“23–29 Oktoba. Fas mo Seken Timoti; Taetas; Filimon: ‘Oltaem Yu Mas Soemaot Gudfala Eksampol long Ol Kristin Man,’” Kam Folem Mi—Blong Praemeri: Niu Testeman 2023 (2021)
“23–29 Oktoba. Fas mo Seken Timoti; Taetas; Filimon,” Kam Folem Mi—Blong Praemeri: 2023
23–29 Oktoba
1 mo 2 Timoti; Taetas; Filimon
“Yu Mas Soemaot Gudfala Eksampol blong ol Kristin Man”
Pol i tijim se “olgeta tok blong Baebol oli kamaot … ol tok ya i stret gud blong tijim yumi long ol trutok” (2 Timoti 3:16). Taem yu stap stadi ol leta ia, tingting hevi long olsem wanem oli save givim insperesen long ol pikinini blong laef stret mo gud.
Invaetem Ol Pikinini blong Serem Wanem Oli Gat
Askem ol pikinini blong tokbaot wan we i wan gudfala “eksampol blong man we oli biliv” long olgeta. ?Wanem nao oli stap mekem blong stap olsem ol gudfala eksampol long ol narafala man?
Tijim Doktrin: Ol Smol Pikinini
Ol bisop oli lidim wod olsem ol wokman blong God.
Pol i bin tijim Timoti mo Taetas abaot impoten wok blong ol bisop. ?Olsem wanem nao yu save tijim ol pikinini abaot wanem ol bisop oli stap mekem? (Wan branj presiden i semmak long wan bisop.)
Samfala Aktiviti we Yu Save Mekem
-
Droem wan simpol pikja blong bisop blong yu long bod. Askem ol pikinini blong talem nem blong sam samting we oli save abaot bisop. ?Hem i olsem wanem? ?Hem i mekem wanem? ?Olsem wanem nao hem i stap blesem wod? (Yu save faenem sam fasin blong wan bisop long 1 Timoti 3:1–2 mo Taetas 1:7–9.) Taem ol pikinini oli serem ol aedia blong olgeta, raetem olgeta long ol pis blong pepa mo letem ol pikinini oli stikim olgeta long bod kolosap long droing.
-
Raetem diuti blong wan bisop long ol pis blong pepa—olsem blong stap helpem ol pikinini mo ol yut long wod, akseptem ol taeting mo ol fast ofring, givimaot ol koling, intaviu long ol memba mo helpem olgeta we oli stap long nid. Putum ol pis pepa ia long wan bolglas o kontena, mo invaetem wanwan pikinini blong pikimap wan pis pepa. Afta helpem ol pikinini blong mekem drama long ol diuti ia wetem yu. Serem testemoni blong yu se God i singaotem bisop blong yu.
-
Invaetem ol pikinini blong droem wan pikja blong bisop we i stap givim seves long ol memba blong wod. Givim tingting long olgeta se blong oli givim ol droing blong olgeta long hem blong talem tangkyu long hem. ?Wanem nao yumi save mekem blong helpem hem?
“Yu yu wan yang man nomo, be i nogud yu letem ol man oli luklukdaon long yu from samting ya. Oltaem yu mas soemaot gudfala eksampol long ol Kristin man” (1 Timoti 4:12).
Mi save stap olsem “wan gudfala eksampol long ol Kristin man.”
?Wanem nao yu save mekem blong givim insperesen long ol pikinini blong stap olsem “ol gudfala eksampol long ol Kristin man”?
Samfala Aktiviti we Yu Save Mekem
-
Singsing wan singsing wetem ol pikinini abaot “Do as I’m Doing” (Children’s Songbook, 276). Askem ol pikinini blong folem eksampol blong yu taem oli mekem ol aksen we yu stap mekem. Letem ol pikinini oli gat janis blong lidim evriwan long klas blong stap folem ol aksen blong olgeta. Ridim 1 Timoti 4:12, mo askem ol pikinini wanem nao oli save mekem blong stap ol gudfala eksampol blong ol narafala man.
-
Serem wan eksperiens taem we yu traem blong stap olsem wan gudfala eksampol long wan narafala man o taem we wan i bin wan gud eksampol long yu (maet yu save talem ol pikinini long klas blong yu tu). Invaetem ol pikinini blong stap ol gudfala eksampol long ol memba blong famli mo ol fren blong olgeta.
Ol skripja bae oli helpem mi blong lanem trutok.
Sapos yu save helpem ol pikinini blong lanem blong lavem ol skripja, ol tijing blong ol skripja bae oli blesem laef blong olgeta long ol yia we i stap kam.
Samfala Aktiviti we Yu Save Mekem
-
Soem wan set blong ol skripja, mo helpem ol pikinini blong save gud olgeta taem yu stap soem ol taetol pej blong Baebol, Buk blong Momon, Doktrin mo Ol Kavenan mo Perel we I Gat Bigfala Praes. Invaetem ol pikinini blong holem ol buk ia taem yu stap ridim 2 Timoti 3:15–17. Talem long ol pikinini from wanem yu lavem ol skripja, mo letem ol pikinini oli taem ol filing mo tingting blong olgeta.
-
Askem ol pikinini blong tokbaot ol samting we oli gat we oli gat valiu. ?Wanem nao oli stap mekem wetem? ?Oli stap tritim hemia olsem wanem? Letem olgeta wanwan oli holem mo tantanem ol pej wetem kea long ol skripja. ?Yumi stap yusum ol skripja blong mekem wanem? ?From wanem yumi mas lukaotem gud olgeta? Testifae se ol skripja ol gat ol trutok we Papa long Heven i wantem yumi blong save.
