era sara itaba na matavuvale

2–8 ni Okotova

Efeso

“Mera Vakavinakataki Kina ko Ira sa Lotu”

Ni o vulica na iVola vei ira na kai Efeso, vakasamataka na ivakavuvuli cava soti o rawa ni vakabibitaka mo vakalougatataki ira kina na gone o vakavulica. Vola na vakasama cava ga e votu mai ni o wilika tiko.

ivakatakilakila ni veiwasei

Sureta na Veiwasei

Sureti ira na gone me ra tucake ena dua na laini. Tekivu ena mata ni laini, solia vei ira yadua na gone e dua na madigi me wasea e dua na ka e se qai vulica wale toka ga me baleta na kosipeli ena gauna ni vuli ivolanikalou vakamatavuvale, ena Lalai, se dua tale na vanua.

ivakatakilakila ni veivakavulici

Vakavulica na iVunau: Gone Sobu

Efeso 2:19

O ira na lewe ni Lotu sa dodonu me ra veitokani ka “koro vata ga.”

Vakacava o ira na gone ena nomu kalasi era “vulagi” tiko beka se “koro vata ga” kei ira na kena vo kei ira na lewe ni tabanalevu? Vukei ira me ra kila ni dina ga ni tu na noda duidui, sa vukei keda na iVakabula me da duavata ka veilomani.

iTaviqaravi e Rawa ni Caka

• Biuta e dua na iyaloyalo ni iVakabula ena lomadonu ni rumu. Sureti ira na gone me ra tu ena veivanua duidui ena rumu me ra matataki ira na “vulagi” se “kai tani.” Vukei ira me ra kila ni veivosa oqo e kena ibalebale na tamata eda se bera ni kila. Ni o wilika na Efeso 2:19, sureti ira me ra torova yani na iyaloyalo kei Karisito me yacova ni ra sa tu veivolekati. Tukuna vei ira ni da sa toro voleka yani vua na iVakabula, sa rawa ni yaco me da duavata kei ira tale eso vakaveitokani se “koro vata ga.”

• Raica mai na kedra iyaloyalo na gone mai na veiyasai vuravura, ka vunitaka wavoki ena loma ni rumu. Biuta e dua na iyaloyalo ni iVakabula ena muana i liu ni rumu. Sureti ira na nomu kalasi me ra veisasa vaka na daukaulotu ka veivukevuke ena vaqarai ni kena iyaloyalo e dua na “vulagi” me biu volekata na iyaloyalo ni iVakabula. Vukei ira me ra vakila ni ra sa papitaiso na tamata, era sa yaco me tiki ni noda matavuvale vaka Lotu, se “lewe ni vale ni Kalou.” Eda rawa vakacava ni vukea e dua e se ka vou me vakataukeitaki?

Efeso 6:1–3

Na Tamada Vakalomalagi e vinakati au meu talairawarawa vei rau na noqu itubutubu.

Ni o wilika na Efeso 6:1–3, vakasamataka na sala eso o rawa ni vukei ira kina na gone me ra kila na vuna e sa rui bibi kina me ra talairawarawa vei ira nodra itubutubu.

iTaviqaravi e Rawa ni Caka

• Wilika na Efeso 6:1 vei ira ena kalasi, se vukea e dua vei ira na gone me wilika. Vukei ira me ra vakasamataka na gauna eso era a talairawarawa kina ki na nodra itubutubu. Kerei ira me ra wasea na sala era a vakalougatataki kina ni ra talairawarawa kei na veika era vakila ni ra talairawarawa. Na cava na vuna e bibi kina me da talairawarawa ki na noda itubutubu?

• Lagata vata e dua na sere baleta na talairawarawa, vaka na “Meu sa Totolo” (iVolanisere ni Gonelalai, 71). Me ra veivukevuke na gone ena vakatokayacataki ni dua na ka era kerea na nodra itubutubu me ra cakava, ka sureti ira me ra matanataka ni ra cakava na ka oqori.

• Vakaraitaka e dua na iyaloyalo kei Jisu Karisito ni papitaisotaki (raica na iVola ni iYaloyalo Vakosipeli, naba 35), ka wasea na sala a talairawarawa kina na iVakabula vua na Tamada Vakalomalagi ena nona papitaiso (raica na 2 Nifai 31:6–7). Wasea e dua na gauna o a talairawarawa kina vei rau na nomu itubutubu ka qai vakalougatataki. Na cava e vinakata kina na Tamada Vakalomalagi meda talairawarawa vei ira noda itubutubu?

Efeso 6:10–18

Na iyaragi ni Kalou sa rawa ni taqomaki au mai na veika ca.

O na vukei ira vakacava na gone me ra kila ni kena caka na veika dodonu e sa vaka na daramaki ni iyaragi?

iTaviqaravi e Rawa ni Caka

• Vakaraitaka na iyaloyalo ni dua na tamata e daramaka tu na iyaragi, me vaka na kena ena tabana ni itaviqaravi ni macawa oqo se ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Ni o vakalekalekataka na Efeso 6:10–18, vakaraitaka vei ira na gone na kena taqomaki na tikiniyago duidui mai na tiki ni iyaragi duidui. (Raica na “The Whole Armor of God,” iTokani, Jiune 2016, 24–25.)

