13–19 Novemba

Jemes

Yufala I Mekem Wanem Tok i Talem, Yufala I No Lisin Nomo

Taem yu stap ridim Leta blong Jemes, luklukgud ol sentens we oli kamaot klia long yu. ?Long wanem wei nao yu filim se oli pusum yu blong yu “mekem” wanem ol toktok ia oli talem? (Jemes 1:22).

Raetemdaon Ol Filing mo Tingting blong Yu

Samtaem, wan ves blong skripja nomo i save jenisim wol. Jemes 1:5 i luk olsem wan simpol kaonsel nomo—sapos yu nidim waes, askem God. Be taem we Josef Smit, we i gat 14 yia, i ridim ves ia, “i luk se i kam wetem bigfala paoa insaed long evri filing blong hat blong [hem].” (Josef Smit—Histri 1:12). Nao, wetem insperesen, Josef i bin tekem aksen long toktok blong Jemes, mo i go askem waes we i kam long God tru long prea. Mo God i bin givim long hem, we i no holemtaet eni samting; Hem i givim long Josef wan visit blong heven we i moa naes evriwan long histri blong man—Fas Visen. Visen ia i bin jenisim rod blong laef blong Josef, mo i bin lidim i go blong Jos Ia blong Jisas Kraes, i kambak long wol ia. Tedei, yumi evriwan i gat blesing from Josef Smit i bin ridim mo i bin tekem aksen folem wanem i stap long Jemes 1:5.

?Wanem nao bae yu yu faenem taem yu stap stadi long Leta blong Jemes? Maet wan ves, o tu ves, bae i jenisim yu, o wan we yu lavem. Maet bae yu faenem wan rod taem yu stap lukaotem blong mekem misin blong yu long laef ia. Maet bae oli leftemap tingting blong yu blong toktok long wan fasin we i kaen, o blong yu save wet longtaem. Maet bae yu filim blong mekem se ol aksen blong yu oli stret moa folem fet blong yu. Nomata wanem insperesen i kam long yu, letem ol toktok ia oli “kam wetem bigfala paoa insaed long evri filing blong hat blong [yu].” Mo yu “mas mekem tingting blong [yu] i stap daon, blong harem tok ya” olsem we Jemes i bin raetem; mo afta, yu mas go mekem, be yu no harem nomo (luk long Jemes 1:21–22).

Sam Aedia blong Skripja Stadi blong Yuwan

?Huia nao i Jemes?

Oli biliv se man we i raetem Leta blong Jemes i wan boe blong Meri, mama blong Jisas Kraes, mo nao, hem i haf brata blong Sevya. Jemes, oli tokbaot long Matiu 13:55; Mak 6:3; Ol Wok 12:17; 15:13; 21:18; mo Galesia 1:19; 2:9. Aot long ol skripja ia, i luk se Jemes i bin wan lida blong Jos long Jerusalem, mo oli bin singaotem hem olsem wan Aposol (luk long Galesia 1:19).

Jemes 1:2–4; 5:7–11

Fasin blong stap strong kasem en wetem fasin blong save wet longtaem, i lidim man blong i kam stret evriwan.

Afta we yu ridim Jemes 1:2–4; 5:7–11, ?bae yu talem se wijwan nao i stamba mesej abaot fasin blong save wet longtaem? Bae i save help blong tingting hevi long wanem famli blong Elda Jeremy R. Jaggi i bin lanem abaot fasin blong save wet longtaem aot long ol ves ia (luk long “Blong Kam Stret Evriwan Tru long Fasin blong Save Wet Longtaem !i Fulumap Yumi Wetem Glad!,” Liahona, Novemba 2020, 99–101). ?Wanem nao hem i stret wok we i soem fasin blong save wet longtaem? (Jemes 1:4). ?Olsem wanem nao yu save soem long Lod we yu yu glad blong yu save stap wet longtaem?

Jemes 1:3–8, 21–25; 2:14–26; 4:17

Fet i askem blong man i tekem aksen.

?Olsem wanem nao yu yu save sapos yu gat fet long Jisas Kraes? ?Olsem wanem nao ol wok blong yu oli soemaot fet blong yu long God? Tingting abaot ol kwestin taem yu stap stadi long ol tijing blong Jemes abaot fet. Bae i intresting tu blong ridim abaot Ebraham mo Rehab, tufala eksampol ia we Jemes i tokbaot (luk long Jenesis 22:1–12; Josua 2). ?Olsem wanem nao oli soem se oli bin gat fet long God?

Sapos yu stap ridim Jemes 1:3–8, 21–25; 2:14–26; 4:17 i save helpem yu blong tingting long sam wei we yu save kam blong mekem wanem toktok i talem. Raetemdaon eni tingting o filing we yu kasem, mo mekem ol plan blong putum i go long aksen.

Luk tu long Alma 34:27–29; 3 Nifae 27:21.

