9–15 Oktoba

Filipae; Kolosi

“Mi Save Mekem Evri Samting long Paoa blong Kraes Ya we I Stap Mekem Mi Mi Strong”

?Wetaem nao las taem we yu bin ridim ol filing mo ol tingting we yu bin stap kasem, mo yu bin raetemdaon long taem we yu bin stap stadi long Niu Testeman? Bae i save help blong luklukbak long ol kwaet toktok blong Spirit we Hem i bin talem long yu.

Raetemdaon Ol Filing mo Tingting blong Yu

Pol i bin raetem ol leta blong hem i go long Ol Man Filipae mo Kolosi taem hem i bin stap long kalabus long Rom. Be ol leta ia, saon blong hem i no olsem wanem wan i wantem harem long wan we i stap long kalabus. Pol i toktok plante abaot glad, stap glad, mo talem tangkyu, bitim we hem i tokbaot ol hadtaem mo ol tes; hem i talem se: “be oli stap talemaot Kraes, mo samting ya i stap mekem mi mi glad. Mo bambae mi save stap glad yet” (Filipae 1:18). Mo “maet mi mi stap longwe long yufala, be tingting blong mi i joen finis long yufala. Mo mi mi glad tumas from we mi stap luk we … yufala i stap bilif strong long Kraes (Kolosi 2:5). I tru, “pis blong God” we Pol i bin gotru long hem long hadtaem blong hem, “i bitim save blong yumi” (Filipae 4:7), be i wan samting we i tru. Long taem yumi stap fesem ol tes, yumi save filim semfala pis ia mo “oltaem yumi mas glad” (Filipae 4:4). Yumi tu, olsem Pol i mekem, yumi save dipen fulwan long Jisas Kraes, “we i tekemaot ol sin blong yumi” (Kolosi 1:14). Yumi save talem, olsem we Pol i bin talem: “Mi save mekem evri samting long paoa blong Kraes ya we i stap mekem mi mi strong” (Filipae 4:13; luk tu long Kolosi 1:11).

Sam Aedia blong Skripja Stadi blong Yuwan

Filipae 2:5–11; Kolosi 1:12–23

Bilif blong mi, i stanap long Jisas Kraes.

Presiden Russell M. Nelson i bin talem se taem hem i bin mekem skripja stadi blong hem i lukluk nomo long Jisas Kraes, i tajem hem bigwan mekem se hem i filim se hem i kam wan “defren man.” (“Pulum Paoa blong Jisas Kraes Insaed long Laef blong Yumi,” Jeneral Konfrens, Epril 2017, ChurchofJesusChrist.org/general-conference/conferences?lang=bis). Tingting blong stap folem eksampol blong Hem taem yu stap ridim Filipae and Kolosi (luk speseli long Filipae 2:5–11; Kolosi 1:12–23). ?Wanem nao yu lanem abaot Sevya? ?Olsem wanem nao ol trutok ia oli stap helpem yu blong kam wan “defren man” o woman?

Filipae 2:12–13

“Yumi, yumi wokemaot hao bae yumi sevem yumiwan bakegen?

Sam pipol oli yusum toktok ia “finisim wok ya we hem i stap mekem blong sevem yufalawan” (Filipae 2:12) blong sapotem aedia ia se, ol hadwok blong yumi nomo bae oli sevem yumi. Ol narawan oli yusum tijing blong Pol, “God i givhan long yufala long gladhat blong hem, i sevem yufala, from we yufala i bilif long Kraes” (Efesas 2:8)blong talem se, i no nid blong mekem eni wok blong Kraes i sevem yumi. Be, ol skripja, wetem ol raeting blong Pol, oli tijim klia long yumi se yumi nidim tugeta, gladhat blong Jisas Kraes, mo hadwok blong yuwan blong save mekem se Kraes i sevem yumi. Mo iven long ol bes hadwok blong yumi blong sevem yumi, God nao i stap wok insaed long yu (Filipae 2:13; luk tu long Filipae 1:6; 2 Nifae 25:23; Gaed long Ol Skripja, “Gladhat”).

Filipae 3:4–14

Gospel blong Jisas Kraes, hem i gud inaf blong yumi mekem eni sakrifaes from.

Pol i bin lego plante samting taem hem i bin jenisim laef blong hem i kam long gospel blong Jisas Kraes, wetem paoa we hem i bin holem long sosaeti blong Ol Jiu, olsem wan Farisi. Long Filipae 3:4–14, lukaotem wanem nao Pol i winim from se hem i bin glad blong mekem ol sakrifaes from gospel ia. ?Olsem wanem nao hem i filim abaot ol sakrifaes ia blong hem?

