13–19 Novemba

Jemes

“Yufala I Mekem Wanem Tok i Talem, Yufala I No Lisin Nomo”

Long Leta blong Jemes i gat plante trutok we i save blesem ol pikinini we yu stap tijim. Folem Spirit blong i talemaot long yu wanem trutok bae yu serem wetem olgeta. Ol aedia long aotlaen ia oli save helpem yu.

Invaetem Ol Pikinini blong Serem Wanem Oli Gat

Invaetem ol pikinini blong serem wan prinsipol blong gospel we oli bin tingbaot, we oli lanem wetem famli blong olgeta long las wik o long Praemeri klas, las Sandei. Afta we wan pikinini i serem, invaetem wan narafala pikinini long klas blong talem, long sot toktok, wanem we oli bin tokbaot.

Tijim Doktrin: Ol Smol Pikinini

Jemes 1:5–6

Mi save askem Papa long Heven blong helpem mi lanem wanem we i tru.

Helpem ol pikinini we yu tijim blong andastanem se, oli save tanem olgeta i go long Papa long Heven blong kasem waes tingting. Taem oli mekem olsem, bae oli kasem bigfala blesing long taem we oli fesem ol had kwestin.

Samfala Aktiviti we Yu Save Mekem

• Helpem ol pikinini blong ripitim sentens ia: “Sapos wan long yufala i no gat waes, hem i mas askem long God” (Jemes 1:5). ?Olsem wanem nao yumi askem ol kwestin long God? ?Olsem wanem nao Hem i ansarem yumi?

• Soem wan pikja blong Fas Visen (Gospel Art Buk, namba 90), o soem vidio blong “Joseph Smith’s First Vision” (ChurchofJesusChrist.org). Eksplenem olsem wanem, taem hem i bin ridim Jemes 1:5 Spirit i givim insperesen long Josef Smit blong askem Papa long Heven blong helpem hem wetem wan kwestin (luk long Josef Smit—Histri 1:1–20). Serem testemoni blong yu se God i ansarem ol prea, mo testifae se ol pikinini oli save prea long Hem taem oli gat ol kwestin. Letem ol pikinini oli dro ol pikja blong olgetawan abaot Josef Smit we i stap ridim Jemes 1:5 mo i stap prea long Papa long Heven.

Jemes 3:1–13

Mi save talem ol toktok we oli kaen.

Olsem we Jemes i bin testifae, blong stap lanem blong stap talem ol kaen toktok nomo, bae i helpem yumi blong kam olsem Jisas Kraes (luk long Jemes 3:2).

Samfala Aktiviti we Yu Save Mekem

• Soem ol pikja blong ol samting we oli swit, mo hemia we oli konkon. Helpem ol pikinini blong andastanem se Papa long Heven i askem yumi blong yusum ol tang blong yumi blong talem ol swit (o kaen) samting, be i no konkon (o no kaen) samting (luk long Jemes 3:10). Helpem olgeta blong tingting long ol eksampol blong ol naes samting we oli save talem long ol narafala man.

• Givim long wanwan pikinini, wan simpol droing blong wan man o woman we i stap toktok. Invaetem ol pikinini blong leftemap droing ia taem yu talem wan naes samting we yumi save mekem wetem ol toktok blong yumi (olsem, stap talem trutok, presem olgeta long wanem we oli bin mekem, mo askem blong helpem wan narafala man) mo putum daon droing taem yu talem wan samting we yumi no mas talem wetem ol tang blong yumi (olsem, stap giaman, mo no wantem blong stap obei long papa o mama).

• Sapotem mesej blong Jemes 3:1–13 taem yufala i singsing tugeta wan singsing abaot fasin blong stap kaen, olsem “Kindness Begins with Me” (Children’s Songbook, 145).

Jemes 5:7–11

Blong stap kasem ol blesing blong God i nidim blong gat longfala tingting.

Blong gat longfala tingting i no stap kam olsem nomo, speseli blong ol pikinini. Tingting long olsem wanem yu save yusum kaonsel blong Jemes blong helpem ol pikinini we yu stap tijim blong oli lanem blong gat longfala tingting.

Samfala Aktiviti we Yu Save Mekem

• Helpem ol pikinini blong tingting long ol taem we oli mas wetem from wan samting we oli rili wantem. Serem wan eksperiens taem we yu mas wet. Eksplenem se, blong stap wet from wan samting we yumi wantem mo yumi no stap komplen from, oli singaotem se blong gat longfala tingting.

• Talem long sot toktok Jemes 5:7 long toktok blong yuwan, mo soem wan pikja blong wan sid o wan sid we i stap gro smol. ?From wanem nao yumi nidim blong gat longfala tingting taem yumi planem ol samting we oli gro? ?Wanem bae i hapen sapos yumi traem blong pulum smol plant ia blong gro hariap? Yu save tokbaot tu wetem ol pikinini abaot wanem i minim blong gat longfala tingting wetem ol narafala man mo yumiwan. Testifae se, God i save helpem yumi blong lanem blong gat longfala tingting.

• Serem stori blong Job we oli tokbaot long Jemes 5:11 olsem wan eksampol blong gat longfala tingting (luk long “Job,” long Ol Stori long OlTesteman, o vidio we i go wetem long ChurchofJesusChrist.org). ?Olsem wanem nao Job i kasem blesing from hem i gat longfala tingting?

