Kraes i stap stanap wetem wan yang gel

Meresin long Gilead, i kam long Annie Henrie

30 Oktoba –5 Novemba

Hibrus 1–6

Jisas Kraes, “I Prapa Man blong Sevem Man”

?Wanem ol trutok we yu faenem long Hibrus 1–6 we i kasem insperesen long hem, blong tijim long ol pikinini? Luklukgud long ol kwaet voes blong Spirit we i kam taem yu rere mo sua blong raetemdaon olgeta.

serem pikja aekon

Invaetem Ol Pikinini blong Serem Wanem Oli Gat

Ol pikinini oli akseptem invitesen blong en blong lesen blong las wik, blong faenem wan ves long skripja we oli save serem? Sapos olsem, givim taem long olgeta blong serem. Sapos no gat, helpem olgeta blong tingting long wan samting we oli bin lanem long ol skripja i no longtaem i pas, we oli save tokbaot.

tijing pikja bokis

Tijim Doktrin: Ol Smol Pikinini

Hibrus 1:1–10; 2:8–10, 17–18

Mi biliv long Jisas Kraes.

Ol ves ia i save helpem ol pikinini blong lanem moa abaot Jisas Kraes mo mekem rilesensip wetem Hem i kam moa strong.

Samfala Aktiviti we Yu Save Mekem

• Faenem sam trutok abaot Jisas Kraes long Hibrus 1:1–10; 2:8–10, 17–18, mo raetem olgeta long ol pis blong pepa. Haedem ol pepa raon long rum, mo invaetem ol pikinini blong faenem olgeta. Helpem ol pikinini blong ridim ol trutok we oli raetem long ol pepa, mo tokbaot wanem ol trutok ia oli minim. Sapos i nid, eksplenem se oli singaotem Jisas se Pikinini blong God from se Papa long Heven i papa blong tugeta spirit mo bodi blong Hem.

• Leftemap wan pikja blong Sevya, mo serem from wanem yu tangkyu from Hem. Letem wanwan pikinini i holem pikja mo serem from wanem hem i tangkyu from Jisas Kraes.

Hibrus 3:8

Papa long Heven i wantem yumi blong “no mekem hat blong [yumi] i kam strong.

Hibrus 3 o tokbaot ol laen blong Isrel we oli mekem hat blong olgeta i kam strong mo stap sakemaot ol blesing blong Lod. Hemia i save wan woning i go long evri wan long yumi blong no mekem hat blong yumi i kam strong.

Samfala Aktiviti we Yu Save Mekem

• Karem i kam long klas, sam samting we i save pulum samting i go insaed ( olsem wan sponj o wan tawel) mo wan samting we i strong (olsem wan ston). Invaetem ol pikinini blong tajem ol samting ia mo tokbaot se oli filim olsem wanem taem oli tajem olgeta. Putum sam drop blong wota long wanwan long ol samting ia, mo poenemaot se wota i go insaed long samting we i pulum wota ia, bitim we i go insaed long ston ia. Eksplenem se, hat blong yumi i nidim blong sofsof mo no strong mekem se, yumi save akseptem ol trutok mo lav blong Papa long Heven.

• Katem wan hat sep long wan sofsof materiol, olsem wan tawel, mo wan materiol we i strong, olsem wan strong pepa. Toktok raon wetem ol pikinini abaot wanem we i defren bitwin taem yumi gat wan sofsof hat mo taem yumi gat wan strong hat. Serem sam eksampol insaed long ol skripja blong ol pipol we oli gat sofsof hat o strong hat olsem, Nifae, Leman, mo Lemyul (1 Nifae 2:16–19); Paul (Ol Wok 9:1–22); o Josef Smit (Josef Smit—Histri 1:11–20). Taem yu serem wanwan eksampol, invaetem ol pikinini blong poen i go long sofsof hat o strong hat.

Moses i stap odenem Eron

Eron, “God i bin singaotem hem” (Hibrus 5:4). Moses I Singaotem Eron long Ministri, i kam long Harry Anderson

Hibrus 5:4

Olgeta we oli gat Prishud, God i singaotem olgeta.

Hibrus 5:4 i wan impoten ves from se, i tokbaot moa klia se, ol man we oli gat prishud paoa, God i mas singaotem olgeta. I semmak long eniwan we oli singaotem hem blong givim seves long Jos blong Lod.

Samfala Aktiviti we Yu Save Mekem

• Ridim Hibrus 5:4 long ol pikinini. Askem wan we i gat prishud blong eksplenem wanem ia prishud. Hem i save serem olsem taem hem i givim seves long ol narafala man, i soem se hem i stap mekem ol diuti blong hem i hapen. Askem tu long wan sista long wod blong serem eksperiens blong hem taem we oli bin setem hem apat blong holem wan koling long Jos. Leftemap tingting blong hem blong serem olsem wanem Lod i bin blesem hem wetem paoa blong mekem koling blong hem i stap hapen.

• Helpem ol pikinini blong lanem baehat ol sentens blong namba faef toktok blong bilif. Serem testemoni blong yu se ol pipol we oli singaotem olgeta blong mekem wok blong God, oli singaotem olgeta tru long revelesen, we i kam long God.

tijing pikja bokis

Tijim Doktrin: Ol Bigfala Pikinini

Hibrus 1:1–10; 2:8–10, 17–18

Mi biliv long Jisas Kraes.

