeso 2:19–22; 3:1–7; 4:11–16

E tauyavutaki tu na Lotu ena iapositolo kei na parofita, ka sa ivatuvakadei o Jisu Karisito.

Me vaka e tukuni ena Efeso 2:19–22; 3:1–7; 4:11–16, cava na vuna mera tiko kina na parofita kei na iapositolo? Vakasamataka mada na nodra itukutuku na parofita kei na iapositolo o rogoca ena koniferedi raraba. E vakataucokotaka vakacava na nodra ivakavuvuli na inaki e vakamacalataka o Paula? Me vakataka, era sa vukei iko vakacava na nodra ivakavuvuli mo kakua ni “veitosoyaki ena cagi kecega ni vakavuvuli”?

E tautauvata vakacava kei na ivatuvakadei ni Lotu o Jisu Karisito? E tautauvata vakacava o Koya kei na dua na ivatuvakadei ena nomu bula?

Raica talega na Cakacaka 4:10–12.

Sa ivatuvakadei ni Lotu o Jisu Karisito.

Efeso 5:21–6:4

Na muria na ivakaraitaki ni iVakabula ena vaqaqacotaka na noqu veiwekani vakamatavuvale.

Ni o wilika na Efeso 5:21–6:4, vakasamataka na sala e rawa ni vaqaqacotaka kina na nomu veimaliwai vakamatavuvale na ivakasala ena veitikina oqo.

E bibi me kilai ni vosa nei Paula ena Efeso 5:22-24 era volai tu me baleta na veituvaki ni bula kei na itovo ni nona gauna. Era vakatavulica nikua na parofita kei na iapositolo ni sega ni cecere na turaga vua na marama ka rau dodonu me “veivuke vakatautauvata” (raica “Na Matavuvale: Ai Vakaro ki Vuravura Raraba,” ChurchofJesusChrist.org). Sa vakakina, e rawa ni o kunea na ivakasala e veiganiti ena Efeso 5:25–33. Me ivakaraitaki, e vakaraitaka vakacava o Karisito na Nona loloma vei ira na Yalododonu? Na cava e kena ibalebale oqo me baleta na sala e dodonu kina vei ira na veiwatini, ni ra sa dau veivuke vakatautauvata, mera veiqaravi kina vakai ira? Na lesoni cava so o kunea e baleti iko ena tikina oqo?

Efeso 6:10–18

Na iyaragi ni Kalou ena taqomaki keda mai na veika butobuto.

Ni o wilika na Efeso 6:10–18, vakasamataka na cava na vuna e vakayacana kina vakaoya o Paula na veitiki yadua ni iyaragi ena sala oya. Na cava ena taqomaki keda mai kina na “iyaragi ni Kalou”? Na cava o rawa ni cakava mo tokara vakataucoko kina na veitikina yadua ena veisiga?

Raica talega na 2 Nifai 1:23; Vunau kei na Veiyalayalati 27:15–18.

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Efeso 1:10.Me vakavulici na tikina oqo, a vakayagataka o Elder David A. Bednar na ivakaraitaki ni dua na dali (raica na “Soqona Vata na Ka Kecega vei Karisito”). Vakasamataka mo vakaraitaka vei ira na lewe ni matavuvale e dua na dali ka vakatara me ra taura ka vakadikeva ni o wasea eso na tiki ni itukutuku nei Elder Bednar. E vakasoqona vata vakacava tiko na Kalou na ka kecega vei Karisito? Eda sa vakalougatataki vakacava ena vuku ni vakasoqoni oqo?

Efeso 2:4-10; 3:14–21.Sureti ira na lewe ni vuvale me ra wasea na veika era sotava ka ra sa vakila kina na loloma kei na loloma veivueti ni Kalou kei Jisu Karisito me vaka e vakamacalataki ena veitikina oqori.

Efeso 2:12–19.Ena marautaka beka na nomu vuvale me ratou binia cake na lokoloko me lalaga se iyaya tale so e vale ka qai talaraki ira sobu. Ena gauna e tukuna tiko kina o Paula na “bai” vei ira na kai Matanitu Tani kei ira na Jiu, na mataqali bai cava era duidui kina na tamata nikua? Sa “basuraka sobu” vakacava o Jisu Karisito na bai oqo? E “vakaveivinakati [keda] vakacava ko Koya vua na Kalou”? (tikina e 16).

Efeso 6:10–18.E rawa ni cakava nomu vuvale na “iyaragi ni Kalou” ena iyaya ga e tiko e vale. Na vidio “Na iYaragi ni Kalou” (ChurchofJesusChrist.org) e rawa ni vukei ira na lewe ni matavuvale me ra raitayaloyalotaka na iyaragi oqo, ka rawa ni ra kunea na ivakamacala rawarawa ena “Na iYaragi Taucoko ni Kalou” (iTokani, June 2016, 24–25). E taqomaki keda vakayalo vakacava na veitiki yadua ni yaragi oqo? Na cava eda rawa ni cakava meda veivukei meda tokara “na iyaragi ni Kalou” (Efeso 6:11) e veisiga?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Serenilotu vakaturi: “Nuinui nei Isireli,” Sere ni Lotu, naba 157.

Vakatorocaketaki ni Vuli ni Tamata Yadua

Me dusimaki iko na Yalo ena nomu vuli. Mo vakananuma tiko na Yalo ena Nona sa tuberi iko ena veika o gadreva mo vulica ena veisiga, kevaka sara madaga ena liutaki iko mo vulica e dua na iulutaga o a sega ni navuca taumada.

Na tokari ni iyaragi ni Kalou ena rawa ni taqomaki keda vakayalo.