Sevya we i laef bakegen long ded, i visitim Pol long kalabus (luk long Ol Wok 23:11). Jisas Kraes i save mekem yumi kam fri long fasin blong “kam slef bakegen” (Galesia 5:1).

25 Septemba–1 Oktoba

Galesia

Wokbaot Folem Spirit

Taem yu ridim Galesia, ?wanem ol filing mo tingting i kam long yu, abaot wanem nao ol pikinini long klas blong yu oli nidim blong lanem?

Invaetem Ol Pikinini blong Serem Wanem Oli Gat

Givim smol taem long ol pikinini blong droem wan samting we oli bin lanem aot long wan toktok storian abaot gospel we i pas i no longtaem, long hom o long jos. Letem ol pikinini oli serem wanem wanwan long ol pikja ia i ripresentem.

Tijim Doktrin: Ol Smol Pikinini

Galesia 5:22–23

Tabu Spirit i helpem mi blong mi filim lav, glad, mo pis.

Ol yangfala pikinini oli save luksave frut blong Spirit. Hemia bae i mekem oli rere blong lukaotem paoa blong Tabu Spirit truaot long laef blong olgeta.

Samfala Aktiviti we Yu Save Mekem

• Hangem o soem pikja blong sam frut, mo askem ol pikinini blong tokbaot se tes blong wanwan frut ia i olsem wanem. Eksplenem se, semmak olsem we ol frut oli gat defdefren tes, yumi save filim Tabu Spirit long ol defdefren wei olsem, lav mo pis. Tokbaot sam wei we yu bin filim Tabu Spirit long laef blong yu, mo letem ol pikinini blong serem olsem wanem olgeta oli stap filim Tabu Spirit.

Evri pikinini, i nomata wanem yia oli gat, oli save eksperiensem “frut blong Spirit.”

• Ridim Galesia 5:22–23 wetem ol pikinini, mo eksplenem ol toktok we maet oli no bin save. Invaetem wanwan pikinini blong jusum wan frut blong Spirit we oli talemaot long ol ves ia, mo helpem olgeta blong tingting long wan taem we oli bin eksperiensem. Invaetem ol pikinini blong dro ol simpol pikja blong eksperiens ia.

Galesia 6:2

Jisas Kraes i wantem mi blong helpem olgeta we oli stap long nid.

Instraksen long Galesia 6:2 i semmak long tijing blong Alma long Mosaea 18:8 we i go long ol pipol we oli stap rere blong kasem baptaes. Tekem janis ia blong helpem ol pikinini blong rere from ol kavenan we bae oli mekem long taem blong baptaes.

Samfala Aktiviti we Yu Save Mekem

• Soem wan pikja blong wan pikinini we i stap kasem baptaes (olsem Gospel Art Buk, namba 104). Askem ol pikinini, wanem nao pikinini ia i stap mekem. Eksplenem se taem yumi kasem baptaes, yumi mekem ol kavenan o ol promes. Ridim Galesia 6:2 o Mosaea 18:8 blong helpem ol pikinini lanem wan long ol samting, yumi promesem blong stap mekem: givgivhan long ol trabol blong yumi wanwan. Invaetem ol pikinini blong dro ol wei we oli save helpem ol narafala man we oli stap karem ol hevi samting.

• Ridim sentens ia long ol pikinini, long Galesia 6:2: “Yufala i mas stap givgivhan long yufala long ol trabol blong yufala.” Blong soemaot wanem hemia i minim, givim wan hevi samting long ol pikinini blong karem. Afta, askem wan volontia blong kam helpem pikinini ia blong karem samting we i hevi ia. Eksplenem long ol pikinini se, plante samting, oli save kam ol hevi samting olsem, taem wan i sik o stap filim nogud o stap hemwan nomo. ?Wanem nao yumi save mekem blong helpem wan man o woman we i gat wan hevi samting olsem?

Galesia 6:7–9

Tugeta ol aksen blong yumi we oli gud o nogud, i gat ol risal blong olgeta.

Taem yu stap tijim se, yumi kakae wanem we yumi planem, olsem we oli eksplenem long Galesia 6:7–9, yu save tijim ol pikinini blong tingting long ol risal blong ol aksen blong olgeta.

Samfala Aktiviti we Yu Save Mekem

• Soem wan sid o wan vejetebol. Ridim Galesia 6:7–9 long ol pikinini. Askem ol pikinini blong mekem olsem se oli stap planem wan sid, taem oli harem toktok ia planem. Askem olgeta blong mekem olsem se oli stap karem wan vejetebol aot long wan plant taem oli harem toktok ia kakae.

• Soem sam kaen vejetebol, mo helpem olgeta blong faenem ol sid insaed long wanwan. Putum ol sid long wan kontena, mo givim janis long wanwan pikinini blong stap jusum wan mo stap talem wanem vejetebol nao bae i gro sapos oli planem sid ia. Helpem olgeta luk se, semmak olsem ol sid we yumi planem, i talem wanem vejetebol nao bae yumi kasem, ol joes we yumi mekem bae oli talemaot ol risal mo ol blesing we, long en, bae yumi kasem.