Afta, lukluk long fasin blong yu olsem wan disaepol? ?Wanem nao yu sakrifaes long hem from gospel blong Jisas Kraes? ?Wanem nao yu bin kasem? ?I gat eni moa sakrifaes we yu filim se yu nidim blong mekem blong kam wan disaepol blong Sevya we i givim moa tingting?

Luk tu long 3 Nifae 9:19–20; Doktrin mo Ol Kavenan 58:2–5; Taylor G. Godoy, “Wan Moa Dei,” Liahona, Mei 2018, 34–36.

Filipae 4:1–13

Mi save faenem glad long Kraes, i nomata long ol situesen blong mi.

Laef blong Pol i wan tru pikja blong trutok ia we Presiden Russell M. Nelson i tokbaot: “Taem we, long laef blong yumi, yumi stap lukluk nomo long Jisas Kraes mo gospel blong Hem, yumi save filim glad nomata wantem i stap hapen—o i no stap hapen—long laef blong yumi. Glad i kam long Hem mo from Hem.” (“Glad mo Traehad blong Laef long Saed blong Spirit,” Jeneral Konfrens, Oktoba 2016, ChurchofJesusChrist.org/general-conference/conferences?lang=bis).

Taem yus tap ridim Filipae—speseli japta 4—lukaotem insaed, ol toktok we oli save helpem yu blong faenem glad ia long eni situesen blong laef blong yu. ?wetaem nao yu go tru long eksperiens ia blong gat “pis blong God” long taem blong wan taem we yu gat jalenj? (ves 7). ?Wetaem nao yu yu bin faenem paoa “tru long Kraes” blong mekem ol samting we oli had? (ves 13). ?From wanem yu yu ting se hem i impoten blong stap glad long evri situesen? (ves 11). ?Olsem wanem nao, taem yu stap praktisim ol kwaliti fasin we oli stap long ves 8, i helpem yu blong faenem glad long ol situesen blong yu?

Luk long Alma 33:23; Dieter F. Uchtdorf, “Talem Tangkyu long Eni Situesen,” Jeneral Konfrens, Epril 2014, ChurchofJesusChrist.org/general-conference/conferences?lang=bis.

Kolosi 3:1–17

Ol disaepol blong Jisas Kraes oli kam “niu” taem oli bin stap laef folem gospel blong Hem.

?Olsem wanem nao yu save talem se Jisas Kraes i bin helpem yu blong kam wan “niu man” o woman? Wan wei blong tingting hevi long hemia, hem i blong luklukgud insaed long Kolosi 3:1–17 mo mekem wan lis blong ol fasin, ol kwaliti fasin, mo ol aksen blong “olfala man” mo wan nara lis blong ol fasin, ol kwaliti fasin, mo aksen blong “niu man.”

Raetemdaon ol tingting blong yu long saed blong wei we Sevya i stap jenisim yu, blong mekem se yu yu save luklukbak long olgeta long fiuja, mo tingting hevi long wei we yu stap progres.

Ol Aedia blong Famli Skripja Stadi mo Haos Naet

Filipae.Famli blong yu i save teknot long ol toktok ia, glad o stap glad we oli ripitim plante taem long Filipae. Evri taem we yu yu krosem wan long ol toktok ia, yu save stop mo toktok raon long wanem Pol i tijim abaot wei blong faenem glad.

Filipae 2:14–16.?Olsem wanem nao yumi save saen olsem ol laet long wol ia?

Filipae 4:8.Ol memba blong famli oli save faenem ol samting blong stap tingting long hem we i go stret wetem wanem i stap long ves ia (luk tu long Ol Toktok blong Bilif 1:13). ?Olsem wanem nao famli blong yu bae i gat blesing taem i stap folem kaonsel blong Pol?

Kolosi 1:23; 2:7.Maet bae famli blong yu i save ridim ol ves ia taem oli stap sidaon raon long wan tri, o stap lukluk long wan pikja blong wan tri (olsem wan we i stap long aotlaen ia). ?Hem i minim wanem blong gat rus long Kraes? ?Olsem wanem nao yumi save helpem wanwan long yumi blong mekem ol rus long saed blong spirit oli kam strong moa?

Kolosi 2:2–3.Maet famli blong yu i save fulumap wan “bokis blong ol rij samting” mo putum insaed wanem i ripresentem “ol rij samting” mo “ol rij waes mo save” we yu faenem insaed long gospel.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Rejoice, the Lord Is King!,” Hymns, namba 66.

Stap Kam Antap long Fasin blong Yumi blong Stap Tij

Laef folem testemoni blong yu. “Yu stap tijim huia yu,” Elda Neal A. Maxwell i tijim. “Bae man i tingbaot moa ol fasin blong yu bitim wan trutok insaed long wan spesel lesen” (long Teaching in the Savior’s Way, 13).

Pol i bin tijim se fet blong yumi i mas gat rus blong hem i stap long Jisas Kraes (Kolosi 2:7).