• Kauta mai eso na iyaya ki na kalasi ka rawa ni matataka na veitiki ni iyaragi e tukuni ena Efeso 6:14–17 (me ivakaraitaki, e dua na isala se dua na eparoni), se cakava eso na tiki ni iyaragi rawarawa ena pepa. Me ra veivukevuke na gone ena daramaki ni “iyaragi.” Vukei ira me ra kila na ivakarau eda tokara kina na iyaragi ni Kalou (me vakataka, ena vulici ni ivolanikalou, qaravi ira na tani, masu, talairawarawa, kei na so tale). Veivosakitaka na sala e taqomaki keda kina mai na ca na vakayacori ni veika oqo.

ivakatakilakila ni veivakavulici

Vakavulica na iVunau: Gone Qase Cake

Efeso 2:13–19

Eda sa “koro vata ga” ena lewe ni vale ni Kalou.

Era sa vaqaqacotaki na gone ni ra vakaitokani vinaka ena kosipeli. O na vukei ira beka vakacava me ra tara cake na veitokani vinaka vakataki ira?

iTaviqaravi ni Lalai

Eda sa “koro vata ga” kei ira na Yalododonu ni Kalou.

iTaviqaravi e Rawa ni Caka

• Wilika vata na Efeso 2:19 ka veivosakitaka na kena ibalebale me dua e vulagi se kai tani. Wasea e dua na gauna o a vakila kina ni o vulagi se kai tani ka qai vukei iko e dua mo vakataukeitaki ka ciqomi. Sureti ira na gone me ra wasea na mataqali gauna vata vaqori. Na cava eda rawa ni cakava me da yaco me da “koro vata ga” ka sega ni vulagi? E tiko beka eso na gone ena nomu kalasi era sega ni dau lako wasoma mai, baleta beka ni vaka era vulagi? Vukei ira na gone me ra tuvatuvaka ni vukei ira na lewenilotu oya mera vakataukeitaki ka lomani.

• Me vukei ira na gone me vaqaqacotaki nodra veimaliwai vakai ira, vola eso na taro ena papa e uqeti ira me ra wasea e dua na ka baleti ira, me vaka Na gauna cava sa bau saumi kina e dua na nomu masu? se Na cava na ka taleitaki o dau via cakava vata kei na nomu matavuvale? Wasei ira na gone me ra veisasa, ka sureti ira me ra veitarotarogi ena taro. Na cava beka e daru dui vulica me baleti kedaru?

Efeso 6:1–3

Na Tamada Vakalomalagi e vinakati au meu talairawarawa ka rokova na noqu itubutubu.

Vakasamataka na sala eso mo vukei ira kina na gone me ra kila na vuna e sa bibi kina me ra talairawarawa vei ira nodra itubutubu.

iTaviqaravi e Rawa ni Caka

• Sureti ira na gone me ra wilika yadua na Efeso 6:1–3 ka vakatakila na malanivosa e duatani vei ira. Sureti ira me ra wasea na veimalanivosa oqo kei na vuna era nanuma ni ra sa bibi kina.

• Vukei ira na gone me ra vakaraica ka veivosakitaka na nodra ivakaraitaki na tamata ena ivolanikalou ka ra dau talairawarawa ka rokova na nodra itubutubu, me vaka na iVakabula (raica na Luke 2:42–52), Ruci (raica na Ruci 1), se Nifai (raica na 1 Nifa 3:1–8). Na cava na vuna e bibi kina me da talairawarawa ka rokova na noda itubutubu?

• Solia vei ira na gone yadua e dua na tikinipepa kei na vosa rokova ena tutuna e cake. Veivosakitaka na ibalebale ni vosa. Sureti ira na gone me ra vola se droinitaka ena nodra pepa e dua na ka era rawa ni cakava me ra vakaraitaka ni ra rokova na nodra itubutubu.

Efeso 6:10–18

Na iyaragi ni Kalou sa rawa ni taqomaki au mai na veika ca.

Ni o wilika na Efeso 6:10–18, vakasamataka eso na ka rerevaki vakayalo era dau sotava na gone kei na ivakarau o rawa ni veivuke kina me vaqaqacotaki ira me ra vorata.

iTaviqaravi e Rawa ni Caka

• Ni wilika tiko e dua na gone na Efeso 6:10–18, kerea e dua tale na gone me vola se droinitaka ena papa na veitiki ni iyaragi e tukuni tiko. Na cava na vuna e bibi kina na iyaragi ena dua na ivalu? Me da na tokara tiko vakacava e veisiga na iyaragi vakayalo?

• Lesi ira yadua na gone me ra droinitaka ka vakayacana e dua na tiki ni iyaragi e vakamacalataki ena Efeso 6:14–17. Ena taqomaki keda vakacava mai na ca na veitiki ni iyaragi oqo? Na cava e yalataka na Turaga vei ira era tokara na iyaragi ni Kalou? (see Efeso 6:13). Na cava na kena ibalebale mo “vorata rawa kina ena siga ca”?

ivakatakilakila ni vuli

Vakauqeta na Vuli e Vale

Sureti ira na gone me ra vakaraica toka ena macawa oqo e dua ena vaka me vulagi. Bolei ira me ra cakava e dua na ka me ra dolele yani kina vua na tamata oya.

Vakatorocaketaki ni Noda Veivakatavulici

Vukei ira na gone sobu me ra vuli mai na ivolanikalou. E rawa ni ra vuli mai na ivolanikalou na gone sobu, ia era na gadreva beka me ra vakanamata ki na dua ga na tikina se dua mada ga na malanivosa bibi. O na sureti ira beka na gone mera tucake ni ra rogoca e dua na vosa se malanivosa vakatabakidua. (Raica na Veivakavulici ena iVakarau ni iVakabula, 25–26.)

tabana ni itaviqaravi: na iyaragi ni Kalou sa rawa ni taqomaki au