-
Helpem ol pikinini blong mekemap ol aksen we i go wetem ol singsing abaot ol skripja olsem “Search, Ponder, mo Pray” (Children’s Songbook, 109).
Tijim Doktrin: Ol Bigfala Pikinini
Mi save stap olsem “wan gudfala eksampol long ol Kristin man.”
Timoti i yang blong stap olsem wan lida blong Jos, be Pol i wantem hem blong save se hem i save stap olsem wan eksampol. Yu save givim insperesen long ol pikinini blong stap stap olsem ol gudfala eksampol blong olgeta we oli stap raonem olgeta.
Samfala Aktiviti we Yu Save Mekem
-
Ridim tugeta 1 Timoti 4:12, mo askem ol pikinini blong faenem sikis we Pol i bin talem, we yumi save stap olsem “wan gudfala eksampol blong ol Kristin man.” Serem ol pikinini long tu tu, mo invaetem olgeta blong tingting long wan situesen we oli save stap olsem wan eksampol blong ol kristin man. Askem olgeta blong mekem wan drama long situesen blong olgeta blong evriwan long klas.
-
Askem ol pikinini sapos oli wantem serem eni eksperiens taem oli traem blong stap olsem wan gudfala eksampol long ol narafala man. Talem long olgeta se, oli bin stap ol eksampol blong ol Kristin man long yu, mo olsem wanem yu bin luksave we oli stap olsem ol gudfala eksampol long ol narafalawan.
Ol samting we i no save finis, oli gat moa valiu bitim mane.
Wol i lukaotem faswan mane mo ol samting we mane i save pem. ?Olsem wanem bae yu save helpem ol pikinini blong lukluk nomo long lav we i stamba long Papa long Heven mo Jisas Kraes?
Samfala Aktiviti we Yu Save Mekem
-
Invaetem ol pikinini blong tokbaot se, wanem bae oli pem sapos oli gat evri mane long wol ia. Ridim 1 Timoti 6:7–12 wetem ol pikinini mo askem olgeta blong talem long sot toktok wanem nao Pol i bin tijim long Timoti abaot mane. Afta, invaetem ol pikinini blong ridim ol ves 11–12 bakegen, mo lukaotem ol samting we Pol i bin talemaot we oli gat moa valiu bitim mane.
-
Putumaot ol pikja blong ol samting blong wol olsem (mane, ol pleiplei doli o ol samting we i pulum tingting blong man mo ol samting we oli no save finis (olsem ol famli o ol tempol). Invaetem ol pikinini blong putumaot ol pikja long tu hip—ol samting we i tekem yumi i kam kolosap long Kraes mo ol samting we i save pulumaot tingting blong yumi long Kraes, sapos yumi lavem olgeta moa bitim we yumi lavem Hem. ?From wanem “lav blong mane … i stamba blong olgeta fasin nogud”? ?Olsem wanem taem yumi stap lukluk nomo long Jisas Kraes, i mekem yumi hapi?
Papa long Heven i givim ol skripja long yumi blong save ol trutok aot long ol rong tijing.
Taem yu stap tijim ol pikinini abaot ol skripja, lukaotem ol wei blong leftemap tingting blong olgeta blong kasem ol eksperiens we gat moa paoa, wetem God.
Samfala Aktiviti we Yu Save Mekem
-
Invaetem ol pikinini blong ridim 2 Timoti 3:15–17. Soem ol pikja we i soem wan stori long wanwan long ol fofala stamba wok, mo invaetem ol pikinini blong jusum wan pikja blong talem stori. (Yu save faenem ol pikja long Gospel Art Buk mo long Kam Folem Mi ol tul blong presentem buk.) Askem ol pikinini blong serem eni samting we oli save abaot buk blong skripja ia. Olsem wanem nao ol skripja oli “mekem [yumi] waes long fasin blong sevem man”?
-
Serem wan fevret skripja ves o wan eksperiens taem we skripja i helpem yu blong bildimap fet long Papa long Heven mo Jisas Kraes. Invaetem ol pikinini blong serem wan fevret ves o eksperiens blong olgetawan.
-
Askem wan pikinini blong ridim Moronae 10:4–5. ?Wanem nao Moronae i promesem long ves ia? Askem ol pikinini olsem wanem yumi save kasem wan testemoni se ol skripja oli tru. Invaetem olgeta blong ridim ol lisin oltaem long ol skripja mo askem God sapos oli tru.
Stap Leftemap Tingting blong Lanem Samting long Hom
Invaetem ol pikinini blong serem wetem ol famli blong olgeta wanem oli bin lanem abaot ol skripja, mo blong oli faenem wan ves long ol skripja we oli save serem wetem klas nekis wik (wetem help blong papa mo mama, sapos i gat nid).
Stap Kam Antap long Fasin blong Yumi blong Stap Tij
Stretem ol aktiviti folem ol nid we i stap. I no minim se bae yu mas luk ol aotlaen ia olsem ol instraksen we yu mas folem taem yu tij, be yusum olgeta olsem wan ples we i save givim laet long insperesen blong yuwan taem yu stap tingting hevi long ol nid blong ol pikinini we yu stap tijim. Yu save stretem ol aktiviti blong tijim ol pikinini nomata yia blong olgeta.