Tijim Doktrin: Ol Bigfala Pikinini

Jemes 1:5–6

Papa long Heven bae i helpem mi blong lanem trutok sapos mi lukaotem help blong Hem.

Ol pikinini we yu tijim oli gat hamas yia yang long Josef Smit taem hem i bin ridim Jemes 1:5 mo i bin kasem insperesen blong go mo askem Papa long Heven tru long prea. Tingting long olsem wanem yu save helpem ol pikinini bildimap fet blong olgeta se God bae i helpem olgeta taem we oli no gat waes tingting.

Samfala Aktiviti we Yu Save Mekem

• Askem ol pikinini blong talem long yu stori blong Fas Visen blong Josef Smit long toktok blong olgetawan (luk long Josef Smit—Histri 1:5–20; luk tu long vidio blong “Joseph Smith’s First Vision” long ChurchofJesusChrist.org). ?Olsem wanem nao blong stap ridim Jemes 1:5 i helpem Josef? Helpem ol pikinini blong tingting long ol narafala eksampol blong ol pipol we oli bin kasem ansa long ol prea blong olgeta, olsem Nifae, (luk long 1 Nifae 1:1–6) mo brata blong Jared long (luk long Ita 2:18–3:9). ?Wanem sam samting we yumi save askem Papa long Heven tru long prea?

• Rid wetem ol pikinini Josef Smit—Histri 1:10–14. Invaetem ol pikinini blong faenem ol samting we Josef Smit i bin mekem blong kasem ansa long ol kwestin blong hem. ?Olsem wanem nao yumi save folem eksampol blong Josef taem yumi gat ol kwestin?

Jemes 1:22–27; 2:14–26

“Fet we i no gat wok i go wetem, i samting we i ded.”

?Olsem wanem nao yu save helpem ol pikinini blong luksave koneksen bitwin wanem we oli bilivim mo wanem we oli mekem?

Samfala Aktiviti we Yu Save Mekem

• Soem long ol pikinini wan toj laet we i no gat ol batri, wan pensel we i no gat lid, o nara samting we i nomo gat yus o i “ded.” Askem ol pikinini blong ridim Jemes 2:14–17. ?Olsem wanem nao ol samting ia oli soem trutok long ol ves ia?

• Invaetem sam long ol pikinini blong ridim kwaet Jemes 1:22–27 mo ol narawan blong ridim 2:14–18. Afta invaetem olgeta blong serem wanem oli save mekem blong soem se oli man blong mekem folem toktok. Eksampol: ?olsem wanem nao oli stap obei long ol kavenan we oli mekem taem oli baptaes? ?Oli save wan we i sik, o we i stap hemwan we oli save go visitim? ?Olsem wanem nao oli save givim moa seves long ol famli blong olgeta? Yu save rimaenem olgeta long ol toktok we maet oli bin harem long sakramen miting tedei. ?Olsem wanem nao yumi save kam ol man blong mekem folem toktok?

“Ebraham i biliv long God” (Jemes 2:23). Ebraham long Ol Flat Eria blong Mamre, i kam long Grant Romney Clawson

Jemes 3:1–13

Mi save jusum blong talem ol kaen toktok.

Ol toktok we yumi talem long wanwan long yumi, bae oli no impoten samtaem, be olsem we Jemes i bin testifae, oli save gat bigfala paoa blong mekem gud mo nogud.

Samfala Aktiviti we Yu Save Mekem

• ?I gat wan long wod, o wan pikinini we yu tijim, we oli bin wok wetem ol hos o we i save wan samting abaot ol bot? Yu save invaetem hem blong givim sam niufala tingting abaot ol tijing blong Jemes long Jemes 3:3–4 abaot stap yusum ol kaen toktok. O givim sam long ol niufala tingting blong yuwan. ?Wanem nao yumi lanem abaot stap kontrolem ol tang blong yumi long ol eksampol ia?

• Invaetem ol pikinini blong ridim Jemes 3:1–13 mo dro wan pikja blong wan samting we oli bin faenem we i stap tij abaot olsem wanem blong kontrolem ol tang. Givim taem long olgeta blong serem ol pikja blong olgeta mo wanem we oli bin lanem. Singsing tugeta wan singsing abaot, yusum ol kaen toktok olsem “Let Us Oft Speak Kind Words” (Hymns, no. 232).

• Afta we yufala i luklukbak long Jemes 3:1–13 tugeta, luklukbak long ol standet blong lanwis long Blong Ol Yut Oli Kam Strong ([buklet, 2022], 12). Helpem ol pikinini blong putum wan gol mo kam antap long ol wei we oli toktok long ol narawan mo leftemap tingting blong olgeta blong askem Papa long Heven blong helpem olgeta wetem gol ia.

Stap Leftemap Tingting blong Lanem Samting long Hom

Invaetem ol pikinini blong mekem wan samting long wik ia blong praktisim wanem we oli bin lanem long klas, olsem blong prea long Papa long Heven wetem wan kwestin o traem blong gat moa longfala tingting. Askem olgeta blong serem eksperiens blong olgeta long nekis klas.

Stap Kam Antap long Fasin blong Yumi blong Stap Tij

Helpem ol pikinini blong stap aktiv. “Taem yu stap tijim ol pikinini, letem olgeta blong bildimap samting, dro, kala, raet mo krietem wan samting. Ol samting olsem oli no ol aktiviti blong pleiplei nomo be—oli impoten long fasin blong stap lanem samting” ” (Teaching in the Savior’s Way, 25).