rau vosa tiko na goneyalewa daukaulotu kivua na cauravou

16–22 ni Okotova

1 kei na 2 Cesalonaika

“Tinia Vinaka Talega Na Ka Sa Sega ena Nomudou Vakabauta”

Ni o wilika ena yalomasumasu na 1 kei na 2 Cesalonaika ni o vakasamataki ira tiko na gone, o na kunea na ivakavuvuli eso e gadrevi me ra kila.

ivakatakilakila ni veiwasei

Sureta na Veiwasei

Ena lesoni ni macawa sa oti, o a sureti ira beka na gone me ra vakayagataka na ka era vulica ena sala eso? Me ra vakayagataka na gone na imatai ni vica na miniti ena kalasi ni macawa oqo me ra wasea kina na veika era sotava.

ivakatakilakila ni veivakavulici

Vakavulica na iVunau: Gone Sobu

1 Cesalonaika 5:1–6

Ni’u muria na ivunau ni Kalou, au sa na tuvakarau ki na iKarua ni Lako Mai i Jisu Karisito.

Eda sega ni kila na gauna ena lesu mai kina ki vuravura na iVakabula. Ia sa rawa meda vakaraici Koya tiko ka vakavakarau tu ki na Nona lako mai.

iTaviqaravi e Rawa ni Caka

• Sureta e dua na tina me wasea vakalekaleka se a vakacava beka na nona a waraka voli na luvena me sucu mai. Wilika na 1 Cesalonaika 5:2–3, ka tukuna vei ira na gone ni na lako tale mai ki vuravura o Jisu Karisito, ia e sega ni dua e kila na kena gauna donu—me vaka ga nona sega ni kila e dua na tina na gauna donu ena sucu kina na luvena.

• Kerei ira na gone me ra tukuna e dua na gauna era a vakavakarau kina ki na dua na ilakolako se soqo. Na cava era a cakava me ra vakavakarau kina? Kauta mai e dua na kato ni isulu se katotuberi ka me ra raitayaloyalotaka na gone ni ra sa vakasosolo tiko ki na dua na ilakolako. Ena iyaya yadua era vakatawana, vukei ira na gone me ra vakasamataka e dua na sala e rawa ni da vakavakarau kina vei Jisu Karisito me lesu tale mai.

• Wilika na 1 Cesalonaika 5:6 vei ira na gone ka vakamacalataka ni kevaka eda sega ni vakavakarau tiko ki na lesu tale mai i Jisu, ena vaka ni da sa mocelutu ka da na sega ni vakarau tu Vua. Sureti ira na gone me ra raitayaloyalotaka ni ra sa moce. Vakamacalataka ni kevaka eda vakarau tu, ena vaka ni da yadra tu ka waraki Koya tiko. Sureti ira me ra yadra mai.

• Lagata vata e dua na sere me baleta na iKarua ni Lako Mai, vaka na “Ena Lesu Tale Beka Mai” (iVolanisere ni Gonelalai, 46).

2 Cesalonaika 2:1–3

A vakavulica o Paula ni na yaco na vukitani ni se bera ni lako tale mai o Jisu Karisito.

A mani qai yaco na vukitani ki na Lotu a tauyavutaka o Jisu Karisito, ka kena ibalebale ni a kau tani mai vuravura na lewa ni matabete kei na dina ni kosipeli. A parofisaitaka o Paula ni vukitani oqo, se na “lutu tani,” ena yaco ni se bera na iKarua ni Lako mai ni iVakabula.

iTaviqaravi e Rawa ni Caka

• Ni wiliki oti na 2 Cesalonaika 2:3 vata kei ira na gone, me ra qai vukei iko ni tara e dua na vale cecere mai na bilo palasitika se buloko eso. Tukuna vei ira na gone ni bilo se buloko eso era matataka na veitiki bibi ni Lotu Dina, me vaka na dina vakosipeli, na matabete, na veivauci ena valetabu, kei ira na parofita. Ni sa mate oti o Paula kei ira na vo ni iApositolo, era sa yali na veika oqo, ka sa sega ni tu kina e vuravura na Lotu dina me vuqa na yabaki. Sureta e dua na gone me vakabalea na valececere, ka vakamacalataka ni sa vakatokai oqo na Vukitani se “lutu tani.” Ni sa kauta lesu mai na Nona Lotu o Jisu Karisito, e a vakatokai oqo na Veivakalesuimai.

• Vakaraitaka e dua na iVola i Momani kei nai yaloyalo eso ni parofita kei na valetabu. Sureti ira na gone me ra kaya “Vukitani” ni o vunitaka na veika oqori ena dua na katotuberi kei na “Veivakalesuimai” ni o kauti ira tale mai tuba.

• Lagata na sere era vakavuvulitaka na dina era a kau tani ena Vukitani ka vakalesui mai ena noda gauna oqo, me vaka na “Au Lewe ni Lotu i Jisu Karisito,” “Matabete Sa Lesu Mai,” kei na “Raica na Valetabu” (iVolanisere ni Gonelalai, 48, 60, 99).

ivakatakilakila ni veivakavulici

Vakavulica na iVunau: Gone Qase Cake

1 Cesalonaika 5:1–6

Ni’u muria na ivunau ni Kalou, au sa na tuvakarau ki na iKarua ni Lako Mai i Jisu Karisito.

Na ivakasala i Paula sa rawa ni vukei keda me da tuvakarau ka yadrava toka na siga cecere koya ena lako tale mai kina ki vuravura na iVakabula.

iTaviqaravi e Rawa ni Caka

• Sureta e dua na gone me wilika na 1 Cesalonaika 5:1–6 ni ra vakamuria voli na vo ni gone. Ni oti na veitikina yadua, kerea e dua na gone me vakalekalekataka na cava e nanuma ni tukuna tiko na tikina oya. O na vinakata beka mo vakamacalataka ni “siga ni Turaga” e kena ibalebale na iKarua ni Lako Mai i Jisu Karisito. Cava na vuna e vakatauvatani kina na iKarua ni Lako Mai ki na dua na daubutako ena bogi se dua na yalewa sa vakarau vakasucu?

• Tukuna vei ira na gone me ra raitayaloyalotaka ni na veisiko mai ki na nomu kalasi na iVakabula ena dua na gauna nikua. Me da na vakavakarau beka vakacava ki na Nona veisiko mai? Vukei ira na gone me ra vakasamataka na veika eso eda rawa ni cakava me da vakarautaki keda kina ki na siga ena lesu tale mai kina o Jisu Karisito. Me ivakaraitaki, e rawa ni da veivutuni, veivosoti, vakavinakataka noda veiwekani vakamatavuvale, muria na parofita, vakasaqara na veivakayarayarataki ni Yalo Tabu, ka rokova na noda veiyalayalati. Vakayaloqaqataki ira na gone me ra digitaka e dua na ka era na cakava me ra vakarautaki ira kina ni ciqoma na iVakabula ena Nona Lako Mai.

2 Cesalonaika 2:1–3

A vakavulica o Paula ni na yaco na vukitani ni se bera ni lako tale mai o Jisu Karisito.

Kevaka era sa kila rawa na gone ni a kautani mai vuravura ena Vuki Tani Levu na Lotu i Jisu Karisito kei na Nona kosipeli, e sa na qai matata cake vei ira na veiganiti ni Veivakalesuimai.

iTaviqaravi e Rawa ni Caka

• Sureta e dua vei ira na gone me wilika na 2 Cesalonaika 2:1–3. Mai na veitikina oqo, na cava e dodonu me yaco ni bera “na siga i Karisito,” ka kena ibalebale na iKarua ni Lako Mai? Na cava na ibalebale ni malanivosa “na vuki tani”? Vakadeitaka me ra kila na gone ni sa kena ibalebale na Vukitani Levu, ka a yaco ni oti na nodra vakamatei nai Apositolo ni iVakabula. Sa rawa mo wasea na itukutuku mai na “Vukitani” ena iDusidusi ki na iVolanikalou (scriptures.ChurchofJesusChrist.org).

• Vukei ira na gone me ra vola ena papa ni volavola eso na dina kei na veivakalougatataki eda marautaka tu baleta na kosipeli. Bokoca laivi yadua na veika oqo, ka tarogi ira na gone se na duatani vakacava na nodra bula kevaka e sega na veika oqo. Vakamacalataka ni dina eso oqo a yali ena gauna ni Vukitani Levu. Cava na vuna e bibi kina me vakalesui tale mai ki vuravura na Lotu i Jisu Karisito ena gauna oqo? Sureti ira na gone me ra “vakalesuya mai” se vola tale na dina kei na veivakalougatataki eso ena papa ni volavola.

2 Cesalonaika 3:7–13

Sa vinakata na Tamada Vakalomalagi meu dau cakacaka.

O na rawa ni vukei ira vakacava na gone me ra raica na cakacaka me dua na veivakalougatataki, sega ni dua na ka me levei?

iTaviqaravi e Rawa ni Caka

• Sureti ira na gone me ra veivukevuke ni wilika na veitikina mai na 2 Cesalonaika 3:7–13 ka vakaraica na leqa era a sotava tu na Yalododonu. Cava na vuna e vinakata kina na Tamada Vakalomalagi me da cakacaka? Na cava ena yaco kevaka eda sega ni vulica me da cakacaka vakaukauwa? Me ra veivukevuke na gone ni matanataka na cakacaka rawarawa eso ni ra vakilakila na vo ni gone se cava era cakava tiko.

• Sureti ira na gone me ra tukuna e dua na gauna era a cakacaka kina vakaukauwa ena dua na itavilesi, cakacaka, se dua na inaki. Na cava era nanuma tu vakai ira ena gauna era vakacavara kina? Na cava na kena ibalebale me da “kakua ni ceguoca ena cakacaka vinaka”? (2 Cesalonaika 3:13). Na cava e vukea na noda toso tikoga ni sa dredre na cakacaka?

ivakatakilakila ni vuli

Vakauqeta na Vuli e Vale

Sureti ira na gone me ra tukuna ki na dua na lewe ni matavuvale se itokani e dua na vuna era vakavinavinakata kina ni sa tu vei keda e vuravura nikua na kosipeli (na tabana ni itaviqaravi ena macawa oqo e rawa ni solia vei ira na vakasama eso).

Vakatorocaketaki Noda Veivakavulici

Tokoni ira na itubutubu ni gone. “O ira na itubutubu sa qasenivuli ni kosipeli levu duadua kivei ira na luvedra—sa nodra ruarua na itavi bibi kei na kaukauwa levu duadua me vakayarayarataki kina na luvedra (raica Nai Vakarua 6:6–7). Ni o vakavulici ira na gone ena lotu, vakasaqara ena masumasu na sala eso me ra tokoni kina na nodra itubutubu ena nodra itavi bibi” (Veituberi ena iVakarau ni iVakabula, 25).

tabana ni itaviqaravi: ena liu taumada na Vukitani ni bera na iKarua ni Lako Mai