Leta blong Hibrus oli bin raetem blong mekem ol Man Hibru oli kam moa strong long fet blong olgeta long Jisas Kraes. Hem i save mekem semmak long ol pikinini we yu tijim.

Samfala Aktiviti we Yu Save Mekem

• Givim wok long wanwan pikinini blong ridim sam ves long Hibrus 1:1–10; 2:8–10, 17–18, mo askem ol pikinini blong lukaotem ol trutok abaot Jisas Kraes. Letem olgeta oli serem o raetem long bod wanem we oli stap faenem. ?Wanem bakegen we yumi save abaot Jisas Kraes? ol pikinini oli save faenem sam aedia long ol singsing olsem “Mi Save Ridima Hem I Laef” (STSP, namba 136) o “He Sent His Son” (Children’s Songbook, 34–35).

• Invaetem ol pikinini blong dro ol pikja blong olgetawan wetem papa mo mama blong olgeta. Askem olgeta blong serem wanem we oli gat long olgetawan we i semmak long papa mo mama blong olgeta. Eksplenem se taem we Hibrus 1:3 Jisas Kraes i “pikja we i soem [God] olsem wan man,” i minim se Jisas mo Papa long Heven tufala gat ol semmak kwaliti mo fasin. Toktok wetem ol pikinini abaot, olsem wanem taem yumi folem Jisas Kraes, i tekem yumi kam moa kolosap long Papa long Heven.

Hibrus 3:7–19

Blong letem Papa long Heven i lidim mo blesem yu, yumi no mas “mekem hat blong [yumi] i kam strong.”

Long Hibrus 3, stori blong ol laen blong Isrel long wael ples, oli yusum blong tijim from wanem i impoten blong no mekem hat blong yumi i kam strong. ?Olsem wanem nao yumi save yusum stori ia blong tijim ol pikinini blong yu long klas, abaot prinsipol ia?

Samfala Aktiviti we Yu Save Mekem

• Askem long ol pikinini blong tingting long ol samting we oli strong mo sofsof. (Sapos i posibol, karem sam eksampol blong soem long olgeta.) Ridim tugeta Hibrus 3:8. ? I minim wanem blong gat wan hat we strong? ?From wanem nao God i wantem yumi blong gat sofsof hat?

• Long toktok blong yuwan, serem stori blong ol laen blong Isrel we oli mekem hat blong olgeta i kam strong agensem Lod long wael ples (luk long Ol Namba 14:1–12; Hibrus 3:7–19). Letem ol pikinini blong aktem stori. ?Wanem bae i hapen sapos yumi mekem hat blong yumi i kam strong agensem Lod mo gospel blong Hem?

• Invaetem ol pikinini blong ridim Matiu 13:15; Hibrus 3:15; Mosaea 11:29; mo Moses 6:27. Askem olgeta blong droem ol pat blong bodi long bod, we oli talemaot long ol ves ia. ?I minim wanem blong gat wan sora we i no gat yusum long saed blong spirit, ae we i blaen, mo hat we i strong? ?Olsem wanem nao bae yumi meksua se ol sora blong yumi ol ae mo ol hat oli rere blong harem save voes blong Spirit?

Hibrus 5:1–4

Olgeta we oli gat Prishud, God i singaotem olgeta.

Hibrus 5 i givim wan janis blong toktok raon long wanem hem i prishud—paoa mo atoriti blong mekem samting long nem blong God—mo olsem wanem oli kasem.

Samfala Aktiviti we Yu Save Mekem

• Soem pikja blong Moses I Givim Prishud long Eron (Gospel Art Buk, namba 15) mo wan pikinini blong ridim Hibrus 5:4. Eksplenem se Aronik Prishud oli tekem nem ia long Eron. Helpem ol pikinini blong tingting long ol diuti blong olgeta we oli gat Aronik Prishud we oli save mekem (baptaes, blesem mo pasem sakramen, mo invaetem ol narawan blong kam long Kraes; luk long Doktrin mo Ol Kavenan 20:46–48, 59).

• Helpem ol pikinini blong tingting long ol defren wei we ol pipol oli kasem atoriti. Eksampol. ?Olsem wanem nao wan tija, dokta o wan lida long politik oli kasem atoriti. ?olsem wanem nao God i givim atoriti blong Hem? Invaetem ol pikinini blong tingting long ol kwestin ia, taem oli stap ridim Hibrus 5:4 mo namba faef toktok blong bilif. Helpem ol pikinini blong tingting long ol pipol long wod we oli gat atoriti we i kam long God—we i gat tu, olgeta we oli gat prishud, mo tu ol man mo ol woman we oli bin set apat blong givim seves long sam spesel koling.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini serem wan skripja, singsing o aktiviti we oli bin lanem long klas tedei, wetem ol famli blong olgeta, long taem blong famli haos naet.

Stap Kam Antap long Fasin blong Yumi blong Stap Tij

Ol pikinini oli save luksave paoa blong Spirit. Tijim ol pikinini se ol filing blong pis, lav, mo wom filing we oli filim taem oli stap tokbaot o sing abaot Jisas Kraes mo gospel blong Hem i kam long Tabu Spirit.

aktiviti pej: Mi gat wan testemoni long Jisas Kraes