• Mekem wan laen long floa wetem skoj. Putum wan hapi fes mo wan fes we i harem nogud long wan en mo narawan long narafala en blong skoj ia long floa. Invaetem wan pikinini blong stanap long medel blong laen, mo helpem ol narafala pikinini blong tingting long ol joes we bae i lidim hem i go long hapines o harem nogud. Long evri joes, askem pikinini ia long medel blong stap wokbaot i go long hapi saed o saed we blong harem nogud. Ripitim aktiviti ia plante taem mo invaetem ol pikinini blong gat janis blong stanap long medel blong skoj.

Tijim Doktrin: Ol Bigfala Pikinini

Galesia 3:26–28

Taem yumi kasem baptaes i mekem yumi stap “wan long Kraes.”

Pol i bin tijim Ol Sent blong Galesia se, taem we oli kasem baptaes, bae oli kam “wan long Kraes.” ?Olsem wanem nao yu save helpem ol pikinini blong traehad from yuniti we oli tokbaot long Galesia 3:26–28?

Samfala Aktiviti we Yu Save Mekem

• Invaetem ol pikinini blong ridim Galesia 3:26–28 wetem kwestin ia long maen blong olgeta: ?Wanem i hapen taem mi kasem baptaes? Maet bae yu wantem lukluk nomo long ol sentens olsem “putum Kraes” o “wan long Kraes.” ?Wanem nao ol sentens ia oli minim? ?Olsem taem yumi “stap putum long Kraes” i semmak long, stap tekem nem blong Hem long yumiwan? (Luk long Doktrin mo Ol Kavenan 20:75–79). ?Wanem nao yumi save mekem blong soem se yumi bin tekem nem blong Hem long yumi wanwan?

• Ridim tugeta Galesia 3:28, mo talemaot sam wei we ol pipol oli luksave long olgetawan taem oli kasem baptaes, long taem blong Pol. Helpem ol pikinini blong talem sam wei we oli save talemaot huia olgeta tedei. ?Wanem nao Pol i stap traem blong talem long yumi abaot, olsem wanem yumi mas tritim yumi wanwan taem yumi kasem baptaes.

Galesia 5:16, 22–23

Sapos mi “wokbaot folem Spirit,” bae mi kasem “frut blong Spirit.”

Taem yumi baptaes, mo yumi kasem presen we i Tabu Spirit, yumi save kasem frut blong Spirit moa long laef blong yumi. ?Olsem wanem nao bae yu helpem ol pikinini blong luksave frut ia long laef blong olgeta?

Samfala Aktiviti we Yu Save Mekem

• Givim wanwan pepa long ol pikinini (yu save katem ol sep blong ol frut long ol pepa), mo askem ol pikinini blong faenem wan “frut blong Spirit” we oli listim long Galesia 5:22–23. Invaetem olgeta blong raetem wan long ol frut ia long wan saed blong pepa blong olgeta, mo wan toktok we i stap minim oposit long narafala saed blong pepa. (Helpem olgeta blong andastanem ol toktok we oli no save gud.) Invaetem olgeta blong serem ol frut blong olgeta wetem evriwan long klas. ?Wanem nao yumi save mekem blong gat Tabu Spirit i stap oltaem wetem yumi?

• Invaetem ol pikinini blong rid abaot frut blong Spirit long Galesia 5:22–23 mo raetemdaon o dro wan pikja blong wan taem we oli bin filim frut blong Spirit ia. Askem olgeta blong serem stori o pikja blong olgeta wetem wan narawan long klas. ?From wanem frut i wan gudfala wei blong helpem yumi blong andastanem olsem wanem paoa blong Spirit i wok long yumi?

Galesia 6:7–9

Tugeta ol aksen blong yumi we oli gud o nogud, i gat ol risal blong olgeta.

Helpem ol pikinini andastanem se, ol risal blong ol fasin blong yumi, samtaem oli kam hariap, samtaem oli kam long “stret taem blong [olgeta]” (ves 9).

Samfala Aktiviti we Yu Save Mekem

• Ridim tugeta Galesia 6:7–9. Mekem wan lis blong ol aksen (o ol sid we yumi “planem”) mo ol risal (o frut we yumi “kakae”). Askem ol pikinini blong majem ol aksen i go wetem ol risal blong olgeta.

• Invaetem ol pikinini blong mekem sam lis blong ol blesing we oli hop blong kasem long Papa long Heven. Helpem olgeta blong tingting long ol “sid” we oli mas planem mekem se oli save “kasem” ol blesing ia.

Stap Leftemap Tingting blong Lanem Samting long Hom

Helpem ol pikinini blong oli lukaotem ol trutok we oli bin lanem tedei, oli save yusum long evri dei laef blong olgeta. Eksampol, yu save invaetem olgeta blong lukaotem ol gudgudfala risal o “frut,” we i kam from ol gudfala desisen we oli mekem.

Kam Antap long Fasin blong Yumi blong Stap Tij

Stretem ol aktiviti blong oli fit wetem yia blong ol pikinini. Givim janis long ol pikinini blong tekpat, be tingbaot se paoa blong olgeta blong mekem samting i jenis folem yia mo tingting blong olgeta. Ol smol pikinini bae oli nidim blong oli helpem mo lidim mo daerektem olgeta. Taem oli kam bigwan moa, oli save tekpat moa, mo oli save kam gud moa blong serem ol tingting blong olgeta. (Luk long Teaching in the Savior’s Way, 25–26.)