“9–15 Oktoba. Filipae; Kolosi: ‘Mi Save Mekem Evri Samting long Paoa blong Kraes Ya we I Stap Mekem Mi Mi Strong,’” Kam Folem Mi—Blong Praemeri: Niu Testeman 2023 (2022)
“9–15 Oktoba. Filipae; Kolosi,” Kam Folem Mi—Blong Praemeri: 2023
9–15 Oktoba
Filipae; Kolosi
“Mi Save Mekem Evri Samting long Paoa blong Kraes Ya we I Stap Mekem Mi Mi Strong”
Ridim Filipae mo Kolosi, mo stap tingting long ol pikinini we yu tijim. Lukaotem insperesen abaot olsem wanem blong tijim olgeta long ol prinsipol long leta ia.
Invaetem Ol Pikinini blong Serem Wanem Oli Gat
Askem ol pikinini long wanem oli bin mekem long wik we i pas ia blong praktisim wan samting we oli bin lanem long lesen blong las wik. Eksampol, ?olsem wanem nao oli go givhan long wan we i nidim wan fren?
Tijim Doktrin: Ol Smol Pikinini
Ol lida blong jos oli lavem mo prea from mi.
Oltaem Pol i statem ol leta blong hem, taem hem i stap talem filing mo tingting blong hem long ol memba blong Jos, mo stap talem long olgeta se hem i stap prea from olgeta. Tingting long olsem wanem yu save helpem ol pikinini blong andastanem se ol lida blong Jos oli lavem olgeta.
Samfala Aktiviti we Yu Save Mekem
-
Ridim laod Filipae 1:3–4 mo Kolosi 1:3, 9 mo askem ol pikinini blong foldem han blong olgeta mo benem hed i go daon, evri taem, taem oli harem ol toktok ia pray(prea), praying(stap prea), mo prayer(prea). Eksplenem se Aposol Pol i prea from ol memba blong Jos, semmak olsem we ol lida blong Jos tedei oli stap prea from yumi.
-
Soem wan pikja blong Jisas Kraes mo ridim sam skripja ves we i tokbaot Hem we i stap prea from wan man (eksampol, Luk 22:32; 3 Nifae 19:21, 23). ?Wanem nao Jisas i askem taem Hem i prea from ol narafala man?
-
Helpem ol pikinini blong talem nem blong sam lida blong Jos olsem, presiden blong Praemeri, bisop mo Presiden blong Jos. Eksplenem se ol lida ia oli askem Papa long Heven blong blesem ol pikinini mo helpem olgeta blong laef long wan stret mo gud laef. Tingting blong talem long ol pikinini wanem yu talem taem yu prea from olgeta.
Mi save glad long Lod.
Pol i leftemap tingting blong ol Sent blong stap glad—iven taem we oli fesem ol taem we i had tumas mo Pol we hemwan i bin stap long kalabus. ?Olsem wanem nao bae yu helpem ol pikinini blong oli luk se blong stap folem Jisas Kraes i givim glad?
Samfala Aktiviti we Yu Save Mekem
-
Askem ol pikinini blong lisin long ol toktok we oli ripriptim, taem yu stap ridim Filipae 4:4. Askem ol pikinini blong soem long yu wanem oli mekem taem oli stap glad. Talem long ol pikinini from wanem yu stap“glad long Lod”—from wanem yu filim glad long Jisas Kraes. Letem ol pikinini oli serem olsem wanem oli filim abaot Jisas.
-
Soem ol samting o pikja we oli ripresentem ol samting we i helpem yu “oltaem yufala i mas glad” (Filipae 4:4), olsem, Kriesen blong Hem, wan tempol., taem Hem we i Laef Bakegen long Ded, o wan famli. Letem wanwan pikinini i gat janis blong jusum wan pikja o wan samting, mo afta, talem long olgeta from wanem nao samting ia i mekem olgeta oli hapi. Invaetem ol pikinini blong serem ol samting we i helpem olgeta blong stap glad long Lod.
-
Tugeta ridim, Filipae 4:8 mo helpem ol pikinini blong tingting long ol samting we i go stret wetem hemia long ves (luk tu long Ol Toktok blong Bilif 1:13). Invaetem ol pikinini blong dro ol pikja blong ol samting ia.
Fet blong mi i mas “hang strong” long Jisas Kraes.
Sapos ol pikinini oli bildimap laef mo fet blong olgeta long Sevya, bae oli save stanap strong agensem ol strong win blong laef.
Samfala Aktiviti we Yu Save Mekem
-
Soem wan pikja blong wan tri long aotlaen blong wik ia long Kam Folem Mi—Blong Wanwan Man, Woman, mo Famli taem bae yu stap ridim ol ki toktok long Kolosi 1:23; 2:6–7 (o soem vidio blong “Spiritual Whirlwinds” long ChurchofJesusChrist.org). ?Wanem bae i hapen long wan tri ia sapos wan strong win i kam mo tri ia i no gat strong rus? Askem ol pikinini blong stanap mo mekem olsem se oli ol tri, we oli gat ol rus we i wik long wan strong win mo afta wan tri we i gat ol strong rus. Testifae se fet long Sevya i save helpem yumi blong stap olsem wan tri we i gat ol strong rus. Afta yumi save stanap strong agensem “ol strong win,” olsem ol temtesen mo ol hadtaem.