“Ebraham i bilif long God, mo from we hem i bilif olsem, God i mekem hem i stret man long fes blong hem” (Jemes 2:23). Ebraham long ol flat ples blong Mamre, i kam long Grant Romney Clawson

Jemes 1:26; 3:1–18

Ol toktok we mi talem oli gat paoa blong mekem nogud long man, o blong blesem ol nara man.

Long medel blong ol rij pikja we Jemes i bin yusum truaot long leta blong hem, sam long ol strong lanwis blong hem i stap long kaonsel blong hem abaot lanwis. Tingting blong mekem wan lis blong evri wei we Jemes i bin tokbaot tang, o maot. Wanwan samting ia we oli komperem, o wanwan pikja ia, ?i tokbaot wanem abaot ol toktok we yumi stap talem? Tingting abaot wan samting we yu yu save mekem blong blesem wan wetem ol toktok blong yu (luk long Doktrin mo Ol Kavenan 108:7).

Jemes 2:1–9

Olsem wan disaepol blong Jisas Kraes, mi sapos blong lavem evri pipol, i nomata wanem situesen blong olgeta.

Jemes i bin givim woning long Ol Sent speseli agensem fasin blong laekem ol rijman, mo fasin blong no laekem ol puaman, be woning blong hem, oli save yusum long eni nara fasin we i no stret we maet yumi stap mekem long ol nara man. Taem we, wetem prea, yu stadi long Jemes 2:1–9, luklukgud insaed long hat blong yuwan, mo lisin long ol kwaet toktok blong Tabu Spirit. Bae i save help sapos yu riplesem sam sentens long ol ves ia, olsem, “narawan we i puaman, we klos blong hem i brokbrok” (ves 2), wetem sam nara toktok o sentens we i tokbaot wan we yu gat temtesen blong yu no jajem i stret. ?Yu yu filim se yu nidim blong mekem eni jenis long wei we yu stap tritim o tingting abaot ol nara man?

Ol Aedia blong Famli Skripja Stadi mo Haos Naet

Jemes 1:5.Afta we yu ridim Jemes 1:5, famli blong yu i save talemsot stori blong Fas Visen (luk long Josef Smit—Histri 1:8–20) o wajem vidio ia:“Ask of God: Joseph Smith’s First Vision” (ChurchofJesusChrist.org). Invaetem ol memba blong famli blong oli serem ol testemoni blong olgeta abaot Profet Josef Smit, mo ol eksperiens blong taem Papa long Heven i bin ansarem ol prea blong olgeta.

Jemes 1:26–27.Tingting blong wajem vidio ia: “True Christianity” (ChurchofJesusChrist.org). Afta, ridim mining blong “relijin we i stret gud” long Jemes 1:26–27, mo toktok raon long ol wei we famli blong yu i save mekem se hao yufala i praktisim relijin, i kam moa stret gud.

Jemes 3.Jemes 3 i gat fulap pikja i stap insaed long hem, we i save givim insperesen long sam gud lesen we oli yusum samting, blong helpem famli blong yu blong tingbaot blong toktok long wan fasin we i kaen. Eksampol: yufala i save bildim wan faea tugeta, mo tokbaot olsem wanem, wan smol toktok we i no kaen, i save mekem wan bigfala problem (luk long ol ves 5–6). O yu save kasem wan kaekae we i konkon smol, mo putum insaed long wan kaekae we i swit—olsem blong putum laman jus insaed long hani. Hemia i save lidim yufala blong toktok raon abaot fasin blong yusum ol swit toktok mo ol toktok blong leftemap tingting (luk long ol ves 9–14).

Jemes 4:5–8.?From wanem nao bae yumi mas “stap kolosap long God” (Jemes 4:8) taem yumi fesem ol temtesen?

Jemes 5:14–16.Presiden Dallin H. Oaks i tijim se “ol papa mo mama oli mas leftemap tingting blong i gat moa prishud blesing long famli” (“Ol Paoa blong Prishud,” Liahona, Mei 2018, 67). Maet sapos yufala i ridim Jemes 5:14–16 mo serem ol eksperiens abaot fasin blong kasem wan prishud blesing i save leftemap tingting blong ol memba blong famli blong askem wan blesing taem oli sik, o taem oli nidim paoa long saed blong spirit.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Have I Done Any Good?,” Hymns, namba 223).

Stap Kam Antap long Stadi blong Yuwan

Tekem aksen folem wanem yu lanem. Taem yu stap stadi, lisin long ol kwaet toktok blong Spirit abaot wei we yu save praktisim wanem we yu stap lanem, insaed long laef blong yu. Komitim yu blong folem ol kwaet toktok ia, mo laef moa fulwan folem gospel. (Luk long Teaching in the Savior’s Way, 35.)

Strong advaes blong Jemes blong “askem God” (Jemes 1:5) i givim insperesen long Josef Smit blong lukaotem waes we i kam long God. Foto i kam long Christina Smith