23–29 ni Okotova

1 kei na 2 Timoci; Taito; Filimoni

“Mo Yaco mo Nodra iVakarau Era sa Vakabauta”

A vakatavulica o Paula ni “sa vakavuna na ivolatabu … me ia kina na vakatavuvuli ena ka e dodonu” (2 Timoci 3:16). Ni o vulica na ivola eso oqo, vakasamataka vakatitobu na sala era rawa ni vakauqeti ira kina na gone me ra bula dodonu.

Sureta na Veiwasei

Kerei ira na gone me ra veitalanoataka e dua na tamata e yaco me “nodra ivakarau era sa vakabauta” vei ira. Na cava era sa cakava tiko me ra ivakaraitaki vinaka kina vei ira na tani?

Vakavulica na iVunau: Gone Sobu

1 Timoci 3:1–2; Taito 1:7–9

O ira na bisopi era liutaka na tabanalevu vakaitalai ni Kalou.

A vakavulici rau o Timoci kei Taito o Paula me baleta na bibi ni bisopi. O na vakavulica vakacava vei ira na gone na ka e dau cakava na bisopi? (Na peresitedi ni tabana e sa vakatauvatani ki na dua na bisopi.)

iTaviqaravi e Rawa ni Caka

• Droinitaka e dua na iyaloyalo rawarawa ni nomu bisopi ena papa. Kerei ira na gone me ra cavuta mai eso na ka era kila me baleta na bisopi. E vakacava tu beka o koya? Na cava dau cakava o koya? E vakalougatataka vakacava o koya na tabanalevu? (E rawa ni o kunea eso na itovonibula vakabisopi ena 1 Timoci 3:1–2 kei na Taito 1:7–9.) Ni ra wasea na gone na nodra vakasama, vola ena veitiki ni pepa ka me ra biuta na gone ena papa ena yasa ni droini.

• Vola na itavi ni dua na bisopi ena tiki ni pepa eso—me vaka na nodra vukei na gonelalai kei na itabagone ena tabanalevu, ciqomi ni ikatini kei na isolisoli ni lolo, soli ni veikacivi, nodra vakatarogi na lewenilotu, kei na nodra vukei na vakaleqai tu. Biuta na veitiki ni pepa ena dua na bilo, ka sureta na gone yadua me digia e dua. Qai vukea na gone me matanataka vata kei iko na itavi eso oqo. Wasea na nomu ivakadinadina ni o nomu bisopi e sa kacivi mai vua na Kalou.

• Sureti ira na gone me ra droinitaka e dua na iyaloyalo ni bisopi ni qaravi ira tiko na lewe ni tabanalevu. Vakatura me ra solia vua nodra droini me ra vakavinavinakataki koya kina. Na cava eda rawa ni cakava meda vukei koya?

“Me kakua ni beci iko e dua ni ko sa cauravou; ia mo yaco mo nodra ivakarau era sa vakabauta” (1 Timoci 4:12).

1 Timoci 4:12

Au sa rawa ni yaco me “nodra ivakarau era sa vakabauta.”

Na cava o rawa ni cakava mo vakauqeti ira kina na gone mera “[nodra] ivakarau era sa vakabauta”?

iTaviqaravi e Rawa ni Caka

• Lagata vata kei ira na gone na “Cakava Sara” (iVolanisere ni Gonelalai, 146). Kerei ira na gone me ra muria nomu ivakaraitaki ena nodra cakava na ivukivuki o cakava. Me ra veivukevuke na gone ena nodra liutaka na vo ni kalasi me ra muria nodra ivukivuki. Wilika na 1 Timoci 4:12, ka tarogi ira na gone na cava era rawa ni cakava me ra ivakaraitaki vinaka kina vei ira na tani.

• Wasea e dua na gauna o a tovolea kina mo ivakaraitaki vinaka vua e dua se ni a ivakaraitaki vinaka vei iko e dua (e rawa ni ra okati kina na gone ena nomu kalasi). Sureti ira na gone me ra ivakaraitaki vinaka vei ira na lewe ni nodra matavuvale kei na itokani.

2 Timoci 3:14–17

Ena vukei au na ivolanikalou meu vulica na dina.

Kevaka o rawa ni vukei ira na gone me vulica me ra taleitaka na ivolanikalou, na kena ivakavuvuli ena vakalougatataka na nodra bula ena veitabayabaki muri mai.

iTaviqaravi e Rawa ni Caka

• Vakaraitaka e dua na ituvani ni ivolanikalou, ka vukei ira na gone me ra vakamatautaki ira kina ena nomu vakaraitaka vei ira na tabana ni ulutaga ni iVolatabu, na iVola i Momani, na Vunau kei na Veiyalayalati, kei na Mataniciva Talei. Sureta e dua na gone me taura tu na ivola eso oqo ni o wilika na 2 Timoci 3:15–17. Tukuna vei ira na gone na vuna o taleitaka kina na ivolanikalou, ka me ra qai vakaraitaka na gone na nodra nanuma.

• Kerei ira na gone me ra veivosakitaka na ka talei duadua era taukena. Era dau vakayagataka beka vakacava? Era dau qarava beka vakacava? Me ra veivukevuke ni taura tu na ivolanikalou ka cereka vakamalua na veitabana. Na cava eda dau vakayagataka kina na ivolanikalou? Na cava na vuna me da dau qarauni ira vakavinaka kina? Vakadinadinataka ni tu ena ivolanikalou na dina e vinakata na Tamada Vakalomalagi meda kila.

• Vukei ira na gone me ra bulia eso na matanimeke me sala vata kei na sere baleta na ivolanikalou, me vaka na “Vaqaqara ka Masu” (iVolanisere ni Gonelalai, 66).

Vakavulica na iVunau: Gone Qase Cake

1 Timoci 4:12

Au sa rawa ni yaco me “nodra ivakarau era sa vakabauta.”

A se gone sara o Timoci me dua na iliuliu ni Lotu, ia a vinakati koya o Paula me kila ni se rawa tikoga vua me dua na ivakaraitaki. E rawa ni o vakauqeti ira na gone me ra ivakaraitaki vinaka vei ira era tu wavoliti ira.

iTaviqaravi e Rawa ni Caka

• Wilika vata na 1 Timoci 4:12, ka kerei ira na gone me ra vaqara e ono na sala a tukuna o Paula ni rawa me ra “nodra ivakarau era sa vakabauta.” Wasei ira yarurua na gone, ka sureta na isa yadua me ra vakasamataka e dua na ituvaki era na rawa ni nodra ivakaraitaki kina o ira sa vakabauta. Sureti ira me ra matanataka na nodra ituvaki vei ira na vo ni kalasi.

• Tarogi ira na gone kevaka era vinakata me ra wasea e dua na gauna era a tovolea kina me ra ivakaraitaki vinaka vei ira na tani. Tukuna vei ira na ivakarau era sa ivakaraitaki ni vakabauta tiko kina vei iko kei na ivakarau o raici ira kina ni ra ivakaraitaki vinaka tiko vei ira na tani.

1 Timoci 6:7–12

Na veika tawamudu e yaga vakalevu cake mai na ilavo.

Na vuravura e vakaliuca vakalevu sara na ilavo kei na veika e rawa ni voli kina. E rawa vakacava ni o vukei ira na gone me dei nodra vakanamata kei na loloma me yavutaki vei Tamada Vakalomalagi kei Jisu Karisito?

iTaviqaravi e Rawa ni Caka

• Sureti ira na gone me ra tukuna se cava era na volia kevaka e tu vei ira na ilavo kece e vuravura. Wilika na 1 Timoci 6:7–12 vata kei ira na gone, ka kerei ira me ra vakalekalekataka na veika a vakavulica o Paula vei Timoci me baleta na ilavo. Qai sureti ira na gone me ra wilika tale na veitikina e 11–12 ka vaqara na veika a tukuna o Paula ni yaga cake mai na ilavo.

• Tuva na iyaloyalo eso ni veika vakavuravura (me vaka na ilavo, iyaya ni vakatatalo, se ka ni veivakamarautaki) kei na veika tawamudu (me vaka na matavuvale se valetabu). Sureti ira na gone me ra wasea na iyaloyalo oqori ki na rua na ibinibini—na veika e kauti keda vakavoleka vei Karisito kei na veika e rawa ni kauti keda tani mai vei Karisito kevaka eda lomani ira vakalevu cake mai na noda lomani Koya. Na cava na vuna sa “vu ni ka ca kecega … na daulomana na ilavo”? E vakamarautaki keda vakacava na noda vakanamata vei Jisu Karisito?

2 Timoci 3:14–17

Na Tamada Vakalomalagi a solia vei keda na ivolanikalou me vukei keda ni kila na dina mai na cala.

Ni o vakavulici ira na gone ena ivolanikalou, vakaraica na sala eso mo vakauqeti ira kina me ra vakila vakaukauwa vaka i ira na vosa ni Kalou.

iTaviqaravi e Rawa ni Caka

• Sureti ira na gone me ra wilika na 2 Timoci 3:15–17. Vakaraitaka na iyaloyalo ni italanoa eso mai na ivolayavu yadua ni cakacaka e va, ka sureta e vica na gone me ra digia e dua na iyaloyalo ka tukuna na italanoa. (E rawa ni o kunea na iyaloyalo eso ena iVola ni iYaloyalo Vakosipeli kei na ivola vakarau eso ni Lako Mai, Mo Muri Au.) Kerei ira na gone me ra wasea e dua tale na ka era kila me baleta na ivolanikalou oya. E “vakavukui [keda] rawa me da bula” vakacava na ivolanikalou?

• Wasea e dua na tiki ni ivolanikalou taleitaki se dua na ka e sotavi ena gauna a vukei iko kina na ivolanikalou mo tara cake nomu vakabauta na Tamada Vakalomalagi kei Jisu Karisito. Sureti ira na gone me ra wasea e dua na tikina taleitaki se ka sotavi vakai ira.

• Kerea e dua na gone me wilika na Moronai 10:4–5. Na cava a yalataka o Moronai ena veitikina oqo? Tarogi ira na gone ena ivakarau era sa rawata kina e dua na ivakadinadina ni sa dina na ivolanikalou. Sureti ira me ra dau wilika se vakarorogo wasoma ki na ivolanikalou ka taroga vua na Kalou kevaka era sa dina.

Vakauqeta na Vuli e Vale

Sureti ira na gone me ra wasea ki na nodra matavuvale na ka era sa vulica me baleta na ivolanikalou ka me ra vaqara e dua na tiki ni ivolanikalou era rawa ni wasea ki na kalasi ena macawa mai oqo (ena veivuke ni nodra itubutubu, ke gadrevi).

Vakatorocaketaki Noda Veivakavulici

Moica na itaviqaravi me sotava na gagadre. Mo kua ni raica na ituvatuva oqo ni ra sa idusidusi mo muria, ia vakayagataki ira vaka e dua na ivurevure ni vakasama me vakauqeti iko vaka i iko ni o vakananuma titobu na nodra gagadre na gone o vakavulica. O rawa ni moica na itaviqaravi me ra vakavulici kina na gone ena itabayabaki cava ga.