-
Invaetem wan pikinini blong droem wan tri long bod. Askem ol pikinini blong talem nem blong sam samting we oli save mekem blong “hang strong” long Jisas Kraes. Evri taem we wan pikinini bae i talem nem blong wan samting, invaetem hem blong ademap wan rus i go long droing.
Tijim Doktrin: Ol Bigfala Pikinini
Sapos mi gat fet long Jisas Kraes, mi save stap hapi nomata long ol hadtaem.
Pol i safa tru long plante hadtaem, be hem i stap hapi from se hem i gat fet long Jisas Kraes.
Samfala Aktiviti we Yu Save Mekem
-
Askem ol pikinini blong pikjarem long maen blong olgeta se oli stap insaed long kalabus, semmak olsem Aposol Pol, taem we hem i bin raetem Leta blong Ol Man Filipae. Ridim Filipae 4:4–13 wetem ol pikinini, mo askem olgeta blong lukaotem ol toktok ia “glad,” “pis,” mo “ stap gud nomo.” ?From wanem Pol i save stap glad mo filim pis long kalabus? Afta, askem ol pikinini blong faenem ol toktok olsem “Lod,” “God,” mo “Kraes” long ol ves ia. Helpem olgeta blong andastanem se fet blong Pol long Jisas Kraes i mekem i posibol blong hem i sap glad.
-
Invaetem ol pikinini blong helpem yu komplitim ol sentens ia: “Mi save stap long wan dak ples, be yet, mi save lukluk ol samting . Mi save stap aotsaed long wan dei we i hot , be yet,mi save filim kolkol sapos mi gat wan . Mi save gat ol hadtaem, be yet, mi save faenem glad sapos mi .” ?Wanem nao Filipae 4:4–13 i tokbaot se yumi save mekem blong faenem glad? Invaetem ol pikinini blong serem sam hym o skripja abaot Jisas, we i save helpem olgeta blong filim glad long taem blong ol hadtaem.
Mi save “tingting long” ol samting we oli tru, ones, mo klin.
Plante taem, ol pikinini oli save luk ol samting we oli ivel o no klin. Yu save helpem olgeta blong lukaotem ol samting we oli save leftemap tingting mo we oli gud.
Samfala Aktiviti we Yu Save Mekem
-
Askem wan pikinini blong ridim laod Filipae 4:8 mo ol narawan oli lukaotem ol toktok long Ol Toktok blong Bilif 1:13 we oli semmak o kolosap i semmak. Invaetem wan blong raetem ol toktok ia long bod. Askem ol pikinini wanem ol toktok ia oli minim, mo helpem olgeta blong givim ol mining blong olgeta sapos i gat nid. ?From wanem yumi mas “tingting long” ol samting ia? ?Olsem wanem nao yumi save “lukaotem” ol samting ia?
-
Askem ol pikinini blong talem nem blong ol samting we oli go stret wetem ol samting we oli stap long Filipae 4:8. Invaetem olgeta blong holem wan lis blong wik ia blong eni samting we oli luksave we i stret wetem wanem we oli stap tokbaot ia. Leftemap tingting blong olgeta blong tekem lis blong olgeta i kam long Praemeri nekis wik mo serem wanem we oli bin faenem.
Fet blong mi i mas “hang strong” long Jisas Kraes.
Setan i traem blong mekem fet blong yumi i kam wik tru ol temtesen mo ol giaman doktrin. ?Olsem wanem nao yu save givim insperesen long ol pikinini blong mekem fet blong olgeta i kam moa strong long Sevya mekem se oli “no muv longwe aot long gospel”? (Kolosi 1:23).
Samfala Aktiviti we Yu Save Mekem
-
Invaetem ol pikinini blong droem ol pikja we i ripresentem ol trutok we oli faenem long Kolosi 1:23; 2:6–7. Letem olgeta oli serem ol pikja blong olgeta wetem klas mo eksplenem ol trutok we oli pikja blong olgeta i ripresentem.
-
Soem vidio blong “Spiritual Whirlwinds.” ?Wanem sam temtesen mo ol giaman doktrin long wol tedei we i save mekem fet blong yumi i kam wik? Leftemap tingting blong ol pikinini blong raetemdaon wan samting, we oli save mekem blong oli save “hang strong” (Kolosi 2:7) long Jisas Kraes. Askem olgeta blong hangem o putum long wan ples we oli save luk long hem evri dei.
Stap Leftemap Tingting blong Lanem Samting long Hom
Invaetem ol pikinini blong serem wetem ol famli blong olgeta wanem oli lanem abaot Jisas Kraes. Oli save yusum aktiviti pej blong wik ia o wan skripja we oli bin ridim long taem blong klas tedei.
Kam Antap long Fasin blong Yumi blong Stap Tij
Ol pikinini oli wantem save evri samting mo lanem samting tru ol niu mo ol defdefren eksperiens. Yusum ol aktiviti we bae i helpem olgeta blong muv olbaot, yusum evri sens blong olgeta, lukluk raon mo traem ol niufala samting. Ol tingting long “Lukluk long Ol Nid blong Ol Yangfala Pikinini” long stat blong lesenbuk ia. (Luk tu long Teaching in the Savior’s Way, 25–26.)