Melkesedek I Blesem Ebram, i kam long Walter Rane Presen we i kam long man we i dro

6–12 Novemba

Hibrus 7–13

Wan Hae Pris blong Ol Gud Samting we Bae Oli Kam

Taem yu stap rid long Hibrus 7–13, lisin gud long ol kwaet toktok blong Tabu Spirit. Tingting long sam wei we yu save raetemdaon olgeta; eksampol: yu save raetemdaon olgeta long aotlaen ia, long saed blong ol skripja blong yu, o insaed long wan notbuk, o wan jenol.

Raetemdaon Ol Filing mo Tingting blong Yu

Iven ol fetful Sent, sam taem, oli safa from “ol man ol tok nogud mo mekem nogud” long olgeta, mo hemia i bin save mekem tras blong olgeta i seksek (luk long Hibrus 10:32–38). Pol i bin save se Ol Jiu we oli jenisim laef i kam long Kristin fasin, oli bin gotru long sam bigfala agens from niufala bilif blong olgeta. Blong leftemap tingting blong olgeta blong stap tru long testemoni blong olgeta, hem i mekem olgeta oli tingbaot wan longtaem tradisen blong ol fetful man blong biliv, we i kamaot long histri blong olgeta: Ebel, Inok, Noa, Ebraham, Sara, Josef, Moses—”wan klaod blong ol witnes” se ol promes blong God oli ril, mo oli gud inaf blong stap wet from olgeta (luk long Hibrus 11; 12:1). Tradisen ia, i blong yu tu. Hem i wan samting we oli pasem i kam, we i fet we evriwan we oli bin lukluk long Jisas olsem “hem we i stat mo i stap long en” blong bilif blong yumi (Hibrus 12:2). From Hem, taem we man i kam agens i wantem mekem yumi pulbak, bae yumi go kolosap wetem wan tru hat wetem ful tras long fet (Hibrus 10:22, 38). Long yumi, semmak olsem Ol Sent blong bifo, Jisas Kraes i “hae pris we i tekem ol gudgudfala samting ia oli kamtru” (Hibrus 9:11).

Sam Aedia blong Skripja Stadi blong Yuwan

Hibrus 7

Melkesedek Prishud i poenem mi i go long Jisas Kraes.

Blong plante handred yia, Ol Jiu oli bin praktisim Prishud blong Livae, we oli save tu olsem Prishud blong Eron. Be, wetem ful gospel blong Jisas Kraes, prishud we i hae moa, oli putumbak Melkesedek Prishud, we i givim plante hae moa blesing. ?Wanem nao yu lanem abaot Melkesedek Prishud aot long Hibrus 7? Taem yu kipim long maen blong yu se, stamba tingting blong leta ia—semmak olsem evri skripja—i blong bildimap fet long Jisas Kraes, teknot long ol skripja we oli testifae abaot Hem.

Hemia samfala eksampol blong ol nara trutok we yu save faenem:

• Josef Smit Translesen, Hibrus 7:3, 21: “Mo olgeta evriwan we oli odenem olgeta long prishud ia, oli kam olsem Pikinini blong God, we oli stap wan pris we i no gat en samtaem.”

• Hibrus 7:11: Prishud blong Livae, i no mekem man i save kam stret evriwan, mo from hemia, Melkesedek Prishud i tekem ples (luk long Doktrin mo Ol Kavenan 84:18–22).

• Hibrus 7:20–21: Melkesedek Prishud ia, oli kasem tru long wan “strong promes mo kavenan” (luk long Doktrin mo Ol Kavenan 84:33–44).

?Wanem blesing nao yu yu kasem long Melkesedek Prishud mo “ol odinens insaed long hem”? (Doktrin mo Ol Kavenan 84:20). ?Olsem wanem Melkesedek Prishud i bin helpem yu blong kam long Kraes?

Luk tu long Alma 13:1–13; Doktrin mo Ol Kavenan 121:36–46; Gospel Topics, “Melchizedek Priesthood,” topics.ChurchofJesusChrist.org; Gaed long Ol Skripja, “Melkesedek,” olskripja.ChurchofJesusChrist.org; Russell M. Nelson, “Ol Rij Samting long Saed blong Spirit,” Liahona, Novemba 2019, 76–79; Dallin H. Oaks, “Melkesedek Prishud mo Ol Ki,” Liahona, Mei 2020, 69–72.

Hibrus 9; 10:1–22

Ol odinens blong bifo mo blong tedei, oli poenem yumi i go long Jisas Kraes.

Ol fas Hibru man we oli ridim leta ia, bae oli save gud ol tabenakol mo ol odinens blong bifo, we Pol i tokbaot. Be sam oli no bin luksave fulwan se ol stamba tingting blong ol odinens ia, i blong poen i go long sakrifaes blong Jisas Kraes we i pem praes from sin.

