“9–15 ni Okotova. Filipai; Kolosa: ‘Au sa Rawata na Ka Kecega ena Vuku i Karisito o Koya sa Vakaukauwataki Au,’” Lako Mai, Mo Muri Au—Me Baleti Ira na Lalai: Veiyalayalati Vou 2023 (2022)
“9–15 ni Okotova. Filipai; Kolosa,” Lako Mai, Mo Muri Au—Me Baleti Ira na Lalai: 2023
9–15 ni Okotova
Filipai; Kolosa
“Au sa Rawata na Ka Kecega ena Vuku i Karisito o Koya sa Vakaukauwataki Au”
Wilika na Filipai kei na Kolosa, ka vakasamataki ira tiko na gone o vakavulica. Vakasaqara na veivakauqeti ena sala mo vakavulici ira kina ena ivakavuvuli ni veivola oqo.
Sureta na Veiwasei
Tarogi ira na gone na cava era a cakava ena macawa sa oti oqo mera cakacakataka kina e dua na ka era a vulica ena kalasi ni macawa sa oti. Me ivakaraitaki, era a sudra yani vakacava kivua e dua ka gadreva tu e dua na itokani?
Vakavulica na iVunau: Gone Sobu
Era lomani au ka masulaki au na iliuliu ni Lotu.
E tekivuna wasoma o Paula na nona ivola ena vakaraitaki ni loloma vei ira na lewe ni Lotu ka tukuna tu vei ira ni sa masulaki ira. Vakasamataka na sala o rawa ni vukei ira kina na gone me ra kila matua ni o ira na nodra iliuliu ni Lotu era lomani ira.
iTaviqaravi e Rawa ni Caka
-
Wilika i cake na Filipai 1:3–4 kei na Kolosa 1:3, 9, ka kerei ira na gone me ra roqoliga ka cuvara na uludra ena veigauna era rogoca kina na vosa masu, masulaki,, kei na masumasu. Vakamacalataka ni dau masulaki ira na lewe ni Lotu nai Apositolo o Paula, me vaka ga nodra masulaki keda nikua na nodai liuliu ni Lotu.
-
Vakaraitaka e dua nai yaloyalo kei Jisu Karisito, ka wilika eso na tiki ni ivolanikalou e vakamacalataki Koya ni masulaka tiko e dua (vaka na, Luke 22:32; 3 Nifai 19:21, 23). Na cava a kerea o Jisu ena Nona masulaki ira na tani?
-
Vukei ira na gone me ra cavuta eso na nodra liuliu ni Lotu, me vaka na peresitedi ni Lalai, na bisopi, kei na Peresitedi ni Lotu. Vakamacalataka ni ra kerea vua na Tamada Vakalomalagi na liuliu oqo me vakalougatataki ira na gone ka vukei ira me ra buladodonu. Vakasamataka mo tukuna vei ira na gone na ka o tukuna ni o masulaki ira.
Au rawa ni rekitaka na Turaga.
A vakayaloqaqataki ira na Yalododonu o Paula me ra reki—dina ga ni ra sotava tu na veivakatovolei dredre ka tiko voli o koya e valeniveivesu. O na vukei ira vakacava na gone me ra raica ni sa vakavu reki na muri Jisu Karisito?
iTaviqaravi e Rawa ni Caka
-
Kerei ira na gone me ra vakarogoca e dua na vosa tokaruataki ni o wilika na Filipai 4:4. Kerei ira na gone me ra vakaraitaka vei iko na ka era dau cakava ni ra reki. Tukuna vei ira na gone na vuna o “reki kina vua na Turaga”—na vuna o yalo marau kina ena vukui Jisu Karisito. Me ra wasea na gone na lomadra me baleti Jisu Karisito.
-
Vakaraitaka nai yaya se yaloyalo eso e matataka na veika e vukei iko mo “reki kina vua na Turaga” (Filipai 4:4), vaka na Nona ibulibuli, na valetabu, Nona Tucaketale, se matavuvale. Me ra veivukevuke na gone ni digitaka e dua nai yaloyalo se iyaya, ka qai tukuna vei ira na vuna e dau vakamarautaki iko kina. Sureti ira me ra wasea na veika e dau vukei ira me ra reki vua na Turaga.
-
Wilika vata na Filipai 4:8, ka vukei ira na gone me ra vakasamataka na veika e veisotari kei na ivakamacala ena tikina (raica talega na Yavu ni Vakabauta 1:13). Sureti ira na gone me ra droinitaka nai yaloyalo ni veika oqo.
Na noqu vakabauta sa dodonu me “yavutaki” vei Jisu Karisito.
Ke ra tara cake na gone na nodra bula kei na nodra vakabauta kivua na iVakabula, era na rawa ni vorata na cava ni bula.
iTaviqaravi e Rawa ni Caka
-
Vakaraitaka nai yaloyalo ni dua na vunikau mai na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale ni o wilika na veimalanivosa bibi mai na Kolosa 1:23; 2:6–7. Na cava ena yaco ki na vunikau oqo kevaka e basika e dua na cava ka sega ni kaukauwa tu na wakana? Me ra tucake na gone ka raitayaloyalotaka ni ra sa dua na vunikau e malumalumu tu na wakana ena dua na cava ka qai dua na vunikau e kaukauwa tu na wakana. Vakadinadinataka na vakabauti ni iVakabula e sa vukei keda ni vaka tu e dua na vunikau e kaukauwa na wakana. Eda qai rawa ni sotava na “cava” vakayalo, vaka na veitemaki kei na veigauna dredre.