Long taem blong Baebol, long wan yia holidei we oli singaotem Dei blong Atonmen, wan hae pris i kam insaed long ples we i moa tabu (o I Moa Tabu long Evri Tabu Ples) insaed long tempol blong Jerusalem, mo i mekem sakrifaes blong wan nani o wan smol sipsip blong pem praes blong sin blong Isrel.

Taem yu stap ridim olsem wanem Pol i stap tokbaot ol odinens ia, lukaotem ol simbol mo ol tijing we oli helpem yu blong andastanem misin blong Sevya blong pem praes ia.

Ol odinens we yumi stap tekpat long hem tedei, oli defren long olgeta we oli bin stap long taem blong Pol, be stamba tingting biaen long olgeta, i semmak. ?Olsem wanem nao, ol odinens blong tedei oli stap testifae long yu abaot Jisas Kraes?

Blong lanem moa abaot ol seremoni blong bifo blong Ol Man Jiu, mo simbol blong olgeta, luk long ol vidio ia: “The Tabernacle” mo “Sacrifice and Sacrament” (ChurchofJesusChrist.org).

Hibrus 11

Blong gat fet, o blong biliv, hem i blong trastem ol promes blong God.

Sapos wan i askem yu blong talem mining blong bilif, ?bae yu talem wanem? Sista Anne C. Pingree i karem lanwis we i stap long Hibrus 11 blong talem mining blong fet, o bilif: “Paoa long spirit blong yumi save stret abaot ol promes se oli stap longwe be yumi no save kasem long laef ia” (“Seeing the Promises Afar Off,” Liahona, Nov. 2003, 14).

Tingting blong stap developem mining blong yuwan abaot fet, taem yu stap tingting hevi long ol aedia long Hibrus 11. ?Wanem nao ol eksampol blong ol pipol we oli tokbaot long japta ia oli stap tijim yumi abaot fet? (Luk tu long Ita 12:6–22.)

?Wanem promes nao we yu yu stap luk we oli stap longwe i kam? ?Olsem wanem nao yu save soem long Lod se yu yu save stret abaot olgeta, mo yu bin akseptem olgeta? (Hibrus 11:13).

Luk tu long Alma 32:21, 26–43; Jeffrey R. Holland, “An High Priest of Good Things to Come,” Ensign, Nov. 1999, 36–38; Gospel Topics, “Faith in Jesus Christ,” topics.ChurchofJesusChrist.org.

Ol Aedia blong Famli Skripja Stadi mo Haos Naet

Hibrus 10:32–36.Yu save invaetem ol memba blong famli blong serem ol eksperiens long saed blong spirit, abaot wan taem we oli bin filim se trutok i saenem olgeta. ?Olsem wanem nao ol eksperiens ia oli helpem yumi blong no sakemaot tras blong yumi long ol taem blong tes o gat tu tingting?

Hibrus 11.?Olsem wanem nao ol memba blong famli blong yu oli lanem samting aot long ol fetful eksampol we oli tokbaot long Hibrus 11? Maet bae i gud tumas blong aktem ol stori blong samfala eksampol ia. ?Yufala i save luklukbak long sam long ol stori ia long Ol Stori long OlTesteman. O maet famli blong yu i save toktok raon long ol eksampol blong ol nara fetful pipol we yu yu save olgeta—wetem sam bubu, lida blong Jos, mo ol memba blong komuniti blong yu. Yufala i save singsing wan singsing abaot fet, olsem: “Faith” (Children’s Songbook, 96).

Hibrus 12:2.Folem ves ia, ?from wanem Jisas i bin glad blong stap strong tru long sobodi mo safaring blong Hem antap long kros? ?Wanem nao hemia i stap tijim yumi abaot wei we yumi save stap strong tru long ol tes blong yumi? Presiden Russell M. Nelson i givim sam niu tingting we oli save help long ves ia, we i stap long mesej ia: “Glad mo Traehad blong Laef long Saed blong Spirit” (Jeneral Konfrens, Okt 2016, ChurchofJesusChrist.org/general-conference/conferences?lang=bis).

Hibrus 12:5–11.?From wanem Lod i stap tok strong long yumi mo i stap stretem yumi? ?Wanem nao yumi luk long ol ves ia abaot wei we Lod i stap lukluk fasin blong stretem man? ?Olsem wanem ol ves ia oli jenisim wei we yumi stap stretem man, o man i stretem yumi?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Faith,” Children’s Songbook, 96.

Kam Antap long Fasin blong Yumi blong Stap Tij

Yusum miusik blong invaetem Spirit mo lanem doktrin. Fas Presidensi i talem se: Miusik i gat ol strong paoa blong muvum yumi i kasem wan hae mak blong spirit” (“First Presidency Preface,” Hymns, x). Maet wan singsing abaot fet, olsem “True to the Faith” (Hymns, no. 254), bae i save kam sapotem wan famli storian aot long Hibrus 11.

Ol simbol mo ol odinens blong tempol blong bifo oli bin stap tijim abaot rol blong Jisas Kraes.