-
Sureta e dua na gone me droinitaka na vunikau ena papa ni volavola. Kerei ira na gone me ra vakayacana eso na ka era rawa ni cakava me ra “yavutaki” tu kina vei Jisu Karisito. Na veigauna e vakayacana kina e dua na gone e dua na ka, sureti koya me vakuria e dua na wakana ena droini.
Vakavulica na iVunau: Gone Qase Cake
Kevaka au vakabauti Jisu Karisito, sa rawa ni’u marau tu ena veigauna dredre mada ga.
A sotava o Paula e vuqa na veivakatovolei, ia a marau tu o koya baleta ni vakabauti Jisu Karisito.
iTaviqaravi e Rawa ni Caka
-
Kerei ira na gone me ra raitayaloyalotaka ni ra tiko e valeniveivesu, me vaka ga nai Apositolo o Paula ena nona vola na iVola vei ira na kai Filipai. Wilika vata kei ira na gone na Filipai 4:4–13 , ka kerei ira me ra vakaraica na vosa “reki,” “vakacegu,” kei na “yalovakacegu.” Cava na vuna a reki rawa kina o Paula ka vakila na vakacegu ena loma mada ga ni valeniveivesu? Qai kerei ira na gone me ra raica na vosa “Turaga,” “Kalou,” kei na “Karisito” ena veitikina. Vukei ira me ra kila matua ni a vakavuna tu na reki i Paula na nona vakabauti Jisu Karisito.
-
Sureti ira na gone me ra vukei iko ni vakacavara na veiyatuvosa vaqo: “Au rawa ni tiko ena butobuto ka rawa ga ni raica na ka eso ke tiko vei au e dua na . Au rawa ni tiko e tautuba ena dua na siga katakata ka rawa ga ni lomavinaka ke tiko vei au e dua na . Au rawa ni sotava na gauna dredre eso ka rawa ga ni kune reki kevaka au .” Na cava e vakatura na Filipai 4:4–13 eda rawa ni cakava meda kune reki kina? Sureti ira na gone me ra wasea eso na serenilotu se ivolanikalou baleti Jisu e rawa ni vukei ira ni vakila na reki ena veigauna dredre.
Au rawa ni “vakasamataka tu ga” na veika e dina, dodonu, ka savasava.
Era sa vagolei wasoma na gone ki na veika e ca ka tawasavasava. O rawa ni vukei ira me ra vaqara na veika e veilaveti ka savasava.
iTaviqaravi e Rawa ni Caka
-
Kerea e dua na gone me wilika i cake na Filipai 4:8 ni ra vaqara na kena vo na vosa eso ena Yavu ni Vakabauta 1:13 e tautauvata se vakataka. Sureta e dua me vola na veivosa oqo ena papa ni volavola. Tarogi ira na gone se cava na kedra ibalebale, ka vukei ira me vakamacalataka ke gadrevi. Cava na vuna me da “vakasamataka tu ga” kina na veika oqo? E rawa vakacava ni da “vakasaqarai” ira?
-
Kerei ira na gone me ra vakayacana na veika e veisotari kei na vakamacala eso ena Filipai 4:8. Sureti ira me ra maroroya e dua na lisi ni cavaga era siqema ena macawa oqo e veisotari tu kei na vakamacala eso oqo. Vakauqeti ira me ra kauta mai na nodra lisi ki na Lalai ena macawa mai oqo ka wasea na ka era sa raica.
Na noqu vakabauta sa dodonu me “yavutaki” vei Jisu Karisito.
Sa segata o Setani me vakamalumalumutaka na noda vakabauta ena veitemaki kei na ivunau vakailasu eso. O na vakauqeti ira vakacava na gone me ra vaqaqacotaka nodra vakabauta na iVakabula me rawa ni ra “sega ni vukici tani mai na inuinui ni itukutuku vinaka”? (Kolosa 1:23).
iTaviqaravi e Rawa ni Caka
-
Sureti ira na gone me ra droinitaka nai yaloyalo eso e matataka na veidina era raica ena Kolosa 1:23; 2:6–7. Me ra wasea na nodrai yaloyalo ki na kalasi ka vakamacalataka na dina eso e matataka na nodrai yaloyalo.
-
Vakaraitaka na vidio “Spiritual Whirlwinds.” Na veitemaki kei na vunau vakailasu cava eso ena vuravura nikua e rawa ni vakamalumalumutaka na noda vakabauta? Vakauqeti ira na gone me ra vola e dua na ka era rawa ni cakava me vaqaqacotaka na nodra vakabauta me rawa ni ra “yavutaki” tu (Kolosa 2:7) vei Jisu Karisito. Kerei ira me ra vakaraitaka tu ena dua na vanua era rawa ni raica kina e veisiga.
Vakauqeta na Vuli e Vale
Sureti ira na gone me ra wasea ki na nodra matavuvale na ka era sa vulica me baleti Jisu Karisito. Era rawa ni vakayagataka na tabana ni taviqaravi ena macawa oqo se dua na ivolanikalou era a wilika ena gauna ni kalasi nikua.
Vakatorocaketaki Noda Veivakavulici
Era dau lomatarotaro ka vuli na gone mai na veika vovou ka duidui era sotava. Vakayagataka na itaviqaravi eso e vukea na nodra veitosoyaki na gone, vakayagataka taucoko nodra wakilakila, vakadidike, ka tovolea na veika vovou. E rawa ni veivuke na vakatutu eso ena “Sotavi Nodra Gagadre na Gone Sobu” ena itekivu ni vurevure oqo. (Raica talega na Veivakavulici ena iVakarau ni iVakabula